Mars avek Bondye e rekolte sa ki bon
Mars avek Bondye e rekolte sa ki bon
“Zot pe kontinyen senm divan, zot pou rekolte tanpet divan.”—OSEA 8:7.
1. Ki mannyer nou kapab mars avek Zeova?
SI NOU ti pe vizit en landrwa danzere, pa nou ti pou pli an sekirite avek en gid ki annan bokou leksperyans? I pou saz mars avek sa gid olye fer nou prop semen. Dan en fason, sa i montre sitiasyon ki nou ladan. Dan en sans, Zeova in ofer pour gid nou dan sa lemonn mesan, ki parey en gran dezer. Nou montre ki nou saz kan nou mars avek li olye esey diriz nou prop lepa. Ki mannyer nou kapab mars avek Bondye? Par swiv sa gidans ki i donnen dan son Parol.
2. Ki nou pou diskite dan sa lartik?
2 Sa lartik avan ti diskit sa zistwar senbolik ki trouve dan Osea sapit 1 ziska 5. Parey nou’n vwar, sa zistwar i fer resorti serten leson ki kapab ed nou mars avek Bondye. Aprezan annou diskit serten pwen enteresan dan sapit 6 ziska 9. I pou byen si nou konmans avek en apersi lo sa kat sapit.
En pti Apersi
3. Rakont an bref sa ki annan dan Osea sapit 6 ziska 9.
3 Zeova ti anvoy Osea pour profetiz prensipalman avek sa dis tribi rwayonm nor Izrael. Sa nasyon, osi koni konman Efraim, dapre son tribi pli renonmen, ti’n rezet Zeova. Dan Osea sapit 6 ziska 9, nou aprann ki sa nasyon ti montre li enfidel par kas lalyans Zeova e pratik sa ki mal. (Osea 6:7) Zot ti’n met konfyans dan bann nasyon pour ganny led olye retourn kot Zeova. Vi ki zot ti pe kontinyen senm sa ki move, zot ti pou rekolte sa ki move—andotmo, zot zizman ti pe aprose! Parkont, Osea ti pe osi anons en mesaz pozitif e rekonfortan. Sa profet ti asir bann dimoun ki zot ti kapab retourn ver Zeova e i a pran pitye pour zot, si zot montre ki zot senserman repantir.
4. Ki leson pratik dan profesi Osea nou pou egzaminen?
4 Dan sa kat sapit profesi Osea, nou kapab ganny plis gidans ki pou ed nou mars avek Bondye. Annou vwar kat leson pratik: (1) Vre repantans i ganny demontre par aksyon, pa zis par parol; (2) zis sakrifis tousel pa fer plezir Bondye; (3) Zeova i soufer kan son bann adorater i abandonn li; e (4) pour rekolte sa ki bon, nou bezwen senm sa ki bon.
Ki mannyer montre vre Repantans
5. Mansyonn laspe pli enportan sa ki ganny dir dan Osea 6:1-3.
5 Profesi Osea i ansenny nou bokou lo repantans ek mizerikord. Dan Osea 6:1-3 nou lir: “Vini lepep. Annou retourn ver Zeova, parski i’n desir nou me i ava geri nou. I’n tap nou san arete me i ava pans nou. Dan de zour i pou donn nou lavi. Trwazyenm zour i pou fer nou leve, e nou pou viv devan li. Nou pou konnen, nou pou rod konnesans lo Zeova. Zis parey granmaten pou fer, sirman i pou sorti. I pou vin kot nou parey en lapli toransyel; parey en lapli prentan ki aroz later.”
6-8. Kwa ki ti mal avek repantans Izrael?
6 Lekel ki pe koze dan sa bann verse? Serten i dir ki bann Izraelit enfidel ki pe koze e zot pe fer krwar zot repantir pour Bondye pran pitye pour zot. Me lezot i dir ki profet Osea ki ti pe koze, i ti pe sipliy sa nasyon pour retourn ver Zeova. Toudmenm, kestyon enportan ki nou pou demande se, Eski bann dimoun an zeneral dan sa dis tribi rwayonm Izrael ti retourn ver Zeova, e montre vre repantans? Larepons i non. Zeova i dir atraver Osea: “Ki mon pou fer avek ou Efraim? Ki mon pou fer avek ou Zida, zot ki zot labonte leker i parey nyaz bomaten e parey laroze ki en pti kou i disparet?” (Osea 6:4) Sa i vreman montre kondisyon deplorab spirityalite pep Bondye! Labonte leker oubyen lanmour fidel ti’n preski disparet—parey laroze dan bomaten ki disparet osito ki soley i leve. Kantmenm bann dimoun ti aparaman fer krwar zot repantir, Zeova pa ti vwar okenn rezon pour pran pitye pour zot. Ki ti zot problenm?
7 Nasyon Izrael pa ti vreman repantir avek tou son leker. Osea 7:14 i dir sa konsernan mekontantman Zeova avek Son pep: “Zot pa’n apel mwan pour led avek tou zot leker, kantmenm zot ti kontinyen irle lo zot lili.” Verse 16 i azoute: “Zot ti konmans retournen, me pa anver okenn keksoz pli siperyer,” savedir, “zot pa ti fer okenn form ladorasyon pli siperyer.” (not anba lo paz) Zot pa ti pare pour retourn ver ladorasyon Zeova ki ti pli siperyer, par fer bann sanzman neseser pour aranz zot relasyon avek li. Wi, zot pa ti vreman anvi mars avek Bondye.
8 Ti annan en lot problenm avek repantans Izrael. Zot ti ankor pe pratik pese. Anfet, zot ti pe fer en kantite pese enkli frod, mert, vole, ladorasyon zidol, e form bann lalyans initil avek lezot nasyon. Dan Osea 7:4, sa pep i ganny konpare avek en four, san dout akoz sa bann move dezir ki ti pe brile dan zot. Kan nou get sa kondisyon spirityel deplorab ki zot ti ladan, eski zot ti merit mizerikord Zeova? Ditou! Osea i dir sa pep rebel ki Zeova pou “mazin zot fot” e i pa pou inyor zot pese. (Osea 9:9) Napa pardon pour zot!
9. Ki nou aprann atraver parol Osea konsernan repantans ek mizerikord?
9 Ki nou aprann konsernan repantans ek mizerikord, ler nou lir parol Osea? Legzanp bann Izraelit enfidel i fer nou vwar ki nou bezwen demontre vre repantans pour Zeova montre mizerikord. Ki mannyer nou kapab demontre en tel repantans? Zeova pa les li ganny anbete par zis parol oubyen larm. Nou aksyon ki montre ki nou’n vreman repantir. Pour Zeova montre son mizerikord, fodre en dimoun ki’n fer sa ki mal i aret net son move lavi e viv an akor avek bann standar Zeova ki onivo.
Zis Sakrifis tousel pa fer Plezir Zeova
10, 11. Parey i evidan dan ka Izrael, akoz zis sakrifis tousel pa fer plezir Zeova?
10 Aprezan annou diskit en dezyenm leson ki kapab ed nou mars avek Zeova. Sa i: Zis sakrifis tousel pa fer plezir Bondye. Osea 6:6 i dir: “Mon’n pran plezir dan labonte leker, pa dan sakrifis, e dan konnesans Bondye olye dan bann lofrann brile.” Remarke ki Zeova i pran plezir dan labonte leker oubyen lanmour fidel, en kalite ki sorti dan leker. I osi kontan ki dimoun i konn li. Me petet ou pe demann ou lekor: ‘Akoz sa verse i dir ki Zeova pa pran plezir dan “sakrifis” ek “lofrann brile”? Pa Lalwa Moiz ki ti demande pour ofer sa bann sakrifis ek lofrann?’
11 Wi, Lalwa ti demande ki zot ofer sakrifis ek lofrann. Me selman ti annan en problenm grav avek bann Izraelit dan letan Osea. I kler ki serten Izraelit ti ofer sa bann sakrifis zis pour fer lezot vwar ki zot pe fer zot devwar. Me anmenmtan, zot ti pe kontinyen fer pese. Zot pese ti endike ki zot ti napa lanmour fidel dan zot leker. Zot ti osi montre ki zot ti’n rezet konnesans Bondye parski zot pa ti pe viv an armoni avek sa konnesans. Ki valer zot sakrifis ti annan si zot ti napa en bon kondisyon leker e zot pa ti pe viv en bon lavi? An realite, zot bann sakrifis ti en lensilt pour Zeova.
12. Ki lavertisman Osea 6:6 i annan pour bann dimoun ozordi?
12 Parol Osea i fourni en lavertisman pour bann dimoun ki al lanmes konmela. Zot ofer Bondye bann sakrifis par serten aktivite oubyen pratik relizye ki zot fer. Pourtan, zot ladorasyon napa preski okenn lefe lo zot fason viv. Eski sa bann dimoun pe vreman fer plezir Bondye si zot leker pa pe pous zot pour pran konnesans egzakt lo li e aplik sa konnesans par rezet bann move keksoz ki zot pe fer? Fodre pa ki personn i krwar ki zis aktivite relizye lo li menm i fer plezir Bondye. Zeova pa pran plezir dan bann dimoun ki sey rod son laprouvasyon par fer krwar zot devoue pour li olye vreman viv dapre son Parol.—2 Timote 3:5.
13. Ki kalite sakrifis ki nou ofer, me ki nou pa devret oubliye konsernan zot valer?
13 Nou ki bann vre Kretyen, nou osi nou bezwen mazinen ki zis sakrifis tousel pa fer plezir Bondye. I vre ki nou pa ofer Bondye sakrifis zannimo. Parkont, nou “rann glwar Bondye” par “loue son non par nou labous,” e sa i en sakrifis ki nou fer. (Ebre 13:15) I enportan ki nou pa tonm dan menm pyez ki bann Izraelit dan letan Osea, an krwayan nou kapab kouver bann keksoz mal ki nou pe fer par fer bann sakrifis pour Bondye. Annou vwar en legzanp. En zenn ki ti pe annan relasyon seksyel an sekre ti admet plitar: “Mon ti ogmant mon predikasyon. Mon ti krwar sa ti pou kapab kouver mon pese.” Eski pa sanmenm ki bann Izraelit dezobeisan ti sey fer? Pa bliye ki loue Bondye par nou labous i enportan. Me Zeova i aksepte li si selman i ganny akonpannyen par sa bon motivasyon ek kondwit.
Zeova i soufer ler son bann Adorater i kit Li
14. Ki profesi Osea i revele lo santiman Bondye?
14 En trwazyenm leson ki nou aprann dan Osea sapit 6 a 9 i konman Zeova i santi kan son bann adorater i aret servi li. Zeova i en Bondye ki annan bann santiman for e anmenmtan i santiman dous. I santi li zwaye ler son pep i repantir pour zot pese e i annan konpasyon pour zot. Me ler son pep pa repantir, i pran aksyon sever. Lefe ki Bondye i annan profon lentere pour nou byennet, i zwaye ler nou mars fidelman avek li. Psonm 149:4 i dir: “Zeova pe pran plezir dan son pep.” Me ki mannyer Bondye i santi ler son bann serviter i enfidel?
15. Dapre Osea 6:7, ki mannyer serten Izraelit ti pe azir?
15 Zeova i dir konsernan bann Izraelit enfidel: “Zot, konman bann imen, zot in kas lalyans. Se la ki zot in trai mwan.” (Osea 6:7) Sa mo Ebre ki’n ganny tradwir “trai” i osi vedir tronp oubyen pa reste fidel avek en dimoun. Dan Malaki 2:10-16, sa menm mo Ebre i ganny servi pour dekrir kondwit bann Izraelit enfidel ki ti’n tronp zot madanm. An rapor avek fason ki sa mo in ganny servi dan Osea 6:7, en liv referans i dir ki par refer avek en “relasyon maryaz, sa i montre sa santiman personnel ki annan dan zot relasyon . . . Sa sitiasyon i enn personnel kot lanmour in ganny brize.”
16, 17. (a) Ki mannyer Izrael ti azir anver sa lalyans ki Bondye ti fer avek zot? (b) Ki nou devret mazinen konsernan nou aksyon?
16 Zeova ti senbolikman refer avek nasyon Izrael konman son madanm akoz i ti’n fer en lalyans avek sa nasyon. Alors, kan son pep ti kas bann kondisyon dan sa lalyans par ekspre, i ti konmsi zot ti pe komet adilter. Bondye ti parey en msye fidel, me son pep ti kit li!
17 Be ki nou pou dir lo nou? Pour Bondye i enportan si nou mars avek li oubyen non. Pa zanmen bliye ki “Bondye i lanmour” e sa ki nou fer i annan lefe lo son santiman. (1 Zan 4:16) Si nou al dan en move semen, nou fer Zeova soufer e nou pou sirman depler li. Ler nou gard sa antet, i kapab anpes nou les nou ganny tante.
Ki mannyer nou kapab rekolte sa ki bon
18, 19. Ki prensip nou trouve dan Osea 8:7, e ki mannyer sa prensip ti vin vre dan ka bann Izraelit?
18 Annou vwar en katriyenm leson dan parol Osea—konman nou kapab rekolte sa ki bon. Konsernan bann Izraelit ek zot lavi initil e bet, Osea i ekrir: “Zot pe kontinyen senm divan, e zot pou rekolte tanpet divan.” (Osea 8:7) La nou trouv en prensip ki ti a byen nou gard antet: I annan en relasyon etrwat ant sa ki nou pe fer konmela e sa ki pou arive avek nou plitar. Ki mannyer sa prensip ti vin vre dan ka bann Izraelit enfidel?
19 Par kontinyen fer pese, bann Izraelit ti pe senm sa ki move. Eski zot ti pou kapab kontinyen fer sa san sibir konsekans? Be ditou! Osea 8:13 i dir: “[Zeova] pou mazin zot fot e fer zot rann kont pour zot pese.” Dan Osea 9:17, nou lir: “Mon Bondye pou rezet zot, parski zot pa’n ekout li, e zot pou ale vini parmi bann nasyon.” Wi, Zeova ti pou vwar bann Izraelit responsab pour zot pese. Akoz zot ti senm sa ki move, zot ti pou rekolte sa ki move. Zeova ti pou pas son zizman lo zot. Sa ti arive an 740 A.N.L. kan bann Asiryen ti defet sa dis tribi rwayonm Izrael e anmenn son bann zabitan an egzil.
20. Ki leksperyans bann Izraelit i ansenny nou?
20 Sa ki ti arive avek sa bann Izraelit i ansenny nou en laverite debaz: Nou rekolte sa ki nou senmen. Parol Bondye i averti nou: “Pa bezwen tronp ou lekor, personn pa kapab anbet Bondye. En dimoun i rekolte sa ki in senmen.” (Galat 6:7) Si nou senm sa ki move, nou pou rekolte sa ki move. Par egzanp, bann ki anmenn en lavi dezord pou rekolte bann konsekans ki vreman fer mal. En dimoun ki kontinyen fer pese pou mal fini.
21. Ki mannyer nou kapab rekolte sa ki bon?
21 Alor, ki mannyer nou kapab rekolte sa ki bon? Nou kapab reponn sa kestyon par servi en pti legzanp. Si en fermye i anvi rekolte patat, eski i pou plant mayok? Be non! En fermye i konnen ki i bezwen plant sa ki i anvi rekolte. Pareyman, si nou anvi rekolte sa ki bon, nou pou bezwen senm sa ki bon. Eski ou anvi kontinyen rekolte sa ki bon, setadir en lavi ere e satisfezan la konmela ek lespwar pour viv pour touzour dan nouvo lemonn Bondye? Alors, ou bezwen kontinyen senm sa ki bon par mars avek Bondye e viv an akor avek son bann standar drwat.
22. Ki leson nou’n aprann dan Osea sapit 6 ziska 9?
22 Dan Osea sapit 6 ziska 9, nou’n aprann kat leson ki kapab ed nou mars avek Bondye: (1) Vre repantans i ganny demontre par aksyon; (2) zis sakrifis tousel pa fer plezir Bondye; (3) Zeova i soufer kan son bann adorater i abandonn li; e (4) pour rekolte sa ki bon, nou bezwen senm sa ki bon. Ki mannyer sa senk dernyen sapit dan sa liv Labib i kapab ed nou mars avek Bondye?
Ki ou pou reponn?
• Ki mannyer vre repantans i ganny demontre?
• Akoz zis sakrifis tousel pa fer plezir nou Papa dan lesyel?
• Ki mannyer Bondye i santi ler son bann adorater i kit li?
• Ki nou bezwen senmen si nou anvi rekolte sa ki bon?
[Kestyon]
[Portre lo paz 15]
Akoz Zeova ti rezet sakrifis son pep?
[Portre lo paz 16]
Pour rekolte sa ki bon, nou bezwen senm sa ki bon