Annan en bon Zizman dan tou Sirkonstans

“Sa ki napa leksperyans i met lafwa dan tou parol, me sa enn ki malen i egzamin son lepa.”—PROVERB 14:15.

1, 2. (a) Ki nou aprann atraver leksperyans Lot? (b) Ki sa lekspresyon “reste touzour vizilan” i vedir?

LER Abraam ti les Lot swazir premye, landrwa kot i anvi reste, Lot ti ganny atire par en rezyon byen ver ki ti “parey zarden Zeova.” Sa landrwa ti’n bezwen paret sa pli bon landrwa pour Lot ek son fanmiy reste, vi ki “Lot ti swazir Distrik Zourden antye” e i ti etablir son kan obor Sodonm. Me sa ki Lot ti vwar premye kou ti anbet li, akoz zis lanmenm obor ti annan “bann zonm Sodonm [ki] ti move ek bann gran peser kont Zeova.” (Zenez 13:7-13) Lot ek son fanmiy ti sibir bann move lefe, e finalman, li ek son de fiy ti bezwen al reste dan en kavern. (Zenez 19:17, 23-26, 30) Sa ki ti’n paret sitan bon okonmansman ti vin tou lekontrer.

² Sa resi lo Lot i donn bann serviter Bondye ozordi en leson. Ler nou annan desizyon pour fer, nou bezwen vey bann danze ki kapab arive e fer atansyon ki nou pa les nou premye lenpresyon anbet nou. Alor, i apropriye ki Parol Bondye i ankouraz nou pour: “Reste touzour vizilan” oubyen annan en bon zizman. (1 Pyer 1:13) Sa mo Grek ki’n ganny tradwir la “reste touzour vizilan” i literalman vedir “azen.” Dapre Richard Lenski en spesyalis Labib, ler en dimoun i “azen” i vedir ki sa dimoun i pran son letan pour reflesir, i pa les li ganny anbete, i evalye e kalkil keksoz byen, e sa i permet li fer en bon desizyon. Annou konsider serten sitiasyon kot nou bezwen annan en bon zizman.

En Loportinite pour fer en Biznes

3. Akoz nou bezwen fer atansyon ler en dimoun i ofer nou en loportinite pour fer en biznes?

³ Sipoze en dimoun ki byen respektab, petet en adorater Zeova, i ofer ou en loportinite pour fer en biznes avek li. I konvenki ki sa biznes pou marse e ankouraz ou pour pa mank sa sans. Ou konmans mazinen ki sa loportinite pou donn ou ek ou fanmiy en pli bon lavi, petet ou kapab menm rezonnen ki sa pou permet ou pas plis letan dan bann aktivite spirityel. Me Proverb 14:15 i averti: “Sa ki napa leksperyans i met lafwa dan tou parol, me sa enn ki malen i egzamin son lepa.” Dan leksitasyon pour konmans en nouvo biznes, dimoun pa kalkil byen bann risk, zot negliz bann danze, e zot pa egzamin oprofon kwa ki kapab fer tonbe sa biznes. (Zak 4:13, 14) Dan en tel sitiasyon, pa i vreman neseser pour touzour annan en bon zizman!

4. Ki mannyer nou kapab ‘egzamin nou lepa’ ler nou pe evalye en propozisyon biznes?

⁴ En dimoun pridan i egzamin byen oprofon en loportinite pour fer en biznes avan ki i fer en desizyon. (Proverb 21:5) Ler en dimoun i fer en tel egzaminasyon, souvan i kapab detekte bann danze ki i pa ti pe ekspekte okonmansman. Konsider sa sitiasyon: En dimoun pe rod pret larzan pour son biznes e i ofer ou en zoli profi si ou pret li sa larzan. Sa ki sa dimoun pe ofer ou i kapab paret atiran, me ki bann risk i annan? Eski sa dimoun ki pe rod pret sa larzan i dakor pour rann sa larzan menm si sa biznes pa marse, oubyen i pou selman rann sa larzan si sa  biznes i bon? Andotmo, eski ou pare pour perdi ou larzan si sa biznes pa marse? Ou osi kapab demande: “Akoz sa dimoun pa al rod sa larzan avek labank, i demann mwan? Eski bann labank i vwar ki sa biznes pa pou bon oubyen tro riske?” Pran letan pour kalkil bann risk pou ed ou evalye sa propozisyon dan en bon fason.—Proverb 13:16; 22:3.

5. (a) Ki sa bon keksoz Zeremi ti fer ler i ti aste en bout later? (b) Ki son lavantaz pour met an ekrir tou lagreman biznes?

⁵ Ler profet Zeremi ti aste en bout later avek son kouzen, ki ti pe ador Zeova li osi, Zeremi ti fer ekrir sa tranzaksyon devan bann temwen. (Zeremi 32:9-12) En dimoun ki saz ozordi pou fer sir ki tou lagreman ki i fer i ganny met an ekrir e sa i enkli avek son bann fanmiy ek konpanyon Kretyen. * Ler i annan en dokiman ki’n ganny byen prepare, sa i anpes bann mal konprenezon e prezerv linite. Parkont, pa fer en lagreman an ekrir i souvan kree difikilte ler bann problenm dan biznes i arive ant bann serviter Zeova. Malerezman, sa bann problenm i kapab anmenn latet fer mal, mekontantman, e menm perdi spirityalite.

6. Akoz nou bezwen veye ki nou pa vin voras?

⁶ Nou osi bezwen veye pour pa vin voras. (Lik 12:15) Promes pour ganny en gro profi i kapab fer en dimoun pa vwar bann danze ki annan avek en biznes. Menm serten ki’n ganny bann bon responsabilite dan kongregasyon in tonm dan sa pyez. Parol Bondye i averti nou: “Pa les lanmour pour larzan domin zot lavi, me kontant zot avek sa ki zot annan.” (Ebre 13:5) Ler nou pe reflesir lo en loportinite pour fer en biznes, en Kretyen i devret demann son lekor: ‘Eski i vreman neseser pour konmans sa biznes?’ Ler nou anmenn en lavi senp e nou konsantre lo nou ladorasyon pour Zeova, sa pou protez nou kont en kantite latet fer mal.—1 Timote 6:6-10.

Difikilte pour bann Selibater

7. (a) Ki difikilte bann selibater i gannyen? (b) Dan ki fason swa ki nou fer pour deside avek ki nou pou marye i enplik nou fidelite avek Bondye?

⁷ I annan bokou serviter Zeova ki anvi marye me zot pa ankor ganny en dimoun apropriye pour marye avek. Dan serten pei, dimoun i met bokou presyon lo lezot pour marye. Me i kapab napa bokou loportinite pour trouv en partner apropriye parmi bann frer ek ser Kretyen. (Proverb 13:12) Bann Kretyen i konnen ki obeir sa lord ki sorti dan Labib pour marye ‘dan Senyer’ i enportan si nou oule reste fidel avek Zeova. (1 Korentyen 7:39) Pour reste ferm kont bann presyon ek tantasyon ki zot rankontre, bann Kretyen selibater i bezwen touzour annan en bon zizman.

8. Ki presyon en fiy Soulamit ti sibir, e ki mannyer bann madanm Kretyen ozordi i rankontre menm difikilte?

⁸ Dan Kantik Salomon, en fiy Soulamit ti atir latansyon lerwa. Sa lerwa ti esey ganny son lafeksyon par demontre son larises, prestiz, ek labote, menm si sa fiy ti deza  anmoure avek en zennonm. (Kantik Salomon 1:9-11; 3:7-10; 6:8-10, 13) Si ou en ser Kretyen, ou osi ou kapab atir latansyon en dimoun, san ki ou anvi fer sa. En dimoun kot ou travay, petet ki dan en bon pozisyon, i konmans dir ou bann pti parol dou, rann ou bann pti faver, e rod loportinite pour avek ou. Vey byen latitid sa dimoun. Menm si pa toultan ki sa bann dimoun i annan en lentansyon romantik oubyen imoral, souvan i leka. Parey sa fiy Soulamit, vin parey “en miray.” (Kantik Salomon 8:4, 10) Avek determinasyon rezet sa bann zekar. Kan ou konmans travay dan en landrwa, fer bann travayer konnen ki ou en Temwen Zeova e profit loportinite pour pres avek zot. Sa pou vin en proteksyon pour ou.

9. Ki serten danze i annan pour konmans en relasyon avek en etranze lo Internet? (Vwar bwat lo paz 30.)

⁹ Bann sit Internet avek bi pour ed bann selibater trouv en partner pour marye pe vin pli popiler. Serten i vwar sa konman en fason pour konn dimoun ki sankwa zot pa ti pou zanmen zwenn. Me i danzere pour sot dan en relasyon avek en etranze. I kapab difisil pour ou konnen kwa ki vre e kwa ki pa vre lo Internet. (Psonm 26:4) Pa tou dimoun ki dir i en serviter Zeova ki vreman en serviter Zeova. Deplis, ler ou pe frekant en dimoun atraver Internet, en sel kou ou kapab devlop en relasyon pros ki kapab afekte ou zizman. (Proverb 28:26) Ki swa atraver Internet oubyen par lezot mwayen, i pa en bon lide pour devlop en relasyon pros avek en dimoun ki ou pa konn bokou keksoz lo li.—1 Korentyen 15:33.

10. Ki mannyer nou kapab ankouraz bann Kretyen selibater?

¹⁰ Zeova i “ranpli avek labonte ek konpasyon” pour son bann serviter. (Zak 5:11) I konn bann difikilte ek dekourazman ki bann Kretyen ki pa ti anvi reste selibater i santi parler e i apresye zot fidelite. Ki mannyer lezot i kapab ankouraz zot? Tanzantan nou devret felisit zot pour zot lobeisans ek leta lespri sakrifis. (Ziz 11:39, 40) Nou osi kapab envit zot dan bann rankont ki nou fer. Eski resaman ou’n fer sa? Deplis, nou kapab priy pour zot, demann Zeova pour ed zot gard zot lekilib spirityel e trouv lazwa pour servi li. Par nou lentere senser, parey Zeova, annou montre ki nou apresye nou bann frer ek ser ki fidel dan sa fason.—Psonm 37:28.

Bann Problenm Lasante

11. Si nou annan en maladi grav, ki problenm nou kapab rankontre?

¹¹ I pa fasil ler nou oubyen bann ki nou pros avek i fer fas avek en problenm lasante grav. (Izai 38:1-3) I normal pour rod bann bon tretman medikal, me nou bezwen reste atase avek bann prensip dan Labib. Par egzanp, bann Kretyen i vwar li enportan pour pa servi disan, e zot rezet tou tretman oubyen tes medikal ki annan pour fer avek bonnonm dibwa oubyen grigri. (Akt 15:28, 29; Galat 5:19-21) Nou bezwen rekonnet ki parler i kapab difisil pour konnen ki tretman ki akseptab sirtou si nou napa bokou konnesans medikal. Kwa ki kapab ed nou pour annan en bon zizman?

12. Ki mannyer en Kretyen i kapab byen swazir en tretman medikal?

 ¹² “Sa enn ki malen i egzamin son lepa” par fer bann resers dan Labib e dan nou bann piblikasyon. (Proverb 14:15) Dan bann pei kot napa bokou lopital ek dokter, lamedsin tradisyonnel, avek bann remed raspay, i kapab sa sel latizann ki en dimoun i gannyen. Si nou pe mazinen pour servi bann tretman koumsa, nou kapab egzamin sa lartik dan Latour Veyer le 15 Avril 1987 paz 26-9 an Angle oubyen Franse. Dan sa lartik, i mansyonn serten danze. Par egzanp, eski sa dimoun kot nou pou ale i osi fer grigri? Eski sa tretman i baze lo fo krwayans ki maladi ek lanmor i vin akoz bann bondye oubyen lespri nou bann zanset in ganny ofanse ouswa akoz en dimoun in zet en move sor lo nou? Eski sa dimoun pou envoke, fer bann sakrifis oubyen lezot pratik pour prepar oubyen donn nou sa latizann? (Deterononm 18:10-12) Si nou fer sa bann resers, sa pou ed nou swiv sa konsey dan Labib: “Egzamin tou keksoz; gard sa ki bon.” * (1 Tesalonisyen 5:21) Sa pou ed nou pour evite taye pour aksepte oubyen refiz en serten tretman medikal.

13, 14. (a) Ki mannyer nou kapab montre nou rezonnab dan domenn lasante? (b) Akoz nou bezwen rezonnab ler nou pe diskit bann topik lo lasante oubyen bann tretman medikal?

¹³ Dan tou laspe nou lavi, nou bezwen rezonnab. Sa i aplik osi pour nou lasante. (Filipyen 4:5, NW) Byen pran swen avek nou lasante i montre ki nou apresye lavi ki nou Kreater i donn nou. Si nou malad, i toutafe normal ki nou fer keksoz. Parkont, nou bezwen gard antet ki nou pa pou kapab ganny en lasante parfe avan ki Bondye i ‘geri tou bann nasyon.’ (Revelasyon 22:1, 2) Nou bezwen veye ki nou pa telman preokipe avek nou lasante fizik ki finalman nou les dekote bann keksoz pli enportan, e sa se bann keksoz spirityel.—Matye 5:3; Filipyen 1:10.

¹⁴ Nou bezwen osi rezonnab e ekilibre dan nou bann konversasyon konsernan nou lasante ek bann tretman medikal. Dan nou bann renyon ek lasanble, nou pa devret toultan pe koz lo sa bann topik. Deplis, nou pa devret oubliye ki sa bann desizyon konsernan lasante i devret baze lo bann prensip Labib, lo konsyans ek relasyon sa dimoun avek Zeova. Pour sa rezon, si nou kontan nou frer nou pa pou enpoz lo  li nou pwennvi oubyen ankouraz li pour pa ekout son konsyans. Napa nanryen mal demann konsey avek bann Kretyen matir dan kongregasyon, me nou bezwen rapel ki sak Kretyen i bezwen pran son responsabilite ler pe fer en desizyon, e ki tou dimoun pou “rann kont devan Bondye pour son prop lekor.”—Galat 6:5; Romen 14:12, 22, 23.

Kan nou anba Presyon

15. Ki kapab arive ler nou anba presyon?

¹⁵ Ler en serviter fidel Zeova i anba presyon, sa i kapab fer li azir oubyen koz dan en fason pa apropriye. (Eklezyast 7:7) Kan Zob ti pas dan en leprev difisil, i ti perdi son lekilib e i ti bezwen ganny korize. (Zob 35:2, 3; 40:6-8) Menm si “Moiz, ti en zonm ki ti annan plis limilite ki tou zonm ki ti lo sirfas later,” en fwa i ti ankoler e i ti koz brit avek lezot. (Nonm 12:3; 20:7-12; Psonm 106:32, 33) David ti vreman demontre kontrol lo son lekor kan i pa ti touy Lerwa Sail. Parkont kan Nabal ti mal koz avek li ek son bann zonm, i ti ankoler e perdi son bon zizman. Se selman kan Abigail ti koz avek li ki i ti realize i pe al fer en fot grav.—1 Samyel 24:2-7; 25:9-13, 32, 33.

16. Kwa ki kapab ed nou pa azir tro vit?

¹⁶ Nou osi nou kapab anba presyon e perdi nou bon zizman. Parey David ti fer, nou bezwen pran an konsiderasyon pwennvi lezot e sa i ava anpes nou tay avek keksoz e tonm dan pese. (Proverb 19:2) Deplis Parol Bondye i ankouraz nou: ‘Pran lakoler me pa fer pese. Koz dan ou leker, lo ou lili, me pa koz lo la avek lezot.’ (Psonm 4:4) Si i posib, plito espere ki nou’n kalmi avan pran aksyon ouswa fer desizyon. (Proverb 14:17, 29) Nou kapab priy Zeova avek tou nou leker, e ‘lape Bondye ki depas tou konpreansyon imen i ava gard nou leker ek nou lespri dan Kris-Zezi.’ (Filipyen 4:6, 7) Sa lape Bondye pou ed nou gard nou kalm e annan en bon zizman menm si nou anba presyon.

17. Akoz nou bezwen depan lo Zeova pour nou annan en bon zizman?

¹⁷ Menm si nou fer bokou zefor pour evit bann danze e fer keksoz bet, nou tou nou fer fot. (Zak 3:2) Petet san realize, nou pros pour fer en keksoz mal. (Psonm 19:12, 13) Deplis konman imen, nou pa kapab e nou napa drwa osi pour diriz nou prop lepa san gidans Zeova. (Zeremi 10:23) Pa nou kontan ki Zeova i rasir nou avek sa parol: “Mon pou fer ou annan bon zizman e ansenny ou ki semen ou devret ale. Mon lizye pou lo ou pour konsey ou.” (Psonm 32:8) Wi avek led Zeova, nou kapab annan en bon zizman dan tou sirkonstans!

[Not anba lo paz]

Ki ou pou reponn?

Ki mannyer ou kapab annan en bon zizman

• si ou annan en loportinite pour fer en biznes?

• si ou anvi marye?

• si ou annan en maladi grav?

• si ou anba presyon?

[Kestyon]

[Bwat lo paz 30]

Eski ou kapab annan Konfyans ladan?

Sa in ganny lir lo bann sit Internet pour bann selibater:

“Nou’n fer nou mye, me nou pa kapab asir vre lidantite sa bann dimoun.”

“Nou napa okenn garanti si sa bann lenformasyon dan sa servis i egzakt, konplet e itil.”

“Pwennvi, konsey, deklarasyon, lof, ek lezot lenformasyon dan sa servis i ganny donnen par sa bann dimoun ki’n kontribye, . . . e i pa neseserman ki ou kapab annan konfyans ladan.”

[Portre lo paz 29]

“Sa enn malen i egzamin son lepa”

[Portre lo paz 31]

Ki mannyer bann ser Kretyen i kapab imit sa fiy Soulamit?

[Portre lo paz 32]

“Egzamin tou keksoz; gard sa ki bon”