Bann Pwen enteresan dan Liv Ester
Parol Zeova i vivan
Bann Pwen enteresan dan Liv Ester
NAPA fason ki sa plan pa ti pou marse. Dan en fason efikas, tou bann Zwif ti pou ganny masakre. Dan zis en sel zour, tou bann Zwif ki ti pe viv dan sa lanpir, ki al depi Lenn ziska Etyopi, ti pou ganny eliminen. Sa i fason ki sa dimoun ki ti pe fer sa konplo ti mazinen. Me ti annan en keksoz ki i pa ti’n kalkile. Dan nenport ki sitiasyon danzere, sa Bondye dan lesyel i kapab delivre son pep. Liv Ester i rakont fason Bondye ti delivre son pep.
En Zwif apele Mordekai ki ti aze, ti ekrir liv Ester ki kouver en peryod letan apepre 18 an pandan renny Lerwa Asweris, oubyen Zerses 1. Sa resi enteresan i montre ki mannyer Zeova ti sov son pep dan lanmen zot lennmi, menm si son bann serviter ti disperse partou dan en gran lanpir. Ozordi, sa lenformasyon i ogmant lafwa pep Zeova, ki pe servi li dan 235 pei. Deplis, sa bann diferan dimoun dan sa resi i donn serten legzanp ki nou kapab imite ek lezot ki nou devret evite. Wi, vreman “Parol Bondye i vivan e i annan pisans.”—Ebre 4:12.
LARENN TI BEZWEN ENTERVENIR
Dan son trwazyenm lannen o pouvwar (493 A.N.L.), Lerwa Asweris ti fer en lafet pour tou dimoun enportan dan son lanpir. Larenn Vasti ki ti renonmen pour son labote ti perdi faver lerwa e i ti osi perdi son pozisyon konman larenn. Parmi tou bann zoli zenn fiy vyerz, Lerwa ti swazir en fiy Zwif apele Adasa pour ranplas Vasti. Lefe son kouzen ti dir li pa fer konnen ki i en Zwif, alor i ti servi son non Pers, Ester.
Avek letan, en zonm arogan ti ganny pozisyon premye minis. Amann ti ankoler akoz Mordekai ti refize bese devan li, alor i ti fer en konplo pour elimin tou Zwif dan Lanpir Pers. (Ester 3:2) Amann ti reisi konvenk Asweris pour dakor avek li e i ti fer lerwa fer en lalwa pour akonpli sa masak. Mordekai ti met “goni ek lasann” lo li. (Ester 4:1) Aprezan, Ester ti bezwen entervenir. Ester ti envit lerwa ek son premye minis en lafet kot son lakour. Zot ti kontan pour al sa lafet, e Ester ti sipliy zot pour vin en lot lafet son lannmen. Amann ti dan en gran lazwa. Me i ti ankoler en kantite akoz Mordekai ti refize onor li. Alor Amann ti fer en konplo pour touy Mordekai avan sa lot lafet son lannmen.
Larepons pour bann Kestyon lo Labib:
1:3-5—Eski sa lafet ti al pour 180 zour? Sa resi pa dir si sa lafet ti al sa kantite letan me i dir ki sa lerwa ti montre bann zofisye larises ek labote son zoli rwayonm pour 180 zour. Petet sa lerwa ti servi sa gran levennman pour montre laglwar son rwayonm. I ti fer sa pour enpresyonn sa bann dimoun e konvenk zot ki i annan abilite pour akonpli son bann plan. Dan sa ka, verse 3 ek 5 i kapab pe refer avek sa 7 zour lafet ki ti ganny fer alafen sa rankont 180 zour.
1:8—Akoz ti napa personn ki ti pe met an fors lalwa konsernan bwar? Pour sa lokazyon, Lerwa Asweris ti fer en leksepsyon avek sa ki ti paret en koutim Pers kot zot ti ankouraz kanmarad pour bwar en serten kantite dan bann tel rankont. En liv i dir ki “zot ti kapab bwar en kantite oubyen en pti gin si zot ti anvi.”
1:10-12—Akoz Larenn Vasti ti refize al devan lerwa? Serten i krwar ki sa larenn ti refize obeir akoz i pa ti oule “degrad son lekor devan bann envite lerwa ki ti sou.” Oubyen petet sa tre zoli larenn pa ti pare pour soumet. Menm si Labib pa dir akoz i ti azir koumsa, bann zonm saz sa letan ti dakor ki refize obeir en mari pa ti kapab les pase e ki move legzanp Vasti ti pou enfliyans tou madanm dan bann provens Pers.
2:14-17—Eski Ester ti annan en relasyon imoral avek lerwa? Larepons i non. Sa resi i dir ki dan bomaten lezot madanm ki ti ganny anmennen kot lerwa ti retourn dan dezyenm lakaz ki ti anba kontrol “gardyen bann konkibin.” Bann madanm ki ti pas lannwit avek lerwa ti alor vin son bann konkibin, oubyen bann madanm segonder. Me apre ki Ester ti vin kot lerwa, li i pa ti ganny anmennen kot lakaz bann konkibin. Ler zot ti anmenn Ester devan Asweris, “sa lerwa ti kontan Ester plis ki tou lezot madanm, ki i ti ganny plis faver ek labonte leker devan li ki tou lezot vyerz.” (Ester 2:17) Ki mannyer Ester ti ganny “faver ek labonte leker” Asweris? Dan sa menm fason ki Ester ti ganny faver lezot. “Sa zenn madanm ti fer plezir [Egay], ki i ti montre labonte leker anver [Ester].” (Ester 2:8, 9) Akoz son laparans ek son bann zoli kalite, sa ti fer Ester ganny faver Egay. Annefe, “Ester ti pe kontinyen ganny faver tou dimoun ki ti pe vwar li.” (Ester 2:15) Pareyman, lerwa li osi ti enpresyonnen par sa ki i ti vwar dan Ester e sa ti fer li kontan Ester.
3:2; 5:9—Akoz Mordekai pa ti bese devan Amann? I pa ti mal pour bann Izraelit respe pozisyon siperyer en gran personnaz par bese devan li. Me i ti annan lezot keksoz ki ti enplike dan ka Amann. Amann ti en Agagit, petet en Amalekit, e Zeova ti’n fini dir ki fodre ekstermin bann Amalekit. (Deterononm 25:19) Pour Mordekai, bese devan Amann ti pou vedir ki i enfidel avek Zeova. I ti atoupri refize fer sa e i ti dir klerman ki i en Zwif.—Ester 3:3, 4.
Leson pour nou:
2:10, 20; 4:12-16. Ester ti aksepte gidans ek konsey avek en adorater Zeova ki ti matir. Nou montre ki nou saz ler nou ‘obei nou bann dirizan e swiv zot lord.’—Ebre 13:17.
2:11; 4:5. Nou ‘pa devret pran ka zis avek nou prop lentere, me osi avek lentere lezot.’—Filipyen 2:4.
2:15. Ester ti montre ki i modes e annan kontrol lo son lekor par aksepte sa ki Egay ti donn li e i pa ti demann plis bizou oubyen pli zoli lenz. Se “labote enteryer, dan leker e ki pa kapab disparet, labote en lespri bon e trankil” ki ti fer Ester ganny faver lerwa.—1 Pyer 3:4.
2:21-23. Ester ek Mordekai ti de bon legzanp soumisyon avek bann lotorite.—Romen 13:1.
3:4. Dan serten sitiasyon, i kapab bon pour pa dir ki nou ete, parey Ester ti fer. Me ler nou bezwen pran en pozisyon lo bann size enportan, parey drwa Zeova pour dirize ek nou fidelite, nou bezwen pa per pour fer konnen ki nou Temwen Zeova.
4:3. Ler nou fer fas avek leprev, nou devret tourn ver Zeova dan lapriyer pour ganny lafors ek lasazes.
4:6-8. Mordekai ti rod led legal kont sa danze ki konplo Amann ti anmennen.—Filipyen 1:7.
4:14. Konfyans ki Mordekai ti annan dan Zeova i egzanpler.
4:16. Avek konfyans total dan Zeova, Ester ti fidelman fer fas avek en sitiasyon ki ti’n kapab kout li son lavi. I tre enportan ki nou aprann pour depan lo Zeova e pa lo nou menm.
5:6-8. Ester ti envit Asweris pour en dezyenm fwa pour reisi ganny son faver. Ester ti servi son lentelizans dan lafason ki i ti azir, nou osi nou devret fer parey.—Proverb 14:15.
SITIASYON TI SANZ POUR LEMEYER
Anmezir ki bann levennman ti deroule, sitiasyon ti sanz konpletman. Zot ti pann Amann lo sa poto ki i ti’n fer pour Mordekai, e li ki ti sipoze vin viktim ti vin premye minis! Ki ti arive avek sa plan pour masakre bann Zwif? Sa osi ti bezwen eksperyans en gran sanzman.
Ester ki ti fidel, ti koz ankor en kou. I ti riske son lavi par vin devan lerwa avek en demann pour reisi trouv en fason pour anpes sa masak ki Amann ti’n konplote arive. Asweris ti konnen ki devret ganny fer. Alor ler zour zot masak ti finalman arive, pa bann Zwif ki ti ganny touye me sa bann ki ti pe rod pour fer zot ditor. Mordekai ti donn lord pour selebre tou le zan Lafet Pourim pour rapel sa gran delivrans. Konman dezyenm dimoun pli enportan apre Lerwa Asweris, Mordekai ti ‘travay pour byennet son pep e koz lape avek tou zot desandans.’—Ester 10:3.
Larepons pour bann Kestyon lo Labib:
7:4—Si bann Zwif ti ganny detrir, ki mannyer sa ti pou afekte lerwa? Lefe ki Ester ti kapab koz konsernan posibilite pour vann bann Zwif konman lesklav, i ti fer resorti ki lerwa ti pou ganny afekte si bann Zwif ti ganny detrir. Sa 10,000 pyes larzan ki Amann ti promet ti bokou mwen profitab pour lerwa ki sa larises ki i ti pou gannyen, si Amann ti’n plàn pour vann bann Zwif konman lesklav. Deplis, larenn osi ti pou perdi lavi si plan Amann ti’n akonpli.
7:8—Akoz zofisye lakour ti kouver figir Amann? Petet zot ti fer sa pour endik laont oubyen pour endik maler ki ti pe al abat lo Amann. Dapre en liv, “lontan bann dimoun ti parler kouver latet sa bann ki ti pe al ganny egzekite.”
8:17—Dan ki fason ‘bokou dimoun dan pei ti pe deklar zot lekor Zwif’? I paret ki bokou Pers ti konverti dan larelizyon Zwif, zot ti mazinen ki sa ki’n arive ti en lendikasyon ki bann Zwif i annan faver Bondye. Dan lakonplisman en profesi dan liv Zekarya nou trouv sa menm prensip. I dir: “Dis zonm sorti dan tou langaz bann nasyon pou tyonbo, wi zot pou vreman tyonbo rob en zonm ki en Zwif, an dizan: ‘Nou pou al avek zot, akoz nou’n antann ki Bondye i avek zot.’”—Zekarya 8:23.
9:10, 15, 16—Menm si sa lord ti permet bann Zwif pran byen sa bann dimoun, akoz zot ti refize fer li? Sa i klerman montre ki zot ti anvi prezerv zot lavi me pa anrisir zot lekor.
Leson pour nou:
6:6-10. “Avan maler i annan lorgey, e avan fo pa en lespri arogan.”—Proverb 16:18.
7:3, 4. Eski nou per pour fer lezot konnen ki nou Temwen Zeova, menm si sa i kapab fer nou ganny persekite?
8:3-6. Ler nou bann lennmi i atak nou, nou kapab e nou devret rod led avek bann lotorite gouvernman ek lakour pour ganny proteksyon.
8:5. Ester ti servi son bon zizman pour pa mansyonnen ki lerwa osi ti responsab pour fer sa lord avek bi pour elimin bann Zwif. Nou osi ler nou pe rann en temwannyaz avek bann o zofisye nou bezwen servi nou bon zizman.
9:22. Nou pa devret oubliy sa bann ki pov parmi nou.—Galat 2:10.
Zeova pou donn “Soulazman ek Delivrans”
Pour Mordekai, ler Ester ti vin larenn sa ti en keksoz ki ti annan pour fer avek plan Bondye. Ler bann Zwif ti santi zot lavi an danze, zot ti zennen e priy pour led. Larenn Ester ti apros devan lerwa san ki i ti ganny envite e a sak fwa lerwa ti byen resevwar li. Sa menm zour swar enportan, sa lerwa pa ti kapab dormi. Wi, liv Ester i koz lo ki mannyer Zeova ti aranz bann levennman dan lavantaz son pep.
Sa resi enteresan dan liv Ester i sirtou ankourazan pour nou ki pe viv dan “letan lafen.” (Danyel 12:4) Dan bann dernyen moman dan letan lafen, Gog sorti Magog, savedir Satan, pou fer en latak lo pep Zeova. Son bi se pour ekstermin konpletman bann vre adorater. Me zis parey dan letan Ester, Zeova pou donn son bann adorater “soulazman ek delivrans.”—Ezekyel 38:16-23; Ester 4:14.
[Portre lo paz 6]
Ester ek Mordekai devan Asweris