Parol Zeova i vivan

Bann Pwen enteresan dan Liv Zob

ZOB ti reste dan sa pei ki apel Outs ki sitye Arabi konmela. Sa letan bokou Izraelit ti viv Lezip. Zob pa ti en Izraelit me i ti ador Zeova. Labib i dir lo Zob: “Napa personn lo later ki parey li, en zonm san repros e drwat, ki annan lakrent pour Bondye e rezet sa ki mal.” (Zob 1:8) Tre probab, sa ti apre lanmor Zozef garson Zakob e avan Moiz ti vin profet.

I paret ki Moiz ti ekrir liv Zob e konn son zistwar ler i ti pas 40 an dan dezer Madiann ki pa tro lwen avek Outs. Moiz ti kapab konn lafen zistwar Zob kan bann Izraelit ti pros avek Outs ver lafen zot 40 an dan dezer. * Fason ki liv Zob in ganny ekrir i telman zoli ki i ganny konsidere konman enn bann pli bon literatir. Me sa liv i pa zis zoli, i osi donn larepons bann kestyon parey: Akoz bann bon dimoun i soufer? Akoz Zeova i permet soufrans? Eski bann imen enparfe i kapab reste fidel avek Bondye? Sa liv i fer parti Parol enspire Bondye e son konteni i vivan e i annan pwisans menm dan nou letan.—Ebre 4:12.

‘PLITO ZOUR MON NESANS I DISPARET’

(Zob 1:1–3:26)

En zour Satan ti kestyonn fidelite Zob avek Bondye. Zeova ti aksepte ki Satan i anmenn bann maler enn deryer lot lo Zob. Me Zob pa ti zanmen “modi Bondye.”—Zob 2:9.

Trwa zonm ki Zob ti konnen ti vin ‘senpatiz avek li.’ (Zob 2:11) Zot asize avek Zob e pa koz ditou ziska Zob ti finalman dir: ‘Plito zour mon nesans i disparet.’ (Zob 3:3) Zob ti a prefere i “parey en zanfan ki pa’n vwar lalimyer” oubyen ki’n mor dan vant son manman.—Zob 3:11, 16.

Larepons pour bann Kestyon lo Labib:

1:4—Eski bann zanfan Zob ti fet zot laz? I pa leka. Dan langaz orizinal Labib, i annan de mo diferan pour “zour” ek “lanniverser nesans,” zot napa menm sans. (Zenez 40:20) Sa mo pour “zour” dan Zob 1:4 i vedir lizour ki konmans avek soley leve e fini avek soley kouse. Sa set garson Zob ti organiz en rankont ki ti al pour set zour pour zot fanmiy tou le lannen. Sakenn son ‘prop zour’ zot ti envit larestan lafanmiy koz zot.

1:6; 2:1—Lekel ki ti annan drwa al devan Zeova sa letan? I ti annan sel Garson Bondye oubyen Laparol, bann lanz fidel e osi bann lanz dezobeisan enkli Satan ladan. (Zan 1:1, 18) Zeova ti permet zot pour vin devan li sa letan akoz sa ti permet Satan pour lev sa bann kestyon ek defi devan tou bann lanz. Satan ek son bann demon in ganny pouse dan lesyel pa bokou letan apre ki Rwayonm Bondye in ganny etabli dan lesyel an 1914.—Revelasyon 12:1-12.

1:7; 2:2—Eski Zeova ti koz direkteman avek Satan? Labib pa donn bokou detay lo ki mannyer Zeova i kominik avek bann lanz dan lesyel. Parkont, profet Mikaya ti vwar dan en vizyon en lanz pe koz direkteman  avek Zeova. (1 Lerwa 22:14, 19-23) Alor i paret fer sans ki Zeova ti koz avek Satan san servi en lanz.

1:21—Dan ki sans, Zob ti kapab retourn dan “vant son manman”? Vi ki Bondye Zeova ti fer zonm avek ‘lapousyer,’ sa mo “manman” pe refer avek later dan en fason senbolik.—Zenez 2:7.

2:9—Pour ki rezon madanm Zob ti demann son msye pour modi Bondye e mor? Parey son msye, madanm Zob ti perdi en kantite. I ti bezwen fer li lapenn pour vwar son msye perdi tou son kouraz avek sa maladi repinyan. I ti perdi son bann zanfan ki i ti kontan. Alor dan son dezespwar akoz tousala, petet madanm Zob ti nepli kapab vwar ki son relasyon avek Bondye ti sa keksoz pli enportan.

Leson pour nou:

1:8-11; 2:3-5. I evidan dan ka Zob ki reste fidel avek Zeova i enplik nou parol ek aksyon, me osi annan sa bon motivasyon pour servi Zeova.

1:21, 22. Si nou reste fidel avek Zeova dan botan konman move tan, nou prouve ki Satan i en manter.—Proverb 27:11.

2:9, 10. Parey Zob, nou devret gard en lafwa for menm si nou fanmiy pa konpran nou lobzektif spirityel, met presyon lo nou pour fer konpromi oubyen abandonn nou lafwa.

2:13. Sa trwa zonm ki ti vin get Zob ti napa nanryen rekonfortan pour dir konsernan Bondye ek son bann promes akoz zot pa ti vreman bann zonm spirityel.

“MON POU RESTE SAN DEFO!”

(Zob 4:1–31:40)

Sa trwa viziter Zob ti dir ki Zob in bezwen fer en keksoz vreman mal pour li ganny pini koumsa par Bondye. Elifaz ti konmans premye. Bildad ti kontinyen avek en bann koze mirak, epi Tsofar ti malparl Zob plis ankor.

Zob pa ti aksepte move rezonnman sa trwa zonm. Me vi ki i pa ti konpran akoz Bondye ti permet son soufrans, i ti mazin tro bokou pour zistifye son lekor. Selman, Zob ti kontan Bondye e ti dir: “Mon pou reste san defo ziska mon lanmor!”—Zob 27:5.

Larepons pour bann Kestyon lo Labib:

7:1; 14:14—Ki sa “korve” ki ganny mansyonnen la? I pe refer avek de keksoz diferan dan sa de verse. Premyerman, problenm Zob ti telman grav ki i ti vwar son lavi parey en korve savedir en travay dir e penib. (Zob 10:17, not anba lo paz) Dezyenmman, ler en dimoun i mor e al dan Seol i osi parey en korve akoz ou napa swa ou bezwen espere ziska rezireksyon.

7:9, 10; 10:21; 16:22—Eski sa bann parol Zob i vedir i pa ti krwar dan rezireksyon? Ler Zob ti dir sa bann parol i ti pe refer avek son lavenir pros. Ki i ti pe esey dir? Petet i ti pe dir ki si i mor, bann dimoun ki ti konn li pa ti pou vwar li ankor. Zot pa ti pou ekspekte vwar Zob retourn kot son lakaz la konmela avan rezireksyon, i pa ti pou ganny rekonnet ankor. Kekfwa osi, i ti anvi dir ki personn pa kapab sorti dan Seol san led Bondye. I evidan ki Zob ti krwar dan rezireksyon ler ou lir son parol dan Zob 14:13-15.

10:10—Ki mannyer Zeova ti ‘vers Zob parey dile e ti fer li kaye parey fromaz’? Dan en fason poetik e senbolik, sa i montre konman Zob ti devlope dan vant son manman.

19:20—Ki Zob ti oule dir ler i ti dir “mon’n sape avek lapo mon ledan”? Zob ti dir ki i’n nobou sap dan sa sitiasyon avek zis en keksoz, lapo son ledan. Vi ki nou pa vwar sa lapo, i paret ki sa i vedir ki Zob ti sape me i pa ti reste li preski nanryen ditou.

Leson pour nou:

4:7, 8; 8:5, 6; 11:13-15. Si en dimoun i dekouraze, nou pa devret deswit mazinen ki i  pe pey konsekans en move aksyon oubyen i napa laprouvasyon Bondye.

4:18, 19; 22:2, 3. Nou devret touzour baz nou konsey lo Parol Bondye plito ki lo nou pwennvi personnel.—2 Timote 3:16.

10:1. Lanmertim ki Zob ti annan akoz son soufrans ti anpes li reflesir lo bann vre rezon akoz i ti pe soufer. Vi ki nou konnen akoz bann imen i soufer, nou pa devret vin anmer akoz problenm ki nou pas ladan.

14:7, 13-15; 19:25; 33:24. Nenport sitiasyon ki Satan i met nou ladan, nou devret toultan mazin rezireksyon, sa pou donn nou kouraz.

16:5; 19:2. Nou parol i devret ankouraz e fortifye lezot, pa dekouraz zot.—Proverb 18:21.

22:5-7. Si nou konsey en dimoun apre ki nou’n tann bann lakizasyon ki napa levidans, i napa valer e i fer ditor.

27:2; 30:20, 21. Reste fidel avek Zeova pa vedir nou bezwen parfe. Zob ti napa en bon rezon pour kritik Bondye.

27:5. Zis Zob li menm ki ti kapab deside pour reste fidel avek Zeova oubyen non, akoz fidelite i depan lo lanmour ki en dimoun i annan pour Bondye. Alor nou bezwen devlop en gran lanmour pour Zeova.

28:1-28. Zonm i konnen kote pour trouv bann bon resours dan later. Pour li fer sa, i servi son lespri pour rod tou sort teknik pour fouy dan later kot menm bann zwazo avek en pli bon lizye pa kapab trouve. Me se bann dimoun ki annan en gran respe pour Zeova ki ganny son lasazes.

29:12-15. Nou devret pare pour demontre labonte leker anver bann ki dan bezwen.

31:1, 9-28. Zob in kit en bon legzanp an sa ki konsern pa esey atir latansyon lezot madanm, pa komet adilter, pa tret lezot dan en fason enzis oubyen kriyel, pa tay deryer keksoz materyel, e pa ador zidol.

“MON VREMAN REPANTIR DAN LAPOUSYER EK LASANN”

(Zob 32:1–42:17)

Eliou en zennonm ki ti’n ekout konversasyon tou sa letan, ti konmans koze. I ti koriz Zob e osi sa trwa zonm ki ti pe fatig Zob.

Apre ki Eliou ti’n fini koze, Zeova ti fer en gro divan soufle e ti donn son larepons. I pa ti eksplike akoz Zob ti soufer. Parkont, i ti demann plizyer kestyon pour montre Zob ki Bondye Tou Pwisan i annan en lafors ekstraordiner e en tre gran lasazes. Zob ti rekonnet ki i’n koze san reflesir e i ti dir: “Mon tir mon parol, e mon vreman repantir dan lapousyer ek lasann.” (Zob 42:6) Finalman bann leprev Zob ti arete e i ti ganny rekonpanse pour son fidelite.

Larepons pour bann Kestyon lo Labib:

32:1-3—Kan Eliou ti arive? Vi ki Eliou ti tann tou sa ki ti ganny dir, i ti bezwen pe asiz en pe pre pour li kapab tande avan ki Zob ti konmans koze e met en lafen avek sa set zour silans sa trwa viziter.—Zob 3:1, 2.

34:7—Ki mannyer Zob ti “bwar bann parol pour boufonn li parey delo”? Dan son soufrans, ler son trwa viziter ti pe boufonn li, Zob ti pran li personnel. Me an realite zot ti malkoz Bondye. (Zob 42:7) Alor, i ti bwar oubyen krwar sa bann parol ler zot ti boufonn li parey en dimoun i kontan bwar delo fre.

 Leson pour nou:

32:8, 9. Pa zis laz ki fer en dimoun vin saz. Nou bezwen konpran Parol Bondye e ganny led lespri sen pour vin saz.

34:36. Pour nou prouve ki nou fidel, nou bezwen ganny teste afon dan en fason ou en lot.

35:2. Eliou ti ekout byen e konpran egzakteman kot problenm ti ete avan i konmans koze. (Zob 10:7; 16:7; 34:5) Avan ki bann ansyen i donn konsey, zot osi devret ekout byen, ganny tou lenformasyon neseser, e byen konpran kot vre problenm i ete.—Proverb 18:13.

37:14; 38:1–39:30. Ler nou reflesir lo bann keksoz merveye ki Zeova in fer, nou pou vwar son lafors ek son lasazes. Sa pou ed nou abes nou e aksepte ki i pli enportan pour Zeova prouve ki se li tousel ki devret dirize, plito ki rezourd nou bann problenm personnel.—Matye 6:9, 10.

40:1-4. Si parler nou anvi konplent kont Bondye, plito nou met ‘lanmen devan nou labous.’

40:15–41:34. Tou le de Beemot (ipopotanm) ek Levyatan (krokodil) i tre for. Si nou oule persevere dan servis Bondye, nou osi nou bezwen lafors ki Zeova i donnen, li ki’n kree sa de bebet.—Filipyen 4:13.

42:1-6. Zeova ti koz avek Zob e montre li son pwisans, sa ti ed Zob pour “vwar Bondye” setadir vwar oubyen konn laverite lo li. (Zob 19:26) Sa ti ed li pour koriz son pwennvi. Ler nou ganny korize avek led Labib, nou devret pare pour aksepte nou fot e fer bann sanzman.

Annou devlop “Pasyans Zob”

Liv Zob i fer kler ki Bondye pa responsab pour soufrans bann imen. Me se Satan. Vi ki Bondye i permet soufrans lo later, sa i donn nou en loportinite pour prouve ki napa pli bon lotorite ki lotorite Zeova e ki nou kapab reste fidel menm dan problenm.

Parey Zob, tou bann ki kontan Zeova pou pas dan bann tes ek leprev. Lavi Zob i montre nou ki i posib pour nou reste fidel. I osi rapel nou ki pou annan en lafen avek nou problenm. Dan Zak 5:11 nou lir: “Zot in tann koz lo pasyans Zob, e zot in war sa ki Senyer in fer pour li alafen.” Zeova ti rekonpans Zob akoz i ti reste fidel. (Zob 42:10-17) Pa nou kontan nou osi pour annan sa lespwar merveye pour viv pour touzour lo later! Alor parey Zob, annou determinen pour reste fidel.—Ebre 11:6.

[Not anba lo paz]

[Portre lo paz 32]

Ki nou kapab aprann avek “pasyans Zob”?