Konpran Labib—En Loportinite ki kapab vin pour ou

LABIB i kontyen laverite ki presye sorti kot Bondye. I dir nou akoz nou la lo later, akoz imen pe soufer e ki annan devan nou. I montre nou ki mannyer pour trouv lazwa dan lavi, konman pour fer zanmi e ki mannyer pour rezourd problenm. Pli enportan ankor Labib i ansenny nou lo nou Kreater, Zeova, li ki nou Papa dan lesyel. Ler nou konn tousala, sa i fer nou zwaye e nou annan en bi dan lavi.

Labib i konpar konnesans lo Bondye avek manze. Zezi ti dir: “Zonm pa viv zis lo dipen tousel me lo tou parol ki sorti dan labous Bondye.” (Matye 4:4; Ebre 5:12-14) Zis parey nou bezwen manz keksoz ki bon pour lasante pour nou reste vivan, nou bezwen lir Parol Bondye regilyerman si nou anvi ganny lavi eternel parey Bondye in promet nou.

Nou santi nou satisfe ler nou pe manz en bon repa, akoz Zeova in kree nou dan sa fason e osi akoz i konble en bezwen enportan dan nou lavi. Annefe, nou annan en lot bezwen enportan ki nou devret pran swen avek si nou anvi viv ere. Zezi ti dir: “Ere bann ki konsyan zot bezwen spirityel.” (Matye 5:3, NW) Si nou pran swen nou bezwen spirityel par pran konnesans lo Parol Bondye, nou kapab santi nou ere.

I vre ki serten dimoun i vwar li difisil pour konpran Labib. Par egzanp, petet ou pou bezwen led pour konpran bann verse ki senbolik e ki koz lo bann koutim ki zanmen ou’n deza tande. I osi annan bann profesi ki’n ganny ekrir dan en fason senbolik, e pour kapab konpran zot ou pou bezwen get lezot  verse ki pe koz lo sa menm size. (Danyel 7:1-7; Revelasyon 13:1, 2) Me kantmenm sa, i pa en mister pour ou konpran Labib. Ki mannyer ou kapab asire ki sa i vre?

En Loportinite pour tou Dimoun

Labib i Parol Bondye. Dan Labib Bondye i eksplik nou son plan. Eski Bondye ti pou donn nou en liv ki enposib konpran oubyen zis bann ki annan gran ledikasyon ki kapab konpran? Non, Zeova pa pou zanmen fer en keksoz parey. Zezi Kri ti dir: “Lekel sa papa parmi zot, ki si son garson i demann li en pwason, i a donn li en serpan olye en pwason; oubyen si i demann li en dizef, i a donn li en skorpyon? Si, zot, move konman zot ete, zot kapab donn bon keksoz zot zanfan, i annan plis rezon pour ki zot Papa ki dan lesyel pou donn son Lespri Sen tou bann ki demann li.” (Lik 11:11-13) Anfet ou kapab asire ki i posib pour ou konpran Labib, e si ou senserman priy Bondye, i pou donn ou sa led ki ou bezwen pour konpran son Parol. Menm bann zanfan i kapab konpran bann lansennyman debaz dan Labib!—2 Timote 3:15.

Menm si i demann zefor pour konpran Labib, kan nou fer sa nou pou vreman ganny en kantite lankourazman. Apre son rezireksyon, Zezi ti aparet avek de son disip e i ti koz lo bann profesi Labib avek zot. Sa resi dan Lik i dir: “Konmansan avek bann liv Moiz ek tou liv bann profet, Zezi ti eksplik zot sa ki Lekritir in dir lo son size.” Ki lefe sa ti annan lo sa de disip? Aswar kan zot ti pe reflesir lo sa ki zot ti’n aprann, zot ti dir kanmarad: “Pa i vre ki ou ti a krwar ki ti annan en dife ki ti pe brile anndan nou ler i ti pe koz avek nou lo semen, kan i ti pe eksplik nou Lekritir?” (Lik 24:13-32) Ler zot ti konpran Parol Bondye sa ti fer zot zwaye, akoz zot lafwa dan promes Bondye ti vin pli for e i ti fer zot get lavenir avek lespwar.

Ler ou konpran Parol Bondye i en keksoz ki eksitan e ou menm ki benefisye, ou santi ou satisfe zis parey ler ou pe manz en bon lasyet manze, i pa vin en fardo lo ou. Ki ou bezwen fer pour ganny sa konnesans? Sa lot lartik pou montre ou ki mannyer ou kapab trouv lazwa ler ou ganny “konnesans Bondye.”—Proverb 2:1-5.

[Portre lo paz 4]

Parey en bon papa, Zeova i anvoy son lespri sen pour ed nou konpran Labib