Bann Pwen enteresan dan premye Liv Psonm
Parol Zeova i vivan
Bann Pwen enteresan dan premye Liv Psonm
KI SA pli bon tit pour en liv dan Labib ki annan preski zis bann louanz pour nou Kreater Zeova ladan? Napa en lot tit ki pli apropriye ki Psonm oubyen Louanz. Dan sa pli gran liv Labib, nou kapab trouv bann zoli sanson ki koz lo bann zoli kalite ki Bondye i annan e lo bann keksoz enpresyonan ki i’n fer. I osi kontyen plizyer profesi. Bokou sanson i eksprim ki mannyer zot ekriven ti pe santi ler zot ti dan moman difisil. Zot eksprim sa bann santiman lo bann keksoz ki’n arive diran en peryod letan apepre mil an, sa depi letan profet Moiz ziska letan apre bann Izraelit ti sorti legzil. Bann ekriven ti Moiz, Lerwa David, ek lezot. I paret ki pret Ezra ki ti aranz sa liv dan son laform final.
Depi byen lontan liv Psonm in ganny divize dan senk koleksyon oubyen seksyon bann sanson: (1) Psonm 1-41; (2) Psonm 42-72; (3) Psonm 73-89; (4) Psonm 90-106; ek (5) Psonm 107-150. Dan sa lartik nou pou egzamin sa premye koleksyon. Dan sa seksyon zis trwa psonm ki pa’n ganny konpoze par Lerwa David dan ansyen Izrael. Nou pa konnen lekel ki ti konpoz Psonm 1, 10, ek 33.
“MON BONDYE I MON ROS”
Apre ki premye psonm i dir ki sa dimoun ki pran plezir dan lalwa Zeova i ere, sa enn dezyenm i koz spesifikman lo Rwayonm. * Dan sa premye seksyon, i annan en kantite siplikasyon dan sa bann psonm. Par egzanp, Psonm 3-5, 7, 12, 13, ek 17, i bann siplikasyon pour ganny delivre avek lennmi. Psonm 8 i montre grander Zeova an konparezon avek enferyorite zonm.
David i dekrir Zeova konman Protekter son pep, ler i sante: “Mon Bondye i mon ros. Mon pou pran refiz dan li.” (Psonm 18:2) Dan Psonm 19, Zeova i ganny loue konman Kreater ek sa enn ki donn lalwa, konman Sover dan Psonm 20, e konman Sover son Lerwa swazir dan Psonm 21. Psonm 23 i dekrir li konman sa Gran Berze, tandis ki Psonm 24 i montre li konman en Lerwa glorye.
Larepons pour bann Kestyon lo Labib:
2:1, 2—Ki sa “keksoz anven” bann nasyon i kontinyen mantoun? Sa keksoz “anven” i ki bann gouvernman imen i kontinyen oule prezerv zot prop lotorite. Sa i anven akoz zot plan pa pou abouti dan nanryen. Eski bann nasyon i krwar zot kapab vreman reisi ler zot debout “kont Zeova e kont sa enn ki i’n swazir”?
2:7—Lekel “desizyon Zeova”? Sa desizyon i sa lalyans pour en Rwayonm, ki Zeova ti fer avek son Garson, Zezi Kri.—Lik 22:28, 29.
2:12—Dan ki fason dirizan bann nasyon i “anbras son garson”? Dan letan Labib, anbrase ti en lekspresyon pour montre lanmitye ek fidelite. I ti en fason pour swet labyenveni bann envite. Bondye i demann bann lerwa lo later pour anbras Garson, savedir rekonnet li konman Lerwa dan Rwayonm Bondye.
3:pti lentrodiksyon—Akoz serten Psonm i annan soutit? Parler soutit i idantifye lekel sa ekriven oubyen donn lenformasyon lo sirkonstans ki sa psonm ti ganny konpoze, parey i leka avek Psonm 3. Petet osi sa soutit i eksplik bi oubyen fason pour servi serten sanson (Psonm 4 ek 5) osi byen donn lenstriksyon mizikal (Psonm 6).
3:2—Kwa sa “Selah”? I posib ki sa mo i reprezant en poz ki zis bann santer ti bezwen fer oubyen santer ek mizisyen ansanm, pour kapab fer en refleksyon an silans. Sa poz ti ganny servi pour met plis lanfaz lo sa panse oubyen santiman ki ti’n ganny eksprimen. Pa fodre lir sa mo aotvwa ler pe lir an piblik bann Psonm.
11:3—Ki bann fondasyon ki ganny demolir? Sa i bann fondasyon ki sosyete imen i repoz lo la setadir lalwa, lord, ek lazistis. Ler sa bann keksoz pa pe fonksyonn byen i pou annan dezord sosyal e pou napa lazistis. Dan bann sitiasyon koumsa, “bann dimoun ki drwat” i bezwen met tou zot konfyans dan Bondye.—Psonm 11:4-7.
21:3—Ki “en kouronn lor rafinen” i sinifye? Labib pa dir si sa kouronn ti literal oubyen senbolik pour endik laglwar ki David ti gannyen akoz son kantite laviktwar. Me dan en fason profetik sa verse i refer avek sa kouronn konman lotorite ki Zezi ti gannyen konman lerwa an 1914. Lefe ki sa kouronn i fer avek lor, sa i montre ki son dominasyon i en nivo pli siperyer ki tou.
22:1, 2—Pour ki rezon David ti’n kapab santi ki Zeova ti’n abandonn li? David ti telman anba bokou presyon akoz son bann lennmi, ki i ti santi konmsi son ‘leker ti parey lasir e ti fonn dan li.’ (Psonm 22:14) Petet i ti krwar ki Zeova ti’n abandonn li. Zezi osi ti santi sa fason ler zot ti klout li lo poto. (Matye 27:46) Parol David i montre son reaksyon konman en imen dan son sitiasyon dezespere. Me ler nou get son lapriyer dan Psonm 22:16-21, i evidan ki David pa ti’n perdi lafwa dan Bondye.
Leson pour nou:
11:1. Fodre pa asosye avek sa bann ki pa kontan Zeova.—1 Korentyen 15:33.
1:2. Toulezour nou devret mazin bann keksoz spirityel.—Matye 4:4.
4:4. Ler nou ankoler oubyen ofanse, nou byen reazir si nou kontrol nou lalang, koumsa nou pa pou dir en keksoz ki nou pou regrete plitar.—Efezyen 4:26.
4:5. Nou sakrifis ki nou fer dan ladorasyon Zeova i vin “bann sakrifis ladrwatir” si nou fer li avek bon motivasyon e nou lavi i an armoni avek sa ki Zeova i ekspekte.
6:5. Eski i kapab annan en pli bon rezon pour anvi reste vivan?—Psonm 115:17.
9:12. Zeova i gete si i annan versman disan pour li pini sa ki koupab, me i mazin “leokri bann ki aflize.”
15:2, 3; 24:3-5. Bann vre adorater i bezwen koz laverite e evit bann fo serman ek kalonmni.
15:4. Amwen ki nou realize ki nou’n fer en promes ki kont Labib, me si non nou devret fer tou sa ki nou kapab pour akonpli nou parol, menm si i difisil pour fer li.
15:5. Nou ki ador Zeova, nou bezwen veye pour pa mal servi larzan.
17:14, 15. “Bann zonm sa sistenm” i dedye zot lafors pour annan en bon nivo lavi, annan en fanmiy, e kit deryer en leritaz. David li ti pli enterese pour fer en bon non avek Bondye pour ki i ‘vwar son figir,’ oubyen ganny faver Zeova. Ler i “leve” oubyen konsyan promes ek lasirans Zeova, David ti pou santi ‘satisfe pour vwar Son laform,’ savedir kontan ki Zeova ti avek li. Parey David, eski pa nou devret met nou leker lo keksoz spirityel?
19:1-6. Si kreasyon, ki pa ni kapab koze oubyen rezonnen, i donn laglwar Zeova, ki kantite plis nou devret fer, nou ki kapab mazinen, koze e adore?—Revelasyon 4:11.
19:7-11. Pa sa ki Zeova i ekspekte avek nou i vreman bon pour nou!
19:12, 13. Bann lerer ek larogans i bann pese ki nou devret evite.
19:14. Nou devret mazinen pour pa zis vey sa ki nou fer me osi sa ki nou dir e panse.
“AKOZ MON FIDELITE OU’N SOUTENIR MWAN”
Dan sa de premye psonm dan sa seksyon, David i fer resorti son dezir senser ek son determinasyon pour gard son fidelite. I sante: “Mwan, mon pou mars dan en fason san defo.” (Psonm 26:11) Ler i ti priy pour demann pardon, David ti admet: “Ler mon ti reste trankil mon lezo ti ize par mon zemisman toudilon lazournen.” (Psonm 32:3) Pour bann ki fidel avek Zeova, David i donn sa lasirans: “Lizye Zeova i lo bann ki drwat, e i antann zot kan zot apel li pour led.”—Psonm 34:15.
Sa konsey ki trouve dan Psonm 37 ti vreman annan bokou valer pour bann Izraelit e i leka pour nou osi, ki pe viv dan “bann dernyen zour” sa lemonn! (2 Timote 3:1-5) Psonm 40:7, 8 i fer resorti en profesi lo Zezi Kri: “La mon la, dan roulo Lekritir in ganny ekrir lo mwan. O mon Bondye, mon’n pran plezir pour fer ou lavolonte, e ou lalwa i oprofon dan mwan.” Dan dernyen psonm dan sa seksyon, i montre ki David ti demann led Zeova pandan bann lannen difisil apre son pese avek Batseba. I sante: “Mwan, mon pou mars dan en fason san defo.”—Psonm 41:12.
Larepons pour bann Kestyon lo Labib:
26:6—Parey David, ki mannyer senbolikman nou mars otour lotel Zeova? Lotel i reprezant lavolonte Bondye pour aksepte sakrifis Zezi Kri pour sov limanite. (Ebre 8:5; 10:5-10) Nou mars otour lotel Zeova par montre lafwa dan sa sakrifis.
29:3-9—Ler lavwa Zeova i ganny konpare avek en loraz ki fer per, ki sa i reprezante? Sa i reprezant pa lot ki pwisans ekstraordiner Zeova!
31:23—Ki mannyer en dimoun arogan i ganny rekonpanse en kantite? Son rekonpans la i pinisyon. Ler en dimoun drwat i fer en fot envolonterman i ganny son rekonpans dan laform disiplin ki sorti kot Zeova. Lefe ki en dimoun arogan pa arete fer sa ki mal, i ganny rekonpanse en kantite par pinisyon sever.—Proverb 11:31; 1 Pyer 4:18.
33:6; not anba lo paz —Kisisa “lespri,” oubyen “souf” sorti dan labous Zeova? Sa lespri i lafors aktif Zeova, oubyen lespri sen, ki i ti servi pour kree sa lesyel ki nou vwar. (Zenez 1:1, 2) I ganny apele lespri sorti dan son labous akoz i parey en souf pwisan ki sorti pour al akonpli en keksoz dan lwen.
35:19—Ki savedir sa ki David ti demande pour pa les sa bann ki ay li bat zot lizye? Bat lizye ti kapab endike ki bann lennmi David ti pe pran plezir lefe ki zot move plan kont li ti pe reisi. David ti demande ki sa pa arive.
Leson pour nou:
26:4. Nou montre ki nou annan lasazes ler nou pa frekant dimoun ki kasyet sa ki zot vreman ete dan bann chat room lo Internet, kanmarad lekol oubyen koleg travay ki fer krwar i nou zanmi avek move lentansyon, bann fo ansennyan ki pretann zot senser, ek bann ki annan de kalite lavi.
26:7, 12; 35:18; 40:9. Devan lezot dan nou renyon nou devret loue Zeova.
26:8; 27:4. Eski nou kontan asiste bann renyon?
26:11. Menm si David ti eksprim son determinasyon pour gard son fidelite, i ti osi fer en demann pour ganny delivre avek pese. Wi, menm si nou enparfe nou kapab reste fidel.
29:10; not anba lo paz. Sa lekspresyon Zeova pe asiz lo “deliz,” oubyen “losean lesyel,” i endike ki i annan kontrol total lo son pouvwar.
30:5. Lanmour me pa lakoler i kalite pli dominan dan Zeova.
32:9. Zeova pa oule nou fer parey en seval oubyen en bourik ki obeir akoz en labrid oubyen en fwet. Okontrer, i anvi ki nou swazir pour obeir li akoz nou konpran byen son lavolonte.
33:17-19. Napa okenn laranzman ki zonm in fer menm si sa laranzman i vreman bon, ki kapab sov nou. Nou devret met nou konfyans dan Zeova e dan son Rwayonm.
34:10. Sa i en zoli lasirans pour tou bann ki met lentere Rwayonm Bondye premye dan zot lavi!
39:1, 2. Ler bann move dimoun i rod lenformasyon pour kapab fer ditor nou bann frer ek ser, i bon ki nou bar nou labous e reste trankil.
40:1, 2. Annan lespwar dan Zeova i kapab ed nou fer fas avek depresyon e konmsi i tir nou dan ‘en trou fon, dan en trou labou.’
40:5, 12. Ni maler oubyen febles personnel, menm si i kapab en kantite, pa pou vin tro bokou pour nou siporte, si nou toultan mazinen ki nou benediksyon i ‘bokou plis ki nou kapab rakonte.’
“Ki Zeova i ganny beni”
Sa premye koleksyon 41 psonm i vreman rekonfortan e ankourazan! Ki swa nou pe soufer akoz leprev oubyen trouble par en move konsyans, nou kapab ganny lafors ek lankourazman dan sa porsyon Parol Bondye ki pwisan. (Ebre 4:12) Dan sa bann psonm i annan bann bon gidans pour nou dan lavi. Plizyer fwa nou ganny sa lasirans ki nenport ki difikilte nou gannyen, Zeova pa pou abandonn nou.
Sa premye koleksyon bann psonm i fini avek sa parol: “Beni Zeova Bondye Izrael depi letan endefini menm pour letan endefini. Amenn e Amenn.” (Psonm 41:13) Apre ki nou’n egzamin sa bann psonm, eski pa nou santi nou anvi beni oubyen loue, Zeova?
[Not anba lo paz]
[Caption on page 30]
Si kreasyon otour nou i donn laglwar Zeova, ki kantite plis nou devret fer li!
[Kot foto i sorti lo paz 29]
Zetwal: Courtesy United States Naval Observatory
[Portre lo paz 29]
Toulezour nou devret mazin bann keksoz spirityel
[Portre lo paz 31]
David ti konpoz laplipar sa premye 41 psonm
[Kot foto i sorti lo paz 31]
Zetwal, paz 30, 31 ek 32: Courtesy United States Naval Observatory
[Portre lo paz 32]
Eski ou konnen dan ki psonm Zeova i ganny reprezante konman sa Gran Berze?