Resers pour viv eternelman

DEPI byen boner dan listwar, imen in touzour anvi viv pour touzour. Ziska prezan sa pa ankor vin en realite akoz personn pa’n reisi konkerir lanmor. Me resaman, bann resers dan domenn medikal in redonn dimoun sa lespwar ki i vreman posib pour prolonz lavi imen lo en bon degre. Annou egzaminen ki pe pase dan plizyer domenn ki pe fer bann resers syantifik.

Bann biolozis pe fer tes avek en enzyme ki apel telomerase, avek bi pour esey fer bann selil kontinyen renouvle zot lekor pour plis letan ankor. Bann syantis i konnen ki bann vye selil ki’n deteryore i mor e ganny ranplase par bann nouvo selil. Anfet, preski tou keksoz dan lekor imen i ganny renouvle plizyer fwa toudilon lavi en dimoun. Bann serser i krwar ki si sa prosesis kot bann keksoz dan nou lekor i ganny renouvle ti prolonze, “lekor imen ti pou kapab renouvle son lekor pour en kantite letan, menm pour touzour.”

Tretman klonaz, ki en seksyon ranpli avek kontrovers dan domenn medikal, ti pou kapab donn bann pasyan nouvo lefwa, ronnyon, oubyen leker ki san poursan konpatib pour transplantasyon. Sa bann lorgann i kapab ganny fer par servi selil sa pasyan.

Bann serser ki travay avek nanotechnology, setadir teknolozi ki servi bann keksoz ki selman kapab ganny obzerve par mikroskop, i dir ki pou annan en letan kot dokter pou kapab transfer bann robot groser en selil dan disan pour rod e detri bann selil kanser ek bann bakteri danzere. Serten i krwar ki sa ansanm avek sa terapi zenetik, pou en zour permet lekor imen soutenir son lekor pour en letan endefini.

En lot domenn se prezerv bann lekor mor dan en landrwa ki vreman fre. Rezon par deryer sa i pour prezerv zot ziska ki progre dan domenn medikal i permet bann dokter geri bann maladi, retir lefe ki lavyeyes i anmennen, e redonn bann mor lavi ek lasante. American Journal of Geriatric Psychiatry i dekrir sa konman “en pratik modern kot dimoun i ganny anbonmen parey ti ganny fer dan letan lontan Lezip.”

Lefe ki imen pe kontinyen fer resers pour anpes zot mor, sa i montre ki pour zot lanmor i en keksoz ki difisil pour aksepte. Eski i vreman posib pour imen viv eternelman en zour? Ki Labib i dir lo sa size? Lartik swivan pou donn larepons.