Reste dan Lanmour Bondye!
Reste dan Lanmour Bondye!
“Bann byenneme, . . . reste dan lanmour Bondye, an atandan . . . lavi eternel.”—ZID 20, 21.
1, 2. Ki mannyer ou kapab reste dan lanmour Bondye?
ZEOVA i telman kontan bann imen ki i ti donn son sel Garson pour ki bann ki demontre lafwa dan li, i a kapab ganny lavi eternel. (Zan 3:16) Pa i ekstraordiner pour santi ki Zeova i kontan ou koumsa! Si ou en serviter Zeova, ou pou sirman anvi ki Zeova i kontan ou pour touzour.
2 Disip Zid i montre konman ou kapab reste dan lanmour Bondye. I ti ekrir: “Kontinyen fer progre dan zot lafwa ki tre sen, e priye par Sent-Espri. Reste dan lanmour Bondye, an atandan ki nou Senyer Zezi-Kri, dan son labonte, i donn zot lavi eternel.” (Zid 20, 21) Etidye Parol Bondye e anons sa bon Nouvel i ed ou batir lo “lafwa ki tre sen” setadir lo bann lansennyman Kretyen. Pour ou reste dan lanmour Bondye, ou bezwen priye ‘par lespri sen,’ oubyen anba son lenfliyans. Ou bezwen osi demontre lafwa dan ranson Zezi Kri si ou oule resevwar kado lavi eternel.—1 Zan 4:10.
3. Akoz serten i nepli Temwen Zeova?
3 Serten ki ti deza annan sa lafwa pa’n reste dan lanmour Bondye. Zot nepli Temwen Zeova, akoz zot in deside pour kontinyen fer sa ki mal. Ki mannyer ou kapab evite fer parey zot? Si ou reflesir lo sa bann pwen swivan, sa pou anpes ou fer pese e reste dan lanmour Bondye.
Demontre ou Lanmour pour Bondye
4. Ki kantite enportan obeir Bondye i ete?
4 Pour demontre ou lanmour pour Bondye, ou bezwen obeir li. (Matye 22:37) Zapot Zan ti ekrir: “La lanmour Bondye: ki nou obei son konmannman; e son bann konmannman i pa en fardo.” (1 Zan 5:3) Ler ou abitye obeir Bondye, sa i kapab ed ou reziste bann tantasyon e ed ou reste zwaye. Dan en Psonm, i dir: “Byennere sa zonm ki pa’n swiv konsey bann dimoun mesan, . . . me i pran plezir dan lalwa Zeova.”—Psonm 1:1, 2.
5. Lanmour pour Bondye pou pous ou pour fer kwa?
5 Ou lanmour pour Zeova pou pous ou pour pa fer en pese grav ki ti pou sali son non. Agour ti dir dan en lapriyer: “Pa donn mwan povrete ni larises. Les mwan devor zis sa ki mon bezwen manze, pangar mon rasazye e vreman rezet ou e dir: ‘Lekel Zeova?’ e pangar mon vin pov e vreman vole e atak non Bondye.” (Proverb 30:1, 8, 9) Determinen pour pa “atak non Bondye” par anmenn en move repitasyon lo li par nou move kondwit. Okontrer, esey fer ou mye pour fer sa ki drwat ki anmenn laglwar lo li.—Psonm 86:12.
6. Ki i kapab arive si ou volonterman fer sa ki mal?
6 Priy regilyerman ou Papa lanmour dan lesyel pour ki i ed ou reziste bann tantasyon pour fer pese. (Matye 6:13; Romen 12:12) Pour ki ou lapriyer i ganny ekoute, kontinyen swiv bann konsey sorti kot Bondye. (1 Pyer 3:7) Si ou volonterman pratik lemal, konsekans pou vreman terib akoz Zeova pou fer konmsi i pe bar avek en manman nyaz, lapriyer bann ki rebel kont li pour ki zot pa ariv kot li. (Lamantasyon 3:42-44) Alors demontre limilite, e priy Zeova ki ou pa fer nanryen ki ti a kapab anpes ou kominik avek Bondye dan lapriyer.—2 Korentyen 13:7.
Demontre ou Lanmour pour Garson Bondye
7, 8. Ki mannyer swiv konsey Zezi i kapab ed en dimoun pa fer sa ki mal?
7 Demontre ou lanmour pour Zezi Kri par obeir son bann komannman pou anpes ou pratik sa ki mal. Zezi ti dir: “Si zot obei mon bann konmannman, zot pou reste dan mon lanmour, parey mwan, mon’n obei konmannman mon Papa e mon reste dan son lanmour.” (Zan 15:10) Ki mannyer aplik parol Zezi i kapab ed ou pour reste dan lanmour Bondye?
8 Pran aker parol Zezi i kapab ed ou pour reste moralman drwat. Lalwa Bondye pour pep Izrael ti dir: “Ou pa devret komet adilter.” (Egzod 20:14) Me Zezi ti donn en prensip par deryer sa komannman ler i ti dir: “En dimoun ki get madanm en lot zonm avek dezir in deza komet adilter avek li dan son leker.” (Matye 5:27, 28) Zapot Pyer ti dir ki serten dan kongregasyon premye syek, ‘zot regar ti ranpli avek dezir pour fer adilter’ e zot ti “atir bann ki feb dan zot pyez.” (2 Pyer 2:14) Me ou kapab diferan avek zot, ou kapab pa tonm dan bann pese seksyel si ou kontan e obeir Bondye ek Kris e si ou determinen pour gard en bon relasyon avek zot.
Les Lespri Zeova diriz ou
9. Konsernan lespri sen, ki i kapab arive si en dimoun i kontinyen fer sa ki mal?
9 Priy Bondye pour ganny son lespri sen, e les sa lafors diriz ou. (Lik 11:13; Galat 5:19-25) Si ou kontinyen fer sa ki mal, Bondye pou kapab retir son lespri lo ou. Rafal David ti fer pese avek Bat-Seba, i ti sipliy Bondye: “Pa tir mwan devan ou figir; silvouple pa retir ou lespri sen lo mwan.” (Psonm 51:11) Lerwa Sail li ti perdi lespri Bondye akoz i ti fer pese e i pa ti repantir. Sa ti ler i ti ofer en lofrann brile e i pa ti detri tou bann zannimo, mouton, kabri ek bef, e osi lerwa bann Amalekit. Apre sa, Zeova ti retir son lespri sen lo Sail.—1 Samyel 13:1-14; 15:1-35; 16:14-23.
10. Akoz nou devret tir net sa nide pour kontinyen fer pese?
10 Tir net dan ou lespri sa nide pour kontinyen fer pese. Zapot Pol ti ekrir: “Si nou kontinyen pese [“volonterman,” NW] apre ki nou’n konn laverite, i pou nepli annan sakrifis ki kapab fer disparet nou pese.” (Ebre 10:26-31) Pa i ti pou vreman terib si nou ti arive fer pese ziska sa degre!
Demontre en Lanmour senser pour lezot
11, 12. Dan ki fason lanmour ek respe pou anpes en dimoun pour annan en move kondwit seksyel?
11 Lanmour pour lezot pou anpes ou pour fer bann fot seksyel. (Matye 22:39) En tel lanmour pou pous ou pour protez ou leker pour ki ou pa anvi vol lanmour ki en dimoun i annan pour sa enn ki i’n marye avek. Sa ti kapab anmenn nou lo semen adilter. (Proverb 4:23; Zeremi 4:14; 17:9, 10) Plito vin parey Zob, en zonm drwat, ki pa ti les li ganny tante pour konmans get get en lot fanm apard ki son madanm.—Zob 31:1.
12 Respe pour lefet ki maryaz i sakre i kapab ed ou evit fer en pese grav. Ti plan Bondye ki en maryaz onorab ek relasyon seksyel ti pou sa mwayen pour reprodwir. (Zenez 1:26-28) Pa bliye ki bann parti seksyel i annan pour fer avek transmet lavi e ki lavi i sakre. Bann ki fer fornikasyon oubyen adilter pe dezobei Bondye, abes relasyon seksyel, mank respe pour maryaz ki sakre, e fer pese kont zot prop lekor. (1 Korentyen 6:18) Me lanmour pour Bondye ek lezot e osi en latitid obeisan anver Bondye pou anpes en dimoun pour annan en move kondwit ki ti kapab fer li ganny ekskli dan kongregasyon.
13. Ki “keksoz ki annan valer” ki en dimoun imoral i detri?
13 Nou bezwen tir dan nou lespri sa bann move panse ki ti kapab fer nou fer soufer bann ki nou kontan. Proverb 29:3 i dir: “Sa enn ki asosye avek bann prostitye i detri bann keksoz ki annan valer.” En zonm ki fer adilter e ki pa repantir i detrir son relasyon avek Bondye e avek son fanmiy. Son madanm i annan en rezon valab pour li divorse. (Matye 19:9) Ki swa i sa msye ouswa sa madanm ki’n fer sa ki mal, en maryaz kase i kapab fer soufer en kantite sa konzwen inosan, bann zanfan ek lezot ankor. Pa ou pou dakor pour dir ki ler nou konn bann tel move konsekans i devret pous nou pour reziste lanvi pour fer sa ki mal?
14. Ki leson nou kapab tire dan Proverb 6:30-35 an sa ki konsern lemal?
14 En lot keksoz ki devret anpes en dimoun fer sa aksyon vreman egois, se ki napa nanryen ki ou kapab fer pour repar ditor ki ou’n fer ler ou fer adilter. Proverb 6:30-35 i dir ki nou kapab konpran en dimoun lafen ki vole, me nou pa aksepte en dimoun ki’n fer adilter akoz i annan en move motivasyon. I “pe detri son prop lavi.” Anba Lalwa Moiz, i ti pou ganny met amor. (Levitik 20:10) En dimoun ki komet adilter i fer lezot soufer zis pour satisfer son dezir seksyel egois, e si i pa repantir, i pa reste dan lanmour Bondye e i ganny ekskli dan kongregasyon Kretyen ki prop.
Gard en Konsyans kler
15. Ki kondisyon en konsyans ki’n ganny marke “avek en fer rouz”?
15 Pour nou reste dan lanmour Bondye, nou pa kapab les nou konsyans vin ensansib vizavi pese. I evidan ki nou pa devret aksepte bann standar moral degradan sa lemonn, e nou bezwen vey byen bann keksoz parey avek lekel nou asosye, sa ki nou lir oubyen lafason ki nou detann. Pol ti donn sa lavertisman: “Dan dernyen tan, serten dimoun pou abandonn lafwa pour atas zot avek bann lespri tronper, e swiv bann lansennyman demon. Zot pou les zot ganny anbete par lipokrizi bann manter ki’n ganny marke avek en fer rouz dan zot konsyans.” (1 Timote 4:1, 2) En konsyans ki ganny marke “avek en fer rouz,” i pou parey en sikatris kot ou nepli santi nanryen e i nepli annan okenn reaksyon. En konsyans parey pou nepli kapab averti nou pour elwanny nou avek bann ki’n rezet laverite e avek bann sitiasyon ki ti kapab fer nou abandonn nou lafwa.
16. Akoz i sitan enportan pour nou annan en konsyans kler?
16 En konsyans kler i neseser si nou oule ganny sove. (1 Pyer 3:21) Gras a nou lafwa dan disan ki Zezi in verse pour nou, nou konsyans i ganny pirifye avek nou bann travay initil, pour ‘nou [rann en servis sakre] Bondye vivan.’ (Ebre 9:13, 14) Si nou volonterman fer pese, sa pou sali nou konsyans e nou pou nepli en pep prop ki kalifye pour fer servis Bondye. (Tit 1:15) Me avek led Zeova, nou kapab gard en konsyans kler.
Lezot Fason pour evit fer sa ki mal
17. Ki lavantaz i annan pour ‘swiv Zeova konpletman’?
17 ‘Swiv Zeova konpletman, ’parey Kaleb ti fer dan lepok pep Izrael. (Deterononm 1:34-36) Fer sa ki Zeova i demann ou, e pa zanmen ni menm mazinen pour partisip ‘atab avek demon.’ (1 Korentyen 10:21) Rezet propagann Dyab. Avek rekonesans, manz manze spirityel ki nou ganny selman lo latab Zeova, e ou pa pou ganny anbete par bann fo ansennyan oubyen demon. (Efezyen 6:12; Zid 3, 4) Konsantre lo bann keksoz spirityel, parey letid Labib, bann renyon Kretyen ek predikasyon. Ou kapab asire ki ou pou ere si ou swiv Zeova konpletman e ou annan touzour bokou pour fer dan travay Senyer.—1 Korentyen 15:58.
18. Ki lefe lakrent pour Zeova pou annan lo ou kondwit?
18 Determinen pour “rann Bondye en servis sakre avek lakrent pour Bondye ek lafreyer.” (Ebre 12:28, NW) Lakrent pour Zeova pou anpes ou pour rebel kont li. I pou ed ou annan en kondwit ki an armoni avek konsey ki Pyer ti donn bann Kretyen swazir: “Si zot priy Bondye konman zot Papa, li ki pa fer okenn preferans, e ki ziz sak dimoun dapre sa ki i’n fer, montre dan zot kondwit ki zot annan respe pour li pandan letan ki reste zot lo later.”—1 Pyer 1:17.
19. Akoz ou devret toultan met an pratik sa ki ou aprann dan Parol Bondye?
19 Toultan met an pratik sa ki ou pe aprann dan Parol Bondye. Sa pou ed ou evite tonm dan en pese grav akoz ou pou parmi sa bann ki atraver “leksperyans zot konn fer diferans ant sa ki byen ek sa ki mal.” (Ebre 5:14) Olye pa tro tro fatig ou avek lafason ki ou koze oubyen ou kondwit, fer atansyon sa ki ou fer pour ki ou viv parey en dimoun saz, ki “servi byen tou bann lokazyon” dan sa move lemonn. “Fer tou zot posib pour zot konpran konman Senyer i oule zot azir” e kontinyen fer li.—Efezyen 5:15-17; 2 Pyer 3:17.
20. Akoz nou devret evite pour vin groker?
20 Rezet konpletman bann dezir egois oubyen voras pour sa ki pa pour ou. Enn sa dis komannman i dir: “Ou pa devret anvi [oubyen groker] lakaz ou prosen. Ou pa devret anvi madanm ou prosen, ni son lesklav zonm oubyen son lesklav fanm ni son toro ni son bourik ni okenn keksoz ki pour ou prosen.” (Egzod 20:17) Sa lalwa ti protez lakaz en dimoun, son madanm, serviter, zannimo ek lezot keksoz ankor. Me pli enportan parey Zezi ti dir, se ki groker sa ki pour lezot i sali en dimoun.—Mark 7:20-23.
21, 22. Ki prekosyon en Kretyen i kapab pran pour evit fer pese?
21 Pran bann prekosyon pour ki en move dezir pa anmenn ou dan pese. Disip Zak ti dir: “Tou dimoun i ganny tante ler i les li ganny antrennen e atire par son prop move dezir. Alor, move dezir enn fwa ki i’n ganny formen i donn nesans pese, e pese, ler in devlope, i anmenn lanmor.” (Zak 1:14, 15) Par egzanp si en dimoun ti annan en problenm avek bwar tro bokou dan lepase, i kapab deside pour napa okenn lalkol kot li. Pour evit tantasyon avek en dimoun lot sèks, en Kretyen i kapab vwar li neseser pour sanz lofis oubyen landrwa lanmenm kot i travay ouswa sanz louvraz.—Proverb 6:23-28.
22 Pa menm anvoy en lepa dan direksyon sa ki mal. Pwente oubyen mazin bann panse imoral i kapab fer ou tonm dan fornikasyon oubyen adilter. Koz bann pti lalang i kapab anmenn en dimoun pour pran labitid pour koz lalang tou lazournen. Konmans vol bann pti keksoz i kapab fer nou konsyans ensansib ziska finalman nou konmans vol bann keksoz pli enportan. Menm en serten lentere avek propagann bann ki’n rezet laverite i kapab anmenn en dimoun lo menm semen avek bann ki’n konpletman rezet Zeova.—Proverb 11:9; Revelasyon 21:8.
Be si nou’n fer en Pese?
23, 24. Ki rekonfor nou kapab gannyen atraver parol 2 Kronik 6:29, 30 ek Proverb 28:13?
23 Tou imen i fer pese. (Eklezyast 7:20) Me si ou’n fer en pese grav, ou kapab ganny rekonfor dan sa lapriyer ki Lerwa Salomon ti fer ler tanp Zeova ti ganny dedye. I ti dir: “Nenport lapriyer, nenport demann pour ganny faver delapar okenn zonm oubyen tou ou pep Izrael, akoz sakenn i konn son fleo ek son soufrans; ler i pou vreman priy avek son lanmen ouver anver sa lakaz alor ou ki dan lesyel, la kot ou reste, ou a ekout li e ou devret pardonn li e donn sakenn dapre son semen, akoz ou konn son leker (akoz zis ou ki konn leker garson bann imen).”—2 Kronik 6:29, 30.
24 Wi, Bondye i konn leker imen e i pare pour pardonnen. Proverb 28:13 i dir: “Sa enn ki pe kasyet son bann lofans pa pou reisi, me sa enn ki pe konfese e pe kit zot pou ganny demontre mizerikord.” Si en dimoun i repantir, konfes son fot e aret fer sa ki mal, i posib pour Bondye pardonn li. Si ou santi ou byen ba spirityelman, eski i annan lezot keksoz ki kapab ed ou pour reste dan lanmour Bondye?
Ki ou pou reponn?
• Ki mannyer nou kapab reste dan lanmour Bondye?
• Konman nou lanmour pour Bondye ek Kris i kapab ed nou pour rezet en move semen?
• Akoz lanmour senser pour lezot pou anpes nou fer en pese seksyel?
• Ki serten fason ki kapab ed nou rezet lemal?
[Kestyon]
[Portre lo paz 8]
Zid i montre nou konman pour reste dan lanmour Bondye
[Portre lo paz 9]
En maryaz kase i kapab fer soufer en kantite sa konzwen inosan e osi bann zanfan
[Portre lo paz 10]
Parey Kaleb, eski ou determinen pour ‘swiv Zeova konpletman’?
[Portre lo paz 11]
Priy regilyerman pour ganny led pour reziste tantasyon