Les Parol Bondye gid ou Lepa
Les Parol Bondye gid ou Lepa
“Ou parol i en lalanp pour mon lipye, e en lalimyer pour mon semen.” —PSONM 119:105.
1, 2. Akoz laplipar imen pa’n reisi trouv vre lape ek boner?
ESKI ou rapel en lokazyon kan ou ti bezwen demann en dimoun pour gid ou kot ou ti pe ale? Petet ou ti pros pour ariv kot ou destinasyon me ou pa ti sir konsernan bann dernyen pti sanzman dan direksyon semen ki ou ti pou pran. Oubyen i kapab ou ti’n konpletman perdi e ou ti bezwen sanz net direksyon ki ou ti’n pran. Dan tou le de ka, eski pa i ti pou saz pour swiv gidans en dimoun ki konn byen sa rezyon? Sa dimoun ti kapab ed ou pour ariv kot ou pe ale.
2 Pour plizyer milye lannen, imen an zeneral in esey viv zot lavi san rod led avek Bondye. Par depan lo zot menm, sa i fer bann imen enparfe napa okenn lespwar. Zot senpleman pa kapab trouv sa semen ki anmenn ver vre lape ek boner. Akoz zot pa’n kapab trouv sa vre lape ek boner? Plis ki 2,500 zan pase, profet Zeremi ti dir: “Mon konnen, O Zeova, ki semen en imen pa pour li. I pa pour en imen ki pe marse pour diriz son lepa.” (Zeremi 10:23) Nenport ki dimoun ki esey diriz son prop lepa san aksepte led avek en dimoun eksperyanse, pou definitivman fristre, akoz i pa pou konnen ki pou fer. Imen i vreman bezwen ganny gide!
3. Akoz Zeova i pli kalifye pour donn gidans bann imen, e kwa ki i’n promet pour fer?
3 Zeova i sa enn ki pli kalifye pour donn en tel direksyon. Akoz? Akoz plis ki nenport ki, i konpran ki mannyer imen in ganny fer. E i konn tre byen ki mannyer imen in sanz direksyon e zot in perdi. I osi konnen kwa ki neseser pour zot retourn lo sa bon semen. Deplis, konman nou Kreater, Zeova i toultan konnen kwa ki pli meyer pour nou. (Izai 48:17) Alor, nou kapab met tou nou konfyans dan son promes ki’n ganny rikorde dan Psonm 32:8: “Mon pou fer ou annan bon zizman e mon pou enstri ou dan sa semen ki ou devret pran. Mon lizye pou lo ou pour konsey ou.” Nou napa okenn dout konsernan sa, akoz Zeova i donn sa pli bon gidans. Me konman i gid nou?
4, 5. Ki mannyer sa ki Bondye in dir dan Labib i kapab gid nou?
4 Dan en lapriyer avek Zeova en psalmis ti dir: “Ou parol i en lalanp pour mon lipye, e en lalimyer pour mon semen.” (Psonm 119:105) Bann parol ek rapel Bondye i trouve dan Labib, e zot kapab ed nou sirmont bann lobstak ki nou kapab rankontre dan nou lavi. An realite, kan nou lir Labib e les li gid nou, personnelman nou pe eksperyans sa ki ganny dekrir dan Izai 30:21: “Ou zorey pou tann en parol deryer ou dir: ‘La sa semen. Mars lo la.’”
5 Me, remarke ki Psonm 119:105 i fer resorti sa de rol ki relye ansanm dan Parol Bondye. Premyerman i konman en lalanp pour nou lipye. Kan nou rankontre difikilte sak zour, bann prensip dan Labib i devret gid nou lepa pour nou fer bann desizyon ki saz e evite tonm dan pyez sa lemonn. Dezyenmman, bann rapel Bondye i ekler nou semen, i ed nou pour fer bann swa ki an armoni avek nou lespwar pour viv pour touzour dan sa Paradi ki Bondye in promet. Vi ki sa semen devan nou i byen eklere, nou pou kapab rekonnet bann konsekans, ki kapab bon oubyen move, depandan lo sa semen ki nou pran. (Romen 14:21; 1 Timote 6:9; Revelasyon 22:12) Annou vwar pli an detay ki mannyer sa ki Bondye in dir dan Labib i kapab vin en lalanp pour nou lipye e en lalimyer pour nou semen.
“En Lalanp pour mon Lipye”
6. Dan ki sirkonstans sa ki Bondye in dir dan Labib i vin en lalanp pour nou lipye?
6 Toulezour nou fer bann desizyon. Serten sa bann desizyon i paret pa tro enportan, me parfwa nou kapab tonm nen-a-nen avek en sitiasyon ki teste nou moralite, nou lonnekte, oubyen nou pozisyon pour pa siport okenn parti politik. Pour kapab byen reisi fer fas avek sa bann leprev, nou abilite pour reflesir in bezwen ganny byen antrennen pour kapab “konn fer diferans ant sa ki byen ek sa ki mal.” (Ebre 5:14) Ler nou ganny konnesans egzakt lo Parol Bondye e devlop en bon konprenezon lo son bann prensip, nou pe aprann devlop sa abilite pour reflesir pour ki nou fer bann desizyon ki fer plezir Bondye.—Proverb 3:21.
7. Eksplik en sitiasyon kot en Kretyen i kapab anvi asosye avek bann koleg travay ki pa Temwen.
7 Annou egzamin en legzanp. Eski ou en adilt ki pe senserman esey fer leker Zeova kontan? (Proverb 27:11) Si sa i leka, ou merit ganny felisite. Me pour en pti moman zis mazinen ki detrwa koleg travay i ofer ou en tiket pour al get en levennman sportif avek zot. Zot kontan pour travay ansanm avek ou e zot ti pou kontan pas letan avek ou an deor landrwa travay. Ou kapab annan sa lenpresyon ki zot pa bann move dimoun. Zot menm kapab annan serten bon prensip. Ki ou pou fer? Eski i pou annan okenn danze si ou aksepte sa lenvitasyon? Ki mannyer Parol Bondye i kapab ed ou fer en bon desizyon dan sa sitiasyon?
8. Ki prensip dan Labib ki ed nou pour rezonnen konsernan frekantasyon?
8 Annou egzamin detrwa prensip dan Labib. Sa enn premye ki kapab vin dan nou lespri i trouve dan 1 Korentyen 15:33, ki dir: “Move frekantasyon, i gat repitasyon.” Lefet ki nou swiv sa prensip eski sa i vedir ki nou bezwen evit bann ki pa temwen konpletman? Larepons Labib pour sa kestyon i non. Apre tou, zapot Pol li menm ti montre konsiderasyon ranpli avek lanmour pour “tou dimoun” enkli bann ki pa ti annan menm krwayans avek li. (1 Korentyen 9:22) Bann vre Kretyen i bezwen demontre en lentere dan lezot, enkli bann ki napa menm krwayans avek zot. (Romen 10:13-15) Anfet, ki mannyer nou kapab swiv sa konsey pour “fer dibyen tou dimoun” si nou evit bann dimoun ki kapab bezwen nou led?—Galat 6:10.
9. Ki konsey Labib ki kapab ed nou annan en pwennvi balanse dan nou relasyon avek nou koleg travay?
9 Kantmenm sa, i kler ki i annan en diferans ant vin amikal avek en koleg travay ek vin son bon zanmi. Se dan sa ka ki en lot prensip Labib i ganny enplike. Zapot Pol ti averti bann Kretyen: “Pa bezwen asosye zot avek bann non-krwaryan.” (2 Korentyen 6:14) Ki savedir sa lekspresyon “pa bezwen asosye”? Serten tradiksyon Labib i tradwi li konman “pa fer lekip,” oubyen “aret form bann relasyon ki pa apropriye.” Kan eski en relasyon avek en koleg travay i vin enn ki pa apropriye? Kan eski sa relasyon i desot limit e vin enn kot ou pe asosye avek en non-krwayan? Parol Bondye, Labib, i kapab diriz ou lepa dan sa sitiasyon.
10. (a) Ki mannyer Zezi ti swazir son bann zanmi? (b) Ki kestyon ki kapab ed en dimoun pour fer bann bon desizyon konsernan frekantasyon?
10 Annou egzamin legzanp Zezi, ki ti annan lanmour pour imen depi lepok zot ti ganny kree. (Proverb 8:31) Ler i ti lo later, i ti vreman pros avek son bann disip. (Zan 13:1) I ti menm “annan lanmour” pour en zonm ki ti dan fernwanr spirityelman. (Mark 10:17-22, NW) Me Zezi ti osi met bann limit byen kler kan i ti pe swazir lekel ki i ti pou vin pros avek. I pa ti vin pros avek dimoun ki ti napa sa lentere senser pour fer lavolonte son Papa. En fwa, Zezi ti dir: “Zot mon bann zanmi, si zot obei mon konmannman.” (Zan 15:14) I vre, ou kapab byen avek enn ou koleg travay. Me demann ou lekor: ‘Eski sa dimoun i pare pour swiv lord ki Zezi in donnen? Eski i oule aprann konsernan Zeova, sa enn ki Zezi ti ansenny nou pour adore? Eski i annan menm standar moral ki mwan mon annan konman en Kretyen?’ (Matye 4:10) Kan ou koz avek ou bann koleg travay e reste determinen pour met an aplikasyon bann standar Labib, larepons sa bann kestyon pou vin evidan.
11. Donn bann legzanp kot sa ki Bondye in dir dan Labib i devret gid nou lepa.
11 I annan plizyer lezot sitiasyon kot sa ki Bondye in dir dan Labib i kapab parey en lalanp pour nou lipye. Par egzanp, en Kretyen ki napa travay i kapab ganny ofer en plas travay ki i vreman bezwen. Parkont, sa travay i vreman demann bokou e si i aksepte li, i pou mank renyon tanzantan e i pa pou kapab fer lezot aktivite ki relye avek vre ladorasyon. (Psonm 37:25) Petet, en lot Kretyen li i pe ganny tante en kantite pour get bann divertisman ki kont bann prensip Labib. (Efezyen 4:17-19) Oubyen i kapab ki en lot li i ofans vitman akoz lenperfeksyon son bann frer ek ser Kretyen. (Kolosyen 3:13) Dan tou sa bann sitiasyon, nou devret les Parol Bondye vin en lalanp pour nou lipye. Anfet, par swiv bann prensip Labib, nou kapab reisi fer fas avek nenport ki kalite defi dan lavi. Parol Bondye i “itil pour ansennyen, pour koriz lerer, pour remet drwat, e pour formen pour viv byen selon Bondye.”—2 Timote 3:16.
“En Lalimyer pour mon Semen”
12. Ki mannyer sa ki Bondye in dir dan Labib i en lalimyer pour nou semen?
12 Psonm 119:105 i osi fer resorti ki sa ki Bondye in dir dan Labib i kapab ekler nou semen, kler sa santye ki devan nou. Nou konnen ki pou arive alavenir, akoz Labib i eksplike akoz sa lemonn i dan sa move kondisyon e ki pou arive avek li finalman. Wi, nou realize ki nou pe viv dan “bann dernyen zour” sa move lemonn. (2 Timote 3:1-5) Vi ki nou konnen ki pou arive alavenir, sa i devret annan en gran lefe lo ki mannyer nou viv nou lavi konmela menm. Zapot Pyer ti ekrir: “Parski tousala pou ganny detri, ki kalite lavi zot devre viv? Zot devre anmenn en lavi sen e annan respe pour Bondye, letan zot pe esper sa zour, an fezan zot mye pour fer sa zour vin pli vit.”—2 Pyer 3:11, 12.
13. Vi ki letan i kourt ki lefe sa i devret annan lo nou fason panse ek nou fason viv?
13 Lafason ki nou panse e viv nou lavi i devret reflekte sa konviksyon ferm ki nou annan, ki sa “lemonn pou disparet ek tou son bann dezir.” (1 Zan 2:17) Ler nou aplik bann gidans sorti dan Labib, sa pou ed nou fer bann desizyon saz konsernan nou lobzektif pour lavenir. Par egzanp, Zezi ti dir: “Rod plito Rwayonm Bondye ek son lazistis, e limenm i a donn zot anplis tou lezot keksoz osi.” (Matye 6:33) Pa i en plezir pour vwar en kantite zenn pe demontre zot lafwa dan parol Zezi par kontinyen fer servis aplentan! Lezot, enkli tou manm lafanmiy, in volonter pour al reste dan bann landrwa kot i annan en gran bezwen pour proklanmater.
14. Ki mannyer en fanmiy Kretyen ti agrandi zot minister?
14 Par egzanp, en fanmiy Kretyen kot an tou ti annan kat zot, zot ti kit Letazini e al Repiblik Dominiken pour servi dan en kongregasyon dan en lavil ki annan 50,000 zabitan. Ti annan apepre 130 proklanmater dan sa kongregasyon. Me le 12 Avril, 2006, apepre 1,300 dimoun ti asiste Memoryal lanmor Kris! Sa teritwar in telman “pare pour larekolt” ki zis apre senk mwan, sa fanmiy ti pe kondwir an tou 30 letid Labib. (Zan 4:35) Sa papa i eksplike: “I annan 30 frer ek ser dan sa kongregasyon ki’n vin isi pour ede. Apepre 20 i sorti Letazini, tandis ki larestan i sorti Bahamas, Kanada, Itali, Nouvel Zelann, ek Lespanny. Zot ti arive avek lantouzyasm pour partisip dan predikasyon e zot in kontribye en kantite pour fer bann frer dan Repiblik Dominiken annan sa menm lantouzyasm.”
15. Ki benediksyon ou’n gannyen lefe ki ou’n met bann keksoz spirityel premye dan ou lavi?
15 I vre, bokou pa kapab al dan en lot landrwa pour servi kot i annan en pli gran bezwen. Me sa bann ki pe servi dan sa bann teritwar, oubyen ki kapab aranz zot sitiasyon pour fer zot disponib, pou sirman ganny bokou benediksyon. Nenport ki landrwa ou akonpli ou servis pour Zeova, fer tou sa ki ou kapab pour ou eksperyans sa lazwa ki nou gannyen ler nou servi Zeova avek tou nou lafors. Si ou met bann keksoz spirityel premye dan ou lavi, Zeova i promet ki i pou ‘devid en benediksyon lo ou ziska ki i ava nepli annan ankor bezwen.’—Malaki 3:10.
Benefisye avek Gidans Zeova
16. Ki mannyer nou kapab benefisye ler nou les sa ki Bondye in dir dan Labib gid nou?
16 Parey nou’n vwar, sa ki Zeova in dir dan Labib i gid nou dan de fason ki relye avek kanmarad. Premyerman, zot parey en lalanp pour nou lipye. Zot ed nou pour al dan sa bon direksyon e gid nou ler nou annan bann desizyon pour fer. Dezyenmman, Parol Bondye i ekler nou semen, par permet nou vwar klerman sa ki devan nou. An retour, sa i ed nou pour swiv konsey zapot Pyer: “Gard zot lespri touzour alert, reste touzour vizilan e met tou zot lesperans dan lagras ki zot pou gannyen ler Zezi-Kri pou ganny revele.”—1 Pyer 1:13.
17. Ki mannyer letid Labib i kapab ed nou pour swiv gidans Bondye?
17 San okenn dout Zeova i donn nou son gidans. Kestyon i, eski ou pou soumet avek son gidans? Pour konpran gidans ki Zeova i donnen, fer li ou lobzektif pour lir Labib toulezour. Reflesir lo sa ki ou lir, esey konpran ki lavolonte Zeova dan sak sitiasyon, e mazin lo diferan fason ki ou kapab aplik sa ki ou’n lir dan ou lavi. (1 Timote 4:15) Apre, servi ou “kapasite pour rezonnen” ler ou fer bann desizyon personnel.—Romen 12:1, NW.
18. Ki benediksyon nou gannyen ler nou les Parol Bondye gid nou?
18 Si nou oule, bann prensip ki trouve dan Parol Bondye pou eklersi nou e donn nou sa gidans ki nou bezwen kan nou pran bann desizyon konsernan sa bon semen ki nou pou swiv. Nou kapab annan konfyans ki parol Zeova ki ganny rikorde dan Labib i fer “sa ki napa leksperyans saz.” (Psonm 19:7) Kan nou les Labib gid nou, nou pou annan en konsyans kler e nou pou satisfe akoz nou pe fer plezir Bondye. (1 Timote 1:18, 19) Si nou les sa ki Bondye in dir dan Labib gid nou lepa sak zour, Zeova pou rekonpans nou avek sa pli gran benediksyon, lavi eternel.—Zan 17:3.
Eski ou Rapel?
• Akoz i enportan pour les Zeova gid nou lepa?
• Dan ki fason sa ki Bondye in dir dan Labib i kapab vin en lalanp pour nou lipye?
• Ki mannyer sa ki Bondye in dir dan Labib i kapab vin en lalimyer pour nou semen?
• Ki mannyer letid Labib i kapab ed nou pour swiv gidans Bondye?
[Kestyon]
[Portre lo paz 19]
Kan ki i pa saz pour frekant en dimoun ki pa Temwen?
[Portre lo paz 20]
Bann zanmi pros Zezi ti sa bann ki ti fer lavolonte Zeova
[Portre lo paz 21]
Eski lafason ki nou viv i montre ki nou met keksoz spirityel premye dan nou lavi?