Eski Ou “Ris Devan Bondye”?
Eski Ou “Ris Devan Bondye”?
“La sa ki arive avek en dimoun ki ranmas en trezor pour limenm, me ki pa ris devan Bondye.”—LIK 12:21.
1, 2. (a) Pour ki keksoz dimoun in pare pour fer bann gran sakrifis? (b) Ki defi ek danze bann Kretyen i bezwen fer fas avek?
ROD en trezor pa zis en zwe ki zanfan kontan. Dan lavi reel, plizyer fwa dan diferan pei ek lepok, dimoun in rod trezor. Par egzanp, 19 vyenm syek, dimoun ti pare pour kit zot lakour ek zot fanmir pour fer en gran vwayaz pour al reste Lostrali, Sidafrik, Kanada, ek Letazini dan bann landrwa enkoni ouswa difisil pour zot rod lor ek larises. Wi, plizyer dimoun i pare pour pran bann gran risk pour zot ganny bann larises ki zot vreman anvi.
2 Menm si bokou dimoun pa vreman rod en trezor ozordi, zot bezwen travay dir pour ganny zot dipen. Dan sa lemonn, ganny sa ki nou bezwen pour viv i kapab difisil, fatigan, e menm rentan. I fasil pour sitan mazin sa ki nou bezwen parey manze, lenz ek landrwa reste ki finalman nou negliz oubyen menm oubliy sa ki pli enportan. (Romen 14:17) Zezi ti donn en legzanp oubyen parabol ki byen dekrir sa tandans imen. Nou kapab vwar sa dan Lik 12:16-21.
3. Rakont an bref parabol Zezi dan Lik 12:16-21.
3 Zezi ti donn sa legzanp rafal i ti koz lo pa vin groker, sa parol ki nou ti egzaminen en pti pe an detay dan lartik avan. Apre sa lavertisman pour pa vin groker, Zezi ti koz lo en zonm ris ki pa ti satisfe avek sa bann bon keksoz ki i ti deza annan dan son bann stor. Me i ti kas son bann stor e i fer bann ki pli gran pour li kapab met ankor plis keksoz ladan. Zis ler i ti met li pare pour li repoze e profit son bon lavi, Bondye ti dir li ki i pou mor, e ki tou sa bann bon keksoz ki i ti’n anmase pou al pour en lot. Alor Zezi ti konklir: “La sa ki arive avek en dimoun ki ranmas en trezor pour limenm, me ki pa ris devan Bondye.” (Lik 12:21) Ki leson nou kapab tire avek sa legzanp? Ki mannyer nou kapab aplik sa leson dan nou lavi?
Sa Zonm ti annan en Problenm
4. Ki kalite zonm ki ganny dekrir dan parabol Zezi?
4 Zezi i servi en legzanp familye. I entrodwir sa legzanp senpleman an dizan: “Ti annan en zonm ki ti annan en propriyete ki ti’n raport li en bon rekolt.” Zezi pa ti dir ki sa zonm ti ganny son larises par anbet oubyen vol lezot. Andotmo, Zezi pa ti dir ki sa zonm ti en move dimoun. Anfet, dapre sa ki Zezi ti dir, i paret ki sa zonm dan sa parabol ti’n travay dir. Omwen nou kapab dir ki sa zonm ti plàn son lavenir e i ti anmans son larzan pour demen, petet avek byennet son fanmir antet. Alor dapre pwennvi imen, sa zonm i kapab pe reprezant en dimoun ki travay dir e ki pran oserye son responsabilite.
5. Ki problenm sa zonm dan parabol Zezi ti annan?
5 An tou ka, Zezi ti dir ki sa zonm ti ris, ki vedir sa zonm ti deza annan en ta keksoz materyel. Parkont, parey Zezi ti dir, sa zonm ti annan en problenm. Son plantasyon ti’n raporte bokou plis ki i ti’n ekspekte, bokou plis ki sa ki i ti bezwen oubyen kapab okipe. Ki i ti merit fer?
6. Ki swa plizyer serviter Bondye i fer fas avek?
6 Ozordi, plizyer serviter Zeova i pas dan preski menm sitiasyon ki sa zonm ris. Bann vre Kretyen i fer zot mye pour zot onnet, travayan, e konsyansye dan zot travay. (Kolosyen 3:22, 23) Serten i anploye, lezot i annan zot prop biznes, e souvan zot fer byen e menm tre byen dan sa ki zot fer. Parler zot ganny en zoli loportinite ouswa en promosyon, e alor zot bezwen fer en swa. Eski zot devret aksepte sa loportinite e fer plis larzan ankor? Bann zenn Temwen osi i kapab pe fer byen lekol. Pour sa rezon, zot kapab ganny ofer bann labours aletranze pour resevwar plis ledikasyon ankor dan bann gran liniversite. Eski zot devret aksepte sa loportinite parey tou dimoun i fer?
7. Ki mannyer sa zonm dan parabol Zezi ti rezourd son problenm?
7 Prezan annou mazin ankor parabol Zezi. Ki sa zonm ris ti fer ler son plantasyon ti raport sitan bokou ki i ti napa landrwa pour li stor tou son rekolt? I ti deside pour kas son bann stor pour konstri bann stor pli gran pour li anmas tou sa bann legren ek tou sa bann bon keksoz an plis. I paret ki i ti satisfe avek son plan e sa ti fer li santi an sekirite akoz i ti dir: “Apre mon a dir dan mwanmenm, ‘rekolt ki ou’n ranmase i ase pour plizyer lannen; alor repoz ou, manze, bwar e anmize!’”—Lik 12:19.
Akoz “Enbesil”?
8. Ki sa laspe enportan ki sa zonm ris pa ti pran an konsiderasyon?
8 Selman, parey Zezi ti montre, plan sa zonm ris ti paret pe ofer sekirite pour lavenir, me i pa ti larealite. Wi, son plan ti paret fer sans me i ti’n oubliy en keksoz enportan, lavolonte Bondye. Sa zonm ti pe zis mazin li menm, ki mannyer i ti pou relaks, manze, bwar, diverti kontan. I ti panse vi ki i annan ‘bokou bon keksoz’ i pou osi kapab viv “plizyer lannen.” Me malerezman pour li, sa pa ti mars dapre son plan. Parey Zezi ti dir oparavan, “lavi en zonm pa depann lo larises ki i posede.” (Lik 12:15) Sa menm swar, tou sa ki sa zonm ti fer ti tonm dan delo, akoz Bondye ti dir li: “Enbesil! Tanto menm ou pou bezwen rann ou lam, lekel ki pou ganny tou sa ki ou’n ranmase?”—Lik 12:20.
9. Akoz Labib i dir sa zonm ris ti en lenbesil?
9 La nou’n ariv lo pwen prensipal sa parabol Zezi. Bondye ti dir sa zonm i en lenbesil. Exegetical Dictionary of the New Testament i eksplike ki sa mo dan langaz Grek i “toultan vedir en dimoun ki mank sa abilite pour konpran en sitiasyon.” I azoute ki dan sa parabol, Bondye i servi sa mo pour montre ki “plan bann dimoun ris pour lavenir i vreman dan vid.” Sa mo pe refer avek en dimoun ki pa neseserman bet me ki “i pa oule pran an konsiderasyon ki i bezwen depan lo Bondye.” Sa parabol Zezi i fer nou mazinen sa ki Zezi ti dir plitar dan premye syek avek bann Kretyen dan kongregasyon Laodise, Lazi miner: “Ou dir, mon ris, mon’n anrisi, e mon pa bezwen nanryen, san konnen ki ou malere, mizerab, pov, aveg e touni.”—Revelasyon 3:17.
10. Akoz annan bokou bon keksoz pa garanti nou ki nou pou viv pour “plizyer lannen”?
10 Nou bezwen pran aker sa legzanp. Eski nou kapab vin parey sa zonm par travay tre dir pour fer sir ki nou anmans ‘bokou bon keksoz’ me oubliy pour fer sa ki neseser pour viv “plizyer lannen”? (Zan 3:16; 17:3) Labib i dir: “Bann keksoz valer pa pou servi dan nanryen zour firer,” e “sa enn ki pe met son konfyans dan larises, pou tonbe.” (Proverb 11:4, 28) Pour sa rezon, Zezi ti dir en dernyen parol dan sa parabol: “La sa ki arive avek en dimoun ki ranmas en trezor pour limenm, me ki pa ris devan Bondye.”—Lik 12:21.
11. Akoz i pa vo lapenn plàn nou lavi par zis met nou konfyans ek lespwar dan keksoz materyel?
11 Ler Zezi ti dir “la sa ki arive,” i ti pe montre ki sa ki ti ariv sa zonm ris pou osi ariv avek bann ki pe plàn zot lavi selman par met zot lespwar ek konfyans zis dan bann keksoz materyel. Sa fot i pa sitan ki en dimoun in ‘anmas en trezor pour li menm,’ me ki i pa “ris devan Bondye.” Disip Zak ti donn en lavertisman preski menm parey ler i ti ekrir: “Ekoute, zot ki dir, ‘Ozordi ou demen nou pou al dan tel ou tel lavil, nou pou pas en an e nou pou fer tel komers e nou pou fer benefis.’ Zot ki pa ni menm konnen ki mannyer zot lavi pou ete demen.” Ki zot merit fer? “Zot devre dir, okontrer: ‘Si Senyer i oule, nou a viv e nou ava fer sa oubyen sa.’” (Zak 4:13-15) Nenport larises oubyen posesyon ki en dimoun i kapab annan, tousala pou anven amwen sa dimoun i ris devan Bondye. Alor, ki savedir vin ris devan Bondye?
Ris devan Bondye
12. Kwa ki fer nou ris devan Bondye?
12 Dan parol Zezi, vin ris devan Bondye i lekontrer avek anmas en trezor pour nou menm, andotmo vin ris materyelman. Pour sa rezon, Zezi ti dir ki nou premye bi dan lavi pa devret pour tay deryer larzan oubyen pour profite an plen avek sa ki nou posede. Okontrer, nou devret servi nou resours dan en fason kot nou amelyor oubyen batir nou relasyon avek Zeova. Se sa ki pou fer nou vin ris devan Bondye. Akoz? Akoz sa i ouver laport pour nou resevwar bokou benediksyon. Labib i dir nou: “Benediksyon Zeova—se sa ki fer ris, e i pa azout okenn douler avek.”—Proverb 10:22.
13. Ki mannyer benediksyon Zeova i ‘fer ris’?
13 Ler Zeova i donn bann benediksyon son pep, i toultan donn zot sa ki meyer. (Zak 1:17) Par egzanp, letan Zeova ti donn bann Izraelit en landrwa, i ti donn zot “en pei kot i koul dile ek dimyel.” Menm si Lezip ti’n osi ganny dekrir dan sa fason, sa pei ki Zeova ti donn zot ti diferan dan omwen en fason enportan. Moiz ti dir bann Izraelit: I “en pei ki Zeova ou Bondye pe pran swen avek.” Par sa parol, Zeova ti pe montre ki zot ti pou prospere parski se li menm ki ti pou pran swen avek zot. Osi lontan ki bann Izraelit ti pou reste fidel avek Zeova, zot ti pou ganny bokou benediksyon e zot ti pou viv en lavi bokou pli siperyer ki sa ki bann nasyon dan zalantour ti pe eksperyanse. Wi, se benediksyon Zeova ki “fer ris”!—Nonm 16:13; Deterononm 4:5-8; 11:8-15.
14. Ki benediksyon bann ki ris devan Bondye?
14 Sa lekspresyon “ris devan Bondye” i osi ganny tradwi konman “ris dan lizye Bondye.” (The New Testament in Modern English, by J. B. Phillips) Laplipar di tan bann ki ris i vwar li enportan lafason ki lezot pe get zot. Souvandfwa ou remark sa dan zot fason viv. Zot oule demonstre devan lezot. Labib i apel sa latitid “lorgey dan lavi toulezour.” (1 Zan 2:16) Parkont, bann ki ris devan Bondye i annan laprouvasyon, faver ek gran labonte Bondye an abondans, zot osi annan en relasyon personnel e entim avek Bondye. Se sa relasyon pros avek Bondye ki fer zot santi zot byen e an sekirite, bokou plis ki sa ki keksoz materyel i kapab aporte. (Izai 40:11) Toudmenm, ki nou bezwen fer pour nou ris devan Bondye?
Ris dan Lizye Bondye
15. Ki nou devret fer pour vin ris devan Bondye?
15 Dan parabol Zezi, sa zonm ti fer en bon plan e i ti travay dir zis pour li vin pli ris, e i ti ganny apele enbesil. Alor, si nou oule vin ris devan Bondye, nou devret fer nou mye pour travay dir e partisip plennman dan bann aktivite ki vreman vo lapenn e ki annan valer dan lizye Bondye. Enn parmi i sa ki Zezi ti demande: “Ale e fer tou pep vin mon bann disip.” (Matye 28:19) Ler nou servi nou letan, lafors ek talan, pa pour nou menm, me pour ede dan sa travay predikasyon e fer disip, se konmsi nou pe fer en lenvestisman spirityel. Bann ki’n fer sa, in resevwar bokou benefis spirityel parey nou pou vwar avek sa bann leksperyans swivan.—Proverb 19:17.
16, 17. Ki leksperyans ou kapab rakonte ki montre ki fason viv ki fer ris devan Bondye?
16 Annou get legzanp en Temwen Zeova dan en pei Lazi. Sa frer ti annan en bon plas travay konman en teknisyen dan konpiter. Selman, son travay ti pran preski tou son letan e sa ti fer li santi pov spirityelman. Finalman, olye avans pli devan avek son travay, i ti deside pour kite e i ti konmans fer ayskrim e vann li lo semen pour li ganny plis letan pour pran swen avek son bann bezwen ek responsabilite spirityel. Son bann koleg travay ti boufonn li. Me finalman ki ti arive avek sa frer? I rakonte: “Anfet, mon ti ganny plis larzan ki ler mon ti travay dan konpiter. Mon pli ere akoz mon pa anba presyon e enkyet parey avek mon louvraz avan. E sa ki pli enportan, mon santi mwan pli pros avek Zeova.” Sa sanzman ti permet sa frer konmans servis aplentan e aprezan i travay dan biro brans Temwen Zeova dan son pei. Benediksyon Zeova i vreman ‘fer vin ris.’
17 En lot legzanp, se en madanm ki ti grandi dan en fanmir kot ledikasyon ti vreman enportan. I ti al liniversite Lafrans, Meksiko ek Laswis. I evidan ki i ti pou konmans en karyer prometan. I ti dir, “La devan mwan ti annan sikse, popilarite, ek loportinite, me dan mon leker mon ti santi mon ti napa sa vre satisfaksyon.” Plitar, i ti konmans aprann lo Zeova. I ti rakonte: “Pli mon ti progrese spirityelman, pli mon dezir pour fer plezir Zeova e pour rann li en ptigin sa ki i ti donn mwan ti grandi. Mon ti vwar ki mon bezwen fer, servi li aplentan.” I ti donn son demisyon e i pa ti tarde pour batize. E pour sa dernyen 20 tan, i’n kontan pour servi Bondye aplentan. I dir: “Serten i panse ki mon’n gaspiy mon talan, me zot rekonnet ki mon ere, e zot admir bann prensip ki mon swiv dan mon lavi. Tou le zour, mon demann Zeova dan lapriyer ki i ed mwan pour annan limilite pour ki mon kapab annan son laprouvasyon.”
18. Parey Pol, konman nou kapab ris devan Bondye?
18 Sol, ki ti vin zapot Pol li osi ti annan en karyer prometan devan li. Pourtan, plitar i ti dir: “Mon konsider tou keksoz konpletman konman en pert, akoz sa valer bokou pli siperyer ki annan dan konnesans mon Senyer, Kris Zezi.” (Filipyen 3:7, 8) Pour Pol, larises ki i ti gannyen atraver konnesans Kris ti annan bokou plis valer ki nenport keksoz ki lemonn ti kapab ofer. Pareyman, ler nou pare pour abandonn bann lanbisyon egois e annan en devosyon pour Bondye dan nou lavi, nou osi nou kapab annan en lavi ere e ris dan lizye Bondye. Labib i asir nou: “Limilite ek lakrent pour Zeova i anmenn larises ek laglwar ek lavi.”—Proverb 22:4.
Eski ou kapab eksplike?
• Ki problenm sa zonm dan parabol Zezi ti annan?
• Akoz sa zonm ris ti ganny apele lenbesil?
• Ki savedir vin ris devan Bondye?
• Ki mannyer nou kapab vin ris devan Bondye?
[Kestyon]
[Portre lo paz 30]
“Benediksyon Zeova —se sa ki fer ris”