Esper Zour Zeova Avek Landirans

‘Azout avek zot lafwa . . . landirans.’—2 PYER 1:5, 6.

1, 2. Ki si sa landirans, e akoz bann Kretyen i bezwen andire?

GRAN zour Zeova i tre pros. (Yoel 1:15; Tsefanya 1:14) Konman bann Kretyen ki determinen pour reste fidel anver Zeova, avek enpasyans nou pe esper sa ler kan drwa Zeova pour dirize pou ganny zistifye. Antretan, nou bezwen fer fas avek laenn, repros, persekisyon, ek lanmor akoz nou lafwa. (Matye 5:10-12; 10:22; Revelasyon 2:10) Sa i demann landirans, sa abilite pour reziste en sitiasyon tre difisil. Zapot Pyer i konsey nou pour: ‘Azout avek zot lafwa . . . landirans.’ (2 Pyer 1:5, 6) Nou bezwen landirans, parski Zezi ti dir: “Sa ki reste fidel [oubyen “andire,” NW] ziska lafen pou ganny sove.”—Matye 24:13.

² Nou osi fer fas avek maladi, sagrinasyon apre ki en dimoun ki nou kontan in mor, ek lezot difikilte. Pa Satan ti pou vreman kontan si nou perdi nou lafwa! (Lik 22:31, 32) Avek  sipor Zeova, nou kapab andir bann diferan leprev. (1 Pyer 5:6-11) Annou konsider serten leksperyans ki’n vreman arive ki prouve ki nou kapab esper zour Zeova avek landirans e san ki nou lafwa i diminyen.

Zot pa’n bes Lebra akoz Maladi

3, 4. Donn en legzanp pour montre ki menm si nou malad nou kapab fidelman servi Zeova.

³ Konmela Bondye pa fer mirak pour geri nou, me i donn nou lafors pour siport maladi. (Psonm 41:1-3) Sharon ti dir: “Osi lontan ki mon kapab rapel, sa wiltyer in toultan mon konpanyon. Depi nesans, en dezabilite koze par en problenm laservel (cerebral palsy) ti anpes mwan konn sa lazwa ki en zanfan i eksperyanse.” Letan Sharon ti aprann konsernan Zeova ek son promes pour en lasante parfe, sa ti donn li lespwar. Menm si i koz e mars avek difikilte, i trouv lazwa dan predikasyon. Apepre 15 an pase, i ti dir: “Mon lasante i kapab kontinyen deteryore, me mon konfyans dan Bondye ek mon relasyon avek li i gard mwan vivan. Mon vreman ere pour form parti pep Zeova e pour toultan ganny son sipor!”

⁴ Zapot Pol ti ankouraz bann Kretyen Tesalonik pour “koz dan en fason konsolan avek bann ki dan depresyon.” (1 Tesalonisyen 5:14, NW) Bann fakter parey en gran dezapwentman i kapab koz depresyon. An 1993, Sharon ti ekrir: “Mon ti santi mwan konpletman initil, mon . . . ti tonm dan en gran depresyon pour trwa zan. . . . Bann ansyen ti konsol e konsey mwan. . . . Avek tandres, Zeova ti ed nou konpran kondisyon en dimoun ki dan en gran depresyon atraver Latour Veyer. Wi, i vreman pran swen avek son pep e i konpran nou santiman.” (1 Pyer 5:6, 7) Sharon i ankor pe fidelman servi Bondye anmezir i esper gran zour Zeova.

5. Ki laprev i annan ki bann Kretyen i kapab andir depresyon?

⁵ Akoz sa ki zot in eksperyanse dan lepase, serten Kretyen i soufer avek serten kalite depresyon. Harley ti vwar bann kriyote pandan Dezyenm Lager Mondyal e i ti ganny kosmar lo lager. Dan son sonmey i ti kriye: “Atansyon! Veye!” Ler i ti sote, i ti tou tranpe avek transpirasyon. Me i ti kapab viv en lavi ki an armoni avek konsey ek gidans Bondye, e avek letan bann tel kosmar pa ti sitan entans e regilye.

6. Ki mannyer en Kretyen ti fer fas avek bann problenm emosyonnel?

⁶ En Kretyen ki ti ganny en maladi mantal (bipolar disorder) ti trouv li vreman difisil pour li prese portanport. Kantmenm sa, i ti persiste dan predikasyon akoz i ti realize ki sa travay ti pou donn li lavi e tou dimoun ki ti ekout li. (1 Timote 4:16) Parfwa i ti menm vwar li difisil pour sonn laklos kot laport. I ti dir: “Apre en serten letan mon ti kapab kontrol mon lemosyon, al kot sa lot laport, e esey ankor. Par kontinyen prese, mon ti kapab reste ase for spirityelman.” Asiste renyon osi ti en defi, me sa frer ti rekonnet lenportans pour asosye avek son bann frer ek ser spirityel. Alors i ti fer sa zefor neseser pour asiste renyon.—Ebre 10:24, 25.

7. Ki mannyer serten i demontre landirans, menm si zot per pour koz an piblik oubyen pour asiste renyon?

⁷ Serten Kretyen i ganny fobya, en gran lafreyer pour serten sitiasyon oubyen lobze. Par egzanp, zot kapab per pour koz an piblik oubyen menm pour asiste renyon. Zis mazinen ki mannyer i difisil pour zot fer komanter dan renyon oubyen pour fer en size dan Lekol Minister Teokratik! Pourtan, zot pe andire, e nou vreman apresye zot prezans ek partisipasyon.

8. Ki nou devret sirtou fer ler nou pe fer fas avek problenm emosyonnel?

⁸ Dormi e repoz plis i kapab ed en dimoun pour andir bann problenm emosyonnel. Petet zot kapab rod lasistans medikal. Me sa ki sirtou efikas, se depan lo Bondye atraver lapriyer. Psonm 55:22 i dir: “Larg ou fardo lo Zeova li menm, e li i pou soutenir ou. Zanmen i pou les sa enn ki drwat drive.” Fer tou sa ki ou kapab  alors pour “met ou konfyans dan Zeova avek tou ou leker.”—Proverb 3:5, 6.

Landirans ler nou perdi en Dimoun ki nou kontan dan Lanmor

9-11. (a) Kwa ki kapab ed nou fer fas avek latristes ler en dimoun ki nou kontan i mor? (b) Ki mannyer legzanp Anna i kapab ed nou fer fas avek sagrinasyon?

⁹ Kan lanmor i separ bann manm fanmir, sa separasyon i kapab fer zot byen tris. Kan son madanm Sara, ki i ti byen kontan ti mor, Abraam ti plere. (Zenez 23:2) Menm Zezi ki ti en zonm parfe “ti plere” ler son zanmi Lazar ti mor. (Zan 11:35) Alor i normal pour santi sagrinasyon ler lanmor i pran en dimoun ki ou kontan. Sepandan, bann Kretyen i konnen ki i pou annan en rezireksyon. (Akt 24:15) Alors, “zot pa sagren parey bann ki napa lesperans.”—1 Tesalonisyen 4:13.

¹⁰ Ki mannyer nou kapab fer fas avek sa sagrinasyon ki nou santi ler en dimoun ki nou kontan i mor? Petet en legzanp i kapab ed nou. Normalman nou pa sagren pour en gran peryod letan ler enn nou zanmi i vwayaze akoz nou ekspekte vwar li ankor ler i retournen. Pareyman, si nou annan menm pwennvi anver lanmor en Kretyen fidel, nou kapab pa tro tris akoz nou konnen ki i pou ganny resisite.—Eklezyast 7:1.

¹¹ Si nou depan antyerman lo sa “Bondye ki touzour donn konsolasyon,” sa pou ed nou andir sa santiman sagrinasyon. (2 Korentyen 1:3, 4) Sa ki pou kapab ed nou osi se si nou reflesir lo sa ki Ann, en vev dan premye syek ti fer. Son msye ti mor zis set-an apre ki zot ti’n marye. Me alaz 84 an, i ti ankor pe servi Zeova kot tanp. (Lik 2:36-38) Lefet ki Ann ti devoue dan servis Zeova, sa ti san dout ed li pour fer fas avek sagrinasyon ek lasolitid. Partisip regilyerman dan aktivite Kretyen, enkli travay predikasyon, i kapab ed nou andir sagrinasyon.

Fer fas avek diferan Leprev

12. Ki leprev serten Kretyen in andire an rapor avek lavi fanmir?

¹² Serten Kretyen i bezwen andir bann leprev ki relye avek lavi fanmir. Par egzanp, si en konzwen i komet adilter, pa sa pou anmenn bann konsekans grav! Sa enn ki’n ganny trai i kapab pa dormi e plere san arete, akoz sok ek latristes. Fer bann pti louvraz senp i kapab  telman fatigan ki i fer fot oubyen bann pti aksidan i arive. Petet sa konzwen ki inosan pa pou kapab manze, i kapab fer li megri, e trouble emosyonnelman. I kapab difisil pour pran par dan bann aktivite Kretyen. E sa pou vreman annan en move lefe lo bann zanfan!

13, 14. (a) Ki lankourazman ou gannyen avek lapriyer ki Salomon ti fer pour inogirasyon tanp? (b) Akoz nou priye pour ganny lespri sen?

¹³ Ler nou pas atraver bann tel leprev, Zeova i donn nou sa led ki nou bezwen. (Psonm 94:19) Lapriyer ki Lerwa Salomon ti fer pour inogirasyon tanp Zeova, i montre ki Bondye i ekout lapriyer son pep. Salomon ti priy Bondye: “Ki swa lapriyer, ki swa en demann pour ganny faver ki nenport zonm ouswa tou dimoun dan ou pep Izrael i fer, akoz sakenn i konn sa douler dan son leker, e vreman zot ouver zot lanmen anver sa lakaz, alors fotespere ki depi dan lesyel ou ekoute, sa landrwa fiks kot ou reste, e ou devret pardonnen e azir e ziz tou dimoun dapre sa ki zot in fer, akoz ou konn son leker (akoz zis ou menm ki konn byen leker tou bann imen); pour ki alafen zot ava annan lakrent pour ou toudilon zot lavi lo sa later ki ou ti donn nou zanset.”—1 Lerwa 8:38-40.

¹⁴ Si nou kontinyen priye pour ganny lespri sen, sa pou kapab vreman ed nou. (Matye 7:7-11) Fri lespri i enkli bann kalite parey lazwa ek lape. (Galat 5:22, 23) Pa i en gran soulazman ler nou Papa ki dan lesyel i reponn nou lapriyer, olye latristes nou ganny lazwa, e lape i ranplas langwas!

15. Ki verse dan Labib ki kapab ed nou pour pa tro trakase?

¹⁵ Nou kapab ekspekte en serten kantite lenkyetid ler nou bezwen andir en kantite presyon. Me kantmenm sa nou kapab trakas mwens si nou gard antet sa parol Zezi: “Pa bezwen trakase, ki zot pou manze e ki zot pou bwar pour viv, oubyen ki zot pou mete. ... Rod plito Rwayonm Bondye ek son lazistis, e limenm i a donn zot anplis tou lezot keksoz osi.” (Matye 6:25, 33, 34) Zapot Pyer ti ankouraz nou pour ‘desarz tou nou sousi lo li, parski limenm ki pran swen avek zot.’ (1 Pyer 5:6, 7) I byen pour fer zefor pour rezoud en problenm. Parkont apre ki nou’n fer sa ki nou kapab, olye trakase, plito priye akoz lapriyer ki pou kapab ed nou. En psalmis ti sante: “Met ou lavi ek son bann fardo dan lanmen Zeova, depan lo li e li i pou azir.”—Psonm 37:5.

16, 17. (a) Akoz nou pa kapab aret trakase konpletman? (b) Ki nou pou eksperyanse si nou met an aplikasyon Filipyen 4:6, 7?

¹⁶ Pol ti ekrir: “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan. Ki lape Bondye ki depas tou konpreansyon imen i ava gard zot leker ek zot lespri dan Kris-Zezi.” (Filipyen 4:6, 7) Natirelman bann desandans enparfe Adan, pa kapab pa enkyet ditou. (Romen 5:12) Bann madanm Ezai ki ti bann Itit ti “en sours lanmertim” pour Izaak ek Rebeka, paran Ezai ki ti annan lakrent pour Zeova. (Zenez 26:34, 35) Pour bann Kretyen parey Timote ek Trofim maladi ti trakas zot. (1 Timote 5:23; 2 Timote 4:20) Pol ti trakas pour son bann frer ek ser Kretyen. (2 Korentyen 11:28) Me sa Enn ki “ekout lapriyer” i toultan la pour bann ki kontan li.—Psonm 65:2.

¹⁷ Anmezir ki nou esper zour Zeova, nou annan sipor ek konsolasyon ki sorti kot ‘sa Bondye lape.’ (Filipyen 4:9) Zeova i annan “mizerikord ek konpasyon,” i “bon e pare pour pardonnen,” e “i mazinen ki nou lapousyer.” (Egzod 34:6; Psonm 86:5; 103:13, 14) Alor annou ‘fer li konn nou bann siplikasyon,’e sa pou fer nou ganny “lape Bondye,” e nou pou santi nou kalm e sa i en santiman ki imen pa kapab konpran.

18. Ki mannyer i posib pour “vwar” Bondye dapre Zob 42:5?

¹⁸ Kan nou lapriyer i ganny reponn, nou konnen ki Bondye i avek nou. Apre ki Zob ti’n andir son bann leprev, i ti dir: “Wi, mon’n tande koze lo ou, me aprezan mon vwar ou avek mon prop lizye.” (Zob 42:5) Avek en lizye lafwa, konprenezon, ek lapresyasyon, nou kapab  reflesir lo sa ki Zeova in fer pour nou e “vwar” li dan en fason ki nou pa’n zanmen vwar oparavan. Vreman en tel lentimite i donn nou en lape lespri ek leker anpe!

19. Ki pou arive si nou ‘larg tou nou traka lo Zeova’?

¹⁹ Si nou ‘larg tou nou traka lo Zeova,’ nou kapab andir bann leprev dan en fason ki nou santi nou kalm e sa pou protez nou leker ek abilite pour reflesir. Ofon nou leker, nou pou nepli enkyet, per e santi nou pa an sekirite. Nou lespri pou nepli boulverse par konfizyon ek traka.

20, 21. (a) Ki laprev leksperyans Etyenn i fourni konsernan reste kalm ler nou pe fer fas avek persekisyon? (b) Donn en legzanp modern kot en dimoun in santi li kalm kan i ti pe andir bann leprev.

²⁰ Etyenn ti demontre ki i ti annan lape lespri ler son lafwa ti pe ganny teste seryezman. Avan i ti donn son dernyen temwannyaz, tou dimoun dan Sannedren “ti war son figir parey figir en lanz.” (Akt 6:15) I ti kalm parey en lanz, en mesaze Bondye. Apre ki Etyenn ti’n montre ki zot ti koupab pour lanmor Zezi, bann ziz “ti pran en gran lakoler, e zot ti grens zot ledan kont li.” “Ranpli avek Sent-Espri,” Etyenn “ti lev son lizye e fikse dan lesyel. I ti war laglwar Bondye, ek Zezi pe debout lo kote drwat Bondye.” Sa vizyon ti fortifye Etyenn, e i ti reste fidel ziska lanmor. (Akt 7:52-60) Menm si nou pa ganny bann vizyon, Bondye i kapab ed nou reste kalm kan nou ganny persekite.

²¹ Konsider santiman serten Kretyen ki’n soufer ziska lanmor dan lanmen bann Nazi pandan Dezyenm Lager Mondyal. Ler i ti pe rakont son leksperyans an kour, en Temwen ti dir: “Santans lanmor ti’n ganny ordonnen. Mon ti ekoute, e apre ki mon ti’n dir sa parol, ‘Reste fidel ziska lanmor,’ e lezot parol nou Senyer, e en sel kou tou ti’n fini. Me pa mazin tou sa la. Mon santi mwan telman anpe e kalm, en satiman ki ou pa pou kapab zanmen imazinen!” En zenn Kretyen ki ti pe al ganny koup likou, ti ekri son paran: “Minwi in deza sonnen. Mon ankor annan letan pour sanz mon nide. Me, eski mon pou ere ankor dan sa lemonn apre ki mon’n trai nou Senyer? Definitivman non! Me la, zot kapab asire ki mon pe kit sa lemonn dan lazwa ek lape.” San okenn dout Zeova i siport son bann serviter fidel.

Ou kapab andire!

22, 23. Ki lasirans ou kapab annan anmezir ou esper zour Zeova avek landirans?

²² Petet ou pa pe fer fas avek serten sa bann defi ki nou’n egzaminen. Pourtan Zob ki ti annan lakrent pour Bondye ti annan rezon ler i ti dir: “Zonm, ki fanm in donn nesans, i viv en ptigin letan e son lavi i ranpli avek problenm.” (Zob 14:1). Petet ou en paran ki pe travay dir pour gid ou zanfan spirityelman. Zot bezwen andir bann leprev kot lekol, me paran, pa zot vreman kontan ler zot zanfan i pran pozisyon pour Zeova ek son bann prensip drwat! Posibleman ou pe eksperyans difikilte ek tantasyon dan travay. Parkont ou kapab andir sa ek lezot sitiasyon parski se “Zeova, ki anmenn nou fardo sak zour.”—Psonm 68:19.

²³ Petet ou konsider ou lekor konman en senp dimoun, me gard antet ki Zeova pa pou zanmen oubliy ou travay ek lanmour ki ou’n montre pour son non. (Ebre 6:10) Avek son led ou kapab andir bann leprev ki teste ou lafwa. Alors enkli ou dezir pour fer lavolonte Bondye dan ou lapriyer ek plan. Koumsa ou kapab asire ki ou pou ganny benediksyon ek sipor Bondye anmezir ou esper zour Zeova avek landirans.

Ki ou pou reponn?

• Akoz bann Kretyen i bezwen landirans?

• Kwa ki kapab ed nou fer fas avek maladi ek sagrinasyon?

• Ki mannyer lapriyer i ed nou andir bann leprev?

• Akoz i posib pour esper zour Zeova avek landirans?

[Kestyon]

[Portre lo paz 17]

Depan lo Zeova i permet nou pour andir sagrinasyon