Zeova I Kontan Lazistis

“Mwan, Zeova, mon kontan lazistis.”—IZAI 61:8.

1, 2. (a) Ki sa mo “lazistis” ek “lenzistis” i vedir? (b) Ki Labib i dir lo Zeova e son kalite ki lazistis?

LAZISTIS i vedir ‘pa fer lapreferans, tret lezot dan en fason egal e azir an armoni avek sa ki moralman drwat e byen.’ Parkont, lenzistis i ler nou pa tret lezot dan en fason egal, fer diskriminasyon, fer sa ki mal, e fer ditor lezot san ki zot merite.

² Apepre 3,500-z-an pase, Moiz ti ekrir sa konsernan Souvren Liniver, Zeova: “Tou son bann semen i lazistis. En Bondye fidel, avek ki napa lenzistis.” (Deterononm 32:4) Plis ki set syek plitar, Bondye ti enspir Izai pour ekrir sa bann parol: “Mwan, Zeova, mon kontan lazistis.” (Izai 61:8) Apre dan premye syek, zapot Pol ti dir: “Eski . . . Bondye i enzis? Pa ditou!” (Romen 9:14) E dan sa menm lepok, zapot Pyer ti dir: “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.” (Akt 10:34, 35) Wi, “Zeova i kontan lazistis.”—Psonm 37:28; Malaki 3:6.

Lenzistis i partou

3. Ki mannyer lenzistis lo later ti konmanse?

³ Lazistis pa en kalite ki sitan evidan denozour. Nou kapab vin viktim lenzistis nenport ler, i kapab dan landrwa travay, kot lekol, par bann dimoun ki annan en o pozisyon, e dan lezot domenn ankor, menm dan nou relasyon antre fanmir. Byensir, bann tel lenzistis i egziste depi lontan. Bann imen ti konmans sibir lenzistis kan nou premye paran Adan ek Ev ti rebele e dezobeir lalwa, akoz en lanz rebel ki ti vin Dyab ek Satan ti enfliyans zot. Adan, Ev ek Satan ti vreman azir dan en fason enzis par mal servi sa kado merveye, sa liberte pour swazir ki Zeova ti’n donn zot. Zot move aksyon ti pou anmenn en kantite soufrans, ek lanmor pour limanite an zeneral.—Zenez 3:1-6; Romen 5:12; Ebre 2:14.

4. Depi konbyen letan lenzistis i egziste dan lemonn?

⁴ Lenzistis i egziste dan lemonn pour apepre 6,000 an, depi sa rebelyon dan zarden Edenn. Sa i pa etonan akoz Satan i bondye sa lemonn. (2 Korentyen 4:4) I en manter e papa tou mansonz, sa enn ki kalonmnyen e opoz Zeova. (Zan 8:44) I’n toultan komet bann lenzistis vreman sokan. Par egzanp, dan en serten degre akoz move lenfliyans Satan avan Deliz dan letan Noe, Bondye ti remark “ sa kantite mesanste ki zonm ti pe fer lo later e tou sa ki i ti panse dan son leker ti toultan move.” (Zenez 6:5) Sa menm sitiasyon ti ankor egziste dan letan Zezi. I ti dir: “Traka en zour i sifi,” sa i vedir bann problenm ki fer soufer, tel parey lenzistis. (Matye 6:34) Labib i egzakt kan i dir: “Ziska aprezan tou lakreasyon Bondye pe soupire e soufer.”—Romen 8:22.

5. Akoz i annan plis lenzistis dan nou letan ki zanmen oparavan?

⁵ Alors, bann move keksoz ki bann lenzistis vreman sokan i anmennen in toultan pe arive pandan listwar imen. Aprezan sa sitiasyon i pli pir ki zanmen. Akoz? Akoz sa lemonn ozordi ki elwannyen avek Bondye, i dan son “bann dernyen zour” depi plizyer dizenn lannen. E bann imen pe eksperyans bann “letan difisil” anmezir ki lafen i aprose. Labib ti predir ki pandan sa lepok, dimoun pou “vin egois, kontan larzan, vantar,  arogan zot pou koz kont Bondye, . . . engra, mank respe pour keksoz sen, zot pou annan leker dir, san pitye, kalomni zot prosen, vyolan, kriel, lennmi sa ki fer dibyen; zot pou tret, annan karakter vif, anfle avek lorgey.” (2 Timote 3:1-5) Tou sa bann move tre ki’n ganny mansyonnen i anmenn tou sord kalite lenzistis.

6, 7. Ki kantite lenzistis ki’n fer soufer imen dan nou letan?

⁶ Pandan sa dernyen san-t-an ki’n pase, lenzistis in ogmante plis ki nou pa’n zanmen eksperyanse oparavan. En rezon, i akoz sa ti bann lannen kot in annan plis lager. Par egzanp, serten istoryen i estimen ki zis dan Dezyenm Lager Mondyal ti annan apepre 50 ziska 60 milyon dimoun ki ti mor, lamazorite ti sivilyen, bann zonm fanm ek zanfan inosan. Depi ki sa lager in terminen, ankor plizyer milyon dimoun in ganny touye dan bann diferan konfli, la ankor lamazorite ti sivilyen. Satan i promot bann tel lenzistis akoz i vreman ankoler, i konnen ki tre byento Zeova pou ganny laviktwar konplet lo li. Profesi Labib i dir koumsa: “Dyab in desann kot zot avek en gran lakoler, akoz i konnen ki i reste li ankor zis en pti pe letan.”—Revelasyon 12:12.

⁷ Larme dan lemonn antye i depans apepre 760 bilyon ero sak lannen. Plizyer santenn milyon dimoun napa dekwa pour viv, alor zis mazinen ki kantite dibyen ti pou’n kapab ganny fer si tou sa larzan ti ganny depanse pour bann proze ki promot lape. Apepre en bilyon dimoun napa ase pour manze, tandis ki lezot i annan annabondans. Dapre en rapor Nasyon-z-ini, apepre senk milyon zanfan i mor akoz lafamin sak lannen. Pa sa i enzis! Anmenmtan, mazin osi sa kantite inosan ki ganny touye par lavortman. Estimasyon ki’n ganny fer i ant 40 ziska 60 milyon dan lemonn sak lannen! Pa en tel lenzistis i vreman sokan!

8. Ki sa sel fason vre lazistis pour imen pou ganny anmennen?

⁸ Bann dirizan imen pa pe trouv solisyon pour sa kantite problenm ki pe fer soufer limanite ozordi, e zot zefor pa pou anmenn okenn amelyorasyon. Parol Bondye ti predir ki dan nou letan “bann move dimoun ek bann anbeter, zot pou fer touzour plis progre dan sa ki mal, zot pou anbet lezot e zot osi zot pou ganny anbete.” (2 Timote 3:13) Lenzistis i telman form parti nou lavi tou le zour ki imen pa kapab retir li. Zis Bondye ki kapab. Zis li ki kapab retir Satan, bann demon, ek bann move dimoun.—Zeremi 10:23, 24.

I normal pour konsernan avek lenzistis

9, 10. Akoz Azaf ti dekouraze?

⁹ Dan lepase, menm serten ekriven Labib ti demande akoz Bondye pa ti ankor entervenir dan bann zafer imen pour anmenn vre lazistis ek ladrwatir. Pran par egzanp, Azaf en zonm dan letan Labib. Son non i ganny mansyonnen dan pti lentrodiksyon sa Psonm 73, ki kapab pe fer referans avek en mizisyen enportan ki ti en Levit pandan renny Lerwa David, oubyen avek bann mizisyen dan lakaz kot Azaf ti sa sef paternel. Azaf ek son desandans ti konpoz en kantite kantik ki ti ganny servi dan ladorasyon an piblik. Kantmenm sa, en serten moman dan son lavi, Azaf ti dekouraze spirityelman. I ti vwar bann move dimoun pe prospere lo plan materyel e i ti remarke ki souvan zot ti paret kontan zot fason viv, san eksperyans okenn move konsekans.

¹⁰ Nou lir: “Mon ti zalou bann ki ti pe vant zot lekor, letan mon ti vwar ki bann dimoun mesan ti anpe. Zot pa konn douler lanmor; e zot vant i byen gro. Zot pa ni dan maler ki zonm mortel i ladan, e zot pa rankontre menm problenm parey lezot zonm.” (Psonm 73:2-8) Me avek letan sa ekriven Labib ti realize ki i ti mal pour annan en tel pwennvi negatif. (Psonm 73:15, 16) Sa psalmis ti esey sanz son fason panse, me i pa ti kapab byen  konpran akoz i paret ki bann mesan pa ti ganny pini malgre zot ti pe fer sa ki mal, tandis ki bann dimoun senser ti souvan pe soufer.

11. Kwa ki sa psalmis Azaf ti arive konpran?

¹¹ Finalman, sa zonm fidel dan letan pase ti arive konpran sa ki pou arive avek bann mesan alafen, ki apre tou Zeova pou redres sitiasyon. (Psonm 73:17-19) Dan en psonm David ti ekrir: “Met lespwar dan Zeova e swiv son semen, i pou elev ou pour ki ou posed later. Ou pou vwar kan bann mesan i ganny detrir.”—Psonm 37:9, 11, 34.

12. (a) Ki plan Zeova konsernan mesanste ek lenzistis? (b)  Ki mannyer ou santi konsernan sa solisyon ki pou ganny anmennen an rapor avek lenzistis?

¹² San okenn dout, i lavolonte Zeova pour retir dan son letan apropriye tou mesanste lo later ek bann lenzistis ki mesanste in anmennen. Sa i en keksoz ki bann Kretyen fidel i devret souvan mazin lo la. Zeova pe al retir tou bann ki opoz son lavolonte e bann ki viv an armoni avek son lavolonte pou ganny rekonpanse. “Son lizye i gete, son lizye briyan i egzamin bann garson zonm. Zeova li menm i egzamin sa dimoun drwat konman sa dimoun mesan. Nenport ki, ki kontan lavyolans, I vreman ay li. I pou fer tonbe bann latrap lo bann mesan, dife ek souf e en divan ki brile. . . . Parski Zeova i drwat; i kontan bann aksyon ki drwat.”—Psonm 11:4-7.

En nouvo lemonn kot pou annan lazistis

13, 14. Akoz i pou annan ladrwatir ek lazistis partou dan sa nouvo lemonn?

¹³ Kan Zeova pou detrir sa lemonn enzis ki anba kontrol Satan, I pou anmenn en nouvo lemonn merveye dan son plas. Sa lemonn pou ganny kontrole par Rwayonm Bondye, sa Rwayonm lo ki Zezi ti ansenny son bann disip pour priye. Mesanste ek lenzistis pou ganny ranplase par ladrwatir ek lazistis e se dan sa letan kot sa lapriyer pou ganny egzose  dan en fason konplet: “Ki ou Renny i ganny etabli; Ki ou lavolonte i ganny akonpli lo later parey dan lesyel.”—Matye 6:10.

¹⁴ Labib i dir nou ki kalite dominasyon nou kapab ekspekte, sa dominasyon ki tou dimoun senser i anvi ozordi. Se dan sa letan ki Psonm 145:16 pou ganny akonpli plennman: “Ou [Zeova] pe ouver ou lanmen e satisfer dezir tou kreatir vivan.” Deplis, Izai 32:1 i dir: “Gete! En Lerwa [Zezi Kri dan lesyel] pou rennyen pour ladrwatir, tandis ki bann prens, [bann reprezantan Kris lo later] zot pou dirize konman prens pour lazistis.” Konsernan sa Lerwa Zezi Kri, Izai 9:7 i predir: “Pou napa lafen avek renny sa prens e avek lape, lo tronn David e lo son rwayonm pour etablir li solidman e pour soutenir li par mwayen lazistis ek ladrwatir, depi konmela e pour en letan endefini. Se avek devouman ki Zeova bann larme pou fer sa.” Eski ou vwar ou pe viv anba sa dominasyon zis?

15. Ki Zeova pou fer pour bann imen dan sa nouvo lemonn?

¹⁵ Dan nouvo lemonn Bondye, nou pou nepli annan okenn rezon pour eksprim sa bann parol ki nou trouve dan Eklezyast 4:1: “Mon menm mon’n retournen pour mon kapab vwar tou bann labi ki pe ganny fer lo later, e get larm sa bann ki pe ganny abize, me ti napa personn pour konsol zot, e bann ki ti pe abiz zot ti annan pwisans, alors zot ti napa personn pour konsol zot.” I vre ki avek nou lespri enparfe, i difisil pour zis mazinen ki kantite merveye sa nouvo lemonn kot ladrwatir pou rennyen pou ete. Lemal pou nepli egziste, okontrer sak zour pou ranpli avek bann bon keksoz. Wi, Zeova pou koriz tou keksoz ki mal, par fer li dan en fason ki pou plis ki sa ki nou ti pe espekte. Alors i apropriye ki Zeova ti enspir zapot Pyer pour ekrir: “Nou, nou pe espere dapre son promes en nouvo lesyel ek en nouvo later kot pou annan lazistis.”—2 Pyer 3:13.

16. Ki mannyer sa “nouvo lesyel” in ganny etabli e dan ki sans sa “nouvo later” pe ganny prepare ozordi?

 ¹⁶ Byensir, sa “nouvo lesyel,” setadir gouvernman Bondye dan lesyel ki dan lanmen Kris, in fini deza ganny etablir. Sa bann ki pou form parti sa “nouvo later,” setadir sa group dimoun senser dan sa nouvo sosyete pe ganny rasanble pandan sa bann dernyen zour. I annan deza preski set milyon dimoun, dan omwen 235 pei, sorti dan apepre 100,000 kongregasyon. Sa bann plizyer milyon dimoun pe aprann konsernan bann semen Zeova ki drwat e zis. Rezilta ki sa i anmennen, se ki dan lemonn antye zot pe rezwir en linite ki baze lo lanmour Kretyen. Sa linite ki zot annan antre zot i vreman ganny remarke par dimoun e i sa enn ki pli dirab dan listwar limanite. En linite ki depas okenn keksoz ki bann ki pe swiv Satan in deza eksperyanse. En tel lanmour ek linite i bann avangou sa lepok ekstraordiner ki pe vini dan nouvo lemonn Bondye, kot pou annan ladrwatir ek lazistis.—Izai 2:2-4; Zan 13:34, 35; Kolosyen 3:14.

Latak Satan pa pou reisi

17. Akoz latak final Satan lo pep Zeova pa pou reisi?

¹⁷ Satan ek sa bann ki pe swiv li pou byento vir kont bann adorater Zeova pour esey detrir zot. (Ezekyel 38:14-23) Sa pou form parti sa ki Zezi ti apel “gran [“ladetres,” NW], pli terib ki tou sa ki’n deza annan avan, depi konmansman lemonn ziska konmela, e pa pou zanmen ariv ankor.” (Matye 24:21) Eski Satan pou reisi ganny laviktwar dan son latak? Non. Labib i asir nou: “Zeova i kontan lazistis, e i pa pou kit son bann fidel. Sirman zot pou ganny garde pour en letan endefini. Me tandis ki desandans bann dimoun mesan, zot pou ganny retire. Bann dimoun drwat pou posed later, e zot pou reste lo la pour touzour.”—Psonm 37:28, 29.

18. (a) Ki mannyer Bondye pou reakte anver sa latak ki Satan pou fer byento kont Son pep? (b) Akoz i ti byen pour ou revwar sa lenformasyon baze lo Labib konsernan lefet lazistis ki pou ranport laviktwar en zour?

¹⁸ Latak Satan ek son bann asosye lo bann serviter Zeova pou sa dernyen lensilt. Zeova ti predir par lentermedyer Zekarya: “Sa ki pe tous ou, pe tous mon kannet lizye.” (Zekarya 2:8) I konmsi en dimoun ti pe bour son ledwa dan kannet lizye Zeova. I pou reazir deswit pour detrir sa bann ki oule fer ditor son pep. Bann serviter Zeova i sa bann lo later ki demontre plis lanmour, linite, lape, ek soumisyon anver lalwa. Alor sa latak kont zot pou enn ki totalman pa merite e enzis. Sa enn ki telman “kontan lazistis” pa pou toler sa. Lefet ki i pou azir an faver son pep, sa i vedir ki Zeova pou anmenn en destriksyon eternel lo lennmi son pep. Se lazistis ki pou ranport laviktwar, e bann ki ador sa sel vre Bondye pou ganny sove. Pa sa levennman ki pou arive byento pou en levennman enkrwayab e eksitan!—Proverb 2:21, 22.

Ki ou pou reponn?

• Akoz i annan sitan lenzistis partou?

• Ki mannyer Zeova pou rezourd sa problenm konsernan lenzistis lo later?

• Kwa ki’n tous ou dan sa letid konsernan lefet ki lazistis pou ranport laviktwar en zour?

[Kestyon]

[Portre lo paz 15]

Ti annan en kantite mesanste avan Deliz, e i partou dan sa bann “dernyen zour”

[Portre lo paz 16]

Dan nouvo lemonn Bondye, lazistis ek ladrwatir pou ranplas mesanste