Ki Mannyer Nou Kapab Demontre Mizerikord?
Ki Mannyer Nou Kapab Demontre Mizerikord?
“Annou fer dibyen tou dimoun, sirtou nou bann frer dan lafwa.”—GALAT 6:10.
1, 2. Ki sa parabol bon Samariten i ansenny nou konsernan mizerikord?
EN PROFESER Lalwa ki ti pe koz avek Zezi ti demann li sa kestyon: “Me lekel mon prosen?” An repons Zezi ti rakont sa parabol swivan: “En zonm ti pe desann, sorti Zerizalenm pour al Zeriko. Bann bandi ti atak li, depouy li, bat li e kit li demi mor. Par azar, en pret ti pe desann par sa menm semen. Ler i ti war sa zonm blese i ti pas lot kote e i ti ale. En levit osi ti ariv dan sa landrwa. Ler i ti war sa zonm li osi, i ti pas lot kote e i ti ale. Me en Samariten, ki ti pe vwayaze, ti ariv kot i ti ete, e ler i ti war sa zonm blese, i ti ganny pitye. I ti apros kot li, bann son blesir apre ki in vid delwil ek diven lo la. Apre i ti met li lo son prop bourik e anmenn li dan en lotel, e ti donn li bann swen neseser. Son lannmen, i ti pran de denye e i ti donn propriyeter lotel e i ti dir li, ‘Pran swen avek li; sa ki ou a depanse anplis, mon a pey ou ler mon a retournen.’” Apre Zezi ti demann avek sa profeser Lalwa “Dapre ou, lekel parmi sa trwa, ki’n azir konman prosen sa zonm ki ti ganny atake par bann bandi?” Sa zonm ti reponn, “Se sa enn ki’n egzers konpasyon [oubyen “mizerikord,” NW] pour li.”—Lik 10:25, 29-37a.
2 Pa i kler ki fason sa Samariten ti pran swen avek sa zonm ki ti’n ganny blese i demontre ki si sa vre mizerikord! Se sa santiman pitye oubyen konpasyon ki ti pous sa Samariten pour pran swen avek sa zonm. Deplis, sa Samariten pa ti ni konn sa zonm ki ti’n ganny blese. Si nou anvi demontre mizerikord napa nanryen ki kapab vin en baryer pour nou, ni lo plan nasyonal, relizye, oubyen kiltirel. Apre ki i ti donn sa parabol konsernan sa bon Samariten, Zezi ti konsey sa zonm ki ti pe ekout li: “Ale, e ou osi fer parey.” (Lik 10:37b) Nou kapab pran aker sa konsey e fer en gran zefor pour demontre mizerikord anver lezot. Me konman? Ki mannyer nou kapab demontre mizerikord dan nou lavi toulezour?
“Si en frer . . . i bezwen lenz”
3, 4. Akoz i devret vreman enportan pou nou annan mizerikord pour bann frer ek ser dan kongregasyon?
3 Zapot Pol ti dir “Alor, pandan ki nou annan lokazyon, annou fer dibyen tou dimoun, sirtou nou bann frer dan lafwa.” (Galat 6:10) Premyerman, annou vwar ki mannyer nou kapab fer bann aksyon ki demontre ki nou annan mizerikord pour nou bann frer ek ser dan kongregasyon.
4 Ler i ti pe ankouraz bann vre Kretyen pour annan mizerikord anver kanmarad, disip Zak ti ekrir: “Bondye pou ziz san pitye [oubyen “mizerikord,” NW] bann ki pa’n pran pitye pour lezot.” (Zak 2:13) Konteks sa parol enspire i montre nou ki mannyer nou kapab annan labitid pour fer bann aksyon ki demontre ki nou annan mizerikord pour nou bann frer ek ser dan kongregasyon. Par egzanp dan Zak 1:27 nou lir: “La sa ki Bondye nou Papa i konsider konman en larelizyon pir e san defo: Pran swen bann orflen ek bann vev dan zot soufrans, e pa les zot ganny sali par move lenflians sa monn.” Zak 2:15, 16 i dir: “Si i annan en frer ou ser ki bezwen lenz e napa ase manze, ki benefis i annan pour ou dir avek li, ‘Ale, Bondye i a beni ou! Gard ou so, e manz byen’, si an atandan ou pa donn li nanryen sa ki son lekor i bezwen.”
5, 6. Ki mannyer nou kapab fer plis aksyon ki montre nou annan mizerikord pour tou dimoun dan nou kongregasyon?
5 Ler nou pran swen avek lezot e ed bann ki dan bezwen sa i en laspe enportan vre larelizyon. Nou ladorasyon pa permet nou pour montre lentere dan lezot zis an parol par dir zot ki nou swete ki tou keksoz i al byen pour zot. Okontrer, en santiman ranpli avek konpasyon pour pous nou pour fer en keksoz an faver bann ki dan en gran bezwen. (1 Zan 3:17, 18) Par egzanp, kan nou prepar manze pour en dimoun ki malad, ed en dimoun a laz par fer bann travay kot son lakour, donn li en pasaz ler i neseser pour asiste renyon e ler nou pa tike pour donnen avek bann ki dan bezwen, tousala i bann aksyon ki montre nou annan mizerikord. E sanmenm ki nou devret fer.—Deterononm 15:7-10.
6 Menm si i enportan pour ed lezot lo plan materyel, i pli enportan pour ed bann manm ki pe ogmante deplizanpli dan kongregasyon Kretyen, lo kote spirityel. Nou ganny ankouraze pour “koz dan en fason konsolan avek bann ki dan depresyon e ed bann ki feb.” (1 Tesalonisyen 5:14, NW) “Bann vye madanm” i ganny ankouraze pour “donn bon konsey.” (Tit 2:3) Ler pe koz konsernan bann ansyen Labib i dir: “Zot tou zot devret vin parey en landrwa kasyet kont divan e en landrwa maske kont tanpet lapli.”—Izai 32:2.
7. Dapre legzanp bann disip ki ti sorti Antyos an Siri, ki nou aprann konsernan fason pour demontre konpasyon?
7 An plis ki pran swen avek bann vev, orfelen ek bann ki bezwen led ek lankourazman dan kongregasyon lokal, parfwa bann kongregasyon dan premye syek ti organiz led pour sekour bann Kretyen dan lezot landrwa ki ti dan bezwen. Par egzanp, ler profet Agabis ti predir ki ti pou annan “en gran lafamin lo later antye,” bann disip ki ti Antyos an Siri “ti deside pou anvoy en kontribisyon selon zot mwayen pour bann frer ki ti reste dan Zide.” Sa ti ganny anvoye kot bann ansyen ki ti laba, “par Barnabas ek Sol.” (Akt 11:28-30) Be ki nou pou dir ozordi? “Lesklav fidel e pridan” i organiz bann komite sekour pour pran swen avek nou bann frer ek ser ki kapab ganny afekte par bann dezas natirel, tel parey siklonn, tranbleman-d-ter, oubyen tsounami. (Matye 24:45, NW) Ler nou volonterman donn nou letan, zefor, ek larzan pour korpere avek sa laranzman, sa i en bon fason pour nou demontre ki nou annan mizerikord.
“Si zot azir dan en fason diferan selon ran dimoun”
8. Ki mannyer fer lapliferans i tou lekontrer avek demontre mizerikord?
8 Pour averti nou konsernan en laspe ki lekontrer avek demontre mizerikord ek ‘sa lalwa rwayal’ lo lanmour Zak ti ekrir: “Me si zot azir dan en fason diferan selon ran dimoun, zot fer en pese, e lalwa i kondann en tel akt akoz zot dezobeir li.” (Zak 2:8, 9) Demontre “tro bokou faver” anver bann dimoun akoz zot larises materyel oubyen zot o pozisyon, i kapab fer nou annan leker dir ler nou tann “en malere pe plennyen.” (Proverb 21:13) Fer lapliferans i anpes en dimoun annan sa leta lespri ki pous li pour demontre mizerikord. Nou kapab demontre mizerikord par tret lezot san fer lapliferans.
9. Akoz i napa nanryen mal pour demontre konsiderasyon spesyal anver bann ki merite?
9 Eski lefet ki nou pa fer lapliferans sa i vedir ki nou pa devret zanmen montre en konsiderasyon spesyal avek okenn dimoun? Be non. Ler i ti pe koz konsernan son konpanyon travay Epafrodit, zapot Pol ti ekrir bann Kretyen dan lavil Filip: “Zot devre montre respe pour bann zonm parey li.” Akoz? “Parski i ti pre pour mor pour travay Kris. I’n riske son lavi pour ed mwan, parski zot menm zot pa ti kapab fer li.” (Filipyen 2:25, 29, 30) Sa servis fidel ki Epafrodit ti akonplir ti merit en tel konsiderasyon spesyal. Deplis, 1 Timote 5:17, i dir: “Bann ansyen ki diriz byen [“kongregasyon,” NW], i merit resevwar en doub loner, sirtou bann ki donn lapenn pour prese e ansennyen.” Nou merit osi montre lapresyasyon pour bann bon kalite spirityel ki lezot i annan. Demontre en tel konsiderasyon i pa vedir fer lapliferans.
‘Lasazes ki sorti dan lesyel i ranpli avek mizerikord’
10. Akoz nou devret kontrol nou lalang?
10 Ler i ti pe koz konsernan lalang, Zak ti dir: “Lalang i en fleo aktif, ranpli avek pwazon vyolan. Avek lalang nou beni [Zeova, NW] nou Papa. Par li nou modi dimoun ki’n ganny kree dan resanblans Bondye. Dan menm labous i sorti benediksyon ek malediksyon.” Dan sa menm konteks, Zak ti azoute: “Lasazes koumsa pa sa enn ki sorti dan lesyel, sa i lasazes lemonn, i pa spirityel, i sorti kot Dyab. Kot i annan zalouzi ek lanbisyon egois, i annan dezord ek tou sort move keksoz. Me lasazes ki sorti dan lesyel i premyerman pir, answit i kontan lape, i modere, pare pour met dakor, i ranpli avek pitye ek bon laksyon, san fer preferans e san lipokrizi.”—Zak 3:8-10a, 14-17.
11. Ki mannyer nou kapab demontre mizerikord ler nou koz avek lezot?
11 Alor lafason ki nou servi nou lalang i montre si nou annan lasazes ki “ranpli avek pitye [oubyen mizerikord, NW].” Be ki nou ti pou revele lo nou menm si nou ti vant lekor, koz lalang avek lezot, oubyen senm bann fo rimer ki fer ditor akoz nou zalou lezot oubyen akoz en dispit ki’n leve avek lezot? Psonm 94:4 i dir: “Tou bann ki pratik lemal i kontinyen vant zot lekor.” Pa i vre ki bann parol ki fer ditor i kapab gat bon repitasyon en dimoun ki inosan! (Psonm 64:2-4) Deplis, zis mazin ditor ki kapab ganny fer par “en fo temwen [ki] zis koz manti.” (Proverb 14:5; 1 Lerwa 21:7-13) Apre ki Zak ti diskit lo sa move fason pour servi lalang i ti dir: “Mon bann frer, sa pa devre arive.” (Zak 3:10b) Demontre vre mizerikord i osi vedir koz avek lezot dan en fason respektab, amikal, e rezonnab. Zezi ti dir: “Mon dir zot, zour zizman tou dimoun pou rann kont sak parol an plis ki i’n dir.” (Matye 12:36) Pa i enportan ki nou demontre mizerikord dan fason ki nou servi nou lalang!
“Pardonn lezot ki’n fer zot ditor”
12, 13. (a) Ki nou’n aprann konsernan mizerikord dan sa parabol kot sa lesklav ti dwa son met en gro sonm larzan? (b) Ki i vedir pardonn nou frer ziska ‘swasanndiset fwa’?
12 Parabol Zezi konsernan sa lesklav ki ti dwa son met, en lerwa, 60 milyon pyes larzan i montre nou en lot fason ki mannyer nou kapab demontre mizerikord. Vi ki sa lesklav ti napa larzan pour pey son det, i ti sipliy sa lerwa pour demontre mizerikord anver li. Son met “ti pran pitye pour li” e i ti efas tou son det. Me sa lesklav ti ale e i ti al vwar en lot lesklav ki ti dwa li zis san pyes larzan e san okenn pitye i ti fer sa lesklav ganny met dan prizon. Kan sa met ti tann sa ki ti’n arive, i ti apel sa lesklav ki i ti’n pardonnen e i ti dir li: “Ou en move serviter! Mon’n fek efas tou ou det akoz ou’n sipliy mwan. Ou osi pa ou ti devre pran pitye pour ou kanmarad parey mon ti pran pitye pour ou?’ Son met ti byen ankoler e i ti anvoy sa zonm dan prizon pour pini li ziska ki i pey tou son det.” Pour termin son parabol, Zezi ti dir: “Koumsa menm ki mon Papa ki dan lesyel pou fer avek zot si zot pa pardonn zot frer avek tou zot leker.”—Matye 18:23-35.
13 Pa i evidan ki sa parabol ki’n ganny mansyonnen pli o i fer vwar, ki demontre mizerikord i osi vedir pare pour pardonnen! Zeova in pardonn nou en kantite pese. Pa nou osi nou devret ‘ pardonn lezot ki’n fer nou ditor’? (Matye 6:14, 15) Avan ki Zezi ti rakont sa parabol konsernan sa lesklav san pitye, Pyer ti demann li: “Senyer, si mon frer i ofans mwan, konbyen fwa mon devre pardonn li, ziska set fwa?” Zezi ti reponn, “Non, pa set fwa me [“swasanndiset,” NW] fwa.” (Matye 18:21, 22) Wi, en dimoun ki demontre mizerikord i pare pour pardonnen ziska ‘swasanndiset fwa’ sa i vedir, i pardonnen sak fwa ki en dimoun i ofans li.
14. Dapre Matye 7:1-4, ki mannyer nou kapab demontre mizerikord sak zour?
14 En lot fason ki mannyer Zezi ti ansenny nou pour demontre mizerikord ti dan son Sermon lo Montanny kot i ti dir: “Pa zize e ou pa ava ganny zize. Parski Bondye pou ziz ou parey ou ziz lezot . . . Ki mannyer ou war lapay ki dan lizye ou frer me ou pa remark poto ki dan sa ki pour ou? Oubyen ki mannyer ou kapab dir ou frer: ‘Les mwan tir sa lapay dan ou lizye’ kan ou annan en poto dan sa ki pour ou?” (Matye 7:1-4) Alor, nou kapab demontre mizerikord sak zour, ler nou aksepte febles lezot san ziz zot oubyen toultan kritik zot.
“Fer dibyen tou dimoun”
15. Akoz bann aksyon ki demontre mizerikord pa devret ganny fer zis anver nou bann frer ek ser dan kongregasyon?
15 Vi ki sa liv Labib ki’n ganny ekrir par Zak i met lanfaz lo mizerikord ki ganny demontre antre krwayan, sa pa vedir ki nou merit demontre mizerikord zis anver bann Kretyen dan kongregasyon. Psonm 145:9 i dir ki: “Zeova i bon avek tou dimoun, e son mizerikord i parlao tou son travay.” Nou ganny ankouraze pour “fer tou [nou] zefor pour fer tou parey li” e pour “fer dibyen tou dimoun.” (Efezyen 5:1; Galat 6:10) Lefet ki nou pa kontan “lemonn ni sa bann keksoz ki dan lemonn,” sa pa vedir ki nou pa konsernen anver bezwen lezot dan sa lemonn.—1 Zan 2:15.
16. Ki bann fakter ki nou pran an konsiderasyon ler nou demontre mizerikord anver lezot?
16 Konman Kretyen, nou touzour pare pour ed dan nenport ki fason ki nou kapab bann ki vin viktim “letan ek levennman san ekspekte” oubyen bann ki pas dan bann sitiasyon difisil. (Eklezyast 9:11) Byensir, led ki nou kapab donnen e ki kantite nou kapab fer i tou depan lo nou sirkonstans. (Proverb 3:27) Ler nou ed lezot lo kote materyel, nou devret fer atansyon ki en aksyon ki paret bon pa vin enn ki ankouraz lapares. (Proverb 20:1, 4; 2 Tesalonisyen 3:10-12) Alor, en aksyon ki demontre vre mizerikord i enn ki relye avek en santiman ranpli avek konpasyon oubyen senpati e osi avek bon zizman.
17. Ki sa pli bon fason pour demontre mizerikord anver bann ki pa Temwen?
17 Sa pli bon fason pour demontre mizerikord anver bann ki pa Temwen, i kan nou partaz avek zot laverite lo Labib. Akoz? Akoz lamazorite imen ozordi pe rode parey bann aveg dan sa fernwanr spirityel. Lefet ki zot pa konnen ki mannyer pour fer fas avek zot problenm, ni okenn vre lespwar pour lavenir, laplipar dimoun zot “fatige e dekouraze parey bann mouton ki napa berze.” (Matye 9:36) Sa mesaz ki sorti dan Parol Bondye i kapab vin ‘en lalanp pour zot lipye,’ pour ed zot pour fer fas avek zot problenm lavi. I kapab osi vin ‘en lalimyer pour zot semen’ vi ki Labib i predir sa ki Bondye i’n promet pour lavenir, par donn zot en baz solid pour en lavenir ere. (Psonm 119:105) Pa i en privilez pour partaz sa mesaz laverite ki merveye avek bann ki vreman bezwen sa mesaz! An atandan sa ‘gran ladetres’ ki pour byento arive, la i lemoman pour partisip avek devouman dan sa travay predikasyon e fer disip. (Matye 24:3-8, 21, 22, 36-41; 28:19, 20) Napa okenn lezot aksyon ki demontre mizerikord ki pli enportan ki sa enn.
Donn “sa ki anndan”
18, 19. Akoz nou devret fer zefor pour demontre plis mizerikord dan nou lavi?
18 Zezi ti dir: “Donn bann pov sa ki anndan.” (Lik 11:41) Pour en bon aksyon ganny konsidere konman en vre aksyon ki demontre mizerikord, i bezwen en don ki sorti anndan setadir dan en leker senser ranpli avek lanmour. (2 Korentyen 9:7) Dan en lemonn kot dimoun i dir, egois, e napa gran lentere pour soufrans ek problenm lezot, pa en tel mizerikord i soulaz nou!
19 Alor, annou fer zefor pour kontinyen demontre plis mizerikord dan nou lavi. Pli nou demontre mizerikord pli nou resanble Bondye. Sa i ed nou pour viv en lavi ki vreman fer sans e ki satisfezan.—Matye 5:7.
Ki ou’n aprann?
• Akoz i vreman enportan pour demontre mizerikord anver nou bann konpanyon Kretyen?
• Ki mannyer nou kapab demontre mizerikord anver lezot Kretyen dan kongregasyon?
• Ki mannyer nou kapab fer zefor pour fer sa ki byen anver bann ki pa Temwen?
[Kestyon]
[Portre lo paz 9]
Sa Samariten ti demontre mizerikord
[Portre lo paz 10]
Bann Kretyen i fer bokou aksyon ki demontre mizerikord
[Portre lo paz 13]
Pli bon fason pour demontre mizerikord avek bann ki pa Temwen i kan nou partaz laverite Labib avek zot