Pourswiv En Bi Ki Vo Lapenn Dan Lavi

“Tou sa ki respire—loue Ya.”—PSONM 150:6.

1. Eksplike ki mannyer en zennonm ti pe rod en bi dan lavi.

“MON ti fer bann letid pour vin dokter akoz mon ti oule servi mon lavi pour ed lezot. Mon ti osi krwar ki pozisyon en dokter e larzan ki mon ti pou gannyen ti pou fer mwan ere.” Sa i parol Seung Jin ki ti grandi Kore. * “Avek letan, mon ti vwar ki en dokter pa kapab fer bokou pour ed lezot e mon ti dezapwente. Alor mon ti konmans etidye lar, me mon bann kreasyon artistik pa ti anmenn bokou byenfe pour lezot, e mon ti santi mwan egois. Apre mon ti vin en ansennyan me i pa ti pran bokou letan pour mwan realize ki mon ti zis kapab pas lenformasyon me mon pa ti kapab donn bann konsey ki anmenn vre boner.” Parey bokou dimoun, Seung Jin ti pe rod en bi ki vo lapenn dan son lavi.

2. (a) Ki savedir annan en bi dan lavi? (b) Ki mannyer nou konnen ki nou Kreater ti annan en rezon pour met nou lo later?

² En vre bi dan lavi se ler nou annan en rezon pour viv, en lobzektif kler, e nou lavi ek zefor i relye avek sa lobzektif. Eski imen i kapab annan en lobzektif koumsa? Wi! Vi ki nou’n ganny kree avek lentelizans, en konsyans, ek en abilite pour rezonnen, sa i montre ki nou Kreater ti annan en bi oubyen en rezon pour met nou lo later. Alor i fer sans ki nou kapab trouv en vre bi dan lavi selman ler nou viv nou lavi an armoni avek bi oubyen plan ki nou Kreater i annan.

3. Ki plan Bondye i enplike pour bann imen?

³ Labib i montre ki plan Bondye pour nou i enplik plizyer laspe. Par egzanp, nou lekor in ganny kree dan en fason merveye e sa i vreman montre ki Bondye i kontan nou senserman. (Psonm 40:5; 139:14) Alor, si nou viv dapre plan Bondye, nou osi nou pou bezwen kontan lezot senserman. (1 Zan 4:7-11) I enplik osi obeir bann lalwa Bondye ki ed nou viv an armoni avek plan Bondye lanmour.—Eklezyast 12:13; 1 Zan 5:3.

4. (a) Ki nou bezwen pour annan en vre bi dan lavi? (b) Ki pli zoli bi en dimoun i kapab pourswiv?

⁴ I ti osi dan plan Bondye ki bann imen i  viv ere e anpe avek kanmarad e osi avek lezot keksoz ki Bondye in kree. (Zenez 1:26; 2:15) Me ki nou bezwen fer pour nou santi nou ere, an sekirite e anpe? Parey en zanfan i bezwen santi ki son paran i la akote li pour li santi li ere e an sekirite, de menm nou bezwen annan en bon relasyon avek nou papa dan lesyel si nou oule konpran vre rezon ek bi akoz nou lo later. (Ebre 12:9) Bondye i fer li posib pour nou annan en tel relasyon avek li ler i les nou vin pros avek li e kan i ekout nou lapriyer. (Zak 4:8; 1 Zan 5:14, 15) Si avek lafwa nou ‘mars avek Bondye’ e nou vin son zanmi, nou kapab loue nou papa dan lesyel e fer li kontan. (Zenez 6:9; Proverb 23:15, 16; Zak 2:23) Sa i pli zoli bi ki en dimoun i kapab pourswiv dan lavi. En psalmis ti dir: “Tou sa ki respire—loue Ya.”—Psonm 150:6.

Ki ou bi dan lavi?

5. Akoz i pa fer sans pour met bann keksoz materyel premye?

⁵ I form par plan Bondye ki nou pran byen swen avek nou lekor ek nou fanmir. Sa i enkli pran swen avek nou lekor lo plan fizik e spirityel. Parkont, nou bezwen gard nou lekilib pour ki nou kontinyen preokip nou avek sa ki pli enportan setadir bann keksoz spirityel olye ki bann keksoz dan lavi tou le zour i vin premye dan nou lavi. (Matye 4:4; 6:33) Malerezman, bokou dimoun i viv zis pour ganny plis keksoz materyel. Pourtan, i pa fer sans pour zis esey satisfer nou bann bezwen materyel. Tou dernyenman, en serve ki ti ganny fer Lazi avek bann dimoun tre ris ti revele ki plizyer sa bann dimoun i “santi zot trouble e pa an sekirite menm si zot annan en o pozisyon dan lasosyete e zot santi zot in reisi finansyerman.”—Eklezyast 5:11.

6. Ki konsey Zezi ti donn bann ki tay deryer larises?

⁶ Zezi ti koz lo lefet ki larises i kapab anbet nou. (Mark 4:19, NW) Dan ki sans? Larises i donn lenpresyon ki i fer dimoun ere, me i pa leka. Lerwa Salomon ki ti saz ti dir: “En zonm ki kontan larzan pa zanmen ganny ase.” (Eklezyast 5:10, The New English Bible) Me eski i posib pour tay deryer keksoz materyel e an menm tan donn nou meyer dan servis Bondye? Non, i pa posib. Zezi ti dir: “Personn pa kapab servi de met; parski swa i pou deteste enn e kontan lot; swa i pou devoue anver enn e mepriz lot. Ou pa kapab servi Bondye ek larises an menm-tan.” Zezi ti ankouraz son bann disip pour pa akimil keksoz materyel lo later, me plito “akimil zot larises dan lesyel,” setadir annan en bon repitasyon devan Bondye ki “konnen sa ki zot bezwen avan menm ki zot demann li.”—Matye 6:8, 19-25.

7. Ki mannyer nou kapab ganny sa “vre lavi”?

⁷ Pol ti ekrir Timote pour donn bann konsey serye lo sa size. I ti dir Timote: “Pour bann ki posed larises, . . . dir zot pa met zot lesperans dan sa bann larises enserten, me met lesperans dan Bondye ki donn nou tou keksoz an labondans pour nou zouir. . . . Zot devre montre zot zenere e touzour pare pour partaz avek lezot. Alor zot ava anmas en bon e solid trezor pour lavenir, e koumsa zot ava ganny vre lavi.”—1 Timote 6:17-19.

Ki si sa “vre lavi”?

8. (a) Akoz plizyer dimoun i fer bokou zefor pour zot ganny larises ek pozisyon dan sa lemonn? (b) Ki sa bann dimoun pa arive konpran?

⁸ Si ou koz lo “vre lavi,” laplipar dimoun pou mazin en lavi deliks ek plezir. La sa ki en magazin sorti Lazi ti raporte: “Bann ki get televizyon oubyen film i devlop en dezir pour sa ki zot vwar, zot reve lo ki kalite keksoz zot kapab gannyen.” Pour bokou dimoun, zot bi dan lavi se ganny plis keksoz materyel e annan en pozisyon dan lasosyete. Alor pour zot, vin ris oubyen annan en pozisyon dan sa lemonn, i vin zot bi dan lavi. Bokou zot i sakrifye zot zenes, lasante, fanmir, ek bann keksoz spirityel pour zot kapab ganny sa  bann keksoz. Bokou sa bann dimoun pa tyonbo en kou pour mazinen ki tou sa bann keksoz ki zot vwar dan medya pe zis reflekte “Lespri dapre lemonn,” setadir fason panse ki enfliyans laplipar sa bilyon dimoun lo later e ki fer zot azir dan en fason ki kont plan oubyen bi Bondye. (1 Korentyen 2:12; Efezyen 2:2) I pa sirprann nou alor ki sitan en kantite dimoun pa ere ozordi!—Proverb 18:11; 23:4, 5.

9. Ki bann imen pa pou zanmen kapab fer, e akoz?

⁹ Be ki nou pou dir lo sa bann dimoun ki devoue senserman pour byennet lezot, ki fer bokou zefor pour elimin lafanmin, maladi oubyen lenzistis? Bokou in benefisye avek bann zefor ek sakrifis ki zot fer. Selman, malgre tou sa zefor, zot pa pou zanmen sanz lemonn pour fer li vin en lemonn zis e bon. Akoz? Parski an realite “lemonn antye i dan pouvwar dyab” e Satan pa oule ki sa lemonn i sanze.—1 Zan 5:19.

10. Kan bann Kretyen fidel pou viv sa “vre lavi”?

¹⁰ I vreman fer lapenn si en dimoun napa okenn lespwar pour lavenir! Pol ti ekrir: “Si nou lesperans dan Kris i valab zis pour sa lavi, dan sa ka, nou en bann dimoun pli malere ki egziste.” Pour dimoun ki krwar ki se sanmenm sa lavi, alor zot dir, “annou manze e bwar, parski demen nou pou mor.” (1 Korentyen 15:19, 32) Me i annan en lavenir pour nou, “nou pe espere dapre son promes en nouvo lesyel ek en nouvo later kot pou annan lazistis.” (2 Pyer 3:13) Dan lavenir, bann Kretyen pou viv sa “vre lavi,” setadir “lavi eternel” e parfe, swa dan lesyel ouswa lo later anba bon dominasyon gouvernman Bondye!—1 Timote 6:12.

11. Akoz napa en pli zoli bi dan lavi ki pour travay pour siport Rwayonm Bondye?

¹¹ Se selman Rwayonm Bondye ki pou kapab rezourd konpletman bann problenm limanite. Pour sa rezon, napa en pli bon bi dan lavi ki fer zefor pour siport Rwayonm Bondye. (Zan 4:34) Ler nou fer sa, nou annan en relasyon presye avek nou Papa dan lesyel. Nou osi annan lazwa pour servi Bondye ansanm avek plizyer milyon frer ek ser spirityel, ki annan menm bi ki nou dan lavi.

 Fer sa bann bon kalite sakrifis

12. Ki diferans i annan ant lavi dan sa lemonn konmela ek “vre lavi”?

¹² Labib i dir ki sa lemonn konmela pe “disparet ek tou son bann dezir.” Tou sa ki dan lemonn Satan, enkli son laglwar ek larises pou disparet, “me sa ki fer lavolonte Bondye i reste eternelman.” (1 Zan 2:15-17) “Vre lavi” setadir lavi eternel anba dominasyon Rwayonm Bondye i konpletman diferan avek bann plezir ki pa dirab, larises ek laglwar ki pa tanporer, ki sa lemonn i ofer. Akoz? Akoz vre lavi i permanan e i vo lapenn ki nou fer sakrifis pour ganny li, me selman nou bezwen fer sa bon kalite sakrifis.

13. Ki mannyer en koup ti fer sa bon kalite sakrifis?

¹³ Annou get legzanp Henry ek Suzanne. Zot annan en lafwa solid dan promes Bondye ki bann ki met Rwayonm Bondye premye dan zot lavi pou ganny Son led. (Matye 6:33) Alor, zot in deside reste dan en lakaz byen senp, koumsa olye zot tou le de i travay aplentan, zot kapab pas plis letan dan bann aktivite spirityel avek zot de fiy. (Ebre 13:15, 16) Enn zot zanmi ki ti annan bon lentansyon pa ti kapab konpran zot swa. I ti dir Suzanne: “Mon ser, si ou le viv dan en pli zoli lakaz en zour, ou pou bezwen fer kek sakrifis.” Toudmenm, Henry ek Suzanne ti konnen ki si zot met Zeova premye zot “posed promes lavi dan letan prezan, ek dan lavenir.” (1 Timote 4:8; Tit 2:12) Finalman, zot de fiy in vin serviter Bondye aplentan. Zot santi ki zot fanmir pa’n mank nanryen, okontrer zot in benefisye en kantite akoz zot annan en bi dan zot lavi, sa i rod sa “vre lavi.”—Filipyen 3:8; 1 Timote 6:6-8.

Fer konmsi zot pa pe ganny okenn profi

14. Ki difikilte bann ki oubliy vre bi lavi i kapab rankontre?

¹⁴ I annan en gran danze si nou oubliy nou vre bi dan lavi e nou pa reste byen konsantre lo sa “vre lavi.” I annan sa risk ki nou les nou ganny antrennen par bann “traka larzan ek plezir lavi.” (Lik 8:14) Si nou pa kontrol nou lanvi pour bann keksoz materyel ek “traka lavi [oubyen pour sa ki nou bezwen pour viv, not anba paz dan NW]”, sa i kapab fer nou vin tro okipe dan sa lemonn. (Lik 21:34) I malere ki serten in les zot ganny antrennen par dezir pour vin ris e zot in “egare lwen avek lafwa e zot in met zot lekor dan en kantite tourman,” e menm perdi zot relasyon presye avek Zeova. Pa i fer lapenn ki dimoun i bezwen pey en konsekans parey akoz zot pa reste konsantre pour ‘ganny lavi eternel’!—1 Timote 6:9, 10, 12; Proverb 28:20.

15. Ki mannyer en fanmir ti benefisye par ‘fer konmsi zot pa pe ganny okenn profi’ dan sa lemonn?

¹⁵ Pol ti donn sa konsey: “Bann ki pe profite dan lemonn, fer konmsi zot pa ganny okenn profi.” (1 Korentyen 7:31) Keith ek Bonnie ti pran sa konsey aker. Keith i dir: “Ler mon ti vin en Temwen Zeova, mon ti pros pour fini mon formasyon pour vin dantis. Mon ti annan en swa pour fer. Mon ti kapab annan en kantite pasyan e fer en bon pti pe larzan, me sa ti pou enterfer avek mon servis pour Zeova. Mon ti deside pour limit lakantite pasyan ki mon ti pran pour mwan kapab annan plis letan pour okip byennet spirityel e emosyonnel mon fanmir, ki finalman ti enkli senk fiy. I vre pa souvan ki nou ti annan larzan an tro, me nou ti aprann pour anmas nou larzan, e nou ti touzour annan sa ki nou bezwen. Dan nou fanmir, nou ti pros avek kanmarad, i ti annan en bon latmosfer ek bokou lazwa. Finalman, nou tou nou’n konmans servis aplentan. Aprezan, nou bann fiy in marye e zot ere, trwa i annan zanfan osi. Zot fanmir osi i ere anmezir ki zot kontinyen met plan Zeova premye dan zot lavi.”

Met plan Bondye premye dan ou lavi

16, 17. Donn legzanp bann dimoun dan Labib ki ti annan bann talan, e ki mannyer nou rapel zot?

¹⁶ Dan Labib, i annan plizyer legzanp bann  dimoun ki ti viv annakor avek plan Bondye e bann ki pa ti fer li. Dimoun sorti dan tou sirkonstans, kiltir ek laz i kapab tir en leson atraver sa bann legzanp. (Romen 15:4; 1 Korentyen 10:6, 11) Nimrod ti konstri bann gran lavil, me i ti fer sa kont lavolonte Zeova. (Zenez 10:8, 9) Parkont, bokou lezot ti bann bon legzanp. Par egzanp, i pa ti bi Moiz pour gard son pozisyon konman en gran personnaz Ezipsyen. O kontrer, i ti realize ki son bann privilez spirityel ti annan en “pli gran valer ki bann trezor Lezip.” (Ebre 11:26) Lik, ki ti en dokter, ti probableman ed Pol ek lezot fer fas avek zot problenm lasante. Me i ti fer pli gran dibyen, ler i ti anons bon nouvel e ekrir en liv dan Labib. Pol li ti renonmen, pa konman en spesyalis Lalwa me plito konman en misyonner ek en “zapot pour bann pep non-Zwif.”—Romen 11:13.

¹⁷ An sa ki konsern David, premye keksoz ki nou mazinen, se pa en komandan militer, en mizisyen ek konpoziter, me plito “en zonm selon leker Bondye.” (1 Samyel 13:14) Nou konn Danyel pa akoz i ti travay konman en o zofisye dan gouvernman Babilonn me konman en profet fidel avek Zeova. Nou pa mazin Ester konman larenn Pers me plito konman en legzanp kouraz ek lafwa. I parey pour Pyer, Andre, Zak ek Zan, nou konn zot pa konman bann bon peser me konman bann zapot Zezi. E pli bon legzanp, se Zezi li menm, ki nou pa rapel konman en “sarpantye,” me konman “Mesi” oubyen Kris. (Mark 6:3; Matye 16:16) Tou sa bann dimoun ti konpran byen ki nenport talan, posesyon oubyen pozisyon ki zot ti annan, sa ki ti devret pli enportan dan zot lavi, ti zot servis pour Zeova e pa zot karyer dan lemonn. Zot ti konnen ki sa ki ti annan plis valer e pli bon bi dan lavi, se ki zot vin en zonm oubyen madanm ki fidel avek Bondye.

18. Ki mannyer en zenn Kretyen ti deside pour servi son lavi, e ki finalman i ti realize?

¹⁸ Seung Jin ki nou ti mansyonn pli boner, ti konpran sa li osi. I eksplike: “Olye dedye tou mon lafors dan domenn lamedsin, lar oubyen lansennyman, mon ti deside pour servi mon lavi an armoni avek mon dedikasyon avek Bondye. Aprezan, mon pe servi kot i annan en gran bezwen pour ansenny Labib e mon ed dimoun pran sa semenn ki anmenn ver lavi eternel. Premye kou, mon ti krwar ki servis aplentan pa ti pou sitan enteresan. Me konmela, i annan plis defi dan mon lavi ki oparavan, anmezir ki mon esey amelyor mon personnalite ek mon abilite pour mon travay avek bann dimoun lezot kiltir. Mon vwar ki ler plan Bondye i vin nou plan osi, sa i anmenn en lavi ki vreman fer sans.”

19. Ki mannyer nou kapab trouv vre bi dan lavi?

¹⁹ Nou Kretyen nou’n ganny beni akoz nou annan en konnesans ek en lespwar ki kapab sov lavi. (Zan 17:3) Alor, annou aksepte e “pa les perdi sa lagras [Bondye] ki [nou’n] resevwar.” (2 Korentyen 6:1) O kontrer, annou servi nou letan presye, zour ek lannen ki nou annan devan nou, pour loue Zeova. Annou koz avek dimoun lo sa konnesans ki anmenn boner la konmela e ki anmenn ver lavi eternel. Si nou fer sa, nou pou vwar ki parol Zezi i vre ler i ti dir: “I annan plis lazwa pour donnen ki pour resevwar.” (Akt 20:35) E nou pou’n trouv vre bi dan lavi.

[Not anba lo paz]

Eski ou kapab eksplike?

• Ki sa pli bon bi dan lavi ki en dimoun i kapab annan?

• Akoz i pa fer sans pour viv zis pour bann keksoz materyel?

• Ki sa “vre lavi” ki Bondye in promet nou?

• Ki mannyer nou kapab servi nou lavi dan plan Bondye?

[Kestyon]

[Portre lo paz 20]

Bann Kretyen i bezwen fer sa bon kalite sakrifis