“Verifye sa ki pli enportan”

“Verifye sa ki pli enportan.”​—FILI. 1:10, NW.

PWEN POUR REFLESIR LO LA

Ki konfyans nou gannyen atraver vizyon Izai, Ezekyel ek Danyel?

Ki leson nou tire kan nou egzamin lobzektif lorganizasyon Zeova lo later?

Ki ou determinasyon apre ki ou’n etidye sa lartik?

1, 2. Ki profesi konsernan bann dernyen zour ki ti kaptir latansyon bann disip Zezi, e akoz?

PYER, Zak, Zan ek Andre ti finalman tousel avek zot Met. Sa konversasyon ki Zezi ti’n fer pli boner konsernan destriksyon tanp ti ankor pe fatig zot. (Mark 13:1-4) Alor zot ti demande: “Dir nou kan tousala pou arive, e ki siny ki pou endik ou [“prezans ek konklizyon sa sistenm,” NW]?” (Mat. 24:1-3) Zezi ti konmans koz avek zot lo bann levennman oubyen kondisyon ki pa ti pou zis anmenn bann gran sanzman dan lavi, me ki ti pou osi montre ki move lemonn Satan ti pe ariv ver son lafen. En levennman partikilye ti’n bezwen kaptir latansyon bann disip Zezi. Apre ki Zezi ti’n mansyonn bann levennman dekourazan parey lager, lafanmin ek logmantasyon lemal, i ti osi predir en keksoz pozitif ki ti pou mark bann dernyen zour. I ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”​—Mat. 24:7-14.

² Bann disip Zezi ti’n vreman kontan pour pres sa bon nouvel lo Rwayonm Bondye ansanm avek Kris. (Lik 8:1; 9:1, 2) I posib ki zot ti mazin sa ki i ti dir: “Rekolt i an labondans, me napa bokou travayer. Alor sipliy Propriyeter rekolt pour li anvoy bann travayer pou ranmas son rekolt.” (Lik 10:2) Me ki mannyer zot ti pou kapab pres “partou dan lemonn” e fer “tou dimoun konnen”? Kote zot ti pou ganny sa bann travayer? Si zis zot ti’n kapab vwar dan lavenir kan zot ti pe asiz avek Zezi sa zour! Sirman, zot ti pou’n sirprann pour vwar lakonplisman sa parol ki ozordi nou lir dan Matye 24:14.

3. Ki mannyer Lik 21:34 pe ganny akonplir ozordi, e ki kestyon nou devret demann nou lekor?

³ Nou pe viv dan sa letan kot parol Zezi pe ganny akonplir. Plizyer milyon dimoun in zwenn ansanm pour pres sa bon nouvel Rwayonm partou  dan lemonn. (Iza. 60:22) Par kont, Zezi ti endike ki serten ti pou vwar li difisil pour reste konsantre pandan sa bann dernyen zour. Zot ti pou ganny distrer e ‘zot vizilans ti pou ganny detournen.’ (Lir Lik 21:34.) Nou osi nou pe vwar lakonplisman sa profesi. Serten parmi pep Bondye pe ganny distrer. Nou kapab remark sa atraver desizyon ki zot fer konsernan travay, letid avanse, zot latitid anver keksoz materyel, e osi dan lakantite letan ki zot pase dan sport ek divertisman. Lezot i fatige akoz presyon ek traka lavi. Demann ou lekor: ‘Ki mannyer mwan mon ete? Eski mon desizyon i montre ki mon pe konsantre lo sa ki pli enportan dan mon lavi?’

4. (a) Konsernan kwa Pol ti priye pour bann Kretyen Filip e akoz? (b) Ki nou pou egzaminen dan sa lartik ek lot ki swiv, e avek ki bi?

⁴ Bann Kretyen dan premye syek ti bezwen fer bokou zefor pour fer bann keksoz spirityel reste en priyorite dan zot lavi. Zapot Pol ti vwar li neseser pour priye ki bann Kretyen Filip i “verifye sa ki pli enportan.” (Lir Filipyen 1:9-11. *) Parey zapot Pol, bokou sa letan ti pe ‘deplizanpli vin pli brav pour pres mesaz Bondye san okenn lafreyer.’ (Fili. 1:12-14) Dan menm fason ozordi, laplipar nou pe pres Parol Bondye avek kouraz. Kantmenm sa, kan nou medit lo sa ki lorganizasyon Zeova pe akonplir konmela, eski sa i kapab ed nou reste pli konsantre lo predikasyon, sa travay pli enportan? Definitivman wi! Anmezir nou etidye sa lartik, annou reflesir lo sa laranzman ki Zeova in met an plas pour ki Matye 24:14 i ganny akonplir. Ki lobzektif son lorganizasyon, e ki mannyer nou ek nou fanmir i kapab ganny motive lefet ki nou konn sa? Dan lot lartik, nou pou vwar kwa ki kapab ed nou andire e mars menm pa avek lorganizasyon Zeova.

LORGANIZASYON ZEOVA DAN LESYEL PE KONTINYEN AL ANNAVAN

5, 6. (a) Akoz Zeova in donn bann vizyon lo son lorganizasyon dan lesyel? (b) Ki Ezekyel ti vwar dan en vizyon?

⁵ I annan bokou keksoz ki Zeova in deside pour pa enkli dan son Parol. Par egzanp, i pa’n fourni detay konsernan ki mannyer laservel i fonksyonnen oubyen ki mannyer liniver i marse, menm si sa bann size ti pou’n kapab vreman enteresan! O kontrer, Bondye in donn nou bann lenformasyon ki nou bezwen pour nou kapab konpran e viv an armoni avek son plan. (2 Tim. 3:16, 17) Pa i enteresan ki Labib i donn nou en apersi lo sa parti lorganizasyon Zeova ki envizib! I en lazwa pour nou kan nou lir deskripsyon ki Izai, Ezekyel, Danyel in ekrir ek resi Zan dan Revelasyon konsernan lafason ki lorganizasyon Zeova i ete dan lesyel. (Iza. 6:1-4; Ezek. 1:4-14, 22-24; Dan. 7:9-14; Rev. 4:1-11) I konmsi Zeova in ouver rido lesyel pour nou kapab egzamin sa ki pe arive laba. Akoz i ti donn nou sa lenformasyon?

⁶ Zeova ti anvi ki nou pa zanmen oubliye ki nou form parti son lorganizasyon iniversel. I annan en kantite keksoz ki nou pa kapab vwar ki pe ganny fer pour fer marse plan Zeova. Par egzanp, Ezekyel ti vwar sa parti envizib lorganizasyon Zeova ki ti ganny reprezante par en gro saret dan lesyel. Sa saret ti kapab bouz vitman e sanz direksyon en sel kou. (Ezek. 1:15-21) Ler  larou sa saret i vire, i kapab kouver en gran zistans vitman. Dan sa vizyon, Ezekyel ti osi kapab vwar sa Enn ki ti pe diriz sa saret. I ti dir: “Mon ti vwar en keksoz ki ti iliminen parey zekler, parey dife toultour . . . I ti annan en laparans parey laglwar Zeova.” (Ezek. 1:25-28) Pa i ti’n bezwen enpresyonn Ezekyel kan i ti vwar sa vizyon! I ti vwar ki sa lorganizasyon ti anba kontrol total Zeova e ki i ti pe servi son lespri sen pour diriz sa lorganizasyon. Pa sa i montre nou ki lorganizasyon Zeova dan lesyel pe vreman al annavan!

7. Ki mannyer vizyon Danyel i donn nou konfyans?

⁷ Sa ki Danyel ti vwar osi i kapab donn nou bokou konfyans. I ti ganny sa loportinite pour vwar Zeova konman “Ansyen bann Zour” pe asize lo en tronn ki ti annan laflanm dife. Sa tronn ti annan bann larou. (Dan. 7:9) Zeova ti anvi Danyel i vwar ki Son lorganizasyon i an mouvman pour akonplir Son plan. Danyel ti osi vwar “en dimoun parey garson zonm,” setadir Zezi, pe ganny donnen drwa pour sirvey sa parti lorganizasyon Zeova ki lo later. Renny parfe Kris pa pou dir pour zis detrwa lannen. O kontrer, i “en dominasyon ki pou dire, ki pa pou fini e son rwayonm i enn ki pa pou ganny detrir.” (Dan. 7:13, 14) Sa i pous nou pour annan konfyans dan Zeova e rekonnet sa ki i pe fer ozordi. I ti donn “dominasyon, dinyite ek rwayonm” son Garson Zezi ki kalifye pour sa fonksyon. Zeova i annan konfyans dan son Garson. Alor, nou osi nou kapab annan konfyans dan lafason ki Zezi i dirize.

8. Ki lenpak sa vizyon ki Zeova ti donn Ezekyel ek Izai ti annan lo zot e ki lefe sa i devret annan lo nou?

 ⁸ Lefet ki nou konn sa parti envizib lorganizasyon Zeova, ki lefe sa i devret annan lo nou? Parey Ezekyel, nou sirman enpresyonnen par sa ki Zeova pe akonplir. (Ezek. 1:28) Kan nou medit lo lorganizasyon Zeova, sa i kapab pous nou pour azir zis parey Izai. Kan i ti ganny sa loportinite pour dir lezot sa ki Zeova ti pe fer, i ti sezi sa loportinite san okenn ezitasyon. (Lir Izai 6:5, 8. *) Izai ti konnen ki i ti kapab fer fas avek nenport kwa avek led Zeova. Pareyman, sa pti apersi lo lorganizasyon Zeova i devret enpresyonn nou e pous nou pour azir. Pa i vreman ankourazan pour medit lo sa lorganizasyon ki pe toultan al annavan e ki son lobzektif se pour akonplir plan Zeova!

LORGANIZASYON ZEOVA LO LATER

9, 10. Akoz i neseser annan en parti lorganizasyon Zeova lo later?

⁹ Atraver son Garson, Zeova in etablir en laranzman lo later ki pe travay an armoni avek son lorganizasyon dan lesyel. Akoz i neseser annan en parti sa lorganizasyon lo later pour akonplir Matye 24:14? Annou vwar trwa rezon.

¹⁰ Premyerman, Zezi ti dir ki son bann disip ti pou pres dan “bann landrwa pli elwannyen lo later.” (Akt 1:8) Dezyenmman, laranzman ti pou bezwen ganny fer pour fourni nouritir spirityel e pour pran swen avek bann ki pe fer sa travay. (Zan 21:15-17) Trwazyenmman, laranzman ti pou bezwen ganny fer pour ki bann ki pe pres sa bon nouvel i kapab rasanble ansanm pour ador Zeova e konnen konman pour fer sa travay. (Ebr. 10:24, 25) Sa travay pa ti pou kapab ganny fer zis koumsa menm. Pour bann disip Kris reisi sa travay, zot ti pou bezwen ganny byen organize.

11. Ki mannyer nou montre ki nou siport bann laranzman ki lorganizasyon Zeova i fer?

¹¹ Ki mannyer nou montre ki nou siport bann laranzman ki lorganizasyon Zeova i fer? En fason enportan se par toultan met nou konfyans dan sa bann ki Zeova ek Zezi in konfye pour diriz predikasyon. I annan bokou aktivite ek rezon dan sa lemonn ki kapab detourn latansyon sa bann frer. Pourtan, kwa ki’n toultan lobzektif sa parti vizib lorganizasyon Zeova?

KONSANTRE LO “SA KI PLI ENPORTAN”

12, 13. Ki mannyer bann ansyen i desarz zot responsabilite, e akoz sa i ankouraz ou?

¹² Bann ansyen eksperyanse partou dan lemonn in ganny apwente pour sirvey e fer sir ki sa travay pour anons Rwayonm Bondye i propaze dan bann pei kot zot pe servi. Sa bann frer i rod gidans Zeova par servi son Parol konman ‘en lalanp pour zot lipye e en lalimyer pour zot semen,’ e zot priy senserman ler zot pe fer en desizyon.​—Ps. 119:105; Mat. 7:7, 8.

¹³ Parey sa bann ki ti pe diriz travay predikasyon dan premye syek, bann ansyen ozordi ki diriz sa travay i devoue dan “predikasyon.” (Akt 6:4) Zot ganny bokou lazwa anmezir ki sa bon nouvel i kontinyen propaze dan zot teritwar e dan lemonn antye. (Akt 21:19, 20) Zot pa etablir en ta lareg ek prosedir.  O kontrer, zot swiv konsey Labib ek gidans lespri sen Bondye anmezir zot fer bann laranzman neseser pour ede ki sa travay predikasyon i propaze. (Lir Akt 15:28.) Par fer sa, sa bann frer responsab i kit en bon legzanp pour kongregasyon.​—Efe. 4:11, 12.

14, 15. (a) Ki laranzman ki’n ganny met an plas pour siport travay predikasyon dan lemonn antye? (b) Ki mannyer ou santi anver sipor ki ou pe donnen dan sa travay predikasyon?

¹⁴ En keksoz ki bokou dimoun pa vwar, i sa kantite travay ki ganny fer pour prepar nouritir spirityel dan nou bann piblikasyon, renyon ek lasanble. Plizyer milyon volonter i travay dir pour tradwir sa nouritir spirityel dan apepre 600 langaz pour ki pli bokou dimoun posib i kapab aprann “bann mervey ki Bondye in fer” dan zot prop langaz. (Akt 2:7-11) Bann zenn frer ek ser i travay avek bann masin lenprimri vit ki prodwir e enprim nou bann piblikasyon. Apre sa, sa bann piblikasyon i ganny distribye avek bann kongregasyon, e menm dan bann landrwa pli elwannyen lo later.

¹⁵ Bokou laranzman in ganny met an plas pour ki nou kapab pres plis avek nou kongregasyon. Par egzanp, plizyer milyon frer ek ser i volonterman ede pour konstri bann Lasal Rwayonm ek Lasal Lasanble, pour ed bann ki’n ganny afekte avek dezas natirel oubyen ki bezwen swen medikal irzan, pour organiz nou lasanble rezyonal e distrik, e pour ansennyen dan lekol minister teokratik. Sa i zis detrwa travay ki bokou pa realize pe ganny fer. Ki bi tou sa travay? Son bi se pour fasilit nou travay predikasyon, pour pli byen pran swen avek spirityalite bann ki pe fer sa travay, e ed lezot pour vin bann adorater Zeova. Eski parti lorganizasyon Zeova lo later pe reste konsantre lo sa ki pli enportan? Anfet wi!

SWIV LEGZANP LORGANIZASYON ZEOVA

16. Ki serten topik enteresan ou kapab etidye personnelman oubyen pandan ladorasyon fanmir?

¹⁶ Eski ou pran letan detanzaot pour reflesir lo sa ki lorganizasyon Zeova pe fer? Serten in swazir pour fer resers lo sa size e medit lo la pandan zot ladorasyon fanmir oubyen letid personnel. En letid lo vizyon Izai, Ezekyel, Danyel ek Zan i byen enteresan pour fer. Liv Jehovah’s Witnesses​—Proclaimers of God’s Kingdom ek lezot piblikasyon oubyen DVD ki disponib dan ou langaz i donn bann lenformasyon vreman enteresan lo nou lorganizasyon.

17, 18. (a) Dan ki fason sa lartik in ed ou? (b) Ki kestyon nou bezwen demann nou lekor?

¹⁷ Ler nou reflesir lo sa ki Zeova pe akonplir atraver son lorganizasyon, sa i annan en bon lefe lo nou. Ansanm avek sa lorganizasyon ekstraordiner, annou kontinyen reste konsantre lo sa ki pli enportan. Si nou fer sa, sa pou fortifye nou pour annan sa menm determinasyon parey Pol ki ti ekrir: “Alor ki nou posed sa minister, par mizerikord, nou pa perdi kouraz.” (2 Kor. 4:1) I ti osi ankouraz son bann konpanyon: “Annou pa aret fer sa ki byen, parski nou pou rekolte kan letan i a’n arive, si nou pa arete.”​—Gal. 6:9.

¹⁸ Eski i annan serten azisteman ki nou bezwen fer endividyelman oubyen konman en fanmir pour fer sir ki tou le zour nou pe reste konsantre lo sa ki pli enportan? Eski nou kapab senplifye nou lavi pour fer plis dan predikasyon? Dan lartik ki swiv, nou pou vwar senk keksoz ki pou ed nou kontinyen mars menm pa avek lorganizasyon Zeova.

[Not anba lo paz]

[Kestyon]

[Portre lo paz 22]

[Portre lo paz 24]