Ranforsi ou maryaz par annan en bon kominikasyon

“En parol ki ganny dir dan son moman apropriye, i parey ponm lor dan bann skilptir annarzan.”​—PROV. 25:11.

KI OU POU REPONN?

Dan ki fason demontre bon zizman i ede pour ki i annan en bon kominikasyon dan maryaz?

Akoz bann dimoun ki’n marye i bezwen demontre respe pour kanmarad?

Ler bann dimoun ki’n marye i devlop limilite, ki lefe sa i kapab annan dan maryaz?

1. Ki mannyer en bon kominikasyon i ede dan maryaz?

EN FRER Kanada ti dir: “Mon ti pou pli kontan pas letan avek mon madanm ki okenn lezot dimoun. Mon lazwa i ogmante e mon soufrans i diminyen ler mon madanm i dan mon kote.” En msye Lostrali ti ekrir: “Pandan sa 11 an ki nou’n marye, i pa’n zanmen pas en sel zour ki mon pa’n koz avek mon madanm. Nou napa okenn dout oubyen lenkyetid ki nou maryaz pa solid. Nou abitye annan en bon kominikasyon e sa i en premye rezon ki fer nou maryaz solid.” En ser Costa Rica i dir: “Lefet ki nou annan en bon kominikasyon sa pa’n zis anrisi nou maryaz, me in osi ed nou vin pli pros avek Zeova, protez nou pour pa tonm dan tantasyon, ini nou konman en koup e fer nou lanmour pour kanmarad vin pli for.”

2. Ki fakter ki anpes annan en bon kominikasyon?

² Eski ou ek ou konzwen zot annan sa bon kominikasyon oubyen pour zot sa i en defi? I vre, bann sityasyon difisil i kapab leve dan maryaz, akoz maryaz i en linyon ant de dimoun enparfe ki annan diferan personnalite, e zot annan bann tre ki reflekte zot kiltir e fason ki zot in ganny elve. (Rom. 3:23) Deplis, en koup marye i kapab annan diferan fason kominike. I pa pour nanryen ki John Gottman ek Nan Silver, de dimoun ki fer resers lo maryaz i dir: “I demann kouraz ek determinasyon pour gard en relasyon maryaz ki dirab.”

3. Kwa ki kapab ed bann koup marye ranforsi zot maryaz?

³ I demann bokou zefor pour fer en maryaz reisi, me a lafen di zour sa i anmenn en kantite lazwa. Bann konzwen ki kontan kanmarad i vreman kapab trouv lazwa dan zot maryaz. (Ekle. 9:9) Annou vwar bon legzanp lavi maryaz Izaak ek Rebeka. (Zen. 24:67) Menm  apre ki en serten letan ti’n pase depi ki zot ti’n marye, napa okenn par dan Labib ki donn nou lenpresyon ki zot ti nepli kontan kanmarad parey avan. Nou kapab dir menm keksoz konsernan bokou koup marye ozordi. Ki zot sekre? Zot in aprann pour eksprim zot panse ek santiman avek kanmarad dan en fason onnet, me dan en fason zantiy. Pour arive fer sa zot in bezwen devlop e demontre bon zizman, lanmour, profon respe, e limilite. Nou pou vwar aprezan ki ler sa bann kalite i ganny demontre dan maryaz sa i fer li fasil pour annan en bon kominikasyon.

ANNAN BON ZIZMAN

4, 5. Ki mannyer bon zizman i kapab ed en koup konpran kanmarad pli byen? Donn legzanp.

⁴ Proverb 16:20 i dir: “Sa enn ki annan bon zizman dan en sityasyon pou vwar sa ki bon.” Sa parol i vre an sa ki konsern maryaz ek lavi fanmir. (Lir Proverb 24:3. *) Parol Bondye i sa meyer sours bon zizman ek lasazes. Zenez 2:18 i dir nou ki Bondye ti kre madanm pour ki i vin en led pour son msye me pa son fotokopi. Nou vwar byen son rol dan lafason ki i kominike. I vre ki sak dimoun i diferan, me normalman bann madanm i kontan eksprim zot santiman, zot konsernen avek relasyon ki dimoun i annan avek kanmarad. Zot apresye bann bon konversasyon amikal, akoz sa i reasir zot ki lezot i kontan zot. De lot kote, bokou msye pa tro kontan koz lo zot santiman, zot pli kontan koz lo bann aktivite, problenm ek solisyon, me bann msye i oule ganny respekte.

⁵ En ser Grannbretanny i dir: “Mon msye i oule rezourd problenm deswit olye pran letan pour ekout mwan. Sa i kapab vreman fer mwan fristre, mon zis anvi ‘en tas dite e ki i senpatiz avek mwan.’” En msye ti ekrir: “Kan mon madanm ek mwan ti’n fek marye, mon ti annan sa tandans taye pour rod solisyon pour nenport problenm ki i ti annan. Me, vitman mon ti konpran ki i ti zis vreman anvi ki mon ekout li.” (Prov. 18:13; Zak 1:19) En msye ki annan bon zizman i pran an konsiderasyon santiman son madanm e i esey rod sa fason apropriye pour koz avek li. Ler i fer sa, i reasir son madanm ki son panse ek santiman i annan valer pour li. (1 Pyer 3:7) An retour, sa madanm i esey konpran pwennvi son msye. Kan msye ek madanm i konpran, apresye e desarz zot responsabilite dapre Labib, zot form en zoli koup. Deplis, zot kapab travay ansanm pour fer e aplik bann desizyon saz e ekilibre.

6, 7. (a) Dan ki fason sa prensip dan Eklezyast 3:7 i kapab ed en koup pour annan bon zizman? (b) Ki mannyer en madanm i demontre disernman e ki zefor en msye i devret fer?

⁶ En koup ki annan bon zizman i osi konnen ki i annan “en letan pour reste trankil e en letan pour koze.” (Ekle. 3:1, 7) En ser ki’n marye depi di-z-an i fer sa remark: “Aprezan mon’n realize ki parler i pa apropriye pour koz lo en topik. Si mon msye i annan en ta louvraz oubyen responsabilite, mon les en pe letan pase avan ki mon lev serten topik. Sa i fer nou annan bann konversasyon pli amikal.” Bann madanm ki annan bon zizman i koz avek ladouser e konsyan ki bann parol byen swazir “ki ganny dir dan son moman apropriye” i atiran e ganny apresye.​—Lir Proverb 25:11. *

⁷ En msye Kretyen i devret fer son par, i pa devret zis ekout son madanm me i osi devret fer zefor pour eksprim son santiman klerman. En ansyen ki’n marye depi 27 an i dir: “I demann bokou zefor pour mwan arive eksprim sa ki dan fon mon leker avek mon madanm.” En frer ki’n marye depi 24-r-an i fer sa remark: “Mon kapab gard  keksoz anndan, par mazinen, ‘Si mon pa koz lo mon problenm, sa problenm pou disparet.’ Me, mon’n realize ki i pa en febles pour eksprim mon santiman. Kan mon fer zefor pour eksprim sa ki mon santi, mon priye pour servi sa bon parol e sa bon fason pour dir zot. Apre mon pran en gran respirasyon e konmans koze.” Sa ki osi ede, se pour swazir sa bon moman, petet ler zot tousel pe egzamin teks pour lazournen oubyen pe lir Labib.

8. Ki lezot motivasyon bann koup Kretyen i annan pour fer zot maryaz reisi?

⁸ I enportan ki msye ek madanm i priye e annan sa dezir pour amelyor lafason ki zot kominike. Definitivman, i difisil pour sanz bann vye labitid. Me ler en koup i kontan Zeova, demann li son lespri sen, e konsider zot maryaz sakre, zot annan en motivasyon ki bokou dimoun napa. En madanm 26 an ti ekrir: “Mon msye ek mwan nou pran pwennvi Zeova lo maryaz o serye, alor nou pa ni menm mazin separe avek kanmarad. Sa i fer nou fer plis zefor pour rezourd nou problenm e pran letan pour koz lo la ansanm.” Ler nou demontre sa kalite lwayote ek devosyon anver Bondye, nou fer li plezir e an retour i beni nou.​—Ps. 127:1.

ANNAN PLIS LANMOUR

9, 10. Dan ki fason pratik en koup i kapab ranforsi zot lanmour?

⁹ Lanmour i sa kalite pli enportan dan maryaz, i “soud tou keksoz parfetman ansanm dan larmoni.” (Kol. 3:14) Vre lanmour i ogmante anmezir ki sa koup i eksperyans lavi ansanm, dan botan e dan movetan. Zot vin zanmi pli pros e kontan pas letan ansanm. Sa kalite maryaz pa ganny batir zis avek detrwa bon aksyon parey nou vwar dan medya, me par en kantite pti aksyon. Par egzanp, ler sa koup i may kanmarad, fer en remark zantiy, azir dan en fason ki montre ki zot in reflesir davans, fer en zoli sourir, oubyen demann senserman “ki mannyer ou lazournen in pase?,” sa i bann pti keksoz ki kapab fer en gran diferans dan maryaz. En msye ki’n marye pour 19 an i dir ki li ek son madanm zot kontan telefonn oubyen teks kanmarad pandan lazournen zis pour vwar ki mannyer keksoz pe ale.

¹⁰ Lanmour i motiv en koup pour kontinyen aprann konn kanmarad. (Fili. 2:4) Sa konnesans an retour i fer zot lanmour vin pli for malgre zot lenperfeksyon. En maryaz ki reisi i amelyore avek letan, e vin pli for, me i pa reste parey i ti ete o konmansman.  Si ou’n marye, demann ou lekor sa bann kestyon: ‘Eski mon vreman konn mon konzwen? Eski mon konn son santiman ek son fason panse? Konbyen fwa mon mazin li, petet reflesir lo son bann kalite ki ti atir mwan anver li?’

DEVLOP RESPE

11. Akoz respe i en fakter enportan pour en maryaz reisi? Eksplike.

¹¹ I pa egziste en linyon parfe menm dan sa maryaz pli ere, e kantmenm sa koup i kontan kanmarad zot pa pou touzour annan menm pwennvi. Abraam ek Sara pa ti tonm dakor lo tou keksoz. (Zen. 21:9-11) Me malgre ki zot ti annan pwennvi diferan parler, sa pa ti kre en baryer ant zot. Akoz? Zot ti tret kanmarad avek dinyite ek respe. Par egzanp, Abraam ti dir “silvouple” avek Sara. (Zen. 12:11, 13) Tandis ki Sara, i ti obeir Abraam e konsider li konman son “senyer” dan son leker. (Zen. 18:12) Souvan nou remarke ki en koup i mank respe pour kanmarad dan lafason ki zot koze e zot ton lavwa. (Prov. 12:18) Si zot pa travay lo sa problenm, zot maryaz pou an danze.​—Lir Zak 3:7-10, 17, 18.

12. Akoz i enportan pour bann dimoun ki fek marye travay dir pour aprann koz avek respe?

¹² Bann dimoun ki fek marye i devret sirtou travay dir pour koz dan en fason zantiy e avek respe, sa pou kre en bon lanbyans pour ki i fasil pour zot kominike dan en fason onnet. En msye i rapel: “Kantmenm bann premye lannen maryaz i kapab gou, parler i kapab annan bann dezapwentman. Anmezir ki ou konmans abitye avek santiman, labitid, ek bezwen ou madanm e li avek sa ki pour ou, i kapab annan serten pti problenm ki leve ant zot de. Me si zot azir dan en fason rezonnab, pa pran tou keksoz o serye, demontre limilite, annan pasyans e depan lo Zeova, zot pou kapab tenir ferm.” Sa i sirman vre!

DEMONTRE VRE LIMILITE

13. Akoz limilite i en fakter enportan dan maryaz?

¹³ En bon kominikasyon dan maryaz i parey en pti sours delo ki pe koule dousman e trankilman dan en zarden. En dimoun ki “viv avek limilite” i zwe son rol pour ki sa delo i kontinyen koule. (1 Pyer 3:8) En frer ki’n marye pour 11 an i dir: “Limilite i sa mwayen pli fasil pour rezourd bann  problenm, akoz i motiv ou pour dir: ‘Eskiz mwan.’” En ansyen ki’n marye pour 20-t-an i fer sa remark: “Parler sa mo ‘eskiz mwan’ i pli enportan ki ‘Mon kontan ou.’” I ti osi azoute: “En fason pli fasil pour demontre limilite i lapriyer. Ler nou de mon madanm nou priy Zeova, nou rapel ki nou enparfe e ki nou bezwen labonte ekstraordiner ki Bondye i demontre. Sa rapel saz i ed mwan vwar keksoz dan sa bon fason.”

14. Ki mannyer lorgey i kapab afekte en maryaz?

¹⁴ Par kont, lorgey pa anmenn lape. I fer kominikasyon difisil e anpes en dimoun annan sa lanvi ek kouraz pour demann leskiz. O kontrer, olye annan limilite pour dir: “Eskiz mwan, silvouple pardonn mwan,” en dimoun orgeye i rod leskiz. Olye annan sa kouraz pour aksepte son febles, i konsantre lo defo sa lot dimoun. Kan en dimoun i bles li, olye rod lape, i ofanse, petet menm reponn dan en fason dir oubyen aret koz avek sa lot dimoun. (Ekle. 7:9) Wi, lorgey i kapab danzere pour en maryaz. I byen pour rapel ki “Bondye i opoz bann ki annan lorgey me i donn son lagras bann ki annan limilite.”​—Zak 4:6.

15. Eksplike ki mannyer aplik sa prensip dan Efezyen 4:26, 27 i kapab ed en koup marye fer fas avek bann problenm ki kapab leve ant zot.

¹⁵ Byensir, i bet pour mazinen ki lorgey pa pou zanmen egziste dan maryaz. Nou devret rekonnet sa tandans e azir deswit. Pol ti dir avek son bann konpanyon Kretyen: “Pa les zot lakoler dire ziska aswar. Pa les dyab pran lavantaz lo zot.” (Efe. 4:26, 27) Si nou pa ekout Parol Bondye, nou kapab sibir soufrans pour nanryen. En ser ti fer sa komanter tris: “Souvandfwa mon msye ek mwan nou pa ti aplik sa konsey dan Efezyen 4:26, 27. Kan sa ti arive, mon ti pas bann pli move lannwit!” Pa i ti pou pli mye diskit keksoz ansanm deswit avek bi pour rekonsilye! Byensir, sa de konzwen i bezwen donn kanmarad letan pour ki presyon i diminyen. I pli apropriye osi pour priy Zeova pour ed ou annan sa bon leta lespri. Sa i enkli annan limilite, e koumsa ou pa pou konsantre lo ou me lo sa problenm, si non sa sityasyon pou vin pli pir.​—Lir Kolosyen 3:12, 13.

16. Ki mannyer limilite i kapab ed en koup pour vwar pwen for kanmarad dan sa bon fason?

¹⁶ En dimoun ki modes e annan limilite pou konsantre lo pwen for son konzwen. Pour donn en legzanp: Meton en madanm i annan en talan spesyal ki i servi pour byennet son fanmir. Si son msye i annan limilite e i modes, i pa pou santi konmsi son madanm pe fer konpetisyon avek li, me i pou ankouraz li pour servi son don, e sa pou montre ki son madanm i annan valer pour li e ki i apresye li. (Prov. 31:10, 28; Efe. 5:28, 29) An menm tan, en madanm ki annan limilite e ki modes pa pou demonstre, ni abes son msye. Apre tou, zot tou le de zot “en sel laser” e sa ki bles enn i bles lot.​—Mat. 19:4, 5.

17. Kwa ki kapab fer en maryaz ere ozordi e anmenn louanz pour Bondye?

¹⁷ San dout ou anvi ki ou maryaz i parey sa ki ti pour Abraam ek Sara oubyen Izaak ek Rebeka, en maryaz ki vreman ere e dirab e ki anmenn louanz pour Zeova. Alor, kontinyen annan menm pwennvi ki Bondye lo maryaz. Rod lasazes ek bon zizman dan son Parol. Devlop “laflanm Ya,” setadir sa vre lanmour par reflesir avek lapresyasyon lo ou konzwen. (Sal. 8:6) Fer bokou zefor pour devlop limilite. Tret ou konzwen avek respe. Si ou fer tousala, ou pou trouv lazwa dan ou maryaz e rezwir leker ou Papa ki dan lesyel. (Prov. 27:11) Definitivman, ou santiman pou parey sa msye ki’n marye pour 27 an ki ti ekrir: “Mon pa kapab mazin lavi san mon madanm. Nou maryaz pe kontinyen vin pli for sak zour. Sa i akoz nou lanmour pour Zeova e nou kominikasyon regilye avek kanmarad.”

[Not anba lo paz]

[Kestyon]

[Portre lo paz 14]

[Portre lo paz 16]

Bann pti keksoz i fer en gran diferans dan maryaz

[Portre lo paz 17]

Gard en bon kominikasyon dan maryaz