Pa zanmen “ankoler avek Zeova”
Pa zanmen “ankoler avek Zeova”
“Se enbesilite en zonm ki fer li fer son semen vin tord, e son leker i menm ankoler avek Zeova.”—PROV. 19:3.
KI OU POU REPONN?
Kwa ki kapab fer nou “ankoler avek Zeova”?
Ki sa senk fakter ki kapab ed nou pour pa ankoler avek Zeova?
Ki nou devret rapel ler nou fer fas avek bann problenm difisil?
1, 2. Akoz nou pa devret blanm Zeova pour sa kantite difikilte ki limanite pe rankontre? Donn legzanp.
FER konmsi ou en msye ki’n annan en lavi maryaz ere pour bokou lannen. Me en zour ler ou retourn kot ou, tou keksoz dan ou lakaz i anbalao. Ou bann meb in kraze, vesel an pti morso fannen partou ater e ou karpet in ganny koup koupe dan en fason ki ou pa pou ni menm kapab repare. I konmsi en dezas in pas kot ou lakour. Eski ou ti pou dir “Akoz mon madanm in fer sa?” Oubyen eski ou ti pou demande, “Lekel ki’n fer sa?” San dout, sa dezyenm kestyon ki ti pou vin dan ou lespri. Akoz? Parski ou konnen ki ou madanm ki ou kontan bokou pa ti pou kapab fer en keksoz parey.
2 Ozordi, landrwa kot bann imen i reste i ranpli avek polisyon, vyolans ek limoralite seksyel. Konman bann etidyan Labib, nou konnen ki Zeova pa responsab pour tou sa bann problenm. I ti kre sa plannet konman en zoli paradi. (Zen. 2:8, 15) Zeova i en Bondye lanmour. (1 Zan 4:8) Nou letid lo Labib i ed nou idantifye vre lakoz sa kantite difikilte ki annan dan lemonn. Sa pa lot ki Satan ki pe “gouvern lemonn” ki responsab.—Zan 14:30; 2 Kor. 4:4.
3. Ki mannyer nou kapab devlop en move pwennvi?
3 Me nou pa kapab blanm Satan pour tou maler ki ariv nou. Akoz? Parski serten problenm i akoz nou prop fot. (Lir Deterononm 32:4-6. *) Kantmenm nou kapab admet ki sa i vre, nou lenperfeksyon i kapab fer nou annan en move pwennvi e fer nou swiv en semen ki finalman anmenn ver maler. (Prov. 14:12) Dan ki fason? Olye blanm nou lekor oubyen Satan pour nou problenm, nou kapab konmans blanm Zeova. Nou kapab menm “ankoler avek Zeova.”—Prov. 19:3.
4, 5. Ki mannyer en Kretyen i kapab arive “ankoler avek Zeova?”
4 Eski i vreman posib pour nou “ankoler avek Zeova?” Sirman i ti pou initil pour fer sa. (Iza. 41:11) Ki nou ti pou ekspekte gannyen? En fwa en poet ti dir: “Ou lebra i tro kourt pour bokse avek Bondye.” Nou pa pou zanmen konplent aotvwa kont Zeova. Me Proverb 19:3 i dir ki enbesilite en zonm ki “fer li fer son semen vin tord, e son leker i menm ankoler avek Zeova.” Wi, en dimoun i kapab ankoler avek Bondye dan son leker. Sa latitid dan en dimoun i kapab devlop dan en fason ki ou pa pou remarke, me sa dimoun i kapab gard rankin avek Zeova dan son leker. Finalman, petet sa dimoun i kapab kit kongregasyon oubyen pa siport plennman laranzman pour ladorasyon Zeova.
5 Kwa ki kapab fer en dimoun “ankoler avek Zeova”? Ki mannyer nou kapab evite tonm dan sa pyez? I enportan ki nou konn larepons sa bann kestyon. Parski sa i menm enplik nou relasyon avek Zeova.
KWA KI KAPAB FER NOU “ANKOLER AVEK ZEOVA”?
6, 7. Akoz bann Izraelit dan letan Moiz ti konmans konplent kont Zeova?
6 Kwa ki kapab fer en serviter fidel Zeova konmans konplent konsernan son Bondye dan son leker? Annou vwar senk fakter e egzamin bann legzanp dan Labib ki met lanfaz lo konman serten dan lepase ti tonm dan sa pyez.—1 Kor. 10:11, 12.
7 Bann konversasyon negatif ki lezot i fer i kapab enfliyans nou. (Lir Deterononm 1:26-28. *) Bann Izraelit ti’n fek ganny delivre dan lesklavaz Lezip. Zeova ti’n anvoy dis fleo lo sa nasyon ki ti pe fer zot soufer e apre i ti detri Faraon ek son larme dan Lanmer Rouz. (Egz. 12:29-32, 51; 14:29-31; Ps. 136:15) Pep Bondye ti pros pour antre dan Later Promiz. Me, dan sa moman vreman enportan, bann Izraelit ti konmans konplent lo Zeova. Kwa ki ti fer zot perdi lafwa? Zot ti perdi kouraz akoz sa rapor negatif ki serten zonm ti fer apre ki zot ti’n al espyonn sa pei. (Nom. 14:1-4) Ki rezilta sa ti anmennen? En zenerasyon antye pa ti antre dan sa “bon pei.” (Det. 1:34, 35) Eski par ler nou kapab les bann konversasyon negatif ki lezot i fer afebli nou lafwa e fer nou konplent lo lafason ki Zeova i azir anver nou?
8. Kwa ki ti fer pep Bondye dan letan Izai konmans blanm Zeova pour zot sityasyon?
8 Bann leprev ek difikilte i kapab dekouraz nou. (Lir Izai 8:21, 22. *) Dan letan Izai, pep Zida ti trouv zot dan en sityasyon difisil. Zot ti antoure avek bann lennmi. I ti napa preski ditou manze. En kantite dimoun ti lafen. Me pli pir ki sa, i ti annan en lafamin spirityel. (Amos 8:11) Olye rod led avek Zeova pour fer fas avek sa difikilte, zot ti plito konmans “dir bann move keksoz” lo zot lerwa e lo zot Bondye. Wi, zot ti blanm Zeova akoz zot bann problenm. Si nou ti dan difikilte oubyen problenm, eski dan nou leker nou ti kapab dir, ‘Kote Zeova ti ete ler mon ti bezwen li?’
9. Akoz bann Izraelit dan letan Ezekyel ti devlop en move pwennvi?
9 Nou pa konn tou bann fe. Akoz zot pa ti konpran tou sa ki ti pe arive, bann Izraelit dan letan Ezekyel ti santi ki fason azir Zeova ‘ti enzis.’ (Ezek. 18:29) I ti konmsi zot ti annan drwa pour ziz Bondye, e ki zot standar konsernan lazistis ti pli meyer ki pour Zeova e zot ti pe ziz li, menm si zot ti napa en bon konprenezon lo sa ki ti pe arive. Si par ler nou pa vreman konpran en resi Labib ouswa lafason ki keksoz i deroule dan nou lavi, eski dan nou leker nou santi ki fason ki Zeova in azir i paret “enzis”?—Zob 35:2.
10. Ki mannyer en dimoun i kapab swiv move legzanp Adan?
10 Nou blanm lezot pour nou prop pese ek lerer. Depi o konmansman listwar limanite, Adan ti blanm Bondye pour pese ki i ti’n fer. (Zen. 3:12) Kantmenm Adan ti fer pese volonterman e i ti konn tre byen konsekans ki i ti pou sibir si i ti kas lalwa Bondye, sa pa ti anpes li blanm Zeova. Anfet, i ti dir ki Zeova ti donn li en move madanm. Depi sa letan, i annan lezot ki’n swiv legzanp Adan e blanm Bondye pour fot ki zot in fer. I byen pour demann nou lekor, ‘Eski dezapwentman ek fristrasyon akoz mon prop fot i kapab fer mwan dir ki standar Zeova i tro strik?’
11. Ki nou aprann avek Yona?
11 Mazin zis nou prop lekor. Profet Yona pa ti dakor avek desizyon Zeova anver bann zabitan Niniv. (Yona 4:1-3) Akoz? Parski aparaman i ti tro konsernen pangar i ti perdi son repitasyon akoz sa destriksyon ki i ti’n anonse pa ti arive. Vi ki Yona ti mazin zis son prop repitasyon, sa ti anpes li annan konpasyon pour bann zabitan Niniv ki ti’n repantir. Eski nou osi nou kapab pe mazin zis nou prop lekor ki nou tant pour “ankoler avek Zeova” akoz i pe tarde pour fer lafen arive? Si i fer plizyer dizenn lannen ki nou pe prese ki zour Zeova i pros, eski petet nou konmans perdi pasyans ler lezot i kritik nou akoz nou pe anons sa ki Labib i dir?—2 Pyer 3:3, 4, 9.
FASON POUR EVITE “ANKOLER AVEK ZEOVA”
12, 13. Si nou konmans kestyonn serten keksoz ki Zeova i fer, ki nou devret rapel?
12 Ki nou kapab fer si nou leker enparfe i pous nou pour konmans kestyonn serten keksoz ki Zeova i fer? Rapel ki i pa saz pour fer sa. En lot tradiksyon Proverb 19:3 i dir: “La sa zonm bet i met son lekor dan problenm epi i tir son lakoler lo Bondye.” (Bible en français courant) Avek sa antet, annou egzamin senk fakter ki pou ed nou pour pa zanmen les fristrasyon dan lavi fer nou blanm Zeova.
13 Pa negliz ou relasyon avek Zeova. Nou kapab evite annan sa move tandans pour ankoler avek Bondye si nou kontinyen gard en relasyon pros avek li. (Lir Proverb 3:5, 6. *) Nou bezwen annan konfyans dan Zeova. Nou bezwen osi evite vin tro zis dan nou prop lizye oubyen mazin zis nou prop lekor. (Prov. 3:7; Ekle. 7:16) Si nou fer sa, nou pa pou taye pour blanm Zeova ler bann keksoz mal i arive.
14, 15. Ki mannyer nou kapab evite les konversasyon negatif ki lezot i fer afekte nou?
14 Pa les bann konversasyon negatif afekte ou. Bann Izraelit dan letan Moiz ti annan dekwa rezon pour krwar ki Zeova ti pou reisi fer zot antre dan Later Promiz. (Ps. 78:43-53) Me kan zot ti tann rapor negatif sa dis espyon ki pa ti fidel, zot pa ti “mazin son lanmen.” (Ps. 78:42) Si nou medit lo bann travay Zeova, mazin tou bann bon keksoz ki i’n fer pour nou, nou relasyon avek li pou vin pli for. Alor, nou pa pou les bann pwennvi negatif ki lezot i annan kre en baryer ant nou ek Zeova.—Ps. 77:11, 12.
15 Me, si nou annan en latitid negatif anver nou bann frer ek ser? Dan bann tel sirkonstans, nou relasyon avek Zeova i kapab ganny afekte. (1 Zan 4:20) Ler bann Izraelit ti kestyonn lotorite ki Aaron ti’n gannyen, pour Zeova i ti konmsi zot ti pe konplent kont Li menm. (Nom. 17:10) Pareyman, si nou konmans konplent konsernan bann dimoun ki Zeova i servi pour gid nou atraver son lorganizasyon lo later, a lafen dizour i pou konmsi nou pe konplent kont Zeova.—Ebr. 13:7, 17.
16, 17. Ki nou bezwen rapel ler nou pe fer fas avek bann problenm?
16 Rapel ki Zeova pa lakoz nou problenm. Kantmenm bann Izraelit dan letan Izai ti aret servi Zeova, I ti ankor anvi ed zot. (Iza. 1:16-19) Nenport problenm nou fer fas avek, nou kapab ganny rekonforte akoz nou konnen ki Zeova i enterese avek nou e i anvi ed nou. (1 Pyer 5:7) Anfet, i promet pour donn nou lafors ki nou bezwen pour andire.—1 Kor. 10:13.
17 Si, parey Zob sa serviter fidel, nou pe soufer akoz serten lenzistis, nou bezwen rapel ki Zeova pa lakoz nou problenm. Zeova i ay lenzistis e i kontan ladrwatir. (Ps. 33:5) Annou annan menm latitid parey Eliou zanmi Zob ki ti dir: “Zanmen sa vre Bondye pou azir dan en move fason, e zanmen sa Enn Tou Pwisan pou azir dan en fason enzis!” (Zob 34:10) Olye kre sa bann problenm ki nou rankontre, Zeova i donn nou ‘tou don ekselan ek tou kado parfe.’—Zak 1:13, 17.
18, 19. Akoz nou pa devret zanmen annan doutans lo Zeova? Donn legzanp.
18 Pa zanmen annan doutans lo Zeova. Bondye i parfe, e son panse i pli siperyer ki sa ki pour nou. (Iza. 55:8, 9) Alor, ler nou annan limilite e nou modes, sa pou ed nou admet ki nou pa touzour konpran tou keksoz. (Rom. 9:20) I rar ki nou konn tou keksoz lo en sityasyon. San dout, ou’n eksperyans sa laverite ki dan sa Proverb: “Premye pour pled son ka i paret byen ziska ki en lot i vini e kestyonn li.”—Prov. 18:17, New International Version.
19 Si en zanmi ki nou annan konfyans dan li i fer en keksoz ki nou pa konpran o konmansman oubyen ki nou vwar drol, eski nou pou taye pour akiz li konmkwa i’n fer en keksoz mal? Oubyen, eski nou ti pou evite kondann nou zanmi sirtou si nou konn li pour plizyer lannen? Si nou azir avek lanmour anver nou zanmi enparfe, pa nou devret annan plis konfyans dan nou Papa ki dan lesyel, ki son fason fer ek panse i pli siperyer ki sa ki pour nou!
20, 21. Akoz i enportan pour blanm sa enn ki merit ganny blanmen?
20 Blanm sa enn ki merit ganny blanmen. Akoz nou devret fer sa? Be akoz nou kapab responsab pour serten nou bann problenm. Si sa i le ka, nou bezwen aksepte sa realite. (Gal. 6:7) Pa esey blanm Zeova. Akoz i pa pou rezonnab pour fer sa? Annou vwar sa legzanp: En loto i kapab roul avek en gran vites. Meton en drayver i al pli vit ki fodre kan i pe pran en kontour sek, e i fer aksidan. Eski sa dimoun ki’n fabrik sa loto ki devret ganny blanmen pour sa aksidan? Pa ditou! Pareyman, Zeova in kre nou avek sa liberte pour swazir. Me i’n osi donn nou bann gidans lo konman pour fer bann desizyon saz. Alor, akoz nou devret blanm nou Kreater pour nou prop fot?
21 Byensir, tou problenm ki arive avek nou i pa akoz nou bann fot ek move aksyon. Serten sityasyon i arive akoz “letan ek levennman san ekspekte.” (Ekle. 9:11) Me, finalman annou pa zanmen oubliye ki Satan ki premyerman responsab pour bann move keksoz. (1 Zan 5:19; Rev. 12:9) Se li ki nou lennmi, pa Zeova!—1 Pyer 5:8.
APRESYE OU RELASYON AVEK ZEOVA
22, 23. Ki nou devret rapel si nou dekouraze akoz nou bann problenm?
22 Ler ou pe pas dan leprev ek difikilte, rapel legzanp Zozye ek Kaleb. Kontrerman avek sa dis lezot espyon, sa de zonm fidel ti anmenn en bon rapor. (Nom. 14:6-9) Zot ti montre ki zot ti annan lafwa dan Zeova. Kantmenm sa, zot ti bezwen pas 40 an ale vini dan dezer ansanm avek lezot Izraelit. Eski Zozye ek Kaleb ti konplent oubyen ankoler akoz zot ti santi ki sa sityasyon pa ti zis? Non. Zot ti annan konfyans dan Zeova. Eski zot ti ganny beni? Definitivman! Kant a sa zenerasyon antye, zot ti mor dan dezer, me sa de zonm ti finalman antre dan Later Promiz. (Nom. 14:30) Pareyman, nou pou resevwar benediksyon Zeova si nou pa “aret” fer son lavolonte.—Gal. 6:9; Ebr. 6:10.
23 Si ou dekouraze akoz bann problenm, lenperfeksyon lezot oubyen ou prop lenperfeksyon, ki ou devret fer? Konsantre lo bann zoli kalite ki Zeova i annan. Esey vwar dan ou lespri sa lespwar ki Zeova in donn ou. Demann ou lekor, ‘Kote mon ti pou ete san Zeova?’ Touzour reste pros avek li, e pa zanmen ankoler avek li dan ou leker!
[Not anba lo paz]
^ par. 3 Deterononm 32:4-6: “4 Sa Ros, tou sa ki i fer i parfe, parski tou son bann semen i lazistis. En Bondye fidel, avek ki napa lenzistis; i drwat e onnet. 5 Lo zot par, zot in mal azir; zot pa son bann zanfan, se zot lafot. En zenerasyon koronpi e visye. 6 Eski koumsanmenm ki zot kontinyen tret Zeova, o pep enbesil ki napa lasazes? Eski pa ou Papa ki’n kre ou, li ki’n fer ou e ki’n donn ou stabilite?”
^ par. 7 Deterononm 1:26-28: “26 Me zot pa ti oule monte; e zot ti konmans rebel kont lord Zeova zot Bondye. 27 Zot ti kontinyen konplent dan zot latant e dir: ‘I akoz Zeova i pa kontan nou, ki i’n tir nou dan pei Lezip, pour donn nou dan lanmen bann Amorit, pour ki zot detri nou. 28 Kot nou pou ale? Nou bann frer in fer nou leker fonn, par dir: “I en pep ki bokou e ki pli gran ki nou, avek bann lavil gran e for ki ariv ziska lesyel, e laba nou ti vwar bann garson Anakim.”’”
^ par. 8 Izai 8:21, 22: “21 Sirman sakenn parmi zot pou travers pei, byen martirize e byen lafen; e i devret arive ki akoz i lafen e i ankoler, i pou modi son lerwa ek son Bondye e i pou get anler. 22 E ver later i pou gete, me i pou vwar zis ladetres, fernwanr, lobskirite, letan difisil ek fernwanr total.”
^ par. 13 Proverb 3:5, 6: “5 Met ou konfyans dan Zeova avek tou ou leker e pa apiy lo ou prop konprenezon. 6 Dan tou ou semen pran li an konsiderasyon e li i pou fer drwat ou bann santye.”
[Kestyon]
[Portre lo paz 10]
[Portre lo paz 12]
Ekout bann konversasyon negatif i kapab annan en move lefe lo ou (Vwar paragraf 7)
[Portre lo paz 14]
Zozye ek Kaleb ti ganny beni akoz zot ti annan konfyans dan Zeova (Vwar paragraf 22)
