Zot in ganny sanktifye
Zot in ganny sanktifye
“Zot in ganny lave, zot in ganny pirifye [oubyen “sanktifye,” NW].”—1 KOR. 6:11.
KI OU POU REPONN?
Akoz nou devret evit move frekantasyon?
Ki mannyer nou kapab siport laranzman teokratik?
Kwa ki pou ed nou met keksoz spirityel premye e prezerv nou lidantite Kretyen?
1. Ki bann sityasyon enkyetan Neemya ti vwar ler i ti retourn Zerizalenm? (Vwar portre anler.)
BANN zabitan Zerizalenm pe koze. En etranze ki move e byen renonmen pe reste dan lakour tanp. Bann Levit pe abandonn zot responsabilite. Olye donn gidans lo kote spirityel, bann ansyen pe fer komers zour Saba. En kantite Izraelit pe marye avek bann non Zwif. Sa i zis serten sityasyon enkyetan ki Neemya i vwar ler i retourn Zerizalenm en pti pe letan apre lannen 443 A.N.L.—Nee. 13:6.
2. Ki mannyer Izrael ti vin en nasyon ki ti’n ganny sanktifye?
2 Izrael ti en nasyon ki ti’n ganny dedye avek Bondye. An 1513 A.N.L., bann Izraelit ti dakor pour fer lavolonte Zeova. Zot ti dir: “Tou parol ki Zeova in dir nou pare pour fer.” (Egz. 24:3) Alor Bondye ti sanktifye zot, oubyen met zot apar konman son pep swazir. Pa sa ti en privilez! Karant an pli tar, Moiz ti fer zot rapel sa parol: “Ou en pep sen pour Zeova ou Bondye. Zeova ou Bondye in swazir ou pour vin son pep, en propriyete spesyal, parmi tou sa bann pep ki lo later.”—Det. 7:6.
3. Ki ti kondisyon spirityel bann Zwif kan Neemya ti retourn Zerizalenm pour en dezyenm fwa?
3 Malerezman, sa lantouzyasm ki pep Izrael ti annan o konmansman pour vin en nasyon sen pa ti dire pour lontan. Kantmenm i ti touzour annan serten Zwif ki ti servi Bondye, laplipar zot ti pli enterese pour donn lenpresyon ki zot ti sen oubyen devoue, olye fer lavolonte Bondye. Ler Neemya ti ariv Zerizalenm pour en dezyenm fwa, i ti’n fer apepre san-t-an depi ki en ptigin Kretyen fidel ti’n retournen sorti Babilonn pour reetablir vre ladorasyon. Ankor enn fwa, zot devouman pour keksoz spirityel ti’n vreman diminyen.
4. Ki sa kat fakter nou pou egzaminen ki kapab ed nou reste en pep sanktifye?
4 Zis parey bann Izraelit, ozordi Temwen Zeova in ganny sanktifye par Bondye. Bann Kretyen swazir ek “gran lafoul” i sen e zot in ganny met apar pour en servis sakre. (Rev. 7:9, 14, 15; 1 Kor. 6:11) Personn pa anvi ki Bondye i nepli konsider zot konman sen parey sa ki ti finalman arive avek bann Izraelit. Kwa ki kapab ed nou pour reste sen e itil dan servis Zeova? Dan sa letid, nou pou egzamin kat fakter ki Neemya sapit 13 i met lanfaz lo la: (1) Evit move frekantasyon; (2) siport laranzman teokratik; (3) met keksoz spirityel premye; e (4) prezerv ou lidantite Kretyen. Annou egzamin sak fakter enn par enn.
EVIT MOVE FREKANTASYON
5, 6. Lekel Eliasib ek Tobya e kwa ki’n kapab fer Eliasib frekant Tobya?
5 Lir Neemya 13:4-9. * Move lenfliyans i partou, alor i pa fasil pour nou reste sen. Annou vwar legzanp Eliasib ek Tobya. Eliasib ti gran pret, e Tobya ti en Amonit e i paret ki i ti en senp zofisye dan ladministrasyon Pers, Zide. Tobya ek bann ki i ti frekante ti fer tou pour anpes Neemya rekonstri miray Zerizalenm. (Nee. 2:10) Bann Amonit ti napa drwa antre dan lakour tanp. (Det. 23:3) Alor, akoz gran pret ti permet ki en landrwa i ganny rezerve dan lasal a manze tanp pour en zonm parey Tobya?
6 Tobya ti vin en zanmi pros Eliasib. Tobya ek son garson Yeoanann ti’n marye avek bann madanm Zwif, e en kantite Zwif ti koz an byen lo Tobya. (Nee. 6:17-19) Enn bann pti zanfan Eliasib ti’n marye avek fiy Sannbalat, gouverner Samari ki ti en zanmi pros Tobya. (Nee. 13:28) Alor, i posib ki gran pret Eliasib ti les en non krwayan ek opozan enfliyans li akoz relasyon ki zot ti annan. Me Neemya ti demontre son fidelite anver Zeova par zet tou bann meb Tobya an deor sa lasal a manze.
7. Ki mannyer bann ansyen ek lezot i evite les zot vin enpir devan Zeova?
7 Konman en pep ki’n dedye avek Bondye, nou devret premyerman touzour fidel anver Zeova. Nou pou reste sen devan Zeova, selman si nou aplik son bann standar drwat. Nou pa devret les lanmour pour nou fanmir pas avan bann prensip Labib. Bann ansyen i les panse Zeova gid zot olye swiv zot prop pwennvi oubyen santiman. (1 Tim. 5:21) Zot fer atansyon pour evit okenn keksoz ki kapab gat zot relasyon avek Bondye.—1 Tim. 2:8.
8. Ki tou serviter Zeova ki’n dedye zot lavi avek li i devret rapel konsernan zot frekantasyon?
8 Nou devret rapel ki “move frekantasyon, i gat repitasyon.” (1 Kor. 15:33) I kapab ki serten dan nou fanmir i annan en move lenfliyans lo nou. Eliasib ti kit en bon legzanp pour lepep ler i ti siport Neemya pour rekonstri miray Zerizalenm. (Nee. 3:1) Me, avek letan Tobya ek lezot ti aparaman enfliyans Eliasib pour fer bann keksoz ki ti fer li vin enpir devan Zeova. Bann bon zanmi i ankouraz nou pour pourswiv bann lobzektif spirityel, par egzanp, lir Labib, asiste renyon e partisip dan predikasyon. Nou vreman kontan e apresye dimoun dan nou fanmir ki ankouraz nou pour fer sa ki byen.
SIPORT LARANZMAN TEOKRATIK
9. Akoz laranzman ki ti’n ganny etablir kot tanp ti nepli pe marse e lekel Neemya ti blanmen pour sa?
9 Lir Neemya 13:10-13. * I paret ki i ti nepli annan kontribisyon ki ti pe ganny fer kot tanp ler Neemya ti retourn Zerizalenm. Lefet ki bann Levit ti nepli pe ganny sa sipor, zot ti bezwen abandonn zot responsabilite e al travay dan zot plantasyon. Neemya ti blanm bann sef asistan pour sa sityasyon. Aparaman, zot pa ti pe fer byen zot travay. Swa bann sef asistan pa ti pe anmas sa dizyenm avek lepep oubyen zot pa ti pe anmenn sa kontribisyon kot tanp parey zot ti devret pe fer. (Nee. 12:44) Alor, Neemya ti pran bann pa neseser pour kolekte sa dizyenm. I ti apwent bann zonm diny konfyans pour okip bann stor kot tanp ek distribisyon ki ti pou ganny fer.
10, 11. Ki privilez pep Bondye i annan pour siport vre ladorasyon?
10 Eski nou kapab aprann en leson avek sa sityasyon? Wi, nou pa devret oubliye ki nou annan sa privilez pour onor Zeova avek nou bann keksoz valer. (Prov. 3:9) Ler nou fer kontribisyon pour siport son travay, nou pe zis donn Zeova sa ki deza pour li. (1 Kron. 29:14-16) Petet nou mazinen ki nou napa bokou pour donnen, me si nou annan sa dezir pour fer li, nou tou nou kapab fer nou par.—2 Kor. 8:12.
11 Pandan bokou lannen, en fanmir ti envit en koup pionye spesyal ki ti aze pour pran en repa avek zot sak semenn. Menm si sa paran ti annan wit zanfan, sa manman ti abitye dir, “Ki diferans i annan si nou met de lasyet an plis lo en latab ki’n ganny prepare pour dis dimoun?” En repa sak semenn pa paret bokou, me pa sa bann pionye ti bezwen vreman rekonesan pour lospitalite ki ti ganny demontre anver zot! An retour, zot ti en benediksyon pour sa fanmir ki ti envit zot. Bann parol lankourazman ek leksperyans sa koup ti ed bann zanfan pour fer progre spirityel. Tou sa bann zanfan ti pran servis a plen tan pli tar.
12. Ki bon legzanp bann zonm ki’n ganny apwente dan kongregasyon pe donnen?
12 En lot leson ki nou aprann i sa enn: Parey Neemya, bann zonm ki ganny apwente ozordi i donn gidans e siport laranzman teokratik. Lezot dan kongregasyon i benefisye avek zot legzanp. Dan sa domenn bann ansyen i osi imit zapot Pol. I ti siport vre ladorasyon e donn bon gidans. Par egzanp, i ti ofer en kantite sizesyon pratik lo konman pour fer kontribisyon.—1 Kor. 16:1-3; 2 Kor. 9:5-7.
MET KEKSOZ SPIRITYEL PREMYE
13. Ki mannyer serten Zwif ti montre ki zot ti napa respe pour Saba?
13 Lir Neemya 13:15-21. Si nou tro konsantre lo bann keksoz materyel, nou kapab gradyelman perdi nou spirityalite. Dapre Egzod 31:13, Saba ki ti ganny fer tou le semenn ti rapel bann Izraelit ki zot ti en pep ki ti’n ganny sanktifye. Zour Saba ti ganny met apar pour ladorasyon fanmir, lapriyer e pour medit lo Lalwa Bondye. Me pour serten kontanporen Neemya, Saba ti zis parey en nenport ki lezot zour. Ladorasyon pa ti en priyorite pour zot. Kan Neemya ti vwar sa ki ti pe arive, i ti fer ferm baro lavil dek ki fernwanr ti fer lo sizyenm zour e sas bann marsan etranze avan ki Saba ti konmanse. *
14, 15. (a) Ki i kapab arive avek nou si nou zis konsantre lo nou biznes? (b) Ki mannyer nou kapab antre dan repo Bondye?
14 Ki nou kapab aprann avek legzanp Neemya? En leson ki nou devret aprann se pour pa zis konsantre lo nou biznes. Si non, nou kapab fasilman ganny distrer, e konmans kontan larzan plis ki Bondye, espesyalman si nou en dimoun ki kontan nou travay. Pa oubliye ki Zezi ti averti nou pour pa vin lesklav de met. (Lir Matye 6:24.) Neemya ti annan larzan, me konman i ti servi son letan Zerizalenm? (Nee. 5:14-18) Olye fer biznes avek bann dimoun sorti Tir oubyen lezot, i ti depans son lenerzi pour ed son bann frer e fer bann keksoz ki ti kontribye pour sanktifye non Zeova. Pareyman ozordi, bann ansyen ek asistan ministeryel i konsantre lo bann keksoz ki pou benefisye kongregasyon, e bann frer ek ser i apresye zot pour sa leta lespri ki zot annan. Sa i fer ki i annan lanmour, lape ek sekirite parmi pep Bondye.—Ezek. 34:25, 28.
15 Kantmenm bann Kretyen pa bezwen obzerv Saba sak semenn, Pol ti dir ki “i ankor reste en repo saba pour pep Bondye.” I ti azoute: “Sa ki antre dan sa repo Bondye, i repoze avek son travay, parey Bondye ti repoze avek sa ki pour li.” (Ebr. 4:9, 10) Konman Kretyen, nou kapab antre dan repo Bondye si nou obeir e travay dan linite pour siport son plan. Eski ou ek ou fanmir zot pe met ladorasyon fanmir, renyon ek predikasyon premye plas dan zot lavi? Petet nou bezwen montre nou anplwayer ek koleg travay ki nou determinen, sirtou si zot napa respe pour bann keksoz spirityel ki en priyorite pour nou. I kapab ki nou pou bezwen ‘ferm baro lavil e sas bann zabitan Tir’ pour nou konsantre lo bann keksoz sakre ki nou priyorite e donn zot tou nou latansyon. Vi ki nou’n ganny sanktifye, i ti pou byen pour demann nou lekor sa kestyon, ‘Eski fason mon viv mon lavi i montre ki mon’n ganny met apar pour servis Zeova?’—Mat. 6:33.
PREZERV OU LIDANTITE KRETYEN
16. Ki mannyer lidantite sa nasyon konman en pep sanktifye ti an danze dan letan Neemya?
16 Lir Neemya 13:23-27. * Dan letan Neemya, bann Izraelit ti pe marye avek bann madanm etranze. Pandan son premye vizit Zerizalenm, Neemya ti demann tou bann ansyen pour siny en dokiman konmkwa zot fer en serman ki zot pa ti pou marye avek bann payen. (Nee. 9:38; 10:30) Me detrwa lannen pli tar, i ti vwar ki sa bann zonm Zwif pa ti’n zis marye avek sa bann madanm etranze, me zot ti’n preski perdi zot lidantite konman sa pep ki Bondye ti’n sanktifye. Bann zanfan ki zot ti gannyen avek sa bann madanm etranze pa ti kapab lir oubyen koz langaz Ebre. Ler zot ti grandi, eski zot ti pou idantifye zot lekor konman bann Izraelit? Oubyen eski zot ti pou dir ki zot ti bann Asdodit, Amonit oubyen Moabit? Lefet ki zot pa ti konn koz langaz Ebre, eski zot ti pou kapab konpran Lalwa Bondye? Ki mannyer zot ti pou konn Zeova e swazir pour servi li olye servi bann fo bondye ki zot manman ti adore? I ti enportan pour azir san tarde e Neemya ti fer sanmenm.—Nee. 13:28.
17. Ki mannyer paran i kapab ed zot zanfan pour annan en relasyon pros avek Zeova?
17 Ozordi, nou bezwen pran bann pa pozitif pour ed nou bann zanfan devlop zot lidantite Kretyen. Paran, demann ou lekor, ‘Eski mon zanfan i koz byen sa “langaz pir” ki sorti dan Labib? (Tsef. 3:9) Eski konversasyon mon zanfan i montre ki zot pe ganny enfliyanse par lespri Bondye oubyen lespri lemonn?’ Pa dekouraz vitman si ou vwar ki zot bezwen amelyore. I pran letan pour aprann en langaz, sirtou ler i annan en kantite keksoz ki distrer nou. Ou zanfan pe fer fas avek en ta presyon pour fer konpromi. I pour sa rezon ki zot paran, zot bezwen kontinyen servi Ladorasyon fanmir ek lezot loportinite pour ed zot zanfan devlop en relasyon pros avek Zeova. (Det. 6:6-9) Montre zot byenfe ki nou gannyen ler nou diferan avek sa lemonn Satan. (Zan 17:15-17) Fer zefor pour tous zot leker.
18. Akoz bann paran Kretyen i dan sa pli bon pozisyon pour prepar zot zanfan pour dedye zot lavi avek Zeova?
18 Finalman, sak zanfan pou bezwen fer zot prop desizyon pour servi Bondye. Me, paran i kapab fer bokou pour ed zot. Zot kapab kit en bon legzanp, etablir bann limit byen kler e diskit avek zot zanfan lo konsekans desizyon ki zot fer. Paran, ou dan sa pli bon pozisyon pour prepar ou zanfan pour dedye zot lavi avek Zeova. Zot bezwen ou led pour devlop e prezerv zot lidantite Kretyen. Byensir, nou tou nou bezwen veye ki nou pa perdi nou “lenz” dan en sans senbolik, setadir bann kalite ek standar ki idantifye nou konman bann disip Kris.—Rev. 3:4, 5; 16:15.
MAZIN MWAN “POUR DIBYEN”
19, 20. Ki mannyer Zeova i kapab mazin nou “pour dibyen”?
19 Profet Malaki ki ti en kontanporen Neemya, ti fer resorti ki “en liv souvenir ti konmans ganny ekrir . . . pour bann ki annan lakrent pour Zeova e pour bann ki mazin son non.” (Mal. 3:16, 17) Bondye pa pou zanmen oubliy bann dimoun ki annan respe ek lakrent pour li e lanmour pour son non.—Ebr. 6:10.
20 Neemya ti priye: “O Zeova mazin mwan pour dibyen.” (Nee. 13:31) Parey Neemya, nou non pou ganny ekrir dan liv souvenir Bondye si nou kontinyen evit move frekantasyon, siport laranzman teokratik, donn priyorite bann keksoz spirityel e prezerv nou lidantite Kretyen. Annou ‘kontinyen teste pour vwar si nou dan lafwa.’ (2 Kor. 13:5) Si nou gard en relasyon pir avek Zeova, i pou mazin nou “pour dibyen.”
[Not anba lo paz]
^ par. 5 Neemya 13:4-9: “4 Avan sa, pret Eliasib ki ti ansarz en lasal a manze dan lakaz nou Bondye ti fanmir avek Tobya; 5 e i ti deside fer en gran lasal a manze pour li, kot oparavan zot ti pe regilyerman met lofrann lagrenn, lansan blan, bann lekipman, en dizyenm bann lagrenn, nouvo diven e delwil ki bann Levit, santer ek gardyen baro ti annan drwa gannyen ek kontribisyon pour bann pret. 6 Pandan tou sa letan, mon pa ti Zerizalenm akoz dan tranndezyenm lannen lerwa Babilonn Artakzerses mon ti’n vin kot lerwa, me apre en serten letan mon ti demann lerwa konze. 7 Alor mon ti vin Zerizalenm e mon ti vwar kantite ditor ki Eliasib ti’n fer akoz Tobya, par fer en lasal pour li dan lakour lakaz sa vre Bondye. 8 E pour mwan sa ti vreman mal. Alor mon ti zet tou bann meb ki ti dan lakaz Tobya an deor sa lasal a manze. 9 Apre sa mon ti donn lord e zot ti pirifye bann lasal a manze; e mon ti remet bann lekipman dan lakaz vre Bondye, ansanm avek bann lofrann lagrenn ek lansan blan.”
^ par. 9 Neemya 13:10-13: “10 E mon ti aprann ki bann Levit pa ti’n ganny donnen zot porsyon, e sa i fer ki bann Levit ek bann santer ki ti pe fer louvraz ti’n ale, sakenn dan son plantasyon. 11 E mon ti konmans repros bann asistan sef e dir: ‘Akoz lakaz sa vre Bondye in ganny neglize?’ Alor, mon ti rasanble zot e mon ti stasyonn zot sakenn dan son plas. 12 E Zida antye ti anmenn en dizyenm porsyon lagrenn, nouvo diven ek delwil kot bann stor. 13 Apre mon ti met pret Selemya, Tsadok sa sekreter ek Pedaya enn parmi bann Levit ansarz bann stor; e par anba zot i ti annan Anann garson Zakour ki ti garson Matanya, akoz zot ti fidel, zot ti osi ganny sa responsabilite pour fer distribisyon parmi zot bann frer.”
^ par. 13 Neemya 13:15-21: “15 Dan sa letan, mon ti vwar pep Zida pe pyetinen dan bann preswar diven zour saba, pe anmenn en ta lagrenn e pe sarz zot lo bann bourik, i ti annan osi diven, rezen, fig e tou sort pake ki zot ti pe anmenn Zerizalenm zour saba; e mon ti temwanny kont zot sa zour ki zot ti pe vann sa bann provizyon. 16 E bann dimoun sorti Tir ti reste dan lavil, zot ti anmenn pwason e tou sort marsandiz pour vann zour saba avek bann garson Zida dan Zerizalenm. 17 Alor mon ti vwar fot avek bann dimoun enportan Zida e dir zot: ‘Ki sa move keksoz ki zot pe fer, menm mank respe pour zour saba? 18 Pa koumsanmenm ki zot zanset ti fer, ki’n fer nou Bondye anmenn tou sa bann maler lo nou, osi lo sa lavil? Me zot, zot in anmenn plis lakoler lo Izrael akoz zot in mank respe pour zour saba.’ 19 Aprezan la sa ki ti arive, dek ki baro Zerizalenm ti konmans vin sonm avan saba i konmanse, deswit mon ti donn lord e bann laport ti ganny fermen. Deplis, mon ti dir pa ouver zot ziska apre saba; e mon ti met serten mon bann asistan vey kot baro pour ki napa okenn marsandiz ki antre dan Zerizalenm zour saba. 20 Alor bann komersan ek bann vander tou sort kalite marsandiz ti pas lannwit an deor Zerizalenm, en fwa apre en dezyenm fwa. 21 Apre mon ti konmans temwanny kont zot an dizan: ‘Akoz zot in pas lannwit devan sa miray? Si zot fer sa ankor, mon pou aret zot.’ Depi sa zot pa ti vin ankor zour saba.”
^ par. 16 Neemya 13:23-27: “23 Osi, dan sa letan mon ti vwar bann Zwif ki ti’n donn landrwa reste zot bann madanm Asdodit, Amonit ek Moabit. 24 E tandis ki zot bann garson, lanmwatye ti koz langaz Asdodit e i ti napa personn parmi zot ki ti konn koz langaz Zwif, me zot tou zot ti koz langaz diferan pep. 25 Alor mon ti konmans vwar fot avek zot e mon ti apel lemal lo zot e mon ti tap serten zonm parmi zot e aras zot seve e apre mon ti fer zot fer serman par Bondye: ‘Zot pa devret donn zot bann fiy avek zot bann garson, e zot pa devret aksepte okenn zot bann fiy pour zot bann garson oubyen pour zot menm. 26 Eski pa akoz sa bann keksoz ki Salomon lerwa Izrael ti fer pese? Parmi sa kantite nasyon i ti napa en lerwa parey li; e vi ki son Bondye ti kontan li, i ti fer li vin lerwa Izrael antye. Ziska li, bann madanm etranze ti fer li fer pese. 27 Eski sa pa i en keksoz ki zot in tande, ki zot in komet sa gran keksoz mal e azir dan en fason enfidel anver nou Bondye par donn en landrwa reste bann madanm etranze?’”
[Kestyon]
[Portre lo paz 3]
[Portre lo paz 5]
Ki mannyer Neemya ti montre ki i ti fidel anver Zeova? (Vwar paragraf 5, 6)
[Portre lo paz 7]
Ed ou zanfan devlop en relasyon pros avek Zeova (Vwar paragraf 17, 18)
