Eski ou pou fer sakrifis pour Rwayonm?

“Bondye i kontan sa ki donn avek lazwa.”​—2 KOR. 9:7.

BANN VERSE POUR REFLESIR LO LA

Ki mannyer sa bann verse i kapab ed ou pour egzamin bann sakrifis ki ou fer pour Rwayonm?

1 Kronik 29:9

1 Korentyen 16:1, 2

2 Korentyen 8:12

1. Ki sakrifis bokou dimoun i fer e akoz?

DIMOUN i pare pour fer sakrifis pour bann keksoz ki enportan pour zot. Bann paran i depans zot letan, larzan ek lenerzi pour byennet zot zanfan. Letan zot kanmarad pe diverti kontan, bann zenn atlet ki anvi reprezant zot pei dan Olenpik i pas plizyer erdtan tou le zour dan bann lantrennman entans. Zezi osi ti fer sakrifis pour bann keksoz ki ti enportan pour li. I pa ti pe rod bann keksoz deliks e i ti napa zanfan. O kontrer, i ti swazir pour promot lentere Rwayonm. (Mat. 4:17; Lik 9:58) Pareyman, son bann disip ti abandonn bokou keksoz pour siport Rwayonm Bondye. Sa keksoz pli enportan pour zot ti pour promot lentere Rwayonm e zot ti fer bann sakrifis pour siport Rwayonm otan ki zot ti kapab. (Mat. 4:18-22; 19:27) Alor nou kapab demann nou lekor, ‘Kwa ki enportan dan mon lavi?’

2. (a) Ki sakrifis ki esansyel pour bann vre Kretyen? (b) Ki lezot sakrifis serten i kapab fer?

² Serten sakrifis i vreman enportan pour tou vre Kretyen e esansyel pour nou kapab devlop e gard en bon relasyon avek Zeova. Sa i enkli sakrifye en pe nou letan ek lenerzi pour priye, lir Labib, fer Ladorasyon Fanmir, asiste bann renyon e partisip dan predikasyon. * (Zoz. 1:8; Mat. 28:19, 20; Ebr. 10:24, 25) Akoz nou zefor ek benediksyon Zeova, sa travay predikasyon pe progrese e en kantite dimoun pe mont lo “montanny kot lakaz Zeova.” (Iza. 2:2) Pour siport bann aktivite Rwayonm bokou i fer sakrifis par servi dan Betel, ede konstri bann Lasal Rwayonm ek Lasal Lasanble, organiz bann lasanble oubyen travay sekour apre bann dezas natirel. Sa bann travay an plis pa obligatwar pour nou ganny sove, me zot  vreman enportan pour siport lentere Rwayonm.

3. (a) Ki byenfe nou gannyen ler nou fer bann sakrifis pour Rwayonm? (b) Ki kestyon nou devret demann nou lekor?

³ Plis ki zanmen oparavan i neseser pour siport Rwayonm. I en plezir pour vwar ki bokou pe volonterman fer sakrifis pour Zeova. (Lir Psonm 54:6. *) Sa leta lespri zenere i donn nou bokou lazwa anmezir ki nou pe esper larive Rwayonm Bondye. (Det. 16:15; Akt 20:35) Alor, sakenn de nou i devret demann son lekor: ‘Eski i annan bann fason ki mon kapab fer lezot sakrifis pour Rwayonm? Ki mannyer mon pe servi mon letan, larzan, lenerzi ek abilite? Ki mon devret veye?’ Annou vwar en legzanp ki nou kapab imite pour fer sa bann sakrifis volonter ki pou donn nou plis lazwa.

BANN SAKRIFIS DAN LETAN LONTAN IZRAEL

4. Ki byenfe bann Izraelit ti gannyen ler zot ti fer sakrifis?

⁴ Bann sakrifis ki ti ganny ofer Izrael ti permet ki bann Izraelit i ganny pardonnen zot pese. Bann sakrifis ti neseser pour ki bann dimoun i ganny laprouvasyon Zeova. Serten ti obligatwar e lezot ti volonter. (Lev. 23:37, 38) Lofrann brile ti kapab ganny ofer konman en lofrann volonter oubyen en kado pour Zeova. Nou vwar en legzanp bann sakrifis ki ti ganny ofer pour Zeova zour linogirasyon tanp dan letan Salomon.​—2 Kron. 7:4-6.

5. Ki provizyon Zeova ti fer pour bann dimoun pov?

⁵ Zeova sa Bondye lanmour ti konpran ki pa tou dimoun ki ti kapab donn menm kantite e i ti demann sakenn dapre zot abilite. Lalwa Zeova ti fer kler ki disan en zannimo ti devret ganny verse, sa ti “en lonbraz bann bon keksoz ki [ti pou] vini” atraver son Garson Zezi. (Ebr. 10:1-4) Par kont, Zeova ti rezonnab konsernan laplikasyon sa lalwa. Par egzanp, Bondye ti pou aksepte ki en dimoun ti ofer de tourtrel si i ti napa sa mwayen pour ofer en mouton oubyen bef konman sakrifis. Sa i fer ki menm bann pov ti kapab ofer Zeova bann sakrifis avek lazwa. (Lev. 1:3, 10, 14; 5:7) Menm si sa bann sakrifis zannimo ti kapab diferan, Zeova ti ekspekte ki sak dimoun ki ti fer bann sakrifis volonter i fer de keksoz.

6. Ki Zeova ti ekspekte avek sak dimoun kan zot ti ofer sakrifis e akoz i ti enportan pour swiv sa bann lenstriksyon?

 ⁶ Premyerman, sa dimoun ti bezwen donn son meyer. Zeova ti dir sa nasyon ki tou lofrann ti bezwen san defo pour kapab “ganny [son] laprouvasyon.” (Lev. 22:18-20) Si sa zannimo ti annan defo, sa sakrifis pa ti pou akseptab pour Zeova. Dezyenmman, sa dimoun ki ti pe fer sakrifis ti bezwen prop e pir. Si en dimoun ti enpir, i ti pou bezwen fer en lofrann pese oubyen lofrann kilpabilite pour reetabli en bon relasyon avek Zeova avan ki i fer en lofrann volonter. (Lev. 5:5, 6, 15) Sa ti en keksoz serye. Zeova ti fer kler ki si en dimoun enpir ti manz en sakrifis konminyon, ki ti enkli bann sakrifis volonter, i ti pou ganny detri. (Lev. 7:20, 21) De lot kote, kan en dimoun ki ti pe ofer sakrifis ti annan en bon relasyon avek Zeova e son lofrann ti san defo, sa dimoun ti pou annan en konsyans kler e dan lazwa.​—Lir 1 Kronik 29:9. *

FER SAKRIFIS OZORDI

7, 8. (a) Ki lazwa bokou i gannyen kan zot fer sakrifis pour Rwayonm? (b) Ki bann resours nou annan?

⁷ Pareyman, bokou dimoun ozordi i pare pour fer plis dan servis Zeova e sa i fer li plezir. Kan nou travay pour nou bann frer ek ser sa i anmenn bokou byenfe. En frer ki partisip dan konstriksyon Lasal Rwayonm e ki’n ed bann ki ti ganny afekte par dezas natirel i fer resorti ki i difisil pour eksprim satisfaksyon ki i gannyen pour servi dan sa bann diferan fason. I dir: “Kan mon vwar lazwa ek lapresyasyon bann frer ek ser ki’n reini dan zot nouvo Lasal Rwayonm oubyen kan zot ganny ede apre en dezas natirel, sa i laprev ki tou sa zefor ki ganny fer i vo lapenn.”

⁸ Dan nou letan, lorganizasyon Zeova in toultan rod bann loportinite pour siport travay Zeova. An 1904, Frer Charles Russell ti ekrir: “Sak dimoun i devret konsider li konman enn ki’n ganny swazir par Senyer konman administrater pour servi son letan, lenfliyans, larzan . . . e servi tou sa bann talan dan sa meyer fason pour li fer loner son Met.” Menm si nou ganny bokou  benediksyon, i pa fasil pour fer bann sakrifis pour Zeova. (2 Sam. 24:21-24) Eski nou kapab pli byen servi resours ki nou annan?

9. Ki prensip dan Lik 10:2-4 nou kapab aplike dan lafason ki nou servi nou letan?

⁹ Nou letan. I demann bokou letan ek zefor pour tradwir e enprim nou bann piblikasyon, konstri landrwa ladorasyon, organiz lasanble, ede apre en dezas natirel e partisip dan bokou lezot aktivite ki neseser. Nou tou nou annan zis 24 erdtan dan en lazournen. Zezi in donn nou en prensip ki kapab ed nou. Kan i ti anvoy son bann disip dan predikasyon, Zezi ti dir zot “pa dir bonzour personn lo semen.” (Lik 10:2-4) Akoz Zezi ti dir sa? En spesyalis Labib i dir: “Bann dimoun dan Les pa ti dir bonzour parey nou, zis par fer en senp pti salye oubyen bes latet, me i [ti] annan bokou bann gran anmaye e menm prostern ater konpletman. Tousala ti pran letan.” Zezi pa ti pe dir son bann disip ki zot devret mank respe pour lezot. O kontrer, i ti pe ed zot pour vwar ki zot ti napa bokou letan e ki zot ti bezwen servi byen zot letan pour fer bann keksoz pli enportan. (Efe. 5:16) Eski nou kapab aplik sa prensip pour ki nou annan plis letan pour ede dan travay Rwayonm?

10, 11. (a) Dan ki fason nou kontribisyon pour sa travay mondyal i ganny servi? (b) Ki prensip dan 1 Korentyen 16:1, 2 ki kapab ed nou?

¹⁰ Nou larzan. En kantite larzan i neseser pour siport aktivite Rwayonm. Sak lannen plizyer dizenn milyon dolar i ganny depanse pour bann sirveyan rezyonal, pionye spesyal ek misyonner. Depi 1999, plis ki 24,500 Lasal Rwayonm in ganny konstri dan bann landrwa kot i annan mwens resours. Me i ankor annan demann pour apepre 6,400 Lasal Rwayonm. Sak mwan apepre 100 milyon kopi Latour Veyer ek Awake! i ganny enprimen. Tousala i ganny siporte par ou kontribisyon volonter.

¹¹ Zapot Pol i donn en prensip konsernan kontribisyon. (Lir 1 Korentyen 16:1, 2.) Anba lenspirasyon i ti ankouraz son bann frer Korent pour pa esper ziska lafen lasemenn pour gete sa ki ti reste, me plito pour met en pti larzan de kote konmansman lasemenn dapre lakantite ki zot ti kapab. Parey dan premye syek, bann frer ek ser dan nou letan i mazin davans sa ki zot kapab donnen dapre zot sirkonstans. (Lik 21:1-4; Akt 4:32-35) Zeova i apresye sa leta lespri pare pour donnen.

12, 13. Kwa ki kapab anpes serten donn tou zot lenerzi ek abilite, me ki mannyer Zeova pou ed zot?

¹² Nou lenerzi ek abilite. Zeova i siport nou dan nou zefor pour servi nou lenerzi ek abilite pour lentere Rwayonm. Zeova i promet pour ed nou kan nou fatige. (Iza. 40:29-31) Eski nou panse ki nou pa alaoter pour ede dan sa travay? Eski nou panse ki lezot i pli kalifye ki nou? Mazinen ki Zeova i kapab ranforsi abilite nenport dimoun, zis parey i ti fer pour Betsalel ek Ooliyab.​—Egz. 31:1-6; vwar portre lo paz 11.

¹³ Zeova i ankouraz nou pour pa refize donn nou meyer. (Prov. 3:27) Kan tanp ti pe ganny rekonstri, Zeova ti demann bann Zwif Zerizalenm pour reflesir konsernan sa travay rekonstriksyon ki zot ti pe fer. (Aga. 1:2-5) Zot ti’n ganny distrer e ti’n aret konsantre lo sa ki ti pli enportan. I ti a byen pour egzaminen si nou bann priyorite i parey avek sa ki pour Zeova. Eski nou kapab ‘fikse nou leker lo nou semen’ pour ki nou kapab partisip plennman dan sa travay Rwayonm dan sa bann dernyen zour?

 FER SAKRIFIS DAPRE SA KI NOU ANNAN

14, 15. (a) Ki mannyer nou ganny ankouraze avek legzanp nou bann frer ki annan mwens resours? (b) Ki nou devret anvi fer?

¹⁴ Bokou dimoun i reste dan bann landrwa kot i difisil pour viv e zot dan lamizer. Nou lorganizasyon i esey “kouver” sa ki nou bann frer ki pe viv dan sa bann pei i manke. (2 Kor. 8:14, NW) Par kont, menm bann frer ki annan mwens resours i kontan sa privilez pour donnen. I en plezir pour Zeova kan bann pov i motive pour donn avek lazwa.​—2 Kor. 9:7.

¹⁵ Dan en pei byen pov Lafrik, serten frer i rezerv en pti kare dan zot zarden e zot servi sa larzan ki zot gannyen ler zot vann sa ki zot in rekolte pour siport travay Rwayonm. Dan sa menm pei, i ti annan en proze pour konstri en Lasal Rwayonm ki bann frer ek ser ti vreman bezwen. Bann frer ek ser ki ti reste dan sa landrwa ti anvi ede. Me sa proze ti pou tonm dan sezon kot zot ti pou plante. Kantmenm sa, zot ti determinen pour donn koudmen konstri zot Lasal Rwayonm. Alor, zot ti donn lanmen konstri zot Lasal Rwayonm pandan lazournen e aswar zot ti al travay dan zot plantasyon. Pa sa i en leta lespri sakrifis! Sa i fer nou rapel bann frer dan premye syek Masedwann. Zot ti vreman “pov,” me kantmenm sa zot ti sipliye pour zot kapab ede. (2 Kor. 8:1-4) Pareyman, annou ‘donn dapre benediksyon ki Zeova in donn nou.’​—Lir Deterononm 16:17. *

16. Ki mannyer nou kapab fer sir ki nou sakrifis i ganny aksepte par Zeova?

¹⁶ Me nou bezwen fer atansyon. Parey ti leka dan letan bann Izraelit, nou osi nou bezwen fer sir ki nou bann sakrifis volonter i akseptab pour Bondye. Nou bezwen annan en bon balans pour ki nou responsabilite anver nou fanmir ek nou ladorasyon pour Zeova i reste sa keksoz pli enportan. Nou devret veye ler nou donn nou letan ek resours pour lezot, ki sa pa fer nou negliz spirityalite oubyen byennet fizik nou fanmir. Si non, i pou konmsi nou pe donn dapre sa ki nou napa. (Lir 2 Korentyen 8:12.) An plis, nou bezwen protez nou spirityalite. (1 Kor. 9:26, 27) Nou kapab asire ki ler nou viv dapre bann standar Labib, nou bann sakrifis pou donn nou bokou lazwa ek satisfaksyon e zot pou “ganny aksepte par” Zeova.

NOU SAKRIFIS I ANNAN EN GRAN VALER

17, 18. Ki mannyer nou santi anver bann ki pe fer sakrifis pour Rwayonm e ki nou tou nou devret reflesir lo la?

¹⁷ Bokou nou bann frer ek ser i ofer zot lekor parey “labwason ki pe ganny vide konman en lofrann” par travay ki zot fer pour siport bann aktivite Rwayonm. (Fili. 2:17, NW) Nou vreman apresye bann ki demontre en leta lespri pare pour donnen. Fanmir bann frer ki annan responsabilite dan aktivite Rwayonm i bezwen ganny felisite pour zot leta lespri pare pour donnen ek leta lespri sakrifis.

¹⁸ I annan en kantite travay dir ki bezwen ganny fer pour siport lentere Rwayonm. Sakenn de nou i devret priy Zeova pour ed nou vwar ki mannyer nou kapab partisip pli plennman dan sa travay. Nou kapab annan konfyans ki nou pou ganny bokou byenfe la konmela e plis ankor “dan lemonn fitir.”​—Mark 10:28-30.

[Not anba lo paz]

[Kestyon]

[Portre lo paz 11]

[Portre lo paz 12, 13]

Bokou lofrann ti volonter parey bann sakrifis ki nou fer ozordi (Vwar paragraf 7-13)

[Portre lo paz 12]

Bann proklanmater kot en Lasal Rwayonm Kenya, Lafrik

[Portre lo paz 12, 13]

En volonter dan Komite Konstriksyon Rezyonal Tuxedo, New York, Leta-z-ini

[Portre lo paz 13]

Bann Betelit Lostrali