‘Pa les zot lespri tonm dan konfizyon fasilman!’

“Mon bann frer, pa les zot lespri tonm dan konfizyon . . . fasilman.”​—2 TESA. 2:1, 2.

REFLESIR LO SA BANN PWEN

Ki lavertisman a tan Pol ti donnen dan son bann let pour bann Tesalonisyen?

Kwa ki kapab anpes nou ganny anbete?

Ki mannyer pres konsernan Rwayonm Bondye avek devouman i en proteksyon pour nou?

1, 2. Akoz i annan bokou malonnekte ozordi e dan ki form i vini? (Vwar portre anler.)

BANN trik, riz ek malonnekte i bann keksoz ki partou lo later. Sa pa devret sirprann nou. Labib i fer kler ki Satan i en bon anbeter e i pe kontrol sa lemonn. (1 Tim. 2:14; 1 Zan 5:19) Anmezir ki nou apros konklizyon sa move lemonn, Satan i pli ankoler akoz i konnen ki i reste li ankor zis “en pti pe letan.” (Rev. 12:12) Alor nou kapab ekspekte ki i pou annan plis malonnekte parmi bann ki ganny enfliyanse par Dyab e zot pou esey anbet sirtou bann ki pe promot vre ladorasyon.

² Bann remark ki pa toutafe vre, bann mansonz lo bann serviter Zeova ek zot krwayans i bann keksoz ki nou vwar par ler dan medya. Bann gran tit dan zournal, bann dokimanter lo televizyon e bann sit Enternet i ganny servi pour promot bann remark ki pa vre. Sa i fer serten dimoun ankoler, lefet ki zot in fasilman krwar sa bann mansonz.

3. Kwa ki kapab ed nou reziste riz nou lennmi?

³ Nou apresye Parol Bondye ki “itil . . . pour remet drwat” akoz sa i permet nou reziste riz nou lennmi ki kapab demoraliz nou. (2 Tim. 3:16) Zapot Pol ti ekrir ki serten Kretyen dan premye syek Tesalonik ti’n ganny anbete pour aksepte bann keksoz ki pa ti vre. I ti ankouraz zot pour ‘pa les zot lespri tonm dan konfizyon fasilman.’ (2 Tesa. 2:1, 2) Ki leson nou kapab aprann atraver konsey Pol e ki mannyer nou kapab aplik sa dan nou ka?

LAVERTISMAN A TAN

4. Ki mannyer bann Kretyen Tesalonik ti ganny averti konsernan zour Zeova e ki mannyer nou osi nou ganny averti?

⁴ Dan son premye let pour kongregasyon Tesalonik,  Pol ti met lanfaz lo zour Zeova ki ti pe aprose. I pa ti anvi ki son bann frer i dan fernwanr oubyen pa’n prepar zot. O kontrer, i ti ankouraz zot konman “bann zanfan lalimyer” pour “reste vizilan e azen.” (Lir 1 Tesalonisyen 5:1-6.) Ozordi nou pe esper destriksyon Gran Babilonn, setadir tou fo larelizyon. Sa pou konmansman gran zour Zeova. Gran mersi, nou pli byen konpran lakonplisman plan Zeova. Atraver kongregasyon nou osi regilyerman ganny bann rapel a tan ki ed nou reste vizilan. Si nou pran aker sa bann lavertisman ki nou pe kontinyelman gannyen, sa i kapab ranforsi nou determinasyon pour fer ‘servis sakre Bondye avek nou abilite pour rezonnen.’​—Rom. 12:1, NW.

5, 6. (a) Ki Pol ti koz lo la dan son dezyenm let pour bann Tesalonisyen? (b) Ki Bondye pou fer byento atraver Zezi e ki nou devret demann nou lekor?

⁵ Pa bokou letan apre ki i ti anvoy son premye let pour bann Kretyen Tesalonik, Pol ti anvoy zot en dezyenm let. Dan sa let i ti met lanfaz lo ladetres ki pe vini kan Zezi pou anmenn zizman lo “bann ki pa konn Bondye ek bann ki pa obei levanzil.” (2 Tesa. 1:6-8) Sapit 2 dan sa let i montre ki serten dan sa kongregasyon ti dan “leksitasyon” konsernan zour Zeova ziska en degre ki zot ti krwar ki larive sa zour ti pou deswit. (Lir 2 Tesalonisyen 2:1, 2.) Konprenezon ki bann premye Kretyen ti annan lo lakonplisman plan Zeova ti limite parey Pol ti admet pli tar konsernan profesi kan i ti dir: “Nou konnesans i enkonplet, nou profesi i enkonplet. Me kan sa ki parfe pou arive, sa ki enkonplet pou disparet.” (1 Kor. 13:9, 10) Me bann lavertisman enspire ki Pol, zapot Pyer ek lezot Kretyen swazir fidel sa letan ti ekrir ti kapab ed zot gard zot lafwa for.

⁶ Pour remet keksoz drwat, anba lenspirasyon Pol ti eksplike ki en gran lapostazi ek “sa Gran Rebel” ti pou aparet avan zour Zeova. * Apre sa, dan  son letan apropriye nou Senyer Zezi ti pou “detri” tou bann ki’n ganny anbete. Zapot Pol ti fer resorti rezon ki zot ti ganny sa zizman, i ti “akoz zot in refize kontan laverite.” (2 Tesa. 2:3, 8-10) I ti a byen demann nou lekor: ‘Ki kantite mon kontan laverite? Eski mon reste azour avek bann nouvo leksplikasyon dan bann magazin ek lezot piblikasyon baze lo Labib ki pep Bondye partou dan lemonn pe gannyen?’

SWAZIR BANN BON FREKANTASYON

7, 8. (a) Ki danze bann premye Kretyen ti bezwen fer fas avek? (b) Kwa ki vreman danzere pour bann vre Kretyen ozordi?

⁷ I vre, bann Kretyen ti pou fer fas avek lezot danze apard ki lapostazi. Pol ti ekrir Timote ki “lanmour larzan i rasin tou lemal.” Zapot Pol ti fer resorti ki “pour posed larzan [serten] in egare lwen avek lafwa e zot in met zot lekor dan en kantite tourman.” (1 Tim. 6:10, nou ki’n met an italik.) “Bann aktivite natir imen” i osi en danze ki ti pou toultan la.​—Gal. 5:19-21.

⁸ Me selman, nou kapab konpran akoz Pol ti averti bann Tesalonisyen dan en fason fran kont sa gran danze sorti kot bann tel zonm ki dan lezot verse Pol ti apel “bann fo zapot.” Serten parmi zot ti ansenny “bann mansonz pour fer bann krwaryan swiv zot.” (2 Kor. 11:4, 13; Akt 20:30) Pli tar, Zezi ti felisit kongregasyon Efez akoz zot pa ti “toler bann move dimoun.” Sa bann Efezyen ti “teste” bann dimoun ki ti bann fo zapot ek manter. (Rev. 2:2) I enteresan pour note ki dan son dezyenm let pour bann Tesalonisyen, Pol ti donn sa konsey: “Aprezan, bann frer, o non Senyer Zezi Kri, nou donn zot lord pour elwanny zot avek nenport frer ki pe viv dan en fason dezordonnen.” Apre i ti mansyonn spesifikman bann Kretyen ki “pa [ti] oule travay.” (2 Tesa. 3:6, NW, 10) Me si bann ki pa ti oule travay ti ganny konsidere konman bann dimoun dezordonnen, konbyen plis sa ti pou leka pour bann ki ti an faver lapostazi! Wi, asosye avek sa bann dimoun dan sa letan ti vreman danzere e se pour sa rezon ki bann Kretyen ti bezwen evit en tel lasosyasyon e sa i osi aplik pour nou ozordi.​—Prov. 13:20.

9. Akoz nou bezwen vizilan si en dimoun i konmans promot son prop lopinyon ki napa laprev oubyen pe kritike?

⁹ Nou pe apros sa gran ladetres ki pres pour deklanse e lafen sa move lemonn, alor sa bann lavertisman ki ti ganny donnen dan premye syek i annan plis lenportans pour nou ozordi. San dout, nou pa anvi “perdi” bi labonte ekstraordiner Zeova ek promes lavi eternel ki swa dan lesyel oubyen lo later. (2 Kor. 6:1) Si an ka en dimoun ki asiste renyon i esey anmyel nou avek zot prop lopinyon ki napa laprev oubyen pe kritike, definitivman nou bezwen vizilan.​—2 Tesa. 3:13-15.

“GARD BYEN BANN LANSENNYMAN”

10. Ki lansennyman bann Kretyen Tesalonik ti ganny ankouraze pour reste atase avek?

¹⁰ Pol ti ankouraz son bann frer Tesalonik pour “reste ferm” e reste atase avek sa ki zot ti’n aprann. (Lir 2 Tesalonisyen 2:15.) Ki “bann lansennyman” zot ti’n gannyen? Sirman, i pa ti bann lansennyman ki bann fo larelizyon ti pe promote ki ti napa okenn valer konpare avek sa ki sorti dan Labib. O kontrer, Pol ti pe refer avek bann lansennyman ki li ek lezot ti’n resevwar avek Zezi e osi avek bann lansennyman ki Bondye ti motiv Pol pour transmet ki laplipar i form parti bann liv  Labib. Pol ti felisit son bann frer dan kongregasyon Korent: “Zot touzour mazin mwan e zot swiv tou mon lansennyman parey mon’n donn zot.” (1 Kor. 11:2) Sa bann lansennyman ki zot ti gannyen ti diny konfyans e zot ti kapab depan lo la.

11. Dan ki fason serten i kapab ganny anbete?

¹¹ Kan Pol ti pe ekrir bann Ebre, i ti atir zot latansyon lo de fason ki en Kretyen i kapab perdi lafwa e pa arive reste ferm. (Lir Ebre 2:1; 3:12.) I ti koz lo “ganny antrennen” ek “tourn zot ledo.” San realize en kannot i kapab ganny antrennen lwen avek lakot. Sa pa ariv en sel kou me ptitapti. Par kont, si en zonm i pous son kannot lwen avek lakot li menm, i pe fer sa aksyon volonterman. Tou le de legzanp i montre byen ki mannyer serten i ganny anbete e les zot konfyans dan laverite afeblir.

12. Kwa ki kapab afekte nou spirityalite ozordi?

¹² Sa ti kapab leka avek serten dimoun Tesalonik. Be ozordi, eski i diferan? I annan bokou aktivite ki gaspiy letan. Mazinen ki kantite letan en dimoun i pase dan detant, swiv bann levennman sportif, al lo bann sit sosyal, lir e reponn bann mesaz ki i gannyen. Tou sa bann aktivite i kapab distrer en Kretyen e afeblir son devouman. Avek ki rezilta? Sa i kapab fer ki i negliz lapriyer senser, letid Parol Bondye, asiste renyon e pres sa bon nouvel. Ki nou kapab fer pour anpes nou tonm dan konfizyon fasilman?

PROTEKSYON KONT KONFIZYON

13. Parey i ti’n ganny predir ki latitid bokou dimoun e kwa ki pou anpes nou lafwa afeblir?

¹³ Nou merit gard antet sa letan ki nou pe viv ladan e sa move lefe ki i kapab annan lo nou si nou asosye avek bann ki pa krwar ki nou pe viv dan bann “dernyen zour.” Zapot Pyer ti ekrir sa konsernan nou letan: “Pour annan bann moker ki pou vin sikann zot an swivan zot prop dezir. Zot pou dir, ‘Oli sa promes, ki i pe vini? Depi ki nou bann zanset in mor, tou i reste parey depi kreasyon lemonn.’” (2 Pyer 3:3, 4) Pour gard antet ki nou pe viv dan bann “dernyen zour” nou bezwen lir Labib tou le zour e etidye Parol Bondye regilyerman. Parey i ti’n ganny predir, lapostazi in vin evidan depi lontan e i ankor egziste ozordi. “Sa Gran Rebel” i ankor egziste e i pe opoz bann serviter Bondye. I pour sa rezon ki nou bezwen reste vizilan plis ki zanmen oparavan la ki zour Zeova pe aprose.​—Tsef. 1:7.

14. Ki mannyer ler nou okipe dan servis Bondye sa i en proteksyon?

¹⁴ Leksperyans i montre ki fason pli enportan pour reste vizilan e pa les nou lespri tonm dan konfizyon se pour regilyerman pres sa bon nouvel Rwayonm. Alor, kan Kris Zezi, Sef kongregasyon ti demann bann ki ti pe swiv li pour fer tou pep vin son bann disip e ansenny zot pour obei tou sa ki i’n ansennyen, i ti pe donn son bann disip en konsey ki ti pou protez zot. (Mat. 28:19, 20) Si nou aplik son konsey nou pou devoue dan predikasyon. Eski ou krwar ou bann frer Tesalonik ti pou kontant zot zis prese konman en routin oubyen ki ou a fer? Rapel parol ki Pol ti dir zot: “Pa bezwen tenny Lespri. Pa bezwen mepriz mesaz profesi.” (1 Tesa. 5:19, 20) Pa sa bann profesi ki nou etidye e partaz avek lezot i eksitan!

15. Ki nou kapab enplike dan Ladorasyon Fanmir ki pou ed nou?

 ¹⁵ I toutafe normal ki nou anvi ed nou fanmir pour vin pli efikas dan predikasyon. Bokou frer ek ser in remarke ki en fason pour ed zot fanmir se pour pran en pe letan dan zot Ladorasyon Fanmir pour koz lo predikasyon. Petet, ou pou vwar li itil pour diskit lo ki mannyer bann manm fanmir pou swiv lentere en dimoun ki zot in zwenn dan predikasyon. Ki zot pou koz lo la dan lot vizit? Ki topik ki pou kontinyen stimil lentere sa met lakour? Kan ki i pli apropriye pour fer sa bann vizit? I annan bokou ki osi pran en pe letan dan zot Ladorasyon Fanmir pour prepar sa ki pou ganny diskite dan renyon. Eski ou kapab fer plis zefor pour prepare avek en bi pour partisipe dan renyon? Ou partisipasyon pou ranforsi ou lafwa e anpes ou lespri tonm dan konfizyon. (Ps. 35:18) Wi, ou Ladorasyon Fanmir pou protez ou kont bann lopinyon ki napa laprev ek bann dout.

16. Kwa ki motiv bann Kretyen swazir pour kontinyen gard zot abilite pour rezonnen?

¹⁶ Ler nou reflesir ki mannyer Zeova in beni son pep tou sa lannen avek en pli bon konprenezon lo bann profesi Labib, sa i fer nou apresye sa zoli rekonpans ki pou vini byento. Bann Kretyen swazir i annan sa posibilite pour zwenn avek Kris dan lesyel. Pa sa i motiv zot pour kontinyen gard zot abilite pour rezonnen! San dout, nou kapab aplik sa ki Pol ti ekrir bann Tesalonisyen avek bann Kretyen swazir ozordi kan i ti dir: “Nou devre remersi Bondye tou letan pour zot, frer, zot ki nou Senyer i kontan, parski Bondye in swazir zot . . . par Lespri ki a fer zot vin en pep sen, e par zot lafwa dan laverite.”​—2 Tesa. 2:13.

17. Ki lankourazman ou gannyen dan 2 Tesalonisyen 3:1-5?

¹⁷ Pareyman, bann ki pe esper avek pasyans pour ganny lavi eternel lo later i devret fer bokou zefor pour anpes zot lespri tonm dan konfizyon fasilman. Si ou annan lespwar pour viv lo later, pran aker sa lankourazman ranpli avek lanmour ki Pol ti ekrir bann Kretyen swazir Tesalonik. (Lir 2 Tesalonisyen 3:1-5.) Sakenn de nou i devret vreman apresye lankourazman Pol. Wi, sa de let pour bann Tesalonisyen i donn lavertisman vreman enportan konsernan bann lopinyon ki napa laprev ek nide ki pa tro apropriye pour en Kretyen. Vi ki nou pros avek lafen, bann Kretyen i vreman apresye sa bann lavertisman.

[Not anba lo paz]

[Kestyon]

[Portre lo paz 6]

[Portre lo paz 7]

Pol ti ekrir bann let ki ti donn bann Kretyen bann lavertisman a tan (Vwar paragraf 4, 5)

[Portre lo paz 10]

En bon preparasyon ek partisipasyon dan predikasyon i kapab anpes nou lespri tonm dan konfizyon fasilman (Vwar paragraf 14, 15)