BOKOU dimoun i konnen ki Zezi ti annan 12 zapot. Me petet zot pa okouran ki parmi son bann disip i ti annan osi bann madanm ki ti pros avek li. Enn parmi sa bann madanm ti Zann.—Mat. 27:55; Lik 8:3.

Ki rol Zann ti zwe dan minister Zezi e ki nou kapab aprann avek son legzanp?

Zann ti “madanm Souza en zofisye Erod.” Petet Souza ti en servant ki ti ansarz lakour Erod Antipas. Zann ti enn parmi sa bann madanm ki Zezi ti geri. Li avek lezot madanm ti akonpanny Zezi ek son bann zapot dan zot vwayaz.—Lik 8:1-3.

Bann sef Zwif ti ansennyen ki bann madanm pa ti devret asosye avek bann msye ki pa ti zot fanmir, pli pir ankor vwayaz avek zot. Anfet, bann msye Zwif pa ti devret tro koz avek bann madanm. Menm si i ti annan sa bann tradisyon, Zezi ti permet Zann ek lezot madanm krwayan pour vwayaz avek zot.

Vi ki Zann ti asosye avek Zezi ek son bann zapot, i ti riske ganny kritike avek bann sef relizye, son fanmir ek zanmi. Tou bann ki ti vwayaz avek Zezi ti bezwen pare pour fer bann sanzman dan zot lavi toulezour. Me Zezi ti dir sa konsernan sa bann disip: “Mon manman ek mon bann frer, se sa bann ki ekout parol Bondye e met li an pratik.” (Lik 8:19-21; 18:28-30) Pa i ankourazan pour konnen ki Zezi i santi li pros avek tou dimoun ki fer bann sakrifis pour kapab swiv li!

Zann ek bokou lezot madanm ti servi “zot prop byen” pour ed Zezi ek son 12 zapot. (Lik 8:3) Remarke ki en ekriven ti dir: “Lik pa pe dir son bann lekter ki sa bann madanm ti kwi manze, lav zafer sal oubyen pyeste bann lenz. Petet zot ti fer sa . . . , me pa sa ki Lik ti dir.” Aparaman sa bann madanm ti servi zot larzan, zot byen oubyen zot propriyete pour ed zot bann konpanyon.

Ni Zezi, ni son bann zapot pa ti travay ler zot ti pe vwayaze pour prese. Alor, probableman zot ti napa mwayen pour aste manze ek lezot keksoz ki sa apepre 20 dimoun ti bezwen. Menm si petet lezot ti ofer zot lospitalite, lefet ki Zezi ek son bann zapot ti annan en bwat larzan avek zot, sa i  montre ki i pa toultan ki zot ti depan lo lospitalite lezot. (Zan 12:6; 13:28, 29) I kapab ki Zann ek lezot madanm ti fer kontribisyon pour kouver bann depans.

Serten pa dakor ki en madanm Zwif ti annan larzan oubyen propriyete. Me bann dokiman ki’n ganny ekrir konsernan sa letan i montre ki en madanm Zwif ti’n kapab ganny sa bann byen oubyen larzan dan diferan fason: (1) konman en leritaz si son papa ti’n mor e i ti napa garson, (2) konman en propriyete ki i ti’n gannyen, (3) konman larzan ki ti enkli dan en lagreman maryaz an ka divors, (4) dan en testaman pour ganny propriyete oubyen larzan son msye ler i mor oubyen (5) larzan ki li menm in travay pour gannyen.

San dout, bann disip Zezi ti kontribye mannyer zot ti kapab. Petet parmi son bann disip i ti annan bann madanm ki ti ris. Vi ki Zann ti, oubyen ti’n deza madanm serviter Erod, serten i mazinen ki i ti annan larzan. Petet li oubyen en lot dimoun ki ti annan larzan ki ti donn Zezi sa lenz ser ki ti san koutir. (Zan 19:23, 24) En ekriven i fer resorti ki “madanm bann peser pa ti pou’n kapab donn” sa kalite lenz.—Hidden Voices: Biblical Women and Our Christian Heritage.

Labib pa presize ki Zann ti kontribye finansyerman. Me i’n fer sa ki i ti kapab e sa i kapab ansenny nou en bon leson. Sa ki nou donnen pour fer avanse lentere Rwayonm oubyen ki swa nou swazir pour donnen oubyen non, i depan lo nou. Sa ki enportan pour Bondye se ki nou fer sa ki nou kapab avek lazwa.—Mat. 6:33; Mark 14:8; 2 Kor. 9:7.

Aparaman, Zann ti la ler Zezi ti ganny met amor, ansanm ek lezot madanm ki “ti swiv Zezi letan i ti Galile e zot ti servi li. Ti annan osi bokou lezot madanm ki ti’n vin avek li Zerizalenm.” (Mark 15:41) Ler lekor Zezi ti ganny tire lo poto pour antere, “bann madanm ki ti’n swiv Zezi depi Galile ti war son tonbo e ki mannyer zot ti’n depoz son lekor. Alor, zot ti retourn se zot e zot ti prepar aromat ek parfen.” Sa bann madanm ki Lik ti idantifye konman “Mari Madlenn, Zann, ek Mari manman Zak” ti retournen apre Saba e vwar bann lanz ki ti dir zot ki Zezi in resisite.—Lik 23:55–24:10.

I posib ki Zann, enkli manman Zezi ek son bann frer, ti parmi bann disip ki ti rasanble Zerizalenm Lapannkot lannen 33 N.L. (Akt 1:12-14) Lefet ki msye Zann ti travay avek Erod Antipas, petet li ki ti donn Lik serten lenformasyon lo sa zonm, sirtou ki zis levanzil Lik ki mansyonn Zann par son non.—Lik 8:3; 9:7-9; 23:8-12; 24:10.

Zistwar Zann i donn nou bann bon leson pour reflesir lo la. I ti servi Zezi dan sa pli bon fason ki i ti kapab. I ti bezwen kontan si son larzan ti ed Zezi, son 12 zapot ek lezot pour vwayaze e pres ansanm. Zann ti ed Zezi e i ti fidel anver li dan tou son leprev. I ti pou byen ki bann madanm Kretyen i imit son leta lespri.