Diny pour resevwar en Rwayonm

“Sa i prouve ki zizman Bondye i zis, pour ki zot vin diny pour son Rwayonm.”—2 TESA. 1:5.

1, 2. Ki plan Bondye konsernan zizman e lekel ki pou anmenn sa zizman?

ANVIRON lannen 50 Nou Lepok, zapot Pol ti dan lavil Atenn. I ti mekontan pour vwar ki partou ti annan ladorasyon zidol, alor i ti santi li pouse pour donn en ekselan temwannyaz. I ti termin son diskour par sa bann parol ki ti’n bezwen ganny latansyon bann payen ki ti pe ekoute. I ti dir: “Aprezan [Bondye] i apel tou dimoun dan nenport ki landrwa pour sanz zot lavi. Annefe, i’n fikse en zour pour li ziz lemonn antye avek lazistis, par en zonm ki i’n swazir. I’n donn laprev pour nou tou, an resisitan sa zonm.”—Akt 17:30, 31.

² Pa i enportan pour reflesir lo sa size, ki Bondye in fikse en zour pour ziz limanite dan lavenir! Pol pa ti mansyonn non sa enn ki pou anmenn sa zizman dan son diskour ki i ti fer Atenn. Me nou konnen ki sa i pa lot ki Zezi Kri ki’n resisite. Sa zizman ki Zezi pou anmennen pou vedir swa lavi oubyen lanmor.

3. Akoz Zeova ti fer en lalyans avek Abraam e lekel ki ti zwe en rol enportan dan son lakonplisman?

³ Zour Zizman pou dire pour 1,000 an. Se Zezi ki pou diriz sa zizman o non Zeova konman Lerwa dan Rwayonm Bondye, me i pa pou tousel. Zeova in swazir lezot dimoun parmi bann imen pour rennyen e ziz avek Zezi pandan sa mil an. (Konpar Lik 22:29, 30.) Apepre 4,000 an pase, Zeova ti poz en baz pour sa Zour Zizman ler i ti fer en lalyans avek son serviter fidel Abraam. (Lir Zenez 22:17, 18.) Sa lalyans ti klerman vin an mars dan lannen 1943 A.N.L. Byensir, Abraam pa ti kapab konpran plennman ki sa lalyans ti pou vedir pour limanite. Parkont, ozordi nou kapab vwar atraver bann kondisyon sa lalyans, ki desandans Abraam i annan en rol enportan pour zwe dan lakonplisman plan Bondye pour ziz limanite.

4, 5. (a) Lekel premye parti dan Desandans Abraam, e ki i ti dir konsernan sa Rwayonm? (b) Kan ki sa lespwar pour form parti Rwayonm Bondye ti vin pli evidan pour bann Kretyen?

⁴ Premye parti dan Desandans Abraam ti Zezi. Ti dan lannen 29 N.L. ki i ti ganny swazir par lespri sen e i ti vin Mesi oubyen Kris. (Gal. 3:16) Zezi ti pres sa bon nouvel lo Rwayonm pandan trwa-z-an edmi avek sa na syon Zwif. Apre ki Zan Batis ti ganny arete, Zezi ti montre ki lezot ti kapab swete pour vin manm sa Rwayonm ler i ti dir: “Depi lepok Zan-Batis ziska prezan Rwayonm lesyel i sa lobzektif ki zonm i pe pouse pour atenn, e bann ki pe pouse pour arive pe reisi.”—Mat. 11:12, NW.

⁵ Parkont i enteresan pour note ki zis avan ki i ti koz konsernan bann ki ti pou “atenn” Rwayonm lesyel, Zezi ti dir: “An verite mon dir zot, parmi bann ki’n ne lo later napa enn ki pli gran ki Zan-Batis. Pourtan sa ki pli pti dan Rwayonm lesyel i pli gran ki li.” (Mat. 11:11) Akoz i ti kapab dir sa? Akoz ti nek zour Lapannkot lannen 33 N.L., kan bann fidel ti ganny lespri sen, ki sa lespwar pour form parti Rwayonm Bondye ti vin pli evidan. Sa letan, Zan Batis ti’n fini mor.—Akt 2:1-4.

Desandans Abraam i ganny konsidere drwat

6, 7. (a) Dan ki fason desandans Abraam pou vin “parey zetwal dan lesyel”? (b) Ki benediksyon Abraam ti resevwar e pareyman ki benediksyon son desandans i resevwar?

⁶ Abraam ti ganny dir ki son desandans ti pou vin bokou “parey zetwal dan lesyel” e gren disab obor lanmer. (Zen. 13:16; 22:17) Andotmo, i ti enposib dan letan Abraam pour konnen konbyen manm ti pou annan dan sa desandans. Me, sif egzakt sa desandans spirityel ti ganny revele finalman. Anplis ki Zezi, ti pou annan 144,000 zot.—Rev. 7:4; 14:1.

⁷ Konsernan lafwa Abraam, Labib i dir: “[Abraam] ti met lafwa dan Zeova; akoz sa I ti konsider li konman en dimoun drwat.” (Zen. 15:5, 6) I vre, napa okenn imen ki totalman drwat. (Zak 3:2) Malgre sa, akoz lafwa remarkab ki Abraam ti annan, lafason ki Zeova ti vwar li se konmsi i ti drwat e i ti menm apel li son zanmi. (Iza. 41:8) Sa bann ki ti form parti sa desandans spirityel Abraam ansanm avek Zezi ti osi ganny konsidere konman bann dimoun drwat e sa i fer zot ganny bann pli gran benediksyon ki Abraam ti resevwar.

8. Ki bann benediksyon ki’n ganny ofer avek bann desandans Abraam?

⁸ Bann Kretyen swazir i ganny konsidere drwat akoz zot annan lafwa dan sakrifis Zezi. (Rom. 3:24, 28) Dan lizye Zeova, zot in ganny libere avek pese e zot kapab ganny swazir par lespri sen pour vin bann garson spirityel Bondye ek bann frer Zezi Kri. (Zan 1:12, 13) Zot in antre dan sa nouvo lalyans e form sa nouvo nasyon, “Izrael Bondye.” (Gal. 6:16, NW; Lik 22:20) Pa tousala i en privilez ekstraordiner! Akoz sa bann dispozisyon ki Zeova in fer dan zot ka, sa bann Kretyen swazir napa sa lespwar pour viv lo later. Zot sakrifye sa lespwar pour viv lo later pour konn sa lazwa ki pa kapab ganny dekrir, par zwenn avek Zezi Zour Zizman e pour renny avek li dan lesyel.—Lir Romen 8:17.

9, 10. (a) Kan eski bann Kretyen ti ganny swazir par lespri sen pour sa premye fwa, e kwa ki zot ti pou eksperyanse? (b) Ki led bann Kretyen swazir ti resevwar?

⁹ Zour Lapannkot lannen 33 N.L., en  group imen fidel ti ganny sa loportinite pour form parti sa bann ki ti pou rennyen avek Zezi Zour Zizman. Apepre 120 disip Zezi ti ganny batize avek lespri sen e zot ti alor vin bann premye Kretyen swazir. Me pour zot sa ti zis en konmansman. Apartir sa letan, zot ti pou bezwen demontre zot fidelite anver Zeova malgre tou sa bann leprev ki Satan ti pou fer zot pas ladan. Zot ti pou bezwen reste fidel ziska lanmor pour zot resevwar kouronn lavi dan lesyel.—Rev. 2:10.

¹⁰ Avek sa lobzektif antet, atraver son Parol e par mwayen kongregasyon Zeova ti donn sa bann Kretyen swazir konsey ek lankourazman ki zot ti bezwen. Par egzanp, zapot Pol ti ekrir bann Kretyen swazir dan lavil ­Tesalonik: “Zot konnen ki nou ti ansenny zot, ankouraz zot konman en papa avek son bann zanfan, e nou’n sipliy zot pour anmenn en lavi ki Bondye i aprouve, li ki’n apel zot pour son Rwayonm e son laglwar.”—1 Tesa. 2:11, 12.

11. Ki bann provizyon an ekrir Zeova ti fer pour bann manm “Izrael Bondye”?

¹¹ Pandan plis ki swasant an plitar, apre ki bann premye manm kongregasyon Kretyen swazir ti konmans ganny rasanble, Zeova ti vwar li apropriye pour fer ekrir en resi ki dirab konsernan minister Zezi lo later osi fason ki i ti azir e konsey bann Kretyen swazir dan premye syek. Alors Zeova ti azout Lekritir Grek Kretyen avek Lekritir Ebre ki ti deza egziste. Lekritir Ebre ti ganny ekrir premyerman pour nasyon Izrael pandan sa letan ki zot ti annan en relasyon spesyal avek Bondye. Lekritir Grek Kretyen ti ganny ekrir premyerman pour “Izrael Bondye” bann ki ti’n ganny swazir konman bann frer Kris ek garson spirityel Bondye. Byensir, sa pa vedir ki bann ki pa ti Izraelit pa ti kapab retir bokou byenfe par etidye Lekritir Ebre. Pareyman, bann Kretyen ki pa’n ganny swazir par lespri sen i retir en kantite byenfe par etidye e viv dapre konsey ki ganny trouve dan Lekritir Grek Kretyen.—Lir 2 Timote 3:15-17.

12. Ki rapel Pol ti fer avek bann Kretyen swazir?

¹² Bann Kretyen dan premye syek ti ganny konsidere konman bann dimoun drwat e zot ti ganny swazir par lespri sen avek bi pour zot resevwar zot leritaz dan lesyel. Vi ki zot ti’n ganny swazir, sa pa ti fer zot vin lerwa lo lezot Kretyen swazir ler zot ti ankor lo later. Aparaman, serten parmi bann premye Kretyen ti’n oubliy sa e zot ti pe konmans rod vin popiler parmi zot bann frer dan kongregasyon. Se pour sa ki Pol ti santi li pouse pour demann zot: ‘Deza zot posed tou sa ki zot bezwen? Deza zot in vin ris? Zot in vin bann lerwa, pour ki nou osi nou ti a konman lerwa ansanm avek zot.’ (1 Kor. 4:8) Alors, Pol ti rapel sa bann Kretyen swazir dan son lepok: “I pa vedir ki nou konmann zot lafwa, . . . me nou pe kontribye dan zot lazwa.”—2 Kor. 1:24.

 Sa i ganny konplete

13. Ki mannyer lapel bann Kretyen swazir ti progrese apre lannen 33 N.L.?

¹³ Pa tou sa 144,000 Kretyen ki ti ganny swazir dan premye syek. Zot ti kontinyelman ganny apele dan lepok bann zapot, epi i paret ki sa lapel ti diminyen. Me zot ti kontinyen ganny swazir ziska dan nou letan. (Mat. 28:20) Finalman, apre ki Zezi ti konmans rennyen an 1914 keksoz ti al pli vit.

14, 15. Ki’n arive dan nou letan an rapor avek lapel bann ki’n ganny swazir?

¹⁴ Premyerman, Zezi ti retir tou sa ki opoz dominasyon Bondye dan lesyel. (Lir Revelasyon 12:10, 12.) Apre i ti konsantre lo sa travay pour rasanble larestan manm dan son Rwayonm pour konplet sa sif 144,000. Dan milye lannen 1930 i ti evidan ki sa travay ti pe byen avanse e bokou parmi bann ki ti pe aksepte sa bon nouvel ti napa sa dezir pour al viv dan lesyel. Lespri sen pa ti pe konfirm avek zot ki zot ti zanfan Bondye. (Konpar Romen 8:16.) O kontrer, zot ti rekonnet ki zot ti form parti ‘lezot mouton’ ki ti annan sa lespwar pour viv pour touzour dan paradi lo later. (Zan 10:16) Alors, apre 1935 sa ki ti pli enportan konsernan sa travay predikasyon, ti sa ki zapot Zan ti vwar dan en vizyon, sa ti rasanbleman sa “gran lafoul” ki ti pou sirviv sa ‘gran ladetres.’—Rev. 7:9, 10, 14.

¹⁵ Me kantmenm sa, diran sa bann lannen depi 1930, ti annan en ptigin dimoun ki ti ganny apele pour al viv dan lesyel. Akoz? Dan serten ka i kapab ki zot ti pe ranplas bann ki ti’n deza ganny swazir me ki pa’n reste fidel. (Konpar Revelasyon 3:16.) Pol ti menm koz lo serten ki i ti konnen personnelman ki ti’n kit laverite. (Fili. 3:17-19) Lekel ki Zeova ti pou apele pour fer en tel ranplasman? Byensir, se li ki fer sa desizyon. Me kantmenm sa, i paret fer sans ki i pa ti pou apel bann ki ti’n fek konverti pour vin Kretyen. Me i ti pou apel bann dimoun tel parey bann disip ki Zezi ti koz avek sa premye fwa ler i ti fer sa nouvo Memoryal, ki ti’n deza demontre zot fidelite ziska en serten degre. *—Lik 22:28.

16. Pour ki rezon nou rekonesan vizavi bann Kretyen swazir, e ki nou kapab krwar avek konfyans?

¹⁶ Me i paret, ki pa tou sa bann ki ti’n ganny apele pour al viv dan lesyel depi 1930 ki ti pe ranplas bann ki pa ti reste fidel. Zeova in fer sir ki nou pou annan bann Kretyen swazir parmi nou tou dilon bann dernyen zour sa move lemonn ziska destriksyon “Gran Babilonn.” * (Rev. 17:5) Nou kapab annan konfyans ki sif konplet sa 144,000 manm pou ganny konplete dan son letan apropriye e ki finalman zot pou rennyen dan sa Rwayonm. Nou kapab osi met nou konfyans dan sa parol profetik, ki sa gran lafoul ki pe kontinyen ogmante konman en group, zot pou kontinyen montre zot fidelite. Byento sa gran lafoul pou “sorti dan sa gran ladetres” ki lemonn Satan pou pas ladan, e avek lazwa zot pou antre dan nouvo lemonn Bondye.

Gouvernman Bondye dan lesyel in preski ganny konplete!

17. Dapre 1 Tesalonisyen 4:15-17 ek Revelasyon 6:9-11, ki ti arive avek bann Kretyen swazir ki ti reste fidel ziska lanmor?

¹⁷ Depi lannen 33 N.L. plizyer dizenn milye Kretyen swazir in demontre zot lafwa for e andire fidelman ziska lanmor.  Sa bann Kretyen in deza ganny konsidere diny pour resevwar sa Rwayonm e i kler ki zot ti konmans resevwar zot rekonpans dan lesyel byen boner kan Kris ti prezan dan en fason envizib.—Lir 1 Tesalonisyen 4:15-17; Revelasyon 6:9-11.

18. (a) Ki konfyans bann Kretyen swazir ki ankor lo later i annan? (b) Ki mannyer bann lezot mouton i konsider zot bann frer swazir?

¹⁸ Sa bann Kretyen swazir ki ankor lo later i annan konfyans total ki si zot reste fidel, zot pou byento resevwar zot rekonpans pour zot fidelite. Ler sa plizyer milyon lezot mouton i reflesir lo lafwa zot bann frer swazir, zot ­dakor avek sa bann parol ki zapot Pol ti dir konsernan bann Kretyen swazir dan lavil ­Tesalonik: “Nou vant nou lekor lo zot size dan bann [“kongregasyon,” NW], akoz zot perseverans ek zot lafwa atraver tou bann persekisyon ek bann soufrans ki zot pas ­ladan. Sa i prouve ki zizman Bondye i zis, pour ki zot vin diny pour son Rwayonm pour lekel zot pe soufer.” (2 Tesa. 1:3-5) Ler sa dernyen Kretyen swazir i mor, nenport ki moman sa i arive, gouvernman Bondye dan lesyel pou ganny konplete. Pa sa pou anmenn lazwa dan lesyel e lo later!

[Not anba lo paz]

Eski ou kapab eksplike?

• Kwa ki Bondye ti revele avek Abraam ki annan en rapor avek zour zizman?

• Akoz Abraam ti ganny konsidere drwat?

• Lefet ki bann desandans Abraam i ganny konsidere drwat ki byenfe sa pou anmennen pour zot?

• Ki konfyans tou Kretyen i annan?

[Kestyon]

[Portre lo paz 24]

Zezi ti ankouraz son disip pour atenn sa Rwayonm

[Portre lo paz 25]

Zour Lapannkot lannen 33 N.L. Zeova ti konmans swazir bann lezot manm desandans Abraam

[Portre lo paz 26]

Lezot mouton i rekonesan ki bann Kretyen swazir in avek zot tou dilon sa bann dernyen zour