Kan Rwayonm Bondye pou vini?
Kan Rwayonm Bondye pou vini?
“SENYER, eski la aprezan, ou pou retabli rwayonm Izrael?” (Akt 1:6) Bann zapot ti eksite pour konnen kan Zezi ti pou etablir son Rwayonm. Ozordi, apepre 2,000 an plitar bokou dimoun i ankor eksite pour konnen: Kan Rwayonm Bondye pou vini?
Vi ki Zezi ti koz en kantite lo sa Rwayonm ler i ti pe prese, ou kapab ekspekte ki i ti diskit lo sa kestyon. E byensir i ti fer li! I ti koz bokou lo en peryod letan spesifik ki i ti apel son “prezans.” (Matye 24:37, NW) Sa prezans i relye etrwatman avek letablisman Rwayonm Bondye dirize par Kris. Ki si sa sa prezans? Annou egzamin kat fe dan Labib ki revel prezans Kris.
1. Prezans Kris ti pou konmans en bon pe letan apre son lanmor. Zezi ti donn en legzanp, kot i ti konpar son lekor avek en zonm ki ti’n “al dan en pei lwen pour li ganny kouronnen konman lerwa.” (Lik 19:12) Ki mannyer sa legzanp profetik ti ganny akonplir? Bon, Zezi ti mor e ti resisite; apre i ti vwayaze pour al “dan en pei lwen” setadir dan lesyel. Parey Zezi ti predir dan en lot legzanp preski parey, son retour dan son pozisyon konman lerwa ti pou vin “apre en bon pe letan.”—Matye 25:19.
Detrwa lannen apre ki Zezi ti mont dan lesyel, zapot Pol ti ekrir: “Kris, par kont, apre ki i’n ofer en sel sakrifis pour tou pese, enn fwa pour tou, in asiz li dan kote drwat Bondye pour touzour. E la aprezan i pe espere ki Bondye i fer son bann lennmi vin son marspye.” (Ebre 10:12, 13) Alors, apre ki i ti’n ariv dan lesyel i ti pou bezwen esper ankor en bon pe letan. Sa kantite letan ki i ti espere ti fini kan Zeova ti kouronn son Garson konman Lerwa sa Rwayonm ki ti’n ganny promet depi en bon pe letan. Sa ti letan ki prezans Zezi ti konmanse. Eski bann imen lo later ti pou vwar sa levennman eksitan?
2. Sa prezans i envizib dan lizye bann zonm. Mazinen, Zezi ti diskit lo siny ki ti pou endik son prezans. (Matye 24:3) Si son prezans ti vizib dan lizye bann imen, eski ti pou bezwen annan en siny? Pour donn en legzanp: Imazinen ki ou pe vwayaze pour al admir lanmer. Tou dilon semen ou pou kapab vwar bann siny ki pou diriz ou dan ou vwayaz, me enn fwa ki ou’n ariv lo lans pe debout kot laroul i kraze e ou vwar sa lanmer imans ziska lo lorizon, eski ou pou ekspekte vwar en gro siny ki mark “bor lanmer” pour ou konnen ki ou’n ariv obor lanmer? Me non! Akfer ou pou bezwen en siny pour idantifye en keksoz ki ou pe deza vwar?
Zezi pa ti dekrir siny son prezans pour montre keksoz ki imen i kapab vwar avek zot lizye, o kontrer sa ti pou ed zot konpran en keksoz ki ti pou arive dan lesyel. Alors Zezi ti dir: “Rwayonm Bondye pa pou ganny etabli par bann siny ki ou kapab war.” (Lik 17:20) Alors ki mannyer sa siny ti pou montre bann ki lo later ki prezans Kris in konmanse?
3. Prezans Zezi pou ganny marke par en letan kot lemonn pou ranpli avek problenm. Zezi ti dir ki son prezans konman Lerwa dan lesyel pou ganny marke lo later par lager, lafamin, tranblemandter, maladi ek move kondwit. (Matye 24:7-12; Lik 21:10, 11) Kwa ki pou lakoz tou sa soufrans? Labib i eksplike ki Satan, “sef lemonn” i ankoler akoz i konnen ki i reste li zis en ptigin letan la ki prezans Kris konman Lerwa in konmanse. (Zan 12:31; Revelasyon 12:9, 12) Nou kapab vwar lakoler Satan e prezans Kris i vreman aparan dan nou letan. Sirtou depi 1914, sa lannen ki bokou istoryen ti rekonnet konman en nouvo sapit dan listwar imen ki sa levidans ti vin aparan lo en gran lesel dan lemonn antye.
Tousala i kapab paret konman en move nouvel, me sa pa leka. I fer vwar ki sa Rwayonm kot Kris i dirize konman Lerwa pe deza dirize dan lesyel. Tre byento sa gouvernman pou egzers son dominasyon isi lo later antye. Alors, ki mannyer bann dimoun pou konn konsernan sa Rwayonm pour ki zot kapab aksepte son dominasyon e vin son sitwayen?
4. Prezans Kris i ganny marke par en travay predikasyon ki pou ganny fer dan lemonn antye. Zezi ti dir ki son prezans pou parey “letan Noe.” * (Matye 24:37-39) Noe ti plis ki zis en konstrikter lars, i ti osi “en predikater lazistis.” (2 Pyer 2:5) Noe ti averti bann dimoun ki en zizman sorti kot Bondye ti pe vini. Zezi ti dir ki son bann disip lo later ti pou fer menm parey pandan son prezans. I ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”—Matye 24:14.
Parey nou ti vwar dan lartik presedan, Rwayonm Bondye pou detrir tou bann gouvernman sa lemonn. Sa travay predikasyon pe fer tou dimoun konnen ki sa gouvernman dan lesyel pros pour azir. I donn zot en loportinite pour sov sa destriksyon ki pe vini e pour vin bann sitwayen sa Rwayonm. Alors, en kestyon enportan se, Ki mannyer ou pou reazir?
Eski Rwayonm Bondye i en bon nouvel pour ou?
Sa mesaz ki Zezi ti prese ti enn ki ti donn en lespwar ki napa son parey. Apre sa rebelyon dan zarden Edenn Zeova ti fer plan pour form en gouvernman ki ti pou met keksoz drwat, e fer bann imen fidel retourn dan sa kondisyon ki Bondye ti annan antet depi o konmansman e sa se lavi eternel dan en paradi isi lo later. Eski i kapab annan en lot keksoz pli eksitan ki sa konnesans ki sa gouvernman ki’n ganny promet depi lontan pe deza dirize dan lesyel? I pa zis en senp konsep me i en realite!
Sa Lerwa ki Bondye in swazir pe deza dirize omilye son bann lennmi. (Psonm 110:2) Dan sa lemonn koronpi ki elwannyen avek Bondye, sa Mesi pe akonplir dezir son Papa pour rod tou bann ki anvi konn Bondye, sa ki i vreman ete e pour ador li “an-espri e an verite.” (Zan 4:24) Lespwar pour viv pour touzour anba dominasyon Rwayonm Bondye i disponib pour dimoun tou laz, ras, ek ran sosyal. (Akt 10:34, 35) Nou ankouraz ou pour sezi sa loportinite ki devan ou. Aprann konsernan Rwayonm Bondye la konmela pour ki ou a kapab rezwir lavi anba son dominasyon kot pou annan lazistis pour touzour!—1 Zan 2:17.
[Not anba lo paz 6]
^ par. 10 Parol Zezi i ede pour koriz sa fo lide ki serten tradiksyon Labib i donnen par mal tradwir sa mo “prezans.” Serten tradiksyon i servi “larive,” “laparisyon” oubyen “retour” ki tousala i donn sa nide en levennman ki pou dire pour zis en ptigin letan. Me remarke ki Zezi pa ti konpar son prezans avek sa Deliz dan letan Noe, ki ti zis en levennman ki ti arive sa letan, me plito avek ‘bann zour dan letan Noe,’ en peryod letan kot en levennman eksitan ti arive. Parey dan sa letan, prezans Kris pou dir pour en peryod letan kot dimoun pou telman okipe avek bann aktivite tou le zour e zot pa pou pran kont lavertisman ki pe ganny donnen.