Bann keksoz ki nou bezwen sov lwen avek

“Bann serpan, lekel ki’n montre zot ki zot kapab sov pinisyon, ki pou ariv lo zot?”—MAT. 3:7.

1. Ki serten legzanp i annan dan Labib kot dimoun ti bezwen sove?

KWA ki vin dan ou lespri ler ou tann sa mo “sove” oubyen taye? Serten dimoun i kapab mazin Zozef, sa zoli zennonm ki ti taye ler madanm Potifar ti fer bann propozisyon imoral avek li. (Zen. 39:7-12) Lezot i kapab mazin bann Kretyen ki dan lannen 66 N.L., ti sove Zerizalenm pour obeir lavertisman Zezi: “Kan zot a war Zerizalenm antoure par bann larme . . . Alor, ki bann ki dan Zide i sov dan montanny, e ki bann ki dan lavil i sorti.”—Lik 21:20, 21.

2, 3. (a) Ki ti vre sinifikasyon parol Zan Batis kont bann sef relizye? (b) Ki mannyer Zezi ti siport sa lavertisman ki Zan ti’n donnen?

² Sa bann legzanp ki’n ganny mansyonnen pli o pe koz konsernan sove dan sa vre sans. Ozordi, i vreman irzan pour bann Kretyen dan preski lemonn antye pour sove dan en sans senbolik. Zan Batis ti servi sa mo “sove” dan sa menm sans. Bann sef relizye Zwif ki ti krwar zot tro zis e ki zot pa ti bezwen repantir ti parmi bann dimoun ki ti vin vwar Zan Batis. Zot ti mepriz bann dimoun ordiner ki ti pe ganny batize konman en senbol repantans. San lafreyer, Zan Batis ti fer bann dimoun rekonnet ki sa bann sef relizye ti ipokrit: “Bann serpan, lekel ki’n montre zot ki zot kapab sov pinisyon, ki pou ariv lo zot? Alor prodwi bann bon fri repantans.”—Mat. 3:7, 8.

³ Zan pa ti pe koz konsernan sove dan sa vre sans. I ti pe avertir konsernan en zizman ki ti pe vini e sa ti en zour lakoler. I ti fer sa bann sef relizye remarke ki si zot ti oule ganny sove sa zour, zot ti pou bezwen prodwir fri ki prouve ki zot ti’n repantir. Pli tar, san okenn lafreyer Zezi ti kondann bann sef relizye setadir denons zot bann latitid kriminel ki ti demontre ki zot vre papa ti Dyab. (Zan 8:44) Pour siport sa lavertisman ki Zan ti anonse pli boner, Zezi ti apel zot “bann piti serpan” e i ti demande: “konman zot ekspekte sov kondannasyon [“Zeenn,” NW]?” (Mat. 23:33) Ki Zezi ti oule dir par “Zeenn”?

4. Ler Zezi ti koz lo “Zeenn” ki sa ti vedir?

⁴ Zeenn ti en vale an deor bann miray ­Zerizalenm kot salte ek lekor bann zannimo mor ti ganny brile. Zezi ti servi Zeenn konman en senbol pour lanmor eternel. Son kestyon konsernan sov kondannasyon Zeenn ti ­montre ki sa bann sef relizye konman en group ti merit en destriksyon eternel.—Mat. 5:22, 29.

5. Ki mannyer listwar i konfirmen ki lavertisman Zan ek Zezi ti vin vre?

⁵ Pese bann sef relizye Zwif ti vin pli pir ler zot ti persekit Zezi ek son bann disip. Pli tar, parey Zan ek Zezi ti’n avertir, zour lakoler Bondye ti vini. Dan sa ka sa “pinisyon ki [ti] pou ariv lo zot” ti pou afekte zis en rezyon setadir Zerizalenm ek Zide. Alors i ti posib pour zot kapab sove dan sa vre sans. Zeova ti eksprim son lakoler lo zot ler Zerizalenm ek son tanp ti ganny detrir par bann larme Romen dan lannen 70 N.L. Sa “ladetres” ti pli terib ki okenn keksoz ki Zerizalenm ti’n deza eksperyanse. En kantite zot ti ganny touye oubyen egzile. I annan en lot destriksyon pli pir ankor ki pe esper bann ki pretann Kretyen ek bann dimoun dan lezot larelizyon.—Mat. 24:21, NW.

 Nou bezwen sov sa lakoler ki pe vini

6. Kwa ki ti konmans devlope dan premye kongregasyon Kretyen?

⁶ Parmi bann premye Kretyen ti annan serten ki ti vin aposta e i annan dimoun ki ti swiv zot. (Akt 20:29, 30) Ler bann zapot Zezi ti ankor vivan zot ti “pe met lobstak” kont lapostazi, me apre zot lanmor en kantite sekt ti devlope parmi bann ki ti’n rezet vre larelizyon Kretyen. Ozordi, i annan plizyer santenn larelizyon Kretyen e zot bann lansennyman i vreman diferan. Labib ti predir konsernan bann sef relizye Kretyen ki ti pou leve. Zot ti ganny dekrir konman en group ki ti ganny apele “sa Gran Rebel” e “sa Lennmi ki’n ganny destinen pour destriksyon” ki “Senyer Zezi pou touy li . . . e detri li par lekla son larive [oubyen “prezans,” NW].”—2 Tesa. 2:3, 6-8.

7. Akoz sa lekspresyon “sa Gran Rebel” i al byen avek bann sef relizye Kretyen?

⁷ Bann sef relizye Kretyen i bann rebel akoz zot in tronp plizyer milyon dimoun par promot bann lansennyman, lafet ek kondwit ki pa annakor avek Labib. Parey bann sef relizye ki Zezi ti kondannen, bann dimoun ozordi ki form parti avek “sa Lennmi ki’n ganny destinen pour destriksyon” pou ganny detrir san okenn lespwar pour ganny resisite. (2 Tesa. 1:6-9) Alors, ki pou arive avek bann dimoun ki’n ganny tronpe par sa bann sef relizye Kretyen ek bann sef relizye dan lezot fo larelizyon? Pour reponn sa kestyon, annou egzamin bann levennman ki ti arive apre destriksyon Zerizalenm dan lannen 607 A.N.L.

“Sove, kit Babilonn”

8, 9. (a) Ki mesaz profetik Zeremi ti annan pour bann Zwif ki ti an egzil Babilonn? (b) Apre ki bann Med ek Pers ti konkerir Babilonn, dan ki sans i ti posib pour sove?

⁸ Profet Zeremi ti predir destriksyon Zerizalenm ki ti arive dan lannen 607 A.N.L. I ti dir ki pep Bondye ti pou ganny anmennen an egzil me zot ti pou retourn dan zot pei natal apre “swasanndis an.” (Zer. 29:4, 10) Zeremi ti annan en mesaz enportan pour bann Zwif ki ti an egzil Babilonn, ki zot pa ti devret les zot ganny kontaminen avek fo larelizyon ki ti pe ganny pratike dan Babilonn. Alors, zot ti pou pare pour retourn Zerizalenm e reetablir sa vre ladorasyon kan sa letan ki Zeova ti’n fikse ti arive. Sa ti ariv deswit apre ki bann Med ek Pers ti konkerir Babilonn an 539 A.N.L. Lerwa Pers Siris 2 ti met an plas en Lalwa pour bann Zwif retournen e rebatir tanp Zeova dan Zerizalenm.—Ezra 1:1-4.

⁹ Plizyer milye Zwif ti sezi sa loportinite e ti retourn Zerizalenm. (Ezra 2:64-67) Par fer sa, zot ti pe akonplir sa lord dan profesi Zeremi ki dan zot ka, zot ti bezwen sove pour al dan en lot landrwa. (Lir Zeremi 51:6, 45, 50.) Tou depan sirkonstans ki zot ti ladan pa tou Zwif ki ti kapab fer sa gran vwayaz pour retourn Zerizalenm ek Zida. Bann ki ti reste Babilonn, parey  profet Danyel ki ti byen a laz, ti kapab ganny benediksyon Bondye osi lontan ki zot ti siport vre ladorasyon ki ti pe ganny pratike dan Zerizalenm e ki zot ti reste separe avek fo ladorasyon bann Babilonnyen.

10. Pour ki kalite “laksyon imoral” “Gran Babilonn” i responsab?

¹⁰ Ozordi, plizyer bilyon imen pe partisip dan diferan form ladorasyon ki ti konmans dan ansyen Babilonn. (Zen. 11:6-9) Konman en group, sa bann larelizyon i ganny apele “Gran Babilonn, manman tou bann prostitye ek tou bann laksyon imoral lo later.” (Rev. 17:5) I fer depi byen lontan ki fo larelizyon pe donn son sipor bann dirizan politik sa lemonn. Parmi “bann laksyon imoral” ki fo larelizyon i responsab, i sa kantite lager kot plizyer santenn milyon dimoun in ganny “touye lo later.” (Rev. 18:24) Anplis “laksyon imoral” i enkli bann aksyon pedofil ek lezot form imoralite seksyel ki’n ganny komet e tolere par bann sef relizye. Eski i etonan alor ki Zeova pou byento detrir tou fo larelizyon ki egziste lo later?—Rev. 18:8.

11. Anmezir ki zot pe esper destriksyon Gran Babilonn, ki responsabilite bann vre Kretyen i annan?

¹¹ Bann vre Kretyen ki okouran sa destriksyon, i annan sa responsabilite pour avertir bann dimoun ki form parti Gran Babilonn. En fason ki zot fer sa i par distribye bann Labib ek piblikasyon baze lo Labib ki ganny pibliye par “sa lesklav fidel e pridan,” ki Zezi ti apwente pour donn “manze [spirityel] kan i ler?” (Mat. 24:45, NW) Ler bann dimoun i demontre ki zot annan en lentere dan mesaz Labib, laranzman i ganny fer pour ed zot atraver en letid Labib. Fotespere zot pou vwar sa nesesite pour “sove, kit Babilonn” avan i tro tar.—Rev. 18:4.

Elwanny zot avek ladorasyon zidol

12. Ki mannyer Bondye i konsider ladorasyon zidol?

¹² En lot aksyon imoral ki komen dan Gran Babilonn i ladorasyon stati ek zidol. Bondye i apel zot “bann keksoz degoutan” ek “bann zidol sal.” (Det. 29:17) Tou sa ki anvi fer plezir Bondye i devret rezet idolatri par azir an armoni avek sa ki Bondye i dir: “Mwan Zeova. Sa i mon non; e mon pa pou donn mon laglwar personn, ni mon louanz avek bann zidol.”—Iza. 42:8.

13. Ki nou bezwen fer pour elwanny nou avek bann form idolatri ki pa fasil pour rekonnet?

¹³ Parol Bondye i osi revel bann form idolatri ki pa fasil pour rekonnet. Par egzanp, groker i ganny apele “ladorasyon zidol.” (Kol. 3:5) Groker i vedir anvi en keksoz ki’n ganny defann, par egzanp en keksoz ki pour en lot dimoun. (Egz. 20:17) Sa lanz ki ti vin Satan ti devlop sa dezir pour vin parey Bondye e pour ganny adore. (Lik 4:5-7) Sa ti fer li rebel kont Zeova e i ti tant Ev pour annan sa lanvi pour ganny en keksoz ki Bondye ti’n defann. Dan en sans, Adan osi ti komet idolatri akoz i ti les son dezir egois pour pa perdi son madanm pas avan lobeisans anver son Papa dan lesyel ki ranpli avek lanmour. De lot kot, tou sa ki oule ganny sove zour lakoler Bondye i devret ador zis li tousel e rezet tou sa bann kalite groker.

 “Elwanny zot avek bann pratik imoral”

14-16. (a) Akoz Zozef ti sitan en bon legzanp dan domenn moral? (b) Ki nou devret fer si nou annan bann move dezir seksyel? (c) Ki mannyer nou kapab reisi elwanny nou avek bann pratik imoral?

¹⁴ Lir 1 Korentyen 6:18. Ler madanm Potifar ti esey fer tou pour Zozef dormi avek li, Zozef ti taye. Pa Zozef in kit en bon legzanp pour bann Kretyen selibater ek bann Kretyen ki’n marye! I kler ki Zozef ti’n byen form son konsyans par bann levennman ki ti’n arive dan lepase ki ti fer li konn pwennvi Bondye lo limoralite. Si nou oule obeir sa lord pour “elwanny [nou] avek bann pratik imoral,” nou pou evite fer keksoz ki kapab fer nou annan bann dezir seksyel pour en lot dimoun apard sa dimoun ki nou’n marye avek. Labib i dir: “Met an-mor bann dezir materyel ki dan zot: limoralite seksyel, lenpirte, pasyon, move dezir, move dezir pour akapar keksoz dimoun, ki en form ladorasyon zidol. Sa bann move keksoz koumsa pou atir lakoler Bondye lo bann ki pa obei li.”—Kol. 3:5, 6.

¹⁵ Remarke ki Bondye pou byento demontre son “lakoler.” En kantite dimoun dan lemonn i devlop bann move dezir seksyel e sa i fer zot tonbe. Alors konman Kretyen nou bezwen priy Bondye pour ganny led son lespri sen pour pa les sa bann dezir seksyel degoutan kontrol nou. Deplis, etidye Labib, asiste bann renyon Kretyen e partaz sa bon nouvel avek nou prosen pou ed nou pour kontinyen “les Lespri diriz [nou] lavi.” Alors nou “pa [pou] satisfer bann dezir natir imen.”—Gal. 5:16.

¹⁶ Sirman, si nou get bann keksoz pornografi, nou pa pe “les Lespri diriz nou lavi.” Pareyman, tou Kretyen i bezwen evite lir, gete oubyen ekout bann keksoz ki eksit dezir seksyel. I mal osi pour ‘pep sen’ Bondye kontan fer okenn fars oubyen koz lo bann keksoz imoral antre zot. (Efe. 5:3, 4) Alors, nou pou montre nou Papa dan lesyel ki ranpli avek lanmour ki nou vreman anvi ganny sove zour son lakoler e viv dan sa nouvo lemonn kot pou annan lazistis.

Evite annan ‘lanmour pour larzan’

17, 18. Akoz nou devret evite annan ‘lanmour pour larzan’?

¹⁷ Dan premye let ki zapot Pol ti ekrir Timote, i ti met lanfaz lo bann prensip ki devret enfliyans bann lesklav ki ti Kretyen vi ki petet serten ti ekspekte benefisye lo plan materyel akoz zot met ti Kretyen. Lezot petet ti’n esey tir profi dan en fason egois par servi bann keksoz ki sen. Pol ti avertir sa bann Kretyen ki zot pa devret “krwar ki lafwa dan Bondye i en fason pour vin ris [lo plan materyel].” Rasin sa problenm ti petet akoz “lanmour larzan,” ki kapab annan en move lefe lo en dimoun ris oubyen pov.—1 Tim. 6:1, 2, 5, 9, 10.

¹⁸ Eski ou kapab mazin legzanp bann dimoun dan Labib ki zot relasyon avek Bondye ti gate akoz “lanmour larzan” oubyen lanmour pour keksoz ki kapab ganny aste me ki pa sitan enportan? (Zoz. 7:11, 21; 2 Rwa. 5:20, 25-27) Pol ti ankouraz Timote: “Fer tou ou posib pour atas ou avek lazistis, atas ou avek Bondye, . . . annan lanmour pour lezot ek perseverans e tret lezot avek [“ladouser,” NW].” (1 Tim. 6:11) I vreman enportan pour tou bann ki oule sirviv sa zour lakoler ki pe vini pour ekout sa konsey.

“Gard ou lekor kont sa bann pasyon lazenes”

19. Ki tou zenn i bezwen?

¹⁹ Lir Proverb 22:15. Bann sotiz ki dan leker en zenn i fasilman kapab anmenn li ver en move semen. En keksoz ki kapab ede pour lit kont sa tandans i disiplin ki baze lo Labib. Bokou zenn Kretyen ki zot paran pa Temwen Zeova i rod  bann prensip dan Labib e met li an aplikasyon dan zot lavi. Lezot i benefisye atraver bann konsey saz ki zot gannyen dan kongregasyon par bann Kretyen matir lo plan spirityel. Si nou obeir konsey ki baze lo Labib sorti kot nenport ki dimoun, sa i kapab rann nou ere konmela menm e osi dan lavenir.—Ebr. 12:8-11.

20. Ki mannyer bann zenn i kapab trouv led pour elwanny zot kont bann move dezir?

²⁰ Lir 2 Timote 2:20-22. Bokou zenn ki pa’n ganny sa bon disiplin in ganny enfliyanse dan bann move fason, par egzanp zot annan en lespri konpetisyon, groker, komet fornikasyon, kontan larzan e kontan anmize. Sa i reflekte “bann pasyon lazenes” ki Labib i ankouraz nou pour elwanny nou avek. Pour elwanny zot avek sa bann keksoz bann zenn Kretyen i bezwen evit bann move lenfliyans, nenport ki kote zot sorti. Sa konsey ki sorti dan Labib i vreman kapab ed nou pour devlop bann kalite Kretyen ‘ansanm avek bann ki kriy lo non Senyer avek en leker pir.’

21. Ki promes Zezi Kri ti fer konsernan son bann disip ki parey bann mouton?

²¹ Ki swa nou zenn oubyen vye, si nou refize pour ekout dimoun ki esey tronp nou, sa i montre ki nou oule ganny konsidere parmi bann disip Zezi ki oule “tay lwen avek . . . lavwa [“bann etranze,” NW].” (Zan 10:5) Me, pour ganny sove zour lakoler Bondye, nou bezwen fer plis ki zis elwanny nou avek bann keksoz danzere. Nou bezwen osi demontre bann kalite pozitif. Nou pou egzamin set parmi sa bann kalite dan sa lot lartik. Nou annan bann bon rezon pour egzamin zot o profon akoz Zezi i fer sa promes merveye: “Mon donn [mon bann mouton] lavi eternel, zot pa pou zanmen mor, e personn pa pou zanmen aras mwan zot.”—Zan 10:28.

Ki ou pou reponn?

• Ki lavertisman Zezi ti donn bann sef relizye?

• Ki sitiasyon danzere plizyer milyon dimoun pe fer fas avek ozordi?

• Ki kalite ladorasyon ki difisil pour rekonnet nou bezwen evite?

[Kestyon]

[Portre lo paz 16-17]

Kwa ki vin dan ou lespri ler ou tann sa mo “sove” oubyen taye?