Fer fas avek sagrinasyon

“Tou . . . bann garson [Zakob] ek tou son bann fiy ti vin konsol li, me i ti refize ganny konsole. ‘Non,’ i ti dir,‘ dan dey mon pou desann dan latonm kot mon garson.’ Alors son papa ti plere pour li.”—Zenez 37:35, The Holy Bible—New International Version.

ZAKOB ti dan en gran sagrinasyon akoz i ti’n perdi son garson. I ti ekspekte ki i ti pou dan sagrinasyon ziska son lanmor. Parey Zakob, sa douler ki ou kapab santi ler ou perdi en dimoun ki ou kontan i telman for ki ou mazinen i pa pou zanmen ale. Eski en sagrinasyon koumsa i neseserman vedir ki ou napa lafwa dan Bondye? Sa i pa ditou leka!

Labib i dekrir Zakob konman en zonm ki ti annan lafwa. Ansanm avek son granpapa Abraam ek son papa Izaak, Zakob ti ganny felisite pour son lafwa remarkab. (Ebre 11:8, 9, 13) Sa i akoz en fwa i ti menm lager tou lannwit avek en lanz pour li ganny en benediksyon sorti kot Bondye. (Zenez 32:24-30) I kler ki Zakob ti en zonm vreman spirityel. Alor, ki nou kapab aprann atraver sagrinasyon Zakob? Sa gran sagrinasyon ek latristes ki nou santi ler en dimoun ki nou kontan i mor, pa vedir ki nou napa en lafwa for dan Bondye. I toutafe normal e natirel pour sagrinen ler en dimoun ki nou kontan i mor.

Ki si sa sagrinasyon?

Sagrinasyon i kapab afekte nou dan diferan fason, me pour bokou dimoun sa santiman pli  for i sa profon douler ki zot resanti. Annou pran legzanp Leonardo ki ti perdi son papa ki ti mor sibit avek en problenm leker ek respiratwar ler i ti annan 14 an. Leonardo pa pou zanmen oubliy sa zour ler son tantin ti anons li sa nouvel. Premye kou i pa ti oule krwar ki sa ti vre. Kantmenm i ti vwar lekor son papa kot ­lanterman, pour li sa ti paret vreman drol konmsi son papa pa ti’n mor. Pour apepre sis mwan Leonardo pa ti kapab plere. Souvan i ti vwar li pe esper son papa pour antre kot lakour apre travay. I ti pran apepre enn an avan ki i ti vreman konpran ki son papa ti’n mor. Kan sa ti arive, i ti vreman santi li tousel. Bann keksoz labitid tel parey antre kot li e pa trouv personn kot lakaz ti fer li mazinen ki son papa ti nepli la. Dan bann moman koumsa, i ti souvan plere akoz i ti nepli kapab tenir vi ki i ti mank son papa en kantite.

Parey leksperyans Leonardo i montre, sagrinasyon i kapab profon. En keksoz ki byen pour konnen se ki i posib pour nou rekipere. Me sa i kapab pran en pe letan. Zis parey i pran letan pour en gro blesir geri, pareyman i pran letan pour rekipere apre lanmor en dimoun ki nou kontan. I kapab pran plizyer mwan, lannen oubyen menm plis letan ki sa, avan ki sa dimoun i rekipere. Me sa profon douler ki ou ti santi o konmansman pour diminyen avek letan e dousman dousman lavi pou paret mwen tris e annan plis sans.

Me an atandan, sagrinasyon i en letap neseser avan ki ou revin byen e osi pour aprann adapte avek sa nouvo sitiasyon. Aprezan dan ou lavi i annan en gran vid kot avan ti annan en dimoun vivan. Ou bezwen adapte ou lavi pour viv san sa dimoun. Sagrinasyon i kapab ed ou pour eksprim ou santiman. Byensir, sak dimoun i eksprim son sagrinasyon dan en fason diferan. Me en keksoz ki vre se: Si en dimoun i evite eksprim son sagrinasyon sa i kapab fer li ditor mantalman, emosyonnelman e fizikman. Alors, ki mannyer ou kapab eksprim ou sagrinasyon dan bann bon fason? I annan serten konsey dan Labib ki ou kapab aplike.

Fer fas avek sagrinasyon

En kantite dimoun ki dan dey in vwar ki koz avek lezot in ede pour eksprim sa ki zot santi. Par egzanp remark parol Zob, en personnaz dan Labib ki ti soufer akoz lanmor son dis zanfan e ki ti andir lezot maler ankor. I ti dir: “Wi, mon’n degout mon lavi. Mon pou eksprim konsernan mon lenkyetid. Mon pou koz lo sagrinasyon ki mon ladan.” (Zob 1:2, 18, 19; 10:1) Remarke ki Zob ti bezwen “eksprim” son lenkyetid. Ki mannyer i ti pou fer sa? I ti dir: ‘Mon pou koze.’

Paulo, ki ti perdi son manman ti dir: “En keksoz ki ti ed mwan i lefet ki mon ti koz lo mon manman.” Alor, lefet ki ou koz lo sa ki ou santi avek en zanmi ki ou annan konfyans ladan i kapab donn ou en pe rekonfor. (Proverb 17:17) Apre ki i ti perdi son manman Yone ti demann son bann frer ek ser Kretyen pour rann li vizit en pe pli souvan. I ti dir: “Lefet ki mon ti koze sa ti ede pour apez mon douler.” Ou osi ou kapab pas atraver sa menm leksperyans si ou koz konsernan sa ki ou pe santi e i pou pli fasil pour  eksprim ou bann santiman ler ou fer li avek en dimoun ki pare pour ekoute.

Ekrir i en bon fason pour eksprim ou sagrinasyon. Pour sa ki vwar li difisil pour koz konsernan zot santiman i kapab vwar li pli fasil pour eksprim zot par ekrir. Apre ki Sail ek Yonatann ti mor, David en zonm fidel ti ekrir en sanson vreman tris kot i ti eksprim son latristes. Finalman sa sanson tris ti form parti sa Dezyenm liv Samyel ki dan Labib.—2 Samyel 1:17–27.

Plere osi i kapab ede pour eksprim ou sagrinasyon. Labib i dir: “I annan en letan apropriye pour tou keksoz, menm . . . en letan pour plere.” (Eklezyast 3:1, 4) Sertennman, lanmor en dimoun ki nou kontan i “en letan pour plere.” Napa nanryen mal pour plere akoz sagrinasyon. I annan en kantite legzanp dan Labib konsernan bann msye ek madanm fidel ki ti plere devan lezot pour eksprim zot sagrinasyon. (Zenez 23:2; 2 Samyel 1:11, 12) Zezi Kri “ti plere” ler i ti pe apros tonbo son bon zanmi Lazar ki ti’n fek mor.—Zan 11:33, 35.

I demann pasyans pour fer fas avek sagrinasyon, ou kapab santi ki ou leta emosyonnel i sanz vitman. Pa bliye ki ou pa devret onte pour plere. En kantite dimoun fidel in vwar ki plere akoz sagrinasyon i normal e neseser pour revin byen.

Apros avek Zeova

Labib i dir nou: “Apros avek Bondye, e i ava apros avek zot.” (Zak 4:8) En premye fason pour apros avek Bondye se atraver lapriyer. Pa souzestim son valer! Labib i fer sa promes ki donn rekonfor: “Zeova i pre avek sa bann ki annan leker brize; e i sov bann ki zot lespri i fatige.” (Psonm 34:18) I osi asir nou: “Larg ou fardo lo Zeova li menm, e li i pou soutenir ou.” (Psonm 55:22) Mazin lo la. Parey nou ti fer remarke pli boner, en kantite dimoun in vwar ki ler zot koz konsernan zot santiman avek en zanmi ki zot annan konfyans sa in ede. Eski pa i pou pli benefisye ou si ou devid tou sa ki lo ou leker avek sa Bondye ki’n promet pour konsol ou leker?—2 Tesalonisyen 2:16, 17.

 Paulo, ki’n ganny mansyonnen pli boner ti dir: “Kan mon ti nepli kapab siport sa douler e santi ki mon pa ti kapab fer fas avek sa sitiasyon, mon ti tonm azenou e priy Bondye. Mon ti sipliy li pour ed mwan.” Paulo ti annan sa konviksyon ki son lapriyer ti ed li. Ou osi ou kapab trouv larepons pour ou bann lapriyer ki ou fer avek perseverans, “Bondye ki touzour donn konsolasyon” pou donn ou lafors ek kouraz pour andire.—2 Korentyen 1:3, 4; Romen 12:12.

Lespwar rezireksyon

Zezi ti dir: “Mwanmenm, larezireksyon ek lavi, sa ki krwar dan mwan, menm si i a’n mor, i pou viv.” (Zan 11:25) Labib i ansennyen ki bann dimoun ki mor pour reviv ankor. * Ler Zezi ti lo later i ti demontre ki i kapab resisit bann mor. En fwa, i ti resisit en pti fiy ki ti annan 12 an. Ki mannyer son paran ti reakte? Zot “ti dan en gran letonnman.” (Mark 5:42) Anba dominasyon son Rwayonm, Zezi sa Lerwa ki dan lesyel pou resisit en gran kantite dimoun ki pou viv lo later, me dan kondisyon kot pou annan lape ek lazistis. (Akt 24:15; 2 Pyer 3:13) Zis mazin sa gran lazwa ler bann dimoun ki’n mor i retourn vivan e rezwenn bann ki zot ti kontan!

Claudete, ki ti perdi son garson dan en aksidan avyon i met portre son garson Renato lo so fridz. I souvan get sa portre e dir dan li menm: ‘Nou pou zwenn ankor, zour rezireksyon.’ Leonardo i mazin sa letan ler son papa pou retourn vivan dan sa nouvo lemonn ki Bondye in promet. Wi, lespwar rezireksyon i vreman en sours rekonfor pour zot e pour en kantite lezot dimoun ankor ki’n perdi dimoun ki zot kontan dan lanmor. Ou osi ou kapab annan sa lespwar.

[Not anba lo paz]

 [Bwat lo paz 7]

Rekonfort lezot

“[Bondye] i konsol nou dan nou bann soufrans pour ki nou osi nou a kapab konsol tou bann ki dan soufrans, par sa konsolasyon ki nou menm nou’n gannyen avek li.”—2 Korentyen 1:4.

En kantite Kretyen in eksperyans personnelman sinifikasyon sa bann parol. Lefet ki zot ti ganny konsole pour fer fas avek sa sitiasyon ler zot ti perdi en dimoun ki zot kontan, zot ti pli byen kapab ankouraz e rekonfort lezot.

Annou pran legzanp Claudete, ki ti regilyerman rann vizit lezot pour partaz son krwayans baze lo Labib. Avan ki i ti perdi son garson, i ti pe vizit en madanm ki son garson ti’n mor avek kanser disan. Sa madanm ti apresye sa bann vizit, me i ti santi ki Claudete pa ti pou zanmen vreman konpran son soufrans. Me, pa tro lontan apre lanmor garson Claudete, sa madanm ti rann Claudete en vizit e i ti dir li ki i ti’n vin vwar si i ti touzour annan lafwa dan son Bondye aprezan ki li menm in perdi son garson. Sa madanm ti enpresyonnen par lafwa for ki Claudete ti annan, aprezan i pe etidye Labib regilyerman avek Claudete e pe ganny en kantite rekonfor dan Parol Bondye.

Apre ki Leonardo ti perdi son papa, i ti deside pour aprann langaz siny pour li kapab partaz sa mesaz rekonfortan sorti dan Labib avek bann dimoun ki sourd. I ti vwar ki son zefor pour ed bann dimoun ki sourd ti vreman benefisye li en kantite. I ti dir: “En keksoz ki’n ed mwan pour fer fas avek mon sagrinasyon i mon dezir pour ed bann dimoun sourd aprann konsernan Bondye. Mon’n depans en kantite letan ek lenerzi pour ed zot. Mon santiman sagrinasyon ti ganny ranplase par lazwa ler mon ti vwar mon premye etidyan Labib batize. An realite, i ti sa premye fwa ki mon ti vreman santi mon ere depi ki mon papa in mor.”—Akt 20:35.

[Portre lo paz 4]

Koz konsernan ou santiman i kapab donn ou en pe rekonfor

[Portre lo paz 5]

Ekrir i kapab ed ou pour eksprim ou sagrinasyon

[Portre lo paz 5]

Lir konsernan lespwar rezireksyon i kapab vreman vin en sours rekonfor pour ou

[Portre lo paz 6]

Zezi ti promet ki pou annan en rezireksyon pour sa ki annan lafwa dan li