Eski ou pre pour montre respe pour lezot?
Eski ou pre pour montre respe pour lezot?
“Setaki montre plis respe pour kanmarad.”—ROM. 12:10.
1. Dan plizyer pei, ki labitid dimoun i nepli annan?
DAN serten parti lemonn, i en koutim ki bann zenn i azenou dan en fason respektab kan zot parmi bann adilt pour montre respe anver zot. Zot fer sa pour zot pa paret pli gran ki sa bann ki pli aze ki zot. Dan sa bann kominote, si en zenn i vir son ledo avek en adilt sa i ganny konsidere konman en mank respe pour li. Kantmenm i annan diferan fason pour montre respe dan diferan kiltir, sa bann fason pour fer li i fer nou rapel Lalwa Moiz. Sa ti enkli sa komannman: “Devan seve blan ou devret leve [avek respe], e ou merit montre konsiderasyon pour en vye dimoun.” (Lev. 19:32) Malerezman, dan en kantite pei, dimoun in perdi sa labitid pour demontre respe anver lezot. Anfet, ozordi nou kapab vwar partou ki dimoun i mank respe pour lezot.
2. Dapre Parol Bondye, lekel ki nou ganny demande pour respekte?
2 Parol Bondye i montre ki i vreman enportan pour montre respe anver lezot. I demann nou pour respekte Zeova ek Zezi. (Zan 5:23) I osi demann nou pour respekte nou fanmir, nou bann frer ek ser Kretyen osi byen ki dimoun ki pa manm kongregasyon. (Rom. 12:10; Efe. 6:1, 2; 1 Pyer 2:17) Ki serten fason nou montre ki nou annan respe pour Zeova? Ki mannyer nou rann loner setadir montre respe anver nou bann frer ek ser Kretyen? Annou egzamin sa bann kestyon e osi lezot kestyon ki relye avek.
Onor Zeova ek Son non
3. Nonm en fason enportan ki nou kapab onor Zeova.
3 En fason enportan pour onor Zeova i par annan en respe apropriye pour son non. Apre tou, nou “en pep pour son non.” (Akt 15:14) I vreman en loner pour port non sa Bondye tou pwisan, Zeova. Profet Mika ti dir: “Tou bann pep zot, zot pou mars sakenn onon zot bondye, me nou, nou pou mars onon nou Bondye Zeova pour en letan endefini, wi pour touzour.” (Mik. 4:5) Nou “mars onon nou Bondye Zeova” kan nou fer bokou zefor sak zour pour viv dan en fason ki anmenn loner pour Zeova e montre respe pour son non. Parey Pol ti rapel bann Kretyen Ronm, si nou pa viv an armoni avek sa bon nouvel ki nou prese, lezot dimoun pou “koz kont” non Bondye oubyen sali Son repitasyon.—Rom. 2:21-24.
4. Ki mannyer ou konsider sa privilez pour koz lo Zeova?
4 Nou osi onor Zeova par sa travay predikasyon. Dan lepase, Zeova ti envit nasyon Izrael pour vin son bann temwen, me zot pa ti reisi akonplir sa rol. (Iza. 43:1-12) Zot ti souvan rebel kont Zeova e “fer soufer sa Enn ki Sen dan Izrael.” (Ps. 78:40, 41) Finalman, sa nasyon ti konpletman perdi laprouvasyon Zeova. Parkont, nou rekonesan ki ozordi nou annan sa privilez pour koz konsernan Zeova e fer lezot konn son non. Nou fer sa akoz nou kontan li e nou vreman anvi ki son non i ganny sanktifye. La ki nou konn laverite lo nou Papa dan lesyel ensi ki son plan, eski nou pou aret koz lo li? Nou santi parey zapot Pol kan i ti dir: “Mon trouv mwan dan lobligasyon. Maler pour mwan si mon pa anons Levanzil!”—1 Kor. 9:16.
5. Ki mannyer nou lafwa dan Zeova i relye avek respe ki nou annan pour li?
5 Psalmis David ti dir: “Sa bann ki konn ou non pou met konfyans dan ou, akoz bann ki rod ou O Zeova, sirman ou pa pou kit zot.” (Ps. 9:10) Si nou vreman konn Zeova e montre respe pour sa ki son non i reprezante, nou pou annan konfyans dan li zis parey son bann serviter fidel dan lepase. Konfyans ek lafwa ki nou annan dan Zeova i en lot fason pour demontre respe ek loner anver li. Remarke ki mannyer Parol Bondye i relye konfyans ki nou annan dan Zeova ek respe ki nou annan pour li. Dan lepase, kan nasyon Izrael pa ti reisi annan konfyans dan Zeova, I ti demann Moiz: “Pour konbyen letan sa pep pa pou respe mwan, e pour konbyen letan zot pa pou met lafwa dan mwan pour tou sa bann siny ki mon’n fer parmi zot?” (Nom. 14:11) Lekontrer i osi vre. Ler nou annan konfyans ki Zeova pou protez e soutenir nou menm dan bann leprev, nou montre ki nou annan respe pour li.
6. Kwa ki pous nou pour montre en profon respe pour Zeova?
6 Zezi ti montre ki respe pour Zeova i devret sorti dan leker. Ler i ti pe koz avek bann ki pa ti senser dan zot ladorasyon, Zezi ti sit sa ki Zeova ti dir: “Sa pep, i onor mwan avek zot labous, Me zot leker i lwen avek mwan.” (Mat. 15:8) Sa respe senser ki nou annan pour Zeova i sorti dan en leker ranpli avek lanmour pour li. (1 Zan 5:3) Nou osi gard antet sa promes Zeova: “Mon rann loner sa bann ki fer mwan loner.”—1 Sam. 2:30.
Bann sirveyan dan kongregasyon i respekte lezot
7. (a) Akoz bann frer ki annan responsabilite dan kongregasyon i devret montre respe anver bann frer ek ser ki anba zot sirveyans? (b) Ki mannyer Pol ti montre respe anver son bann frer ek ser Kretyen?
7 Zapot Pol ti donn sa konsey son bann frer ek ser Kretyen: “Setaki montre plis respe pour kanmarad.” (Rom. 12:10) Bann frer ki annan responsabilite dan kongregasyon i devret donn legzanp setadir touzour premye pour montre respe anver sa bann ki anba zot sirveyans. Bann frer ki annan bann gro responsabilite dan sa domenn i devret swiv legzanp ki Pol in kite. (Lir 1 Tesalonisyen 2:7, 8.) Bann frer dan bann kongregasyon ki Pol ti vizite ti konnen ki Pol pa ti pou zanmen demann zot pour fer keksoz ki li menm pa ti pou fer. Pol ti montre respe anver son bann frer ek ser Kretyen e an retour zot ti respekte li. Nou kapab asire ki kan Pol ti dir: “Mon sipliy zot, imit mwan,” en kantite dimoun ti pare pour imit li akoz son bon legzanp.—1 Kor. 4:16.
8. (a) Dan ki fason Zezi ti montre respe pour son bann disip? (b) Ki mannyer bann sirveyan i kapab swiv legzanp Zezi ozordi?
8 En frer ki annan responsabilite i kapab osi montre respe pour bann ki anba son sirveyans par eksplik zot rezon akoz i pe demann zot pour fer en keksoz spesifik oubyen donn serten konsey. Ler i fer sa, i pe imit Zezi. Par egzanp, ler i ti demann son bann disip pour priye ki plis zouvriye i ganny anvoye pour fer rekolt, Zezi ti eksplik zot akoz. I ti dir: “I annan en gran rekolt ki’n pare me napa ase zouvriye. Pour sa rezon sipliy met rekolt pour anvoy zouvriye.” (Mat. 9:37, 38; Nou ki’n met an italik.) Pareyman, ler i ti demann son bann disip pour kontinyen “veye,” i ti donn zot en rezon pour fer li. I ti dir: “Akoz zot pa konnen ki zour zot Senyer pou vini.” (Mat. 24:42; Nou ki’n met an italik.) Souvan, Zezi pa ti zis dir son bann disip ki zot ti devret fer, me i ti osi dir zot akoz zot devret fer li. Dan sa fason i ti montre respe ek loner anver zot. Pa sa i en bon legzanp pour bann sirveyan Kretyen swiv!
Respekte kongregasyon Zeova ek son gidans
9. Nou montre respe anver lekel kan nou annan respe pour kongregasyon dan lemonn antye ek son bann reprezantan? Eksplike.
9 Pour onor Zeova, nou osi bezwen annan respe pour kongregasyon dan lemonn antye ensi ki son bann reprezantan. Ler nou swiv bann konsey Labib sorti kot lesklav fidel e pridan, nou montre ki nou respekte laranzman Zeova. Zapot Zan ti vwar sa nesesite pour eksprim son mekontantman anver bann Kretyen dan premye syek ki ti montre en mank respe pour sa bann ki ti’n ganny apwente dan kongregasyon. (Lir 3 Zan 9-11.) Bann parol ki Zan ti dir i montre ki serten pa ti zis montre ki zot ti vreman napa respe pour sa bann sirveyan me osi pour zot lansennyman ek gidans. Erezman, laplipar Kretyen pa ti koumsa. Tan ki bann zapot ti vivan, bann frer ek ser dan sa letan ti montre en profon respe pour sa bann sirveyan.—Fili. 2:12.
10, 11. Par servi Labib, eksplike akoz i byen pour serten annan lotorite dan kongregasyon.
10 Dapre sa ki Zezi ti dir avek son bann disip: “Zot tou zot frer,” serten in tonm lo sa konklizyon ki personn pa devret annan okenn lotorite dan kongregasyon. (Mat. 23:8) Me, dan Lekritir Ebre ek Grek i annan plizyer legzanp kot bann zonm ti servi lotorite ki Bondye ti’n donn zot. Listwar bann patrias, ziz ek lerwa parmi bann Ebre ki ti viv dan lepase i donn ase levidans ki Zeova i donn gidans atraver bann reprezantan imen. Ler bann dimoun pa ti respekte sa bann ki Bondye ti’n apwente, Zeova ti disiplin zot.—2 Rwa. 1:2-17; 2:19, 23, 24.
11 Pareyman, bann Kretyen dan premye syek ti rekonnet lotorite bann zapot. (Akt 2:42) Par egzanp Pol ti donn lenstriksyon son bann frer. (1 Kor. 16:1; 1 Tesa. 4:2) Me an menm tan, li osi i ti soumet volonterman avek sa bann ki ti annan lotorite lo li. (Akt 15:22; Gal. 2:9, 10) Pol ti vreman annan en bon pwennvi lo lotorite dan kongregasyon.
12. Ki sa de leson nou kapab aprann konsernan lotorite dapre bann legzanp ki ganny trouve dan Labib?
12 I annan de leson ki nou kapab aprann. Premyerman, ‘lesklav fidel e pridan’ ki ganny reprezante par son Konsey Direkter i azir an armoni avek Labib kan i apwent bann frer pour desarz bann responsabilite. Serten frer i ganny apwente pour annan lotorite lo lezot frer ki annan responsabilite. (Mat. 24:45-47; 1 Pyer 5:1-3) Dezyenmman, nou tou enkli bann frer ki’n ganny apwente, nou devret onor sa bann ki annan lotorite lo nou. Alor, ki mannyer nou kapab onor bann sirveyan dan kongregasyon dan en fason pratik?
Montre respe anver bann sirveyan rezyonal e distrik
13. Ki mannyer nou kapab montre respe anver bann sirveyan kongregasyon ozordi?
13 Pol ti dir: “Mon bann frer mon demann zot pour respekte bann ki travay [dir] parmi zot, bann ki annan responsabilite pour diriz zot e ansenny zot. Montre ki zot estim sa bann frer e kontan zot bokou akoz travay ki zot pe fer. Viv byen an-pe antre zot.” (1 Tesa. 5:12, 13) Sirman bann sirveyan rezyonal e distrik i parmi ‘bann ki travay dir.’ Alors, annou “montre ki [nou] estim sa bann frer.” En fason pour fer sa, i ler nou aksepte avek tou nou leker konsey ek lankourazman ki zot donn nou. Ler en sirveyan rezyonal oubyen distrik i donn nou lenstriksyon sorti kot lesklav fidel e pridan, sa “lasazes ki sorti dan lesyel” pou fer nou ‘pare pour obeir.’—Zak 3:17.
14. Ki mannyer kongregasyon i montre ki i vreman annan respe pour sirveyan rezyonal ek distrik e ki rezilta sa i anmennen?
14 Me ki nou pou fer si nou ganny demande pour fer keksoz dan en fason ki diferan avek sa ki nou abitye fer? Pour montre respe nou bezwen parfwa lalit avek sa lanvi pour rezet konsey, petet par annan sa kalite pwennvi: “Nou pa fer keksoz koumsa isi” oubyen “Petet sa i mars byen dan lezot landrwa me pa dan nou kongregasyon.” Olye mazin koumsa, nou pou fer zefor pour swiv sa konsey. Nou pou arive fer sa pli fasilman, si nou gard antet ki kongregasyon i pour Zeova e Zezi ki Sef. Kan konsey en sirveyan rezyonal oubyen distrik i ganny aksepte avek lazwa e ganny aplike par kongregasyon, sa i montre sa respe senser. Zapot Pol ti felisit bann frer Korent pour lobeisans ranpli avek respe ki zot ti montre anver lenstriksyon ki Tit ti donnen kan i ti pe vizit zot. (2 Kor. 7:13-16) Pareyman, ozordi nou kapab asire ki ler nou pare pour aplik konsey ki nou resevwar sorti kot sirveyan rezyonal oubyen distrik nou eksperyans bokou lazwa dan nou travay predikasyon.—Lir 2 Korentyen 13:11.
“Respekte tou dimoun”
15. Ki serten fason nou kapab montre respe pour nou bann frer ek ser Kretyen?
15 Pol ti ekrir: “Pa bezwen koz dir avek en vyeyar, me koz avek li konmsi ou pe koz avek ou papa. Tret bann zenn zan konman frer, bann vye madanm konman ou manman, e bann zenn madanm konman ou bann ser, avek bokou respe e avek pirte. Okip avek respe bann vev ki vreman vev.” (1 Tim. 5:1-3) Wi, Parol Bondye i ankouraz nou pour respekte tou dimoun dan kongregasyon. Me, ki nou pou fer si nou ganny en problenm avek en frer oubyen ser Kretyen? Eski sa pou anpes ou montre respe anver li? Oubyen eski ou kapab sanz ou latitid e rekonnet bann bon kalite Kretyen ki sa serviter Bondye i annan? Bann ki annan lotorite i devret montre ki zot respekte bann frer ek ser e “pa domin lo . . . troupo.” (1 Pyer 5:3) Wi vreman, nou annan en kantite loportinite pour demontre respe anver kanmarad dan kongregasyon ki ganny idantifye par sa lanmour ki egziste parmi son bann manm.—Lir Zan 13:34, 35.
16, 17. (a) Akoz i enportan pour pa respe zis bann ki nou pres avek me osi nou bann adverser? (b) Ki mannyer nou kapab “respekte tou dimoun”?
16 Byensir, nou pa demontre respe zis pour bann ki form parti kongregasyon. Pol ti ekrir bann Kretyen dan son letan: “Pandan ki nou annan lokasyon, annou fer dibyen tou dimoun.” (Gal. 6:10) I vre ki i kapab difisil pour aplik sa prensip si en koleg travay oubyen kanmarad lekol i azir dan en fason dir anver nou. Dan bann moman koumsa, nou bezwen mazin sa bann parol: “Pa bezwen ankoler akoz bann ki fer sa ki mal.” (Ps. 37:1) Par aplik sa konsey sa pou ed nou pour kontinyen azir avek respe menm anver bann ki opoz nou. Pareyman, pandan ki nou pe prese, si nou napa en tro gran lopinyon lo nou menm, nou pou kapab reponn tou dimoun avek “labonte ek respe.” (1 Pyer 3:16) Menm nou laparans ek nou fason sanze i kapab montre si nou respekte bann ki nou pe pres avek.
17 Alors, ki swa dan nou relasyon avek nou bann frer ek ser Kretyen oubyen avek lezot an deor kongregasyon, nou oule fer bokou zefor pour aplik sa konsey: “Respekte tou dimoun, kontan zot bann frer dan lafwa, annan reverans pour Bondye e respe pour lerwa.”—1 Pyer 2:17.
Ki ou pou reponn?
Ki mannyer ou kapab demontre en respe apropriye pour:
• Zeova?
• Bann ansyen dan kongregasyon ek bann sirveyan rezyonal e distrik?
• Sak manm dan kongregasyon?
• Bann ki ou pres avek?
[Kestyon]
[Portre lo paz 23]
Bann Kretyen dan premye syek ti respekte sa konsey direkter ki ti annan responsabilite pour dirize
[Portre lo paz 24]
Bann ansyen partou dan lemonn i respekte bann sirveyan rezyonal ek distrik ki ganny apwente par Konsey Direkter