Eski parol Zezi i annan lefe lo ou lapriyer
Eski parol Zezi i annan lefe lo ou lapriyer
“Kan Zezi ti’n fini dir zot sa bann keksoz lafoul ti byen etonnen par mannyer ki i ti ansennyen.”—MAT. 7:28.
1, 2. Akoz lafoul ti etonnen par lafason Zezi ti ansennyen?
NOU devret aksepte parol Zezi Kri, sa sel Garson Bondye e aplik li dan nou lavi. Sirman i pa ti koz parey lezot dimoun. Bann dimoun ti enpresyonnen par lafason ki i ti ansennyen dan sa Sermon lo Montanny.—Lir Matye 7:28, 29.
2 Garson Zeova pa ti ansenny parey bann profeser lalwa ki zot bann gran gran diskour ti baze lo lansennyman bann imen enparfe. Kris ti ansenny “avek lotorite” akoz sa ki i ti dir ti sorti kot Bondye. (Zan 12:50) Alor annou vwar ki mannyer lezot parol Zezi dan sa Sermon lo Montanny i kapab e devret annan lefe lo nou lapriyer.
Pa zanmen priy parey bann ipokrit i fer
3. An bref rakont sa ki Zezi ti dir dan Matye 6:5.
3 Lapriyer i en laspe enportan dan vre ladorasyon e nou devret priy Zeova regilyerman. Me parol Zezi dan son Sermon lo Montanny i devret annan lefe lo nou lapriyer. I ti dir: “Kan zot priye, pa fer parey bann ipokrit: Zot kontan priy an debout dan sinagog [e] dan kwen semen pour tou dimoun [v]war zot. An verite mon dir zot, sa bann dimoun in deza ganny zot rekonpans.”—Mat. 6:5.
4-6. (a) Akoz bann Farizyen ti kontan priy “an debout dan sinagog [e] dan kwen semen”? (b) Dan ki sans sa bann ipokrit ti pe “deza ganny zot rekonpans”?
4 Kan zot priye, bann disip Zezi pa ti devret imit “bann ipokrit” parey bann Farizyen ki ti krwar zot tro zis e ki ti esey anbet lezot par fer krwar ki zot ti bann dimoun byen relizye. (Mat. 23:13-32) Sa bann ipokrit ti kontan priy “an debout dan sinagog [e] dan kwen semen.” Akoz? “Pour tou dimoun [v]war zot.” Bann Zwif dan premye syek ti abitye priye konman en kongregasyon ler lofrann brile ti ganny ofer kot tanp (apepre ne-v-er dan bomaten e trwa-z-er lo apremidi). Plizyer zabitan Zerizalenm ti priye ansanm avek en lafoul adorater kot tanp. An deor sa lavil, bann Zwif devoue ti souvan priy de fwa par zour “an debout dan sinagog.”—Konpar Lik 18:11, 13.
5 Vi ki laplipar dimoun pa ti pros avek tanp ouswa sinagog pour bann lapriyer ki nou fek mansyonnen, zot ti kapab priye nenport ki kote zot ti ete sa letan. Serten ti fer sir ki kan ti’n ariv ler pour priye, zot ti “dan kwen semen.” Zot ti anvi ki bann dimoun ki ti pas dan sa kwen ti “[v]war zot.” Sa bann relizye ipokrit ti “fer sanblan fer long lapriyer” pour ki bann obzervater ti pou admir zot. (Lik 20:47) Nou pa devret annan sa kalite latitid.
6 Zezi ti dir ki sa bann ipokrit ti pe “deza ganny zot rekonpans.” Zot ti vreman anvi ganny rekonnet e loue avek lezot dimoun e se tou ki zot ti pou gannyen. Sa ti tou zot rekonpans akoz Zeova pa ti pou reponn zot bann lapriyer ipokrit. De lot kote, Bondye pou reponn lapriyer bann vre disip Kris parey i ganny montre dan lezot parol Zezi lo sa size.
7. Ki sa konsey “antre dan ou lasanm” pour priye i vedir?
7 “Me ou, ler ou priye, antre dan ou lasanm, ferm laport e priy ou Papa la dan sa landrwa sekre; e ou Papa ki [v]war sa ki ou fer an sekre i a rekonpans ou.” (Mat. 6:6) Konsey Zezi pour priy an prive dan en lasanm avek laport fermen pa vedir ki en dimoun pa kapab reprezant kongregasyon dan lapriyer. Sa konsey ti pe dekouraz bann lapriyer ki ti ganny fer an piblik zis pour ganny latansyon oubyen ganny loue avek lezot dimoun. Nou devret rapel sa si nou ganny sa privilez pour reprezant pep Bondye dan lapriyer. Annou obeir osi lezot konsey ki Zezi ti donnen an rapor avek lapriyer.
8. Dapre Matye 6:7, ki move fason pour priye nou devret evite?
8 “Kan zot priye, pa servi en kantite parol parey bann payen: zot krwar ki Bondye i ekout zot si zot koz en kantite.” (Mat. 6:7) Zezi ti mansyonn repetisyon konman en fason ki pa apropriye pour priye. I pa ti pe dir ki nou pa devret zanmen repet bann demann senser e eksprim nou remersiman dan lapriyer. Dan zarden Zetsemane, lannwit avan son lanmor, Zezi ti repet “menm parol” dan lapriyer.—Mark 14:32-39.
9, 10. Dan ki sans nou pa devret repet nou lapriyer?
9 I pou mal pour nou imit lapriyer “bann payen” kot zot zis repet menm keksoz. Zot “servi en kantite parol” savedir zot repet bann fraz ki zot in aprann parker, ki souvan i enplik bann mo ki pa neseser. I pa ti vo lapenn pour bann adorater Baal enplor non zot fo bondye “depi bomaten ziska midi an dizan: ‘O Baal, reponn nou!’” (1 Rwa. 18:26) Plizyer dimoun ozordi i fer bann gran gran lapriyer e repet li an krwayan ‘Bondye pou ekout zot.’ Me Zezi i ed nou pour konpran ki “koz en kantite” dan bann gran lapriyer kot nou zis repete, napa okenn valer devan Zeova. Deplis i ti dir:
10 “Pa imit zot, parski Bondye zot Papa i konnen sa ki zot bezwen avan menm ki zot demann li.” (Mat. 6:8) Bokou sef relizye Zwif ti servi en kantite parol dan lapriyer e sa ti fer ki zot lapriyer ti parey pour bann ki pa ti Zwif. Lapriyer senser ki enplik louanz, remersiman ek siplikasyon i en laspe enportan dan vre ladorasyon. (Fili. 4:6) Pourtan, i pou mal pour nou repet menm zafer tou lazournen an krwayan ki repetisyon i neseser pour dir Bondye sa ki nou bezwen konmsi i bliye. Kan nou priye, nou devret mazinen ki nou pe adres sa Enn ki ‘konn sa ki nou bezwen avan menm ki nou demann li.’
11. Ki nou devret rapel si nou annan sa privilez pour priye devan lezot?
11 Parol Zezi konsernan bann lapriyer ki pa akseptab i devret rapel nou ki Bondye pa enpresyonnen kan i tann bann parol ki pa neseser e long. Nou devret osi realize ki ler nou fer lapriyer devan lezot, sa pa en lokazyon pour nou esey enpresyonn bann ki pe ekoute ouswa fer zot mazinen ki ler zot pou dir “Amenn.” Servi lapriyer pour fer bann lanons ouswa donn konsey lodyans pa pou an armoni avek parol Zezi dan sa Sermon lo Montanny.
Zezi i ansenny nou konman pour priye
12. Ki mannyer ou pou eksplik sinifikasyon sa demann “ki ou non sen i ganny glorifye”?
12 Zezi pa ti zis averti son disip konsernan bann fason ki pa apropriye pour fer lapriyer ki en privilez vreman spesyal, i ti osi ansenny zot ki mannyer pour priye. (Lir Matye 6:9-13.) Sa lapriyer model pa devret ganny aprann parker pour ki i ganny repete tou lazournen. O kontrer, i en model lo lafason ki nou devret priye. Par egzanp, Zezi ti met Bondye premye par konmans avek sa parol: ‘Nou Papa ki dan lesyel ki ou non sen i ganny glorifye.’ (Mat. 6:9) Dan en fason apropriye nou adres Zeova konman “nou Papa” akoz i nou Kreater ki reste “dan lesyel” ki pli siperyer ki later. (Det. 32:6; 2 Kron. 6:21; Akt 17:24, 28) Lefet ki sa mo “nou” i an pliryel, sa i devret rapel nou ki bann frer ek ser Kretyen osi i annan en relasyon pros avek Bondye. “Ki ou non sen i ganny glorifye” i en demann pour ki Zeova i pran aksyon pour glorifye ouswa sanktifye son non par retir okenn repros ki’n ganny anmennen lo son non depi rebelyon Edenn. Pour reponn sa lapriyer, Zeova pou retir tou bann move dimoun lo later e sa pou sanktifye son non.—Ezek. 36:23.
13. (a) Ki mannyer sa demann “ki ou Renny i ganny etabli[r]” pou ganny akonplir? (b) Akonplir lavolonte Bondye lo later i enplik kwa?
13 “Ki ou Renny i ganny etabli[r]; Ki ou lavolonte i ganny akonpli[r] lo later parey dan lesyel.” (Mat. 6:10) An rapor avek sa demann dan lapriyer model ki Zezi ti fer, nou devret rapel ki “Renny” oubyen Rwayonm i gouvernman Bondye dan lanmen Kris konman lerwa ek “bann sen” ki’n resisite ki renny ansanm avek li. (Dan. 7:13, 14, 18; Iza. 9:6, 7) Ler nou priye ki sa Rwayonm i “ganny etabli[r]” nou pe fer demann pour ki Rwayonm Bondye i vini e elimin tou bann lo later ki opoz dominasyon Bondye. Sa pou arive byento e i pou fer li posib pour annan en paradi dan lemonn antye kot pou annan ladrwatir, lape ek prosperite. (Ps. 72:1-15; Dan. 2:44; 2 Pyer 3:13) Lavolonte Zeova pe deza ganny fer dan lesyel e pour demande ki i ganny fer lo later, i en demann pour ki Bondye i akonplir son plan pour nou plannet e sa i enkli retir tou bann ki opoz li ozordi, parey i ti fer dan letan lontan.—Lir Psonm 83:1, 2, 13-18.
14. Akoz i apropriye pour demann nou ‘dipen pour sak zour’?
14 “Donn nou sak zour nou dipen neseser.” (Mat. 6:11; Lik 11:3) Kan nou fer sa demann dan lapriyer, nou pe demann Bondye pour donn nou manze neseser “sak zour.” Sa i montre ki nou annan lafwa dan abilite ki Zeova i annan pour pran swen avek nou bann bezwen tou le zour. I pa en lapriyer pour ganny plis provizyon. Sa demann pour ganny nou bann bezwen sak zour i fer nou rapel ki Bondye ti donn lord bann Izraelit pour anmas lamann “sakenn son kantite sak zour.”—Egz. 16:4.
15. Eksplike ki savedir “pardonn nou nou pese, parey nou pardonn bann ki’n fer nou ditor.”
15 Sa lot demann dan sa lapriyer model i tourn nou latansyon ver en keksoz ki nou bezwen fer. Zezi ti dir: “Pardonn nou nou pese, parey nou pardonn bann ki’n fer nou ditor.” (Mat. 6:12) Zeova pou pardonn nou nou pese si “nou pardonn” bann ki’n fer pese kont nou. (Lir Matye 6:14, 15.) Nou devret pardonn lezot volonterman.—Efe. 4:32; Kol. 3:13.
16. Ki mannyer nou devret konpran sa demann konsernan tantasyon pour pa tonm dan lemal?
16 “Pa permet ki nou ganny tante, me anpes nou tonm dan le mal.” (Mat. 6:13) Ki mannyer nou devret konpran sa de demann ki relye avek kanmarad ki Zezi ti fer dan son lapriyer model? Nou kapab asire ki: Zeova pa tant nou pour fer pese. (Lir Zak 1:13.) Satan i sa enn ki move ki kapab fer nou tonm dan lemal. (Mat. 4:3) Parkont, Labib i koz lo bann keksoz ki pe arive konmsi Bondye ki pe fer zot arive kan an realite i pe zis permet zot arive. (Rit 1:20, 21; Ekle. 11:5) Alor, “pa permet ki nou ganny tante” i en demann pour ki Zeova pa permet ki nou tonbe kan nou pe ganny tante pour dezobeir li. Finalman sa demann pour “anpes nou tonm dan le mal” i en demann pour ki Zeova i anpes Satan fer nou tonbe. Nou kapab annan konfyans ki ‘Bondye pa pou permet ki nou ganny tante plis ki nou kapab siporte.’—Lir 1 Korentyen 10:13.
Kontinyen ‘demande, rode e frape’
17, 18. Ki savedir kontinyen ‘demande, rode e frape’?
17 Zapot Pol ti ankouraz lezot Kretyen pour “priye tou letan.” (Rom. 12:12) Anliny avek sa, Zezi ti fer resorti en pwen tre enportan kan i ti dir: “Demande zot a gannyen, rode zot a trouve, frape e laport i a ouver. Akoz, tou dimoun ki demande i gannyen, sa ki rode i trouve e laport i ouver pour sa ki frape.” (Mat. 7:7, 8) I apropriye pour ‘kontinyen demann’ okenn keksoz ki an armoni avek lavolonte Bondye. Lo menm laliny avek parol Zezi, zapot Zan ti ekrir: “Sa se lasirans ki nou annan dan [Bondye]: si nou demann keksoz dapre son lavolonte, i pou ekout nou.”—1 Zan 5:14.
18 Konsey Zezi pour ‘kontinyen demande e rode’ i vedir ki nou devret sipliye e pa bes lebra. I osi neseser pour nou ‘kontinyen frape’ pour nou ganny akse avek Rwayonm e ganny son benediksyon, byenfe ek rekonpans. Me eski nou kapab annan konfyans ki Bondye pou reponn nou lapriyer? Wi, nou kapab si nou reste fidel avek Zeova, akoz Kris ti dir: “Tou dimoun ki demande i gannyen, sa ki rode i trouve e laport i ouver pour sa ki frape.” Leksperyans bokou serviter Zeova i prouve ki Bondye i vreman sa Enn “ki ekout lapriyer.”—Ps. 65:2.
19, 20. Anliny avek parol Zezi dan Matye 7:9-11, dan ki fason Zeova i en papa ki kontan son zanfan?
19 Zezi ti konpar Bondye avek en papa ki fourni sa ki bon pour son zanfan. Fer krwar ou ti la pe ekout sa Sermon lo Montanny e ou ti tann Zezi dir: “Lekel parmi zot ki a donn son garson en ros si i demann dipen? Oubyen i a donn li en serpan si i demann en pwason? Si zot, move konman zot ete, zot konn donn zot zanfan bon keksoz, alor, a pli fort rezon zot Papa ki dan lesyel pou donn sa ki bon bann ki demann li.”—Mat. 7:9-11.
20 En papa, menm si dan en sans i “move” akoz i’n erit pese, i annan en gran lafeksyon pour son zanfan. I pa pou anbet son zanfan me i pou fer tou son mye pour donn li bann “bon keksoz.” Zeova konman nou Papa ki kontan nou, avek tandres i donn nou bann “bon keksoz” parey son lespri sen. (Lik 11:13) Nou pou ganny lafors pour ofer en servis ki akseptab avek Zeova, sa Enn ki donn “tou don ekselan, [e] tou kado parfe.”—Zak 1:17.
Kontinyen benefisye avek parol Zezi
21, 22. Kwa ki enteresan avek sa Sermon lo Montanny e ki mannyer ou santi anver bann lansennyman Zezi?
21 Sirman sa Sermon lo Montanny ti sa pli meyer diskour ki’n deza ganny donnen lo later. I vreman enteresan akoz i ansenny nou lo Bondye e i byen kler. Parey sa trwa lartik in montre, nou kapab benefisye en kantite avek bann pwen ki’n ganny tire dan sa sermon, si nou aplik zot. Parol Zezi dan sa sermon i kapab amelyor nou lavi la konmela e donn nou lespwar pour en lavenir ere.
22 Dan sa trwa lartik nou’n vwar zis detrwa pyer presye spirityel dan Sermon Zezi lo Montanny. I pa drol alor ki bann ki ti tann sa diskour “ti byen etonnen par mannyer ki i ti ansennyen.” (Mat. 7:28) San dout nou osi nou annan menm reaksyon kan nou ranpli nou lespri ek leker avek sa bann parol ek plizyer lezot parol presye sa Gran Ansennyan, Zezi Kri.
Ki ou pou reponn?
• Ki Zezi ti dir lo bann lapriyer ipokrit?
• Akoz nou devret evit fer bann lapriyer kot nou zis pe repete?
• Ki demann i annan dan lapriyer model Zezi?
• Ki mannyer nou kapab kontinyen ‘demande, rode e frape’?
[Kestyon]
[Portre lo paz 15]
Eski ou konnen akoz i apropriye pour priy pour nou dipen sak zour?