Eski Bondye i annan en non?

Larepons ki nou souvan tande:

▪ “I apel Bondye.”

▪ “I napa en non.”

Ki Zezi ti dir?

▪ “La ki mannyer zot devre priye: ‘Nou Papa ki dan lesyel ki ou non sen i ganny glorifye.’” (Matye 6:9) Zezi ti konn byen ki Bondye i annan en non.

▪ “Mon’n fer tou bann ki ou’n tir dan lemonn e ki ou’n donn mwan, konn ou non. Zot ti pour ou e ou’n donn mwan zot. E zot in obei ou parol.” (Zan 17:6) Zezi ti fer konnen non Bondye.

▪ “Zot pa pou [v]war mwan ankor ziska ler zot ava dir, ‘Beni sa enn ki vin o non Senyer [“Zeova,” NW].’” (Lik 13:35; Psonm 118:26) Zezi ti servi non Bondye.

BONDYE li menm i dir nou son non. Dan Labib Bondye li menm i dir: “Mwan, mon Zeova. Sa i mon non.” * (Izai 42:8, American Standard Version) Non Bondye an Ebre i ganny tradwir konman Zeova an Kreol. Petet ou pou sirprann pour konnen ki sa non inik an Ebre i aparet plizyer milye fwa dan ansyen roulo Labib. Annefe, i aparet pli souvan ki okenn lezot non ki ganny mansyonnen dan Labib.

Si ou demann serten dimoun sa kestyon, “Ki mannyer Bondye i apele?” zot pou reponn, “Bondye.” Sa ti pou zis parey si ou ti’n ganny demande: “Lekel ki’n ganny eleksyon?” e ou reponn: “Sa kandida.” Sa bann larepons pa kler vi ki “Bondye” ek “kandida” pa bann non.

Akoz Bondye i revel son non avek nou? I’n fer sa pour nou kapab konn li pli byen. Par egzanp, depandan lo sirkonstans, en dimoun i kapab ganny apele msye, bourzwa, dadi, oubyen gran papa. Sa bann tit i revel en keksoz lo sa dimoun, me non sa dimoun i fer nou rapel tou sa ki nou konnen lo sa dimoun. Pareyman, bann tit parey Senyer, Tou pwisan, Papa ek Kreater i fer nou rapel diferan keksoz ki Bondye in fer. Parkont, selman son non, Zeova, ki fer nou rapel tou sa ki nou konnen lo li. Ki mannyer nou kapab vreman konn Bondye si nou pa konn son non?

I enportan pour pa zis konn sa non me nou bezwen osi servi sa non. Akoz? Sa i akoz Labib i dir nou: “Tou sa ki envok non Senyer pou ganny sove.”—Romen 10:13; Yoel 2:32.

[Not anba lo paz 6]

[Portre lo paz 6]

Depandan lo sirkonstans, en dimoun i kapab ganny apele msye, bourzwa, dadi oubyen gran papa, me son non i fer nou rapel tou sa ki nou konnen lo li.