Eski Bondye i enterese avek mwan?

Larepons ki nou souvan tande:

▪ “Mon pa krwar ki i enterese avek mwan.”

▪ “Bondye pa enterese avek nou akoz i annan tro bokou mesanste lo later.”

Ki Zezi ti dir?

▪ “Eski senk sren pa i vann pour de sou? Me napa enn ki Bondye i [ou]bliye. Wi, menm bren seve lo ou latet in konte. Pa bezwen per; zot vo plis ki en kantite sren.” (Lik 12:6, 7) I kler ki Zezi ti ansennyen ki Bondye i enterese avek nou.

▪ “Pa bezwen pran traka e demann zot lekor, ‘Ki nou pou manze? Ki nou pou bwar? Ki nou pou mete?’ Bann payen ki rod tousala. Me zot Papa ki dan lesyel i konn tou sa ki zot bezwen.” (Matye 6:31, 32) Zezi ti asire ki Bondye i konn nou bann bezwen personnel.

LABIB i klerman dir ki Bondye i enterese avek nou. (Psonm 55:22; 1 Pyer 5:7) Si i enterese avek nou, alor akoz nou eksperyans bokou soufrans ozordi? Si Bondye i kontan nou e i tou pwisan, akoz i pa met en lafen avek soufrans?

Larepons i trouve dan en laverite ki bokou dimoun pa konnen. Zot pa konnen ki Satan oubyen Dyab, i sef sa move lemonn. Kan Satan ti pe tant Zezi, i ti ofer li tou bann Rwayonm lo later e dir: “Mon a donn ou tou sa pouvwar ek laglwar sa bann rwayonm, akoz tousala in ganny livre avek mwan, e mwan, mon kapab donn nenport ki, ki mon oule.”—Lik 4:5-7.

Lekel ki’n fer Satan vin sef sa lemonn? Kan nou bann premye paran, Adan ek Ev ti obeir Satan e rezet Bondye, zot ti annefe swazir Satan konman zot sef. Depi zot rebelyon, avek pasyans Zeova in permet letan pase pour montre ki dominasyon Satan in konpletman fel. Zeova pa’n fors personn pour servi li me i’n ofer nou sa loportinite pour nou kapab retourn kot li.—Romen 5:10.

Parski Bondye i enterese avek nou, i’n fer en laranzman pour Zezi delivre nou anba dominasyon Satan. Byento, Zezi pou “detri sa enn ki annan pouvwar donn lanmor, setadir dyab.” (Ebre 2:14) Par fer sa, i pou “detri bann travay dyab.”—1 Zan 3:8.

Paradi pou ganny reetablir lo later. Sa letan, Bondye “pou eswiy tou larm dan . . . lizye [bann dimoun]. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen [pou] disparet.”—Revelasyon 21:4, 5. *

[Not anba lo paz 8]

[Portre lo paz 8]

Paradi pou ganny reetablir lo later