Kestyon lekter

Eski en pti baba ki mor avan ki i ne pou ganny resisite?

Pour serten dimoun ki pa’n zanmen perdi en zanfan dan sa fason, i kapab difisil pour zot konpran santiman sa bann ki’n pas atraver sa leksperyans. Serten paran ki’n pas atraver en sityasyon parey, zot vreman sagren en kantite. I ti annan en manman ki ti perdi senk son zanfan avan ki zot ti ne. Avek letan, i ti santi ki i ti’n ganny beni, akoz i ti kapab fer grandi de garson ki an bonn sante. Me sa pa’n fer li oubliy son senk zanfan ki i ti’n perdi. Ziska son lanmor, i ti konnen ki laz son bann zanfan ti pou annan si zot ti vivan. Eski bann Kretyen ki’n pas atraver en tel leksperyans i annan bon rezon pour ekspekte ki en zour zot zanfan pou resisite?

Larepons pour sa kestyon i senp, nou pa konnen. Dan en fason direk, Labib pa’n zanmen dir ki bann ki’n mor dan sa fason, pou ganny resisite. Me parkont, i annan bann prensip dan Parol Bondye ki donn nou leklersisman lo sa kestyon e ki kapab rekonfort nou en pe.

Aprezan annou egzamin de kestyon ki relye avek sa ki nou pe diskite. Premyerman, dapre Zeova, kan ki lavi en imen i konmanse, eski i pandan konsepsyon oubyen ler i donn nesans? Dezyenmman, konman ki Zeova i vwar en zanfan ki pa ankor ne? Konman en endividi ki inik oubyen senpleman konman plizyer selil ek tisi dan matris en madanm? Nou klerman vwar larepons pour sa de kestyon dan bann prensip Labib.

Lalwa Moiz i klerman montre ki lavi en dimoun pa konmans ler i ne, me bokou pli boner. Ki mannyer sa? Dapre Lalwa, si en dimoun ti touy en fetis, i ti annan posibilite ki sa dimoun ti pou ganny touye. Remark sa ki lalwa ti dir: “Ou devret donn nanm pour nanm.” * (Egz. 21:22, 23) Alors, sa zanfan ki pa ankor ne dan matris en madanm, i vivan e i osi ganny konsidere konman en imen. Kan plizyer milyon Kretyen ti konpran sa, en laverite ki pa pou zanmen sanze, sa ti ed zot pour rezet lavortman akoz zot konsider sa konman en pese grav devan Bondye.

Sirman sa zanfan menm si i pa ankor ne, i vivan. Me konman ki Zeova i montre ki lavi sa zanfan i annan valer? Sa lalwa ki nou’n site anler ti dir ki en adilt i devret ganny met a mor akoz i’n touy en zanfan ki pa ankor ne. Alors, i kler ki lavi en zanfan ki pa ankor ne i annan bokou valer devan Bondye. Deplis, i annan bokou verse dan Labib ki montre ki Zeova i vwar bann zanfan ki ankor dan vant konman bann endividi ki diferan. Par egzanp, Lerwa David ti ganny enspire pour dir sa lo Zeova: “Ou ti kasyet mwan ler mon ti dan vant mon manman. . . . Ou ti vwar mwan kan mon ti ankor en anbriyon, e dan ou liv tou son bann parti ti’n ganny ekrir, an sa ki konsern bann zour kan zot ti ganny formen.”—Ps. 139:13-16; Zob 31:14, 15.

Zeova i osi kapab vwar ki sa zanfan i annan bann tre ki pa parey pour lezot e ki i kapab annan gran potansyel ler i grandi. Kan madanm Izaak, Rebeka, ti pe al ganny de piti ansanm, Zeova ti anons en profesi konsernan sa de pti garson ki ti pe tap kanmarad ler zot ti ankor dan matris. Alors, sa i montre ki Bondye ti’n fini vwar bann tre dan zot ki ti pou annan en pli gran lefe alavenir.—Zen. 25:22, 23; Rom. 9:10-13.

I osi enteresan pour egzamin sa ki ti arive dan ka Zan Batis. Levanzil i dir: “Kan Elizabet ti tann salitasyon Mari, son baba ti bouze dan son vant, e Elizabet [ti] ranpli avek Lespri Sen.” (Lik 1:41, 42) Kan Lik ki ti en dokter ti pe rakont sa levennman, i ti servi en mo Grek ki la dan sa verse i’n ganny tradwir konman “baba,” ki ti kapab pe refer swa avek en fetis oubyen en pti baba apre ki i’n ne. I ti servi sa menm mo kan i ti pe refer avek Zezi konman en pti baba ki ti pe alonze dan en loz.—Lik 2:12, 16; 18:15.

 An gro, eski Labib i montre ki i annan en gran diferans ant en zanfan ki pa ankor ne avek enn ki’n fek ne? I pa paret leka. Bann dekouvert syantifik dan nou letan i montre ki sa i vre. Par egzanp, resers in montre ki en zanfan ki ankor dan matris i kapab santi e reakte anver sa ki pe arive toultour li. Alors, i pa drol ki en manman ki ansent, i santi li vreman atase avek sa zanfan ki pe devlope dan li.

Finalman, moman presi ki sa pti baba pou ne i kapab diferan pour sak manman. Annou pran en legzanp. En manman i donn nesans avan ler e dan lespas detrwa zour sa pti baba i mor. En lot manman li, son lansentman ti byen dire pandan nef mwan, me sa zanfan ti mor zis avan ki i donn nesans. Eski nou kapab dir ki sa manman ki ganny mansyonnen premye i annan sa lespwar ki son zanfan pou ganny resisite zis akoz pour en rezon ou en lot, sa zanfan ti ne avan ler? Eski nou kapab dir ki sa dezyenm manman li, i napa sa lespwar?

Pour rezimen, nou kapab dir ki Labib i klerman montre ki lavi i konmans depi konsepsyon, e ki Zeova i vwar en zanfan ki pa ankor ne konman en endividi inik e ki annan valer. Apre ki nou’n vwar laverite dan Labib lo sa size, serten i kapab panse ki nou pa konsistan si nou dir ki en zanfan ki’n mor avan i ne pa pou ganny resisite. Anfet, zot kapab mazinen ki si nou dir sa, sa i kapab fer annan dout lo nou pozisyon vizavi avortman ki baze lo Labib e ki vreman baze lo sa bann laverite ki nou’n eksplike.

Dan lepase, Latour Veyer ti soulev serten bon kestyon ki paret kree dout lo posibilite pour annan en rezireksyon pour bann zanfan ki’n mor avan nesans. Par egzanp, eski dan Paradi Bondye pou met en anbriyon ki’n fek konmans devlope dan matris en madanm? Parkont, kan zot ti fer plis letid, lapriyer ek meditasyon, Konsey Direkter ti realize ki tousala pa afekte sa lespwar rezireksyon. Zezi ti dir: “Tou keksoz i posib pour Bondye.” (Mark 10:27) Nou vwar ki sa i vre kan nou get lafason ki lavi Zezi ti ganny transfer pour sorti dan lesyel pour vin dan matris en zenn vyerz. Sirman dapre pwennvi imen sa i en keksoz ki konpletman enposib.

Alors, eski tousala i vedir ki Labib i ansennyen ki bann zanfan ki’n mor avan nesans pou ganny resisite? Nou bezwen met lanfaz lo sa pwen. Labib pa direkteman reponn sa kestyon, alors nou pa kapab ensiste ki zot pou ganny resisite. Nou kapab demann en ta kestyon lo sa size ki pa pou zanmen fini. Alors, i pli byen ki nou pa tant pour devinen konman keksoz pou ete. Me sa ki nou konnen, se ki tou keksoz i dan lanmen Zeova, li ki annan en kantite labonte ek mizerikord. (Ps. 86:15) Sirman o fon son leker i ti ava kontan rektifye tou sa bann move lefe ki lanmor in anmennen par mwayen rezireksyon. (Zob 14:14, 15) Nou kapab asire ki i toultan fer sa ki byen. I pou fer laranzman pour tir sa kantite soufrans ki nou’n eksperyanse akoz sa lavi dan sa move lemonn, anmezir ki i diriz son Garson pour “detri bann travay dyab.”—1 Zan 3:8.

[Not anba lo paz 22]

[Portre lo paz 23]

Zeova pou soulaz nou avek tou sa bann soufrans ki nou’n eksperyanse