3 Aprann laverite lo Zezi

“Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.”—Zan 3:16.

KI SA DEFI? Serten pou fer ou krwar ki Zezi pa ti egziste. Lezot i admet ki i ti egziste me zot ensiste ki i ti zis en zonm ordiner ki’n mor depi byen lontan.

KI MANNYER OU KAPAB SIRMONT SA DEFI? Imit disip Natanael. * Son zanmi Filip ti dir li ki i krwar ki i ti’n trouv Mesi, “i apel Zezi, Garson Zozef ki sorti Nazaret.” Parkont, Natanael pa ti zis aksepte sa ki Filip ti dir li. Annefe, i ti reponn: “Eski i posib sorti okenn keksoz de bon Nazaret?” Toudmenm, i ti aksepte lenvitasyon Filip pour “vini, e . . . war” pour li menm. (Zan 1:43-51) Ou osi ou pou tir byenfe si ou egzamin pour ou menm levidans lo Zezi. Ki ou kapab fer?

Egzamin levidans istorik ki montre ki Zezi ti egziste. Josephus ek Tacitus, de istoryen ki ti byen ganny respekte dan premye syek, ki pa ti bann Kretyen, ti mansyonn Zezi Kri konman en personnaz ki ti vreman egziste. Kan zot ti pe dekrir lafason Lanperer Romen Nero ti blanm bann Kretyen pour sa dife ki ti arive Ronm lannen 64 N.L., Tacitus ti ekrir: “Nero ti blanm e tortir en group dimoun ki ti ganny apele Kretyen dan en fason kriyel e zot ti ganny deteste akoz zot krwayans par bann dimoun an zeneral. Sa non Kretyen i sorti dan sa non Christus [Kris]. Kris ti sibir en santans terib pandan renny Tiber dan lanmen enn nou bann gouverner, Pons Pilat.”

Konsernan bann referans ki’n ganny fer par bann istoryen dan premye ek dezyenm syek lo Zezi ek bann premye Kretyen, Encyclopædia Britannica Edisyon 2002 i dir: “Endepandaman, sak sa bann resi i prouve ki dan letan lontan menm bann ki ti opoz bann Kretyen pa’n zanmen doute ki Zezi ti egziste. Me a lafen 18 tyenm syek, pandan 19 vyenm syek e o konmansman 20 tyenm syek ki pour premye fwa ti annan deba konsernan legzistans Zezi ki ti baze lo bann rezonnman ki ti napa en fondman.” An 2002, en lartik ki ti ganny pibliye dan The Wall Street Journal ti dir: “Laplipar spesyalis Labib eksepte serten ate ki’n eparpiye partou partou in deza aksepte ki Zezi sorti Nazaret ti egziste.”

Egzamin sa laprev ki Zezi ti ganny resisite. Kan Zezi ti ganny arete par bann opozan,  son bann zanmi pros ti abandonn li e akoz lafreyer, son zanmi Pyer ti dir i pa konn li. (Matye 26:55, 56, 69-75) Apre ki Zezi ti’n ganny arete, son bann disip ti disperse. (Matye 26:31) Imedyatman apre, son bann disip ti revin aktif. Avek kouraz Pyer ek Zan ti fer fas avek sa bann zonm ki ti plàn pour touy Zezi. Bann disip Zezi ti telman ganny motive ki zot ti propaz sa lansennyman partou dan Lanpir Romen e an rapor avek zot krwayans zot ti prefere mor ki fer okenn konpromi.

Kwa ki ti fer zot sanz zot latitid? Zapot Pol ti eksplike ki Zezi ti ganny resisite e i ti “aparet avek Pyer e apre avek son douz zapot.” Pol ti kontinyen dir: “Answit i ti aparet avek plis ki 500 son bann disip ansanm.” Lamazorite bann temwen ti ankor vivan letan zapot Pol ti ekrir sa bann parol. (1 Korentyen 15:3-7) Temwannyaz zis enn oubyen de temwen ti’n kapab fer li fasil pour fer bann ki doute pa krwar. (Lik 24:1-11) Me temwannyaz plis ki senk san temwen ti donn bann levidans konvenkan ki Zezi ti ganny resisite.

KI SA REKONPANS? Bann ki annan lafwa dan Zezi e obeir li i kapab ganny zot pese pardonnen e zot kapab ganny en konsyans kler. (Mark 2:5-12; 1 Timote 1:19; 1 Pyer 3:16-22) Si zot mor, Zezi i promet pour resisit zot “dernyen zour.”—Zan 6:40.

Pour plis lenformasyon, vwar sapit 4, “Lekel Zezi Kri?” e sapit 5, “Pli gro Kado ki Bondye in donn nou,” dan sa liv Ki Labib i vreman dir? *

[Not anba lo paz]

[Portre lo paz 7]

Parey Natanael, egzamin levidans lo Zezi