Akoz Labib i pratik pour nou letan

“Tou Lekritir i enspire par Bondye e, i kapab ganny servi pour anmenn byenfe . . . pour gid lavi dimoun.”—2 TIMOTE 3:16, The Jerusalem Bible.

POUR plizyer syek, Labib in motiv dimoun ki sorti dan plizyer kiltir pour sanz zot fason viv e fer ki zot lavi i vin pli meyer. Sa verse ki’n ganny site anler i eksplike akoz Labib i efikas dan sa domenn. Sa i akoz lasazes ki ladan i sorti kot Bondye. Menm si i’n ganny ekrir par zonm, Labib i fer nou konn pwennvi Bondye. Labib i eksplike: “Sent-Espri ki’n pous zonm pour anons mesaz Bondye.”—2 Pyer 1:21.

Labib i pratik dan omwen de fason. Premyerman, i donn en pwennvi realistik lo kwa ki enplike pour annan en pli bon fason viv. Dezyenmman, i annan sa pouvwar pour motiv dimoun pour fer bann sanzman neseser pour annan sa pli bon fason viv. Annou egzamin sa de laspe.

Servi ou bon zizman

Dan Labib, Bondye in fer sa promes: “Mon pou fer ou annan bon zizman e mon pou enstrir ou dan sa semen ki ou devret pran. Mon lizye pou lo ou pour konsey ou.” (Psonm 32:8) Remarke ki Bondye pa zis donn konsey me i osi donn bon zizman. Bon zizman i sa abilite pour konpran tou sa ki enplike dan en sityasyon. Kan nou servi bon zizman pour rekonnet bann lobzektif ki vreman anmenn byenfe, sa i kapab protez nou pour nou pa gaspiy nou lavi par pourswiv bann lobzektif ki napa valer.

Par egzanp, pour bokou dimoun, zot lobzektif dan lavi i pour vin en dimoun enportan oubyen pour prospere. Bann liv ki ofer konsey pratik i ranpli avek lenformasyon lo konman pour vin pli meyer ki lezot, pour ganny en pozisyon enportan oubyen pour vin ris. Labib i dir nou tou le kontrer: “Konpetisyon antre kanmarad. . . . i anven e konmsi ou pe tay deryer divan.” “En dimoun ki kontan larzan pa pou satisfe avek larzan.” (Eklezyast 4:4; 5:10) Eski sa konsey i pratik pour nou ozordi?

Pour montre ki konsey sorti dan Labib i pratik, annou egzamin legzanp Akinori ki sorti Zapon. Akinori ti atenn son lobzektif pour ganny en diplonm dan en gran liniversite e pour ganny en travay dan en lakonpannyen ki byen repite apre ki i ti’n sirmont en konpetisyon vreman entans. I ti paret ki tou  keksoz ti pe al byen pour li. Parkont, son lareisit pa ti donn li sa lazwa ki i ti pe ekspekte. O kontrer, presyon ek lafatig ti afekte son lasante. Apenn si son bann zanmi kot travay ti anmenn rekonfor pour li. I ti ganny depresyon, i ti vin en alkolik e i ti menm mazin pour swiside. Apre i ti konmans etidye Labib avek Temwen Zeova. Sa ki i ti aprann ti fer li sanz son pwennvi konsernan kwa ki pli enportan dan lavi. Pa bokou letan apre, i ti konmans aret ganny bann maladi ki i ti’n gannyen akoz presyon. Olye les lorgey e lanbisyon kontrol son lavi, Akinori ti eksperyans pour li menm sa ki sa proverb dan Labib i dir: “En leker ki anpe i donn lekor lavi.”—Proverb 14:30, The Holy Bible—New International Version.

Kwa ki ou konsider konman en lobzektif pratik dan lavi? Ki keksoz ki si ou ti reisi akonplir ti pou fer ou vreman ere? Eski pour annan en lavi maryaz ki reisi? Eski pour donn ou zanfan en bon konmansman dan lavi? Pour annan bokou zanmi? Pour trouv lazwa dan lavi? Tousala i bann lobzektif ki vo lapenn. Annefe, Labib i ankouraz nou pour annan sa bann lobzektif, me parkont pa pour annan zot konman nou lobzektif prensipal dan lavi. Labib i ranpli avek bann lansennyman ki ed nou pour annan bon zizman. I fer resorti en kondisyon fondamantal pour annan en fason viv ki anmenn satisfaksyon: “Annan lakrent pour sa vre Bondye e gard son bann komannman. Akoz sa i tou lobligasyon zonm.” (Eklezyast 12:13) Kan nou negliz sa lobligasyon, lavi napa sans, nou fristre e finalman i anmenn dezapwentman. De lot kote, Labib i asir nou: “Ere sa enn ki met son konfyans dan Zeova.”—Proverb 16:20.

Ki mannyer Labib i motiv dimoun pour sanze

Zapot Pol ti ekrir: “Parol Bondye i vivan e i annan pisans.” Parey en lepe ki koup de kote, i kapab desifre panse ek dezir pli o profon en dimoun. (Ebre 4:12) Labib i annan pouvwar pour sanz lafason ki dimoun i viv akoz i ed zot pour vwar zot lekor parey zot vreman ete me pa sa ki zot panse zot ete. Alor, bann ki annan sa bon kondisyon leker, pou finalman realize ki zot bezwen fer sanzman. Par egzanp, konsernan serten dan kongregasyon dan lavil Korent ki oparavan ti bann voler, soular, adilter e lezot, Pol ti dir: “Koumsa menm ki serten parmi zot ti ete. Me zot in ganny lave . . . [par] Lespri nou Bondye.” (1 Korentyen 6:9-11) Lespri sen Zeova i ankor aktif e pwisan dan nou letan e i kapab pous dimoun pour fer bann sanzman neseser.

Mario ki pe viv Lerop, ti en zonm vyolan ki ti vann e fim mariwana. En zour, kan en gard ti konfiske son drog, i ti telman ankoler ki i ti atak sa zofisye e andomaz son loto. Deplis, Mario pa ti travay e i ti annan en kantite det. Kan i ti realize ki i pa ti pou kapab rezourd son problenm li menm, i ti dakor pour ganny en letid Labib. Anmezir ki i ti fer progre, Mario ti sanz son laparans e i ti aret vann e fim drog. I ti osi rezet vyolans. Bokou dimoun ki ti konn li avan ki i ti’n fer sa bann sanzman ti sirprann. Zot ti aret li e demann li: “Mario, eski ou menm sa?”

Kwa ki pous bann dimoun parey Akinori ek Mario pour sanz zot lavi, pour trouv vre satisfaksyon ek lazwa dan lavi? I kler ki i sa konnesans ki zot ti’n gannyen lo Bondye atraver en letid Labib. Zis Bondye ki kapab donn nou bann lenstriksyon pratik ki nou bezwen pour nou lavi reisi la konmela e pour ganny sa lespwar pour ganny lavi eternel dan lavenir. Parey en Papa, Zeova i koz avek nou atraver Labib: “Ekoute, mon garson, e aksepte mon parol. Alors bann lannen lavi pou vin bokou pour ou . . . Kan ou marse, ou lepa pa pou sere, e si ou taye, ou pa pou tonbe. Tyonbo disiplin, pa les li ale. Gard li akoz i ou lavi.” (Proverb 4:10-13) Ki konsey ki kapab pli pratik pour nou ki rod gidans nou Kreater?

 [Box/​Picture on page 7]

Konsey pratik pour nou letan

Labib i donn bann prensip debaz me sa bann prensip i pratik, i kapab gid nou dan tou laspe nou lavi ozordi. La detrwa legzanp:

• Konman pour annan bann bon relasyon avek lezot

“Alor fer pour lezot sa ki ou oule lezot i fer pour ou.”—Matye 7:12.

“Konsider lezot pli enportan ki ou.”—Filipyen 2:3.

“Pratik lospitalite.”—Romen 12:13.

• Konman pour sirmont bann labitid danzere

“Sa ki mars avek bann dimoun saz pou vin saz, me sa ki frekant bann enbesil pou mal pase.”—Proverb 13:20.

“Pa frekant bann bwarer diven.”—Proverb 23:20.

“Pa frekant okenn dimoun ki pran lakoler.”—Proverb 22:24.

• Konman pour batir en maryaz solid

“Fodre ki sak mari i kontan son madanm parey son prop lekor e ki sak madanm i respekte son mari.”—Efezyen 5:33.

“Zot devre ranpli avek konpasyon, labonte, limilite, ladouser ek pasyans. Siport kanmarad, pardonn kanmarad sak fwa ki enn ant zot i ofans en lot.”—Kolosyen 3:12, 13.

• Konman pour ed bann zanfan

“Edik en garson dapre semen ki i devret marse, menm kan i pou’n vye i pa pou kit sa semen.”—Proverb 22:6.

“Zot, bann papa, pa eksit lakoler zot zanfan, me o kontrer, elve zot dan en ledikasyon ek lenstriksyon Senyer.”—Efezyen 6:4.

• Konman pour evit dispit

“En larepons, letan i ganny donnen avek ladouser, i kalmi lakoler, me en parol ki koz douler i fer monte lakoler.”—Proverb 15:1.

“Setaki montre plis respe pour kanmarad.”—Romen 12:10.

Menm parmi zanmi bann dezakor dan tranzaksyon biznes i souvan ganny evite kan en dokiman an ekrir i ganny fer. Alor, Zeremi, serviter Bondye ti ekrir: “Mon’n ekrir dan en dokiman e mont en sele e mon’n anmenn bann temwen avek mwan pour pez sa larzan dan en balans.”—Zeremi 32:10.

• Konman pour devlop en latitid pozitif

“Tou sa ki vre, . . . sa ki bon, sa ki agreab, sa ki ekselan, tou sa ki merit felisitasyon; mazin tou sa bann keksoz.”—Filipyen 4:8.

Labib i dekouraz nou pour konsantre lo bann panse negatif e “touzour plennyen” lo sa ki ariv nou dan lavi. I dir: “Ki ou lesperans i gard ou dan lazwa.”—Zid 4, 16; Romen 12:12.

Kan nou aplik sa bann bon prensip, sa pa pou zis permet nou viv anpe e annan en lavi satisfezan la konmela me i pou osi ed nou pour viv an armoni avek sa ki Bondye i ekspekte e ganny son benediksyon. Labib i dir: “Bann dimoun drwat pou posed later e zot pou reste lo la pour touzour.”—Psonm 37:29.

[Portre lo paz 5]

Kan Akinori ti en biznesmenn (agos) e avek lazwa li avek son madanm pe partaz laverite dan Labib ozordi