“Reste dan lanmour Bondye”
“Reste dan lanmour Bondye”
“Reste dan lanmour Bondye, an atandan ki nou Senyer Zezi-Kri, dan son labonte, i donn zot lavi eternel.”—ZID 21.
1, 2. Ki mannyer Zeova in demontre son lanmour pour nou, e ki mannyer nou konnen ki i pa otomatikman gard nou dan son lanmour?
ZEOVA in demontre son lanmour pour nou dan en kantite fason ki nou pa pou zanmen kapab fini konte. Me, san okenn dout, sa pli gran laprev ki nou annan ki Zeova i kontan nou i sa sakrifis ki i’n fourni pour nou. Son lanmour pour limanite i sitan gran ki i’n menm anvoy son Garson byenneme isi lo later pour mor pour nou. (Zan 3:16) Zeova in fer sa akoz i anvi ki nou viv pour touzour e i osi anvi ki nou benefisye avek son lanmour pour touzour!
2 Eski nou kapab ekspekte ki Zeova pou otomatikman gard nou dan son lanmour nenport kwa ki nou deside pour fer? Non. Parski dan Zid verse 21, nou lir sa lankourazman: “Reste dan lanmour Bondye, an atandan ki nou Senyer Zezi-Kri, dan son labonte, i donn zot lavi eternel.” Sa lekspresyon “reste dan lanmour Bondye” i montre nou ki sa i demann serten aksyon lo nou par. Alor, ki nou bezwen fer pour nou reste dan lanmour Bondye?
Ki mannyer nou kapab reste dan lanmour Bondye?
3. Kwa ki Zezi i dir ti esansyel pour li reste dan lanmour son Papa?
3 Nou kapab trouv larepons sa kestyon dan parol ki Zezi ti dir li menm lo son dernyen zour swar isi lo later. I ti dir: “Si zot obei mon bann konmannman, zot pou reste dan mon lanmour, parey mwan, mon’n obei konmannman mon Papa e mon reste dan son lanmour.” (Zan 15:10) I kler ki Zezi ti santi ki pour li ganny laprouvasyon son Papa, i ti esansyel ki i obzerv son bann komannman. Alor, si sa ti leka pour Garson Bondye ki parfe, eski pa i devret leka pour nou osi?
4, 5. (a) Ki sa fason prensipal ki nou kapab montre ki nou kontan Zeova? (b) Akoz ki nou napa okenn rezon pour ezite obeir komannman Zeova?
4 Premyerman, nou montre ki nou kontan Zeova kan nou obeir li. Zapot Zan i eksprim sa dan sa fason: “La lanmour Bondye: ki nou obei son konmannman; e son bann konmannman i pa en fardo.” (1 Zan 5:3) I vre, dan sa lemonn ozordi, obeir pa touzour en keksoz ki dimoun i kontan fer. Parkont, remarke ki sa verse i dir: “Son bann konmannman i pa en fardo.” Zeova pa pe demann nou pour fer en keksoz ki tro difisil pour nou fer.
5 Annou pran en legzanp: Eski ou ti pou demann en tre bon zanmi pour lev en keksoz ki ou konnen i tro lour pour li? Definitivman non! Zeova i bokou pli bon ki nou e i pli byen konpran nou limit. Labib i asir nou ki Zeova “i mazinen ki nou lapousyer.” (Ps. 103:14) I pa pou zanmen demann nou pour fer en keksoz ki nou pa kapab fer. Alor nou pa devret ezite pour obeir komannman Zeova. O kontrer, nou aksepte lobeisans pour sa ki i vreman ete, i en loportinite merveye pour demontre nou Papa dan lesyel ki nou vreman kontan li e nou anvi reste dan son lanmour.
En kado spesyal sorti kot Zeova
6, 7. (a) Ki si sa konsyans? (b) Donn en legzanp pour montre ki mannyer konsyans i kapab ed nou pour reste dan lanmour Bondye.
6 Dan sa lemonn konplike kot nou pe viv ozordi, i annan bokou desizyon ki nou bezwen fer kot nou bezwen demontre nou lobeisans anver Bondye. Ki mannyer nou kapab fer sir ki sa bann desizyon i an armoni avek lavolonte Bondye? Zeova in donn nou en kado ki kapab vreman ed nou dan sa domenn. Sa i nou konsyans. Ki si sa konsyans? I sa abilite spesyal ki nou annan pour egzamin nou aksyon, latitid ek bann swa ki nou fer. I azir parey en ziz dan nou, ki permet nou egzamin bann swa ki nou annan pour fer dan lavi oubyen reflesir lo aksyon ki nou’n fer e evalye zot pour vwar si zot ti bon oubyen pa bon, ouswa si zot ti byen oubyen mal.—Lir Romen 2:14, 15.
7 Ki mannyer nou kapab byen servi nou konsyans? Egzamin sa legzanp. En dimoun pe travers en gran dezer apye. Dan sa dezer napa okenn santye, ni semen oubyen lansenny. Toudmenm san okenn problenm i ariv kot i ti pe ale. Ki mannyer sa? Sa i akoz i annan en konpa. En konpa i en plak ron ki annan sa kat direksyon prensipal ki’n ganny marke lo la e i annan en zegwir ki’n ganny fer avek en lema ki vir dan direksyon nor. Si sa dimoun ki pe travers en gran dezer ti napa en konpa, nanryen pa ti pou gid li. Pareyman, si bann imen ti napa en konsyans, nanryen pa ti pou gid zot kan zot ti pou esey fer bann bon swa e bann swa ki moralman byen dan lavi.
8, 9. (a) Ki limit nou konsyans i annan ki nou bezwen gard antet? (b) Ki nou kapab fer pour fer sir ki nou konsyans i vreman itil pour nou?
8 Me zis parey en konpa i annan en limit, nou konsyans osi i annan en limit. Si sa dimoun ki pe travers sa gran dezer apye ti met en lema o bor sa konpa, sa zegwir lo sa konpa ti pou vir dan en lot direksyon olye vir dan nor. Pareyman, si nou les nou bann dezir ki devlope dan nou leker pas pour pli enportan, ki pou arive? Nou bann dezir egois i kapab fer nou konsyans gid nou dan move direksyon. Labib i averti nou ki “leker i pli tret ki okenn keksoz e i tre move.” (Zer. 17:9; Prov. 4:23) Deplis, si sa dimoun pa ti annan en bon map ki i ti kapab depan lo la, son konpa pa ti pou vreman fer okenn gran diferans oubyen pa ti pou servi li dan nanryen. Pareyman, si nou pa depan lo gidans ki sorti dan Parol Bondye, ki pa zanmen sanze e ki nou kapab met nou konfyans ladan, nou konsyans pa ti pou preski servi dan nanryen. (Ps. 119:105) I tris pour dir ki bokou dimoun dan sa lemonn i atas en gran valer avek bann dezir ki sorti dan leker, me zot pa port bokou oubyen ditou latansyon lo bann standar Bondye ki dan Labib. (Lir Efezyen 4:17-19.) Alor se pour sa rezon ki menm si zot annan en konsyans, bokou dimoun i fer bann move keksoz.—1 Tim. 4:2.
9 Nou devret determinen pour pa zanmen vin parey zot! O kontrer, annou kontinyen les Parol Bondye edik e antrenn nou konsyans pour ki i ava kapab vin vreman itil pour nou. Olye les nou bann dezir egois annan kontrol lo nou konsyans nou bezwen ekout nou konsyans ki’n ganny antrennen dapre Labib. An menm tan, nou devret fer zefor pour respekte konsyans nou bann frer ek ser Kretyen ki nou byen kontan. Nou devret fer tou nou zefor pour evite fer lezot tonbe e gard antet ki konsyans nou bann frer ek ser i kapab pa permet zot fer serten keksoz oubyen i pli sansib ki sa ki pour nou.—1 Kor. 8:12; 2 Kor. 4:2; 1 Pyer 3:16.
10. Ki sa trwa domenn dan lavi ki nou pou diskit lo la aprezan?
10 Annou aprezan egzamin trwa domenn dan lavi kot nou kapab demontre nou lanmour pour Zeova par obeir li. Byensir, dan sak sa bann domenn, nou bezwen servi nou konsyans, me premyerman e pli enportan ankor nou konsyans i bezwen ganny gide par bann standar Bondye an rapor avek kondwit ki’n ganny enspire dan Labib. Sa trwa fason ki nou kapab demontre Zeova ki nou kontan pour obeir li i: (1) Nou kontan bann ki Zeova i kontan, (2) nou respekte lotorite e (3) nou fer zefor pour reste prop oubyen pir devan Bondye.
Kontan bann ki Zeova i kontan
11. Akoz ki nou devret kontan bann ki Zeova i kontan?
11 Premyerman, nou bezwen kontan bann ki Zeova i kontan. Kot i konsern frekantasyon, dimoun i parey leponz. Nou annan sa tandans pour abzorb oubyen aksepte nenport kwa ki otour nou. Nou Kreater i konn tre byen ki pour bann imen enparfe, frekantasyon i kapab swa vreman danzere oubyen itil. Alor, i donn nou sa konsey ki saz: “Sa ki mars avek bann dimoun saz pou vin saz, me sa ki frekant bann enbesil pou mal pase.” (Prov. 13:20; 1 Kor. 15:33) Personn parmi nou pa anvi “mal pase.” Nou tou nou ti a kontan “vin saz.” Zeova pa kapab vin pli saz ki i deza ete e personn pa pou zanmen kapab fer li vin koronpi. Toudmenm i kit en zoli legzanp pour nou an rapor avek frekantasyon. Zis mazin sa, lekel parmi bann imen enparfe ki Zeova i swazir konman son bann zanmi?
12. Ki kalite zanmi ki Zeova i swazir?
12 Zeova ti refer avek patrias Abraam konman “mon zanmi.” (Iza. 41:8) Sa zonm in kit en legzanp remarkab en dimoun ki ti fidel, drwat, e obeisan. I ti en zonm ki ti vreman annan lafwa. (Zak 2:21-23) Sanmenm sa kalite zanmi ki Zeova i swazir. Ozordi i rod sanmenm sa bann kalite dimoun pour vin son zanmi. Si Zeova i swazir sa bann kalite zanmi, pa i vreman enportan ki nou osi nou byen swazir nou zanmi e ki nou mars avek bann ki saz pour nou vin saz?
13. Kan nou pe swazir nou bann zanmi, kwa ki kapab ed nou pour fer en bon swa?
13 Kwa ki kapab ed ou pour fer bann bon swa kan ou pe swazir ou zanmi? Kan ou egzamin bann legzanp dan Labib, sa i kapab donn ou sa lankourazman pour fer parey. Konsider sa lanmitye ki ti egziste ant Rit ek son belmer Naomi, sa enn ant David ek Yonatann oubyen ant Timote ek Pol. (Rit 1:16, 17; 1 Sam. 23:16-18; Fili. 2:19-22) Kwa ki ti fer zot reste bann zanmi pros? Sa i akoz sa bann lanmitye ti baze lo sa lanmour senser ki zot ti annan pour Zeova. Eski ou kapab trouv bann zanmi ki kontan Zeova parey ou, ou kontan li? Asire ki dan kongregasyon ou kapab trouv sa bann kalite zanmi. Sa bann kalite zanmi pa pou fer ou fer bann keksoz ki pou fer ou mal pase dan en sans spirityel. O kontrer, zot pou ed ou pour obeir Zeova, progrese spirityelman e pour les lespri sen gid ou. (Lir Galat 6:7, 8.) Zot pou ed ou reste dan lanmour Bondye.
Respekte lotorite
14. Ki fakter ki souvan fer li difisil pour nou respekte lotorite?
14 Sa dezyenm fason ki nou demontre nou lanmour pour Zeova i annan pour fer avek lotorite. Nou bezwen respekte lotorite. Akoz ki parfwa sa i kapab difisil pour nou fer? En rezon i akoz bann ki annan lotorite i enparfe. Deplis, nou osi nou enparfe. Nou lalit avek sa tandans pour rebele ki nou’n ne avek.
15, 16. (a) Akoz i enportan pour nou respekte bann ki Zeova in konfye sa responsabilite pour pran swen avek son pep? (b) Ki leson enportan nou aprann avek lafason ki Zeova ti vwar rebelyon ki bann Izraelit ti fer kont Moiz?
15 Alor, petet ou pe mazinen, ‘Si i sitan difisil pour nou respekte lotorite, akoz ki nou bezwen fer li?’ Larepons i annan pour fer avek sa kestyon ki ti ganny souleve konsernan souvrennte. Lekel ki ou pou swazir konman ou souvren oubyen ou dirizan? Si nou swazir Zeova konman nou Souvren, nou bezwen respekte son lotorite. Si nou pa respekte son lotorite, eski nou kapab dir ki i nou Dirizan? Deplis, Zeova i normalman egzers son lotorite atraver bann imen enparfe ki i konfye sa responsabilite pour pran swen avek son pep. Si nou rebel kont sa bann imen, ki mannyer Zeova pour vwar nou aksyon?—Lir 1 Tesalonisyen 5:12, 13.
16 Par egzanp, kan bann Izraelit ti konplent e rebel kont Moiz, pour Zeova i ti konmsi zot ti pe rebel kont li. (Nom. 14:26, 27) Bondye pa’n sanze. Si zanmen nou rebel kont bann ki i’n donn lotorite, an realite nou pe rebel kont li!
17. Ki bon kalite latitid nou devret fer zefor pour devlope anver bann ki annan lotorite dan kongregasyon?
17 Zapot Pol i fer resorti sa bon kalite latitid ki nou bezwen devlope anver bann ki’n ganny konfye avek responsabilite dan kongregasyon. I ti ekrir: “Obei zot bann dirizan e swiv zot lord; parski zot pe kontinyelman vey lo zot lam, konman bann dimoun ki bezwen rann kont lo zot size. Les zot fer zot travay dan lazwa, e non pa dan lapenn ki pa pou anmenn okenn lavantaz pour zot.” (Ebr. 13:17) I vre ki i demann en kantite zefor lo nou par pour nou devlop en leker obeisan e aprann annan en latitid pour soumet. Me pa oubliye ki nou pe travay pour reste dan lanmour Bondye. Eski pa i vo lapenn pour fer tou nou zefor pour atenn sa lobzektif?
Reste prop devan Zeova
18. Akoz ki Zeova i anvi nou reste prop?
18 Sa trwazyenm fason ki nou demontre nou lanmour pour Zeova i ler nou fer zefor pour reste prop devan li. Normalman bann paran i fer bokou zefor pour fer sir ki zot zanfan i prop. Akoz? En rezon se ki lapropte i esansyel pour byennet en zanfan e osi pour ki i an bonn sante. Deplis, si en zanfan i prop, sa i reflekte an byen lo son fanmir. Sa lanmour ek latansyon ki son paran i donn li i aparan. I pour sa menm rezon ki Zeova i anvi ki nou prop. I konnen ki lapropte i esansyel pour nou byennet. I osi konnen ki kan nou prop sa i reflekte an byen lo li, nou Papa dan lesyel. Sa i annan en gran lenportans, akoz dimoun i kapab ganny atire anver sa Bondye ki nou servi ler zot rekonnet ki nou diferan parmi sa kantite dimoun dan sa lemonn koronpi.
19. Ki mannyer nou konnen ki lapropte fizik i enportan?
19 Dan ki domenn ki nou bezwen reste prop? An realite, dan tou laspe nou lavi. Dan lepase an Izrael, Zeova ti fer kler avek son pep ki lapropte fizik ti esansyel. (Lev. 15:31) Lalwa Moiz ti abord bann size ki ti annan pour fer avek en bon kondisyon lizyenn, par egzanp anter lasel, lav vesel, lav lanmen, lipye ek lenz. (Egz. 30:17-21; Lev. 11:32; Nom. 19:17-20; Det. 23:13, 14) Sa ti rapel bann Izraelit ki Zeova zot Bondye, i sen, sa i vedir ki i “prop,” “pir” e “sakre.” Alor bann serviter sa Bondye ki sen, i bezwen sen zot osi.—Lir Levitik 11:44, 45.
20. Dan ki domenn ki nou bezwen reste pir?
20 Alor, nou bezwen prop pa zis an deor me anndan osi. Nou bezwen fer zefor pour gard nou panse prop. Nou bezwen kontinyen fidelman viv an armoni avek standar Zeova pour nou reste pir moralman, malgre pwennvi sa lemonn otour nou lo sèks in degrade. Pli enportan ankor, annou determinen pour gard nou ladorasyon pir par evite ki fo larelizyon i kontamin nou ladorasyon dan okenn fason. Annou touzour gard antet sa lavertisman dan sa parol enspire ki’n ganny rikorde dan Izai 52:11: “Ale, ale, sorti laba, pa tous nanryen enpir, sorti parmi li, gard zot lekor pir.” Ozordi osi, nou kapab reste pir spirityelman si nou menm evite tous sa ki nou Papa dan lesyel i vwar konman bann keksoz ki enpir dan domenn relizye. Par egzanp, se pour sa menm rezon ki nou fer atansyon pour evite partisip dan bann selebrasyon fo larelizyon ek bann lafet ki sitan popiler dan sa lemonn ozordi. I vre ki i pa fasil pour reste pir. Me pep Zeova i fer zot mye pour fer sa, akoz sa i ed zot reste dan lanmour Bondye.
21. Ki mannyer nou kapab fer sir ki nou pou reste dan lanmour Bondye?
21 Zeova i anvi ki nou reste dan son lanmour pour touzour. Me sakenn de nou endividyelman i bezwen fer sir ki nou fer nou mye pour reste dan lanmour Bondye. Nou kapab fer sa par swiv legzanp Zezi e prouv nou lanmour pour Zeova par obeir Son bann komannman. Si nou fer sa, nou asire ki nanryen “pa pou zanmen kapab separ nou avek lanmour Bondye dan Kris-Zezi nou Senyer.”—Rom. 8:38, 39.
Eski ou rapel?
• Ki mannyer nou konsyans i kapab ed nou pour reste dan lanmour Bondye?
• Akoz nou devret kontan bann ki Zeova i kontan?
• Akoz i enportan pour respekte lotorite?
• Ki lenportans lapropte i annan pour pep Bondye?
[Kestyon]
[Box/Picture on page 20]
EN PIBLIKASYON KI ANKOURAZ POUR ANNAN BON KONDWIT
Pandan progranm lasanble distrik 2008/2009 en liv 224-paz ki annan pour tit “Reste dan lanmour Bondye” ti ganny lanse. Ki bi sa nouvo liv? I’n ganny fer pour ed bann Kretyen pour konn e kontan standar Zeova, i konsantre prensipalman lo kondwit bann Kretyen. En letid o profon dan sa liv “Reste dan lanmour Bondye” pou ranforsi nou konviksyon ki viv an armoni avek bann standar Zeova i sa pli bon fason pour viv la konmela e i anmenn ver lavi eternel alavenir.
An plis ki sa, sa liv in ganny fer pour ed nou vwar ki obeir Zeova pa en fardo. O kontrer, i en fason pour montre Zeova ki kantite nou kontan li. Alor, sa liv pou pous nou pour demann nou lekor, ‘Akoz ki mon obeir Zeova?’
Kan serten i fer sa fot pour sorti dan lanmour Zeova, normalman sa i annan pour fer avek zot kondwit me pa avek lansennyman. Pa i enportan alor, pour nou ranforsi nou lanmour ek lapresyasyon pour bann lalwa ek prensip ki Zeova in donn nou pour gid nou dan nou lavi tou le zour! Nou konvenki ki sa nouvo piblikasyon pou ed bann mouton Zeova dan lemonn antye pour reste determinen pour fer sa ki byen, pour prouve ki Satan i en manter e parlao tou pour reste dan lanmour Bondye!—Zid 21.