Valer ekstraordiner ki lenstriksyon sorti kot Zeova i annan
Valer ekstraordiner ki lenstriksyon sorti kot Zeova i annan
“Mon konsider tou keksoz konpletman konman en pert, akoz sa valer bokou pli siperyer ki annan dan konnesans mon Senyer, Kris Zezi.”—FILI. 3:8.
1, 2. Ki swa ki serten Kretyen in fer e akoz?
DEPI byen zenn, Robert ti travay vreman byen lekol. Kan i ti annan zis wit an, enn son bann ansennyan ti vizit li kot son lakour espesyalman pour dir li ki i annan sa potansyel pour akonplir nenport kwa ki i anvi dan son lavi. I ti dir ki i ti a swete ki en zour i ti a vin en dokter. Rezilta ki i ti gannyen dan lekol segonder ti fer li kalifye pour antre dan nenport parmi bann pli gran liniversite dan son pei. Me Robert ti swazir pour les pase sa ki bokou dimoun ti konsider konman en loportinite rar dan lavi pour li kapab pourswiv son lobzektif pour antreprann servis pionye ordiner.
2 Parey Robert, plizyer Kretyen, zenn konman vye, i ganny sa loportinite pour reisi dan sa lemonn ozordi. Serten i swazir pour pa servi tou loportinite ki zot gannyen, zis pour zot kapab pourswiv bann lobzektif spirityel. (1 Kor. 7:29-31) Kwa ki motiv bann Kretyen parey Robert pour volonterman travay dir pour pres sa bon nouvel? Rezon prensipal i sa lanmour ki zot annan pour Zeova e an plis ki sa zot apresye sa valer ekstraordiner ki lenstriksyon sorti kot Zeova i annan. Eski resaman ou’n mazinen ki mannyer ou lavi ti pou kapab ete si ou pa ti’n aprann laverite? Kan nou reflesir lo serten sa bann benediksyon merveye ki nou’n gannyen akoz nou’n ganny ansennyen par Zeova, sa pou ed nou pour kontinyen demontre lapresyasyon pour sa bon nouvel e pour partaz li avek devouman avek lezot.
I en privilez pour ganny ansennyen par Bondye
3. Akoz nou kapab asire ki Zeova i pare pour ansenny bann imen enparfe?
3 Lefet ki Zeova i bon, i pare pour ansenny bann imen enparfe. Dan en profesi konsernan bann Kretyen swazir, Izai 54:13 i dir: “Tou ou bann garson pou ganny ansennyen par Zeova e lape ou bann garson pou annabondans.” An prensip, sa bann parol, i osi aplik pour “lezot mouton” Kris. (Zan 10:16, NW) Sa profesi ki pe ganny akonplir dan nou letan i montre nou ki sa i vre. Dan en vizyon Izai ti vwar dimoun sorti dan tou nasyon pe al ver vre ladorasyon. I dekrir zot konman bann dimoun ki pe dir avek kanmarad: “Annou mont lo montanny Zeova, kot lakaz Bondye Zakob; e i pou enstrir nou konsernan son semen, e nou pou mars dan son santye.” (Iza. 2:1-3) Pa i en privilez pour ganny ansennyen par Zeova!
4. Ki Zeova i ekspekte avek bann ki i ansennyen?
4 Ki mannyer nou kapab vin parmi sa bann ki benefisye avek lenstriksyon sorti kot Zeova? Sa keksoz prensipal se ki en dimoun i bezwen annan limilite e pare pour ganny ansennyen. Psalmis David ti ekrir: “Zeova i bon e drwat. . . . I pou ansenny bann ki annan limilite son semen.” (Ps. 25:8, 9) Zezi ti osi dir: “Mon Papa, Senyer lesyel ek later, mon rann ou glwar akoz ou’n kasyet sa bann keksoz avek bann malen ek bann entelizan e ou’n revel zot avek bann pti zanfan.” (Lik 10:21) Eski ou pa santi ou atire anver en Bondye ki “donn son lagras sa ki annan limilite”?—1 Pyer 5:5.
5. Kwa ki’n fer li posib pour nou ganny en konnesans egzakt lo Bondye?
5 Konman bann serviter Zeova, eski nou kapab dir ki se par nou prop abilite oubyen lasazes ki nou’n konn laverite? Non. Annefe, lo nou menm nou pa ti pou zanmen arive ganny en konnesans egzakt lo Bondye. Zezi ti dir: “Personn pa kapab vin kot mwan, si mon Papa ki’n anvoy mwan, pa atir li kot mwan.” (Zan 6:44) Zeova pe atir bann dimoun ki parey bann mouton, setadir “bann keksoz presye sorti dan tou nasyon,” par mwayen sa travay predikasyon e par mwayen lespri sen. (Aga. 2:7) Eski pa ou rekonesan ki ou enn parmi sa bann ki Zeova in atir ver son Garson?—Lir Zeremi 9:23, 24. *
Lenstriksyon sorti kot Bondye i sanz nou lavi pour le meyer
6. Ki lefe remarkab i kapab annan lo bann dimoun kan zot ganny sa ‘konnesans lo Zeova’?
6 Par servi bann zoli parol ki kree en portre dan nou lespri, profesi Izai i dekrir sa sanzman dan personnalite bann imen ki pe arive dan nou letan. Bann dimoun ki avan sa ti vyolan in vin bann dimoun ki viv anpe avek lezot. (Lir Izai 11:6-9.) * Bann ki ti annan laenn pour kanmarad akoz diferan ras, nasyonalite, tribi oubyen en lot kiltir in aprann pour viv ansanm dan linite. Dan en sans senbolik zot in “forz zot lepe an pyos.” (Iza. 2:4) Ki rezon par deryer sa bann sanzman remarkab? Dimoun in ganny ‘konnesans lo Zeova’ e zot in met li an pratik dan zot lavi. Menm si bann serviter Bondye i enparfe, zot form sa vre lasosyasyon frer ek ser dan lemonn antye. Lefet ki en kantite dimoun sorti dan diferan pei i aksepte sa bon nouvel e sanz zot lavi pour le meyer, sa i montre ki sa lenstriksyon sorti kot Bondye i annan en valer ekstraordiner.—Mat. 11:19.
7, 8. (a) Ki serten sa bann ‘fo rezonnman’ ki lenstriksyon sorti kot Zeova i ed dimoun pour rezete? (b) Kwa ki montre ki lenstriksyon sorti kot Zeova i loue li?
7 Zapot Pol ti konpar sa travay predikasyon ki bann serviter Bondye i fer konman en batay spirityel. I ti ekrir: “Bann zarm ki nou pe servi dan nou lalit i pa zarm ki zonm i servi, me bann zarm ki annan pisans Bondye e ki kapab detri bann kan lennmi. Nou detri tou bann [fo] rezonnman, ek tou lopozisyon lorgey kont konnesans Bondye.” (2 Kor. 10:4, 5) Ki serten ‘fo rezonnman’ ki lenstriksyon sorti kot Zeova i liber bann dimoun avek? Zis pour mansyonn detrwa legzanp, i annan sa fardo ki bann fo lansennyman, siperstisyon ek filozofi imen i mete lo zot. (Kol. 2:8) Lenstriksyon sorti kot Zeova i ed bann dimoun pour sirmont bann move labitid e pour devlop bann kalite ki fer plezir Bondye. (1 Kor. 6:9-11) I fer annan en pli bon lavi fanmir. I donn bann ki napa lespwar en vre bi dan lavi. Se sanmenm sa kalite lenstriksyon ki nou bezwen ozordi.
8 Enn parmi sa bann kalite ki Zeova i ed dimoun pour devlope i lonnekte, zis parey sa leksperyans swivan i montre. (Ebre 13:18) En madanm dan Lenn ti aksepte en letid Labib e avek letan i ti fer progre e vin en proklanmater. En zour kan i ti pe retourn kot li apre ki i ti’n sorti travay lo en proze konstriksyon Lasal Rwayonm, i ti anmas en lasenn annor lavaler wit san dolar Ameriken pros avek en stasyon bis. Menm si i ti pov, i ti anmenn sa lasenn kot kordgard pour zot rode lekel son met. Sa zofisye lapolis ti etonnen ki sa madanm ti pe fer sa! Plitar, en lot zofisye ti demann li: “Akoz ou pa ti pran sa lasenn pour ou?” I ti eksplik zot: “Mon’n sanze akoz mon’n etidye Labib. Aprezan mon en dimoun onnet.” Tre enpresyonnen, i ti dir avek sa ansyen ki ti akonpanny sa ser kot kordgard: “I annan plis ki 38 milyon dimoun dan sa rezyon. Si ou kapab ed dis dimoun pour vin parey sa madanm, ou pou’n akonplir bokou.” Kan nou mazin sa kantite milyon dimoun ki’n sanz zot lavi pour le meyer gras a sa lenstriksyon ki sorti kot Zeova, eski pa nou annan plizyer rezon pour loue li?
9. Ki mannyer i posib pour dimoun fer bann gran sanzman dan zot lavi?
9 Sa pouvwar ki Parol Bondye i annan pour sanz dimoun, ansanm avek sa led ki Zeova i fourni atraver son lespri sen, i permet dimoun pour fer bann gran sanzman dan zot lavi. (Rom. 12:2; Gal. 5:22, 23) Kolosyen 3:10, i dir: “Zot in pran natir nouvo: natir zonm nouvo ki tou letan son kreater, Bondye, pe renouvle dan vre konnesans pour nou resanble li parfetman.” Sa mesaz ki ganny trouve dan Parol Bondye, i annan sa abilite pour revel sa ki en dimoun i ete anndan, i kapab sanz fason ki en dimoun i panse e menm lafason i santi lo serten keksoz. (Lir Ebre 4:12.) Kan en dimoun i ganny en konnesans egzakt lo Lekritir e i viv son lavi an armoni avek bann standar Zeova ki drwat, i kapab vin zanmi Bondye e ganny sa lespwar pour viv pour touzour.
Zeova i prepar nou pour lavenir
10. (a) Akoz zis Zeova ki kapab prepar nou pour lavenir? (b) Ki gran sanzman ki pou afekte limanite byento?
10 Zis Zeova ki kapab ed nou pour prepar nou pour lavenir akoz i konnen ki pou arive byento. Se li ki deside ki mannyer lavenir limanite pou ete. (Iza. 46:9, 10) Profesi Labib i revele ki sa “gran zour Zeova i pros.” (Tsef. 1:14) An rapor avek sa zour, sa parol dan Proverb 11:4 pou vin vre: “Bann keksoz valer pa pou servi dan nanryen zour firer, me ladrwatir li menm pou delivre dan lanmor.” Kan sa moman pou arive pour Zeova egzekit son zizman lo lemonn Satan, sa ki pou vreman konte se si nou annan laprouvasyon Bondye. Larzan pou napa okenn valer. An rapor avek sa, Ezekyel 7:19 i dir: “Dan semen zot pou zet zot larzan, e zot lor pou vin en keksoz degoutan.” Vi ki nou konnen ki sa pou arive, sa i kapab ed nou pour azir avek lasazes la konmela menm.
11. Dan ki fason lenstriksyon sorti kot Zeova i ed nou pour prepar pour lavenir?
11 En fason remarkab ki lenstriksyon sorti kot Zeova i prepar nou pour sa zour Zeova ki pe vini, i par ed nou pour byen etablir nou bann priyorite. Zapot Pol ti ekrir Timote: “Pour bann ki posed larises dan sa monn mon rekomann zot ki zot pa annan lorgey, dir zot pa met zot lesperans dan sa bann larises enserten, me met lesperans dan Bondye.” Menm si nou napa en kantite larzan, nou kapab benefisye avek sa konsey ki’n ganny enspire par Bondye. Ki sa i enplike? Olye fer zefor pour ganny bann keksoz materyel, nou devret fer zefor “pour fer sa ki byen” e fer ki nou “larises i konsist an bonn aksyon.” Kan nou met bann keksoz spirityel dan premye plas dan nou lavi, nou pe “anmas en bon e solid trezor pour lavenir.” (1 Tim. 6:17-19) En dimoun ki annan sa kalite leta lespri sakrifis i montre ki i annan bon zizman, parski parey Zezi ti dir, “ki i pou servi en dimoun si i ganny lemonn antye e i perdi son lavi?” (Mat. 16:26, 27) Avek zour Zeova ki pe aprose antet, i byen pour sakenn de nou mazin lo sa bann kestyon: ‘Kote ki mon pe anmas trezor? Eski mon lesklav Bondye oubyen lesklav Larises?’—Mat. 6:19, 20, 24.
12. Akoz ki nou pa devret dekouraze si serten pa kontan nou travay predikasyon?
12 Sa travay pli enportan parmi sa bann bon travay pour bann Kretyen ki ganny fer resorti dan Parol Bondye i sa travay pour pres lo Rwayonm e fer disip ki sov lavi. (Mat. 24:14; 28:19, 20) Parey i ti le ka dan premye syek, serten i kapab pa kontan nou travay predikasyon. (Lir 1 Korentyen 1:18-21.) Me sa pa fer nou mesaz perdi son valer e i pa diminyen sa lenportans pour donn tou dimoun sa loportinite pour krwar dan sa mesaz kan i ankor annan letan. (Rom. 10:13, 14) Anmezir ki nou ed lezot benefisye avek sa lenstriksyon sorti kot Zeova nou pou ganny bokou benediksyon.
Zeova i beni son bann serviter kan zot fer sakrifis
13. Ki sakrifis zapot Pol ti fer pour sa bon nouvel?
13 Avan ki i ti vin en Kretyen, zapot Pol ti pe ganny formen pour li reisi dan sa sistenm Zwif. I tre probab ki kan i ti annan pa plis ki 13-z-an, i ti kit lavil Tars kot i ti grandi pour al Zerizalenm pour ganny formen par Gamalyel en profeser Lalwa ki ti byen ganny respekte. (Akt 22:3) Avek letan, Pol ti konmans fer pli byen ki tou son bann kontanporen e si i ti’n kontinyen sa kour i tre probab ki i ti pou’n ganny en pozisyon enportan dan larelizyon Zwif. (Gal. 1:13, 14) Kan i ti aksepte sa bon nouvel e i ti konmans prese, i ti kit tousala deryer. Eski Pol ti regrete sa swa ki i ti’n fer? Non. Annefe, i ti ekrir: “Mon konsider tou keksoz konpletman konman en pert, akoz sa valer bokou pli siperyer ki annan dan konnesans mon Senyer, Kris Zezi. Akoz li, mon’n rezet tou, mon konsider tousala konman salte, pour mwan kapab ganny Kris.”—Fili. 3:8.
14, 15. Ki kalite benediksyon nou gannyen lefet ki nou pe ‘travay ansanm avek Bondye’?
14 Parey Pol, bann Kretyen ozordi i fer sakrifis pour zot kapab pres sa bon nouvel. (Mark 10:29, 30) Eski nou pe mank keksoz ler nou fer sa? I annan bokou lezot dimoun ki annan sa menm santiman ki Robert, ki’n ganny mansyonnen o konmansman, ler i dir: “Mon napa okenn regre. Servis aplentan in anmenn bokou lazwa ek satisfaksyon pour mwan e in permet mwan ‘goute e vwar ki mannyer Zeova i bon.’ Sak fwa ki mon ti sakrifye bann keksoz materyel pour ki mon kapab pourswiv bann lobzektif spirityel, Zeova ti touzour beni mwan plis ki sa ki mon ti’n sakrifye. I konmsi mon’n zis gannyen me mon pa’n vreman fer okenn sakrifis!”—Ps. 34:8; Prov. 10:22.
15 Si aprezan i fer en pe letan depi ki ou pe prese e ansenny dimoun, san dout ou osi ou’n ganny sa loportinite pour goute e vwar ki mannyer Zeova i bon. Eski in annan bann moman kot ou’n santi led son lespri sen anmezir ki ou ti pe koz konsernan sa bon nouvel avek lezot? Eski ou’n vwar fason ki lezot in reazir anmezir ki Zeova ti tous zot leker pour ki zot ekout atantivman sa mesaz? (Akt 16:14) Eski Zeova in ed ou pour sirmont bann lobstak, petet par kree plis loportinite pour ou fer plis dan predikasyon? Eski i’n siport ou dan bann moman difisil, kot sa in permet ou pour kontinyen servi li menm kan ou ti santi ki ou lafors ti pe diminyen? (Fili. 4:13) Kan nou personnelman santi ki Zeova pe ed nou anmezir ki nou fer sa travay predikasyon, i vin pli reel pour nou e nou santi nou menm pli pros avek li. (Iza. 41:10) Eski pa i en benediksyon lefet ki nou enn parmi sa bann ki pe ‘travay ansanm avek Bondye’ dan sa gran travay pour propaz lenstriksyon ki sorti kot Zeova?—1 Kor. 3:9.
16. Ki mannyer ou santi an rapor avek sa zefor ek sakrifis ki ou fer pour propaz lenstriksyon ki sorti kot Zeova?
16 Bokou dimoun ti a kontan akonplir en keksoz ki annan en gran lefe diran tou zot lavi. Nou vwar ki menm bann lakonplisman remarkab dan sa lemonn i souvan ganny oubliye deswit apre. Parkont, sa travay ki Zeova pe akonplir dan nou letan an rapor avek sanktifikasyon son non san dout pa pou ganny oubliye dan listwar pep Bondye me i pou ganny rapele pour touzour. (Prov. 10:7; Ebr. 6:10) Fotespere ki nou seri sa privilez ki nou annan pour partisip dan sa travay pour propaz lenstriksyon ki sorti kot Zeova ki pa pou zanmen ganny oubliye dan listwar.
[Not anba lo paz]
^ par. 5 Zeremi 9:23, 24: “La sa ki Zeova in dir: ‘Les sa enn ki annan lasazes pa vant son lekor akoz son lasazes e sa zonm for pa vant son prop lekor akoz son lafors. Les sa zonm ris pa vant son lekor akoz son larises. Les sa enn ki pe vant son lekor, vant son lekor akoz sa bann keksoz. Akoz i annan bon zizman ek konnesans lo mwan, ki mwan mon Zeova, sa Enn ki pe demontre labonte leker, lazistis ek ladrwatir lo later; parski mon vreman pran plezir dan sa bann keksoz,’ la sa ki Zeova i dir.”
^ par. 6 Izai 11:6-9: “E lelou pou vreman reste avek en pti mal mouton pour en serten letan, e en leopar pou dormi o bor en pti kabri. En pti bef, en zenn lyon for, ek bann zannimo ki ganny byen nouri, zot tou zot pou ansanm; e en pti garson pou gid zot. En bef ek lours pou manz ansanm; zot piti pou dormi ansanm. Menm en lyon pou manz lapay zis parey en toro. En pti baba pou sirman zwe lo trou kobra; e lo trou en serpan anpwazonnen en pti zanfan ki’n aret tete pou met son lanmen. Zot pa pou fer okenn keksoz mal oubyen koz okenn destriksyon dan tou mon montanny sen, akoz later pou vreman ranpli avek konnesans Zeova zis parey delo i kouver lanmer.”
Ki ou pou reponn?
• Ki Zeova i ekspekte avek bann ki i ansennyen?
• Ki mannyer lenstriksyon sorti kot Zeova i sanz lavi bann dimoun pour le meyer?
• Dan ki fason nou ganny beni kan nou ed lezot benefisye avek lenstriksyon sorti kot Zeova?
[Kestyon]
[Portre lo paz 25]
Bann ki ganny ansennyen par Zeova i form sa vre lasosyasyon frer ek ser dan lemonn antye
[Portre lo paz 26]
Pa i en benediksyon lefet ki ou enn parmi sa bann ki pe ‘travay ansanm avek Bondye’?