Lespri sen—Akoz dimoun i konfize?

KI SI sa lespri sen? Sa kestyon i paret ase senp, me pour trouv en senp larepons pour sa kestyon i kapab pa sitan fasil. Lepap Benedict 16 ti dir avek en lafoul Lostrali: “I preski enposib pour ganny en bon konprenezon lo Lespri.”

Sirman i annan en kantite lopinyon ek dout lo sa kestyon ‘Ki si sa lespri sen?’ Sa i serten larepons ki nou souvan tande:

• Lespri sen i en personnaz ki dan bann disip Kris.

• Lespri sen i prezans Bondye an aksyon dan lemonn.

• Lespri sen i trwazyenm personnaz dan Trinite.

Akoz i annan sa konfizyon? Sa konfizyon i egziste depi katriyenm syek N.L. kan serten profeser relizye ti dir ki lespri sen ti en personnaz ki ti egal avek Bondye. Sa par kont pa ti en lide ki ti ganny ansennyen dan Lekritir oubyen par bann premye disip Kris. New Catholic Encyclopedia i eksplike: “Dan Ansyen Testaman, i kler ki Lespri Bondye pa ganny dekrir konman en personnaz . . . Lespri Bondye i senpleman pwisans Bondye.” Sa referans i azoute: “Lamazorite verse dan Nouvo Testaman i dekrir lespri Bondye konman en keksoz me pa konman en personnaz, sa i espesyalman evidan dan sa similarite ki egziste ant lespri ek pwisans Bondye.”

I toutafe normal ki dimoun i vwar li difisil pour mazin pwisans konman en personnaz. Alor, en serve ki’n ganny fer resaman Leta-z-ini i montre ki laplipar dimoun pa aksepte sa lide ki lespri sen i en personnaz oubyen en keksoz vivan. Eski sa ki zot panse i byen? Oubyen eski nou devret krwar bann profeser relizye ki ensiste ki “Lespri Sen i vreman en personnaz separe zis parey Papa ek Garson i separe”?

Pour ganny en larepons ki diny konfyans, nou bezwen verifye Parol Bondye, Labib, ki kapab pli byen dir nou ki si sa lespri sen. Zapot Pol ti ekrir: “Tou Lekritir i enspire par Bondye e i itil pour ansennyen, pour koriz lerer, pour remet drwat.”—2 Timote 3:16.

Akoz ou devret fer zefor pour konn laverite lo lespri sen? Akoz kan ou konn laverite lo lespri sen, sa i kapab ouver semen pour ou ganny led avek Bondye. Eski parfwa ou santi ki ou pa pou kapab kontinyen si ou depan zis lo ou prop lafors? Zezi ti promet son bann disip: “Demande e zot a gannyen . . . Si, zot . . . kapab donn bon keksoz zot zanfan, i annan plis rezon pour ki zot Papa ki dan lesyel pou donn son Lespri Sen tou bann ki demann li?”—Lik 11:9, 13.

Dan bann lartik ki swiv, nou pou les Labib dir nou ki si sa lespri sen. Nou pou osi vwar ki mannyer i kapab motiv nou pour fer sa ki byen dan nou lavi.

[Ekstre lo paz 3]

Labib i dir nou ki si sa lespri sen