Gard ou lazwa dan letan difisil
Gard ou lazwa dan letan difisil
“Tou sa ki pran refiz dan [Zeova] pou rezwir; zot pou kriye avek lazwa pour en letan endefini.”—PS. 5:11.
1, 2. (a) Ki serten keksoz ki kapab fer nou enkyet ozordi? (b) Apard maler ki tou imen i sibir, ki bann vre Kretyen i fer fas avek?
TEMWEN ZEOVA osi i sibir maler ki limanite an zeneral i eksperyanse. Bokou serviter Bondye in vin viktim krim, lager ek lezot lenzistis. Dezas natirel, lapovrete, maladi ek lanmor i anmenn en kantite soufrans. Zapot Pol ti annan rezon ler i ti ekrir: “Nou konnen, annefe, ki ziska aprezan tou lakreasyon Bondye pe soupire e soufer.” (Rom. 8:22) Nou osi rekolte konsekans nou lenperfeksyon. Parey Lerwa David dan lepase, nou kapab dir: “Parski mon bann fot in depas mon latet; zot parey en gro fardo ki tro lour pour mwan.”—Ps. 38:4.
2 Apard maler ki tou imen i sibir, bann vre Kretyen i anmenn en poto martir senbolik. (Lik 14:27) Wi, parey i ti leka avek Zezi, son disip osi i ganny persekite e bezwen siport laenn. (Mat. 10:22, 23; Zan 15:20; 16:2) Alor, i demann bokou zefor ek landirans pour swiv Kris anmezir nou esper benediksyon dan nouvo lemonn.—Mat. 7:13, 14; Lik 13:24.
3. Ki mannyer nou konnen bann Kretyen pa neseserman bezwen eksperyans en lavi soufrans pour zot fer plezir Bondye?
3 Eski sa i vedir ki bann vre Kretyen i viv en lavi ki pa ere e zwaye? Eski i devret annan zis sagrinasyon ek latristes dan nou lavi ziska lafen i arive? I kler ki Zeova i anvi nou ere anmezir nou esper lakonplisman son bann promes. Ase souvan Labib i dekrir bann vre Kretyen konman en pep ere. (Lir Izai 65:13, 14. *) Psonm 5:11 i dir: “Tou sa ki pran refiz dan [Zeova] pou rezwir; zot pou kriye avek lazwa pour en letan endefini.” Wi, i posib pour nou zwaye, annan lape lespri ek lakontantman malgre bann maler otour nou. Annou revwar ki mannyer Labib i kapab ed nou pour siport bann leprev e kontinyen reste zwaye.
Zeova, “sa Bondye ere”
4. Ki mannyer Bondye i santi kan son lavolonte pa ganny respekte?
4 Get legzanp Zeova. Konman Bondye Tou Pwisan, liniver antye i anba son lotorite. I pa mank nanryen e i pa bezwen personn. Me, menm si i annan en kantite pouvwar, sirman Zeova ti dezapwente kan en lanz ti rebele e vin Satan. I ti definitivman annan lefe lo li pli tar kan serten lanz ti zwenn ansanm avek Satan dan sa rebelyon. Mazin osi sa douler ki Bondye ti santi kan Adan ek Ev, sa de travay remarkab dan son kreasyon, ti vir ledo avek li. Depi sa letan, plizyer bilyon zot desandans in rezet lotorite Zeova.—Rom. 3:23.
5. Sirtou kwa ki’n fer Zeova soufer en kantite?
5 Satan i ankor pe rebele, menm plis ankor. Pour apepre 6,000 an, Zeova in vwar bann aksyon idolatri, vyolans, krim ek limoralite seksyel degradan. (Zen. 6:5, 6, 11, 12) Deplis, i’n tann bann mansonz ek parol blasfenm. Parler, menm bann vre adorater Bondye in bles son santiman. Labib i dekrir en sityasyon koumsa dan sa fason: “Tanzantan zot ti rebel kont li dan dezer, zot ti fer li soufer dan dezer! Zot ti teste Bondye plizyer fwa, e zot ti fer soufer Sen Izrael.” (Ps. 78:40, 41) Sa douler ki Zeova i resanti ler son pep i rezet li i vreman for. (Zer. 3:1-10) I kler ki move keksoz i arive e Zeova i soufer en kantite kan zot arive.—Lir Izai 63:9, 10. *
6. Ki mannyer Bondye i fer fas avek bann sityasyon ki anmenn dezapwentman?
6 Par kont, Zeova pa les douler ek dezapwentman anpes li pran aksyon. Kan serten sityasyon ti leve, deswit Zeova in pran aksyon pour minimiz move konsekans sa ki’n arive. I’n osi pran bann mezir ki dir pour lontan, pour ki a lafen di zour son plan i ganny akonplir. Atraver sa bann aksyon pozitif, nou vwar ki Zeova pe esper avek lazwa kan son drwa pour dirize pou ganny zistifye kot son bann serviter fidel pou ganny benediksyon. (Ps. 104:31) Wi, malgre repros ki’n ganny anmennen lo li, Zeova i reste “sa Bondye ere.”—1 Tim. 1:11, NW; Ps. 16:11.
7, 8. Kan keksoz i mars mal, ki mannyer nou kapab imit Zeova?
7 I vre, nou pa kapab konpar nou avek Zeova an rapor avek abilite pour rezourd problenm. Me kantmenm sa, nou kapab imit Zeova ler nou siport nou difikilte. I toutafe normal pour santi serten latristes kan keksoz i mars mal, me nou pa devret reste dan sa kalite leta. Nou’n ganny kree dan resanblans Bondye, alor nou abilite pour reflesir ek lasazes pratik i ed nou pour analiz nou problenm e pran aksyon pozitif ler nou kapab.
8 En fakter enportan ki kapab ed nou fer fas avek problenm dan lavi se pour rekonnet ki serten keksoz i senpleman an deor nou kontrol. Si nou deprimen akoz bann tel keksoz, sa i kapab fer nou pli fristre e perdi sa lazwa ki vin atraver vre ladorasyon. Apre ki nou’n pran bann mezir rezonnab pour rezourd en problenm, i byen pour nou aret tro mazin lo nou bann problenm e konsantre lo lezot keksoz prodiktif ki nou kapab fer. Sa bann resi Labib ki swiv pou montre byen sa pwen.
I enportan pour rezonnab
9. Ki mannyer Ana ti montre ki i ti rezonnab?
9 Egzamin legzanp Ana ki plitar ti vin manman profet Samyel. I ti deprimen akoz i pa ti kapab fer zanfan. I ti ganny sikannen akoz sa. Parler Ana ti telman dekouraze ki i ti zis plere e pa manze. (1 Sam. 1:2-7) Pandan enn son vizit kot sanktyer Zeova, Ana ti “sagren e i ti konmans priy Zeova e pler en kantite.” (1 Sam. 1:10) Apre ki Ana ti’n koz avek Zeova lo son santiman, gran pret Eli ti apros li e dir: “Al anpe, ki Bondye Izrael i fer sa ki ou’n demann li.” (1 Sam. 1:17) Sirman, sa moman Ana ti realize ki i ti’n fer tou sa ki i ti kapab. I pa ti kapab fer zanfan e sa ti an deor son kontrol. Ana ti montre ki i ti rezonnab. Apre sa i ti “al son semen, manze e i ti nepli enkyet.”—1 Sam. 1:18.
10. Ki kalite pwennvi Pol ti annan kan i ti ganny en problenm ki i pa ti kapab rezourd?
10 Zapot Pol osi ti annan menm fason get keksoz kan i ti vwar li dan difikilte. I ti annan en keksoz ki ti pe fer li soufer en kantite. I ti apel sa keksoz “en pikan dan [son] laser.” (2 Kor. 12:7, NW) Nenport kwa sa ti kapab ete, Pol ti fer tou sa ki i ti kapab pour retir sa douler e i ti priy Zeova pour ganny soulazman. Ki kantite fwa Pol ti priy lo sa size? Trwa fwa. Apre trwazyenm fwa, Bondye ti fer Pol konnen ki sa “pikan dan [son] laser” pa ti pou ganny tire par mirak. Pol ti aksepte sa e i ti konsantre lo servi Zeova plennman.—Lir 2 Korentyen 12:8-10.
11. Ki rol lapriyer ek siplikasyon i zwe pour nou kapab fer fas avek difikilte?
11 Sa bann legzanp pa vedir ki nou devret aret priy Zeova lo bann keksoz ki trouble nou. (Ps. 86:7) O kontrer, Parol Bondye i konsey nou: “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan.” Ki mannyer Zeova i reponn sa bann siplikasyon ek demann? Labib i azoute: “Ki lape Bondye ki depas tou konpreansyon imen i ava gard zot leker ek zot lespri dan Kris-Zezi.” (Fili. 4:6, 7) Wi, i kapab ki Zeova pa pou tir nou problenm, me i kapab reponn nou lapriyer par protez nou lespri. Apre ki nou’n priy lo en keksoz, nou kapab realize ki i danzere pour les lenkyetid kontrol nou.
Trouv plezir pour fer lavolonte Bondye
12. Akoz i kapab danzere pour reste dekouraze?
12 Proverb 24:10 i dir: “Eski ou’n montre ou dekouraze dan letan ladetres? Ou lafors pou ptigin.” En lot proverb i dir: “Akoz douler dan leker, lespri i deprimen.” (Prov. 15:13) Serten Kretyen i sitan dekouraze ki zot aret lir Labib e medit lo Parol Bondye. Zot lapriyer i vag e menm zot kapab izol zot avek lezot adorater. I vreman danzere pour reste dekouraze.—Prov. 18:1, 14.
13. Ki serten aktivite ki kapab anpes nou dekouraze e donn nou lazwa?
13 De lot kote, en latitid pozitif i kapab ed nou pour konsantre lo bann laspe dan nou lavi kot nou kapab trouv plezir ek lazwa. David ti ekrir: “O mon Bondye, mon’n pran plezir pour fer ou lavolonte.” (Ps. 40:8) Kan keksoz i mars mal dan nou lavi, nou pa devret aret fer nou bann aktivite spirityel. Anfet, remed pour latristes se pour partisip dan bann aktivite ki anmenn lazwa. Zeova i dir nou ki nou kapab trouv lazwa ek boner kan nou lir son Parol e fouy ladan regilyerman. (Ps. 1:1, 2; Zak 1:25) Dan Lekritir sen, ensi ki dan renyon, nou ganny bann “bon parol” ki ankouraz nou e fer nou leker kontan.—Prov. 12:25; 16:24.
14. Ki lasirans sorti kot Zeova ki kapab donn nou lazwa konmela?
14 Bondye i donn nou en kantite rezon pour nou zwaye. Son promes konsernan delivrans i sirman en gran sours lazwa. (Ps. 13:5) Nou konnen ki malgre sa ki nou pe pas atraver konmela, a lafen di zour Bondye pou rekonpans sa bann ki fer bokou zefor pour rod li. (Lir Eklezyast 8:12. *) Profet Abakouk ti eksprim sa dan en zoli fason kan i ti ekrir: “Menm si pye fig pa fleri e napa rekolt dan pye rezen; wi, menm si travay pye zoliv pa prodwi fri; e later pa prodwi manze; bann mouton i ganny tire dan berkay e napa bef dan park; me tandis ki mwan, mon pou loue Zeova li menm; mon pou zwaye akoz Bondye ki pou sov mwan.”—Aba. 3:17, 18.
“Ere sa pep ki Zeova i zot Bondye!”
15, 16. Nonm serten bon keksoz sorti kot Bondye nou kapab gannyen anmezir nou esper lezot benediksyon a lavenir.
15 Anmezir nou esper bann promes a lavenir, i lavolonte Zeova ki nou rezwir bann bon keksoz ki i’n donn nou. Labib i dir: “Mon’n aprann ki napa nanryen pli byen pour zot ki pour rezwir e fer sa ki byen diran zot lavi; e osi ki tou zonm i devret manze, bwar e vwar rezilta akoz i’n travay dir. Sa i en kado sorti kot Bondye.” (Ekle. 3:12, 13) “Fer sa ki byen” i enplik fer bann bon keksoz anver lezot. Zezi ti dir ki i annan plis lazwa pour donnen ki resevwar. Ler nou demontre labonte anver nou konzwen, zanfan, paran ek lezot fanmir, sa i anmenn bokou satisfaksyon. (Prov. 3:27) Ler nou dous, demontre lospitalite e pardonn nou bann frer ek ser spirityel, sa osi i anmenn bokou lazwa e i fer plezir Zeova. (Gal. 6:10; Kol. 3:12-14; 1 Pyer 4:8, 9) Nou menm ki benefisye kan nou akonplir nou minister avek en leta lespri sakrifis.
16 Sa verse dan Eklezyast ki’n ganny site pli o i koz lo bann plezir lavi parey manze ek bwar. Wi, menm kan nou fer fas avek leprev, nou kapab trouv lazwa dan nenport ki keksoz fizik nou’n kapab gannyen avek Zeova. Deplis, ler nou get en zoli soley kouse, en peizaz manifik, bann pti zannimo pe zwe ansanm ek lezot mervey dan lanatir, tousala pa kout nanryen, me kantmenm sa, i ranpli nou leker avek rekonnesans ek lazwa. Ler nou reflesir lo sa bann keksoz, nou lanmour pour Zeova i vin pli for akoz se Li ki donn tou bon keksoz.
17. Kwa ki pou anmenn soulazman konplet pour nou problenm e kwa ki rekonfort nou antretan?
17 Apre tou, si nou kontan Bondye, obeir son komannman e annan lafwa dan sakrifis Zezi, sa pou soulaz nou avek difikilte ki nou lavi enparfe i anmennen e donn nou lazwa pour touzour. (1 Zan 5:3) Antretan, nou ganny rekonforte pour konnen ki Zeova i okouran konsernan tou keksoz ki fer nou soufer. David ti ekrir: “Mon anvi zwaye e rezwir akoz ou labonte leker, akoz ou’n vwar mon soufrans; ou konnen ki mon dan ladetres.” (Ps. 31:7) Motive par son lanmour pour nou, Zeova pou delivre nou dan maler.—Ps. 34:19.
18. Akoz pep Bondye i devret vreman zwaye?
18 Anmezir nou esper lakonplisman son promes, annou imit Zeova, sa Bondye ere. Annou pa les bann santiman negatif paraliz nou spirityelman. Kan problenm i leve, annou les nou abilite pour reflesir ek lasazes pratik gid nou. Zeova pou ed nou kontrol nou santiman e ed nou pran bann pa neseser pour minimiz konsekans bann moman difisil. Annou trouv plezir dan bann bon keksoz sorti kot li, ki swa fizikman ouswa spirityelman. Si nou reste pros avek Bondye, nou pou kapab rezwir akoz “ere sa pep ki Zeova i zot Bondye!”—Ps. 144:15.
[Not anba lo paz 16]
^ par. 3 Izai 65:13, 14: “La sa ki Souvren Senyer Zeova in dir: ‘Gete! Mon prop serviter pou manze, me zot zot pou lafen. Gete! Mon prop serviter pou bwar, me zot zot pou swaf. Gete! Mon prop serviter pou dan lazwa, me zot zot pou onte. Gete! Mon prop serviter pou kriye avek lazwa akoz zot annan lakontantman dan zot leker, me zot zot pou kriye akoz douler dan zot leker e zot pou irle senpleman akoz depresyon.’”
^ par. 5 Izai 63:9, 10: “Pandan ki zot ti pe pas dan soufrans, sa ti fer li soufer. Son prop mesaze ti sov zot. Dan son lanmour ek konpasyon, li menm i ti aste zot. Dan bann letan byen lontan, se li ki ti lev zot e anmenn zot. Me zot zot ti rebele e fer soufer son lespri sen. Apre sa i ti sanze e vin en lennmi pour zot; i ti fer lager kont zot.”
^ par. 14 Eklezyast 8:12: “Menm si en peser i kapab pe fer sa ki mal san fwa e kontinyen fer sa ki fer li plezir pour en ta letan, pourtan mwan mon konnen ki keksoz pou mars byen pour sa bann ki annan lakrent pour sa vre Bondye, akoz zot ti annan lakrent pour li.”
Ki ou’n aprann?
• Kan pe fer fas avek difikilte, ki mannyer nou kapab imit Zeova?
• Ki mannyer en latitid rezonnab i kapab ed nou fer fas avek difikilte?
• Dan moman difisil, konman nou kapab trouv plezir pour fer lavolonte Bondye?
[Kestyon]
[Portre lo paz 16]
Zeova i soufer ler i vwar sa bann move keksoz ki pe arive
[Portre lo paz 18]
Zeova i ed nou gard nou lazwa