“Anons mesaz Bondye san okenn lafreyer”
“Anons mesaz Bondye san okenn lafreyer”
“Zot ti ranpli avek Sent-Espri e zot ti konmans anons mesaz Bondye san okenn lafreyer.”—AKT 4:31.
1, 2. Akoz nou devret fer bokou zefor pour vin efikas dan minister?
TRWA zour avan son lanmor, Zezi ti dir son bann disip: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” Avan mont dan lesyel, Zezi ki ti’n ganny resisite ti donn lord son bann disip pour ‘fer tou pep vin son bann disip. Ansenny zot pour obei tou sa ki i’n komande.’ I ti promet zot ki i ti pou avek zot toulezour, “ziska lafen.”—Mat. 24:14; 26:1, 2; 28:19, 20.
2 Konman Temwen Zeova, nou partisip aktivman dan sa travay ki ti konmans dan premye syek. Napa en lot travay ki osi enportan ki sa travay predikasyon Rwayonm e fer disip, ki sov lavi. Pa i vreman enportan alor pour nou vin efikas dan nou minister! Dan sa lartik, nou pou vwar ki lefe i annan kan nou les lespri sen gid nou afen ki nou kapab pres avek lardyes oubyen san okenn lafreyer kan nou partisip dan predikasyon. Sa de lezot lartik ki swiv pou montre konman ki lespri sen Zeova i kapab gid nou pour ansenny dan en fason efikas e pres regilyerman.
Nou bezwen annan lardyes
3. Akoz i demann lardyes pour partisip dan predikasyon?
3 Sa travay ki nou’n gannyen avek Bondye pour pres lo Rwayonm i en gran privilez. Par kont, i pa touzour fasil. Serten dimoun i pare pour aksepte sa bon nouvel lo Rwayonm Bondye, me tandis ki bokou lezot, zot parey bann dimoun ki ti viv dan letan Noe. Zezi ti dir ki “zot pa ti pran kont nanryen ziska deliz ti vini e balye zot tou.” (Mat. 24:38, 39) Apre, i annan sa bann ki sikann nou ouswa opoz nou. (2 Pyer 3:3) Nou kapab ganny opoze par sa bann ki annan lotorite, kanmarad lekol ouswa koleg travay oubyen menm nou fanmir pros. An plis ki sa, nou annan nou bann febles personnel parey lakanmizri, ouswa nou per pangar nou ganny rezete. I annan en kantite fakter ki kapab fer li difisil pour nou “koz avek lasirans” oubyen lardyes, kan nou pe anons Parol Bondye. (Efe. 6:19, 20) I demann annan lardyes pour nou kapab persevere kan nou pe koz lo parol Bondye. Me, kwa ki pou ed nou devlop sa?
4. (a) Ki si sa lardyes? (b) Ki mannyer zapot Pol ti ganny kouraz pour koz avek bann Tesalonisyen?
4 Sa mo ki’n ganny tradwir “san okenn lafreyer” dan Akt 4:31, i sorti dan en mo Grek ki vedir lardyes. Lardyes i enplik koz fran e direk. Sa mo i osi donn sa lide kouraz, konfidans e pa per. Lardyes pa vedir koz brit ouswa sovaz. (Kol. 4:6) Menm ki nou annan lardyes, nou osi anvi anpe avek tou dimoun. (Rom. 12:18) Deplis, anmezir nou pres sa bon nouvel lo Rwayonm, nou devret kapab fer ladiferans ant koz avek lardyes e annan bon zizman pour ki nou pa ofans en dimoun san fer ekspre. Wi, pour devlop sa bon kalite lardyes nou pou bezwen devlop lezot kalite ki demann bokou zefor. Sa kalite lardyes pa depan lo nou menm, oubyen si nou annan konfyans dan nou prop lekor. Apre ki zapot Pol ek son bann konpanyon ti’n ganny “maltrete dan lavil Filip,” ki mannyer zot ti “pran kouraz” pour zot kapab koz avek bann dimoun Tesalonik? Pol ti ekrir ki sa ti posib ‘gras a Bondye.’ (Lir 1 Tesalonisyen 2:2. *) Zeova i kapab fer nou lafreyer disparet e donn nou menm kalite lardyes.
5. Ki led Zeova ti donn Pyer, Zan ek lezot disip pour kapab pres san okenn lafreyer?
5 Kan zapot Pyer ek Zan ti ganny kestyonnen avek “bann sef Zwif, bann ansyen ek bann profeser Lalwa,” zot ti reponn: “Zize zot menm devan Bondye, si i byen obei zot plito ki obei Bondye? Kant a [nou, nou] pa kapab aret koz lo keksoz ki nou’n war e tande.” Olye priy Bondye pour zot aret ganny persekite, ansanm avek lezot krwayan, zot ti sipliy Zeova: “Regard menas ki zot in fer, e permet ou bann serviter anons ou mesaz avek lasirans san okenn lafreyer.” (Akt 4:5, 19, 20, 29) Ki mannyer Zeova ti reponn zot lapriyer? (Lir Akt 4:31.) Zeova ti ed zot pour devlop lardyes atraver son lespri sen. Lespri sen Bondye i kapab fer menm zafer pour nou. Alor, ki mannyer nou kapab ganny lespri sen Bondye e les li gid nou dan nou minister?
Konman pour devlop lardyes
6, 7. Ki pli bon fason pour en dimoun ganny lespri sen Bondye? Donn legzanp.
6 Pli bon fason pour ganny lespri sen Bondye, se demann li direkteman. Zezi ti dir bann ki ti pe ekout li: “Si, zot, move konman zot ete, zot kapab donn bon keksoz zot zanfan, i annan plis rezon pour ki zot Papa ki dan lesyel pou donn son Lespri Sen tou bann ki demann li?” (Lik 11:13) Vreman, nou devret kontinyelman priye pour ganny lespri sen. Si serten laspe dan predikasyon parey temwannyaz lo semen, temwannyaz enformel ouswa travay dan teritwar biznes i fer nou per, nou devret priy Zeova pour ganny son lespri sen e demann li pour ed nou devlop sa lardyes ki nou bezwen.—1 Tesa. 5:17.
7 Sanmenm sa ki en ser Kretyen ki apel Rosa ti fer. * En zour kot son travay, en ansenyan lekol ti pe lir en rapor lo en lot lekol konsernan move tretman ki bann zanfan i sibir. Sa ansenyan ti sitan enkyet par sa, ki i ti dir byen for: “Pli ale ki pe arive avek sa lemonn?” Rosa pa ti pou kapab les pase sa loportinite pour rann temwannyaz. Ki i ti fer pour ganny kouraz pour koze? Rosa ti dir: “Mon ti priy Zeova e demann li pour ed mwan atraver son lespri sen.” I ti nobou donn en bon temwannyaz e fer laranzman pour rezwenn e diskit ankor en pe plis lo sa size. Egzamin legzanp en pti fiy senk an ki apel Milane. Milane i reste dan lavil New York. I ti dir: “Avan mon al lekol, nou de manmi nou touzour priy Zeova.” Lo kwa zot priye? Zot priye pour Milane ganny kouraz pour defann son lafwa e koz lo son Bondye. Son manman ti dir: “Sa in ed Milane pour eksplik son pozisyon konsernan lanniverser ek lafet, e pour pa partisipe kan sa bann lokazyon i ganny selebre. Eski pa sa bann legzanp i montre ki lapriyer i en gran led pour kapab pran kouraz?
8. Ki nou aprann avek profet Zeremi konsernan devlop lardyes?
8 Reflesir osi lo sa ki ti ed Zeremi pour annan lardyes. Kan Zeova ti apwent li konman en profet pour bann nasyon, Zeremi ti reponn: “Vreman, mon pa konn koze, akoz mon ankor tro zenn.” (Zer. 1:4-6) Me avek letan, Zeremi ti telman persiste e ensiste dan son predikasyon ki bokou ti vwar li konman en dimoun ki ti anons zis maler. (Zer. 38:4) I ti pres mesaz zizman Zeova avek lardyes pour plis ki 65 an. I ti telman renonmen Izrael pour son kouraz e lefet ki i pa ti per pour prese, ki apepre 600-z-an pli tar kan Zezi ti koz avek lardyes, serten ti krwar ki i ti Zeremi ki ti’n retourn vivan. (Mat. 16:13, 14) Ki mannyer profet Zeremi ki o konmansman ti ezite, ti sirmont son lakanmizri? I ti dir: “Dan mon leker, [parol Bondye] ti parey en dife ki pe brile anndan dan mon lezo, e mon ti fatige gard anndan.” (Zer. 20:9) Wi, parol Zeova ti donn Zeremi lafors e sa ti pous li pour anons mesaz Bondye.
9. Akoz parol Bondye i kapab annan lefe lo nou parey i ti annan lo Zeremi?
9 Dan son let pour bann Ebre, zapot Pol ti ekrir: “Parol Bondye i vivan e i annan pisans. I pli koupe ki en lepe ki koup de kote. I kapab penetre ziska separasyon lam ek lespri, zwentir ek lanmwel lezo. I arive desifre tou dezir ek sekre leker imen.” (Ebr. 4:12) Sa mesaz oubyen parol Bondye i kapab annan lefe lo nou parey i ti leka pour Zeremi. Mazinen toudmenm ki menm si zonm ti ganny servi pour ekrir Labib, pa lasazes zonm ki ladan akoz i’n ganny enspire par Bondye. Dan 2 Pyer 1:21, nou lir: “Parski okenn mesaz profesi pa’n ganny prezante par lavolonte imen, me se Sent-Espri ki’n pous zonm pour anons mesaz Bondye.” Kan nou pran letan pour fer en letid Labib personnel ki o profon, nou lespri i ranpli avek sa mesaz ki ganny enspire par lespri sen. (Lir 1 Korentyen 2:10.) Sa mesaz i kapab “parey en dife ki pe brile” dan nou, dan sa sans ki i pa posib pour nou kit li zis pour nou tousel.
10, 11. (a) Ki mannyer nou devret etidye si nou anvi devlop lardyes pour koze? (b) Nonm omwen en keksoz ou deside fer pour amelyor kalite ou letid personnel.
10 Pour nou letid Labib personnel annan en lefe pwisan lo nou, i devret ganny fer dan en fason ki mesaz Bondye i tous nou leker, setadir sa dimoun ki nou ete anndan. Par egzanp, profet Ezekyel ti ganny en vizyon kot i ti ganny demande pour manz roulo en liv ki ti annan en mesaz pwisan ki ti devret ganny anonse avek en pep ki pa ti apresye sa mesaz. Se konmsi sa mesaz ti bezwen vreman antre dan Ezekyel, i ti devret konpletman aksepte sa mesaz e aprezan i ti pou pli gou pour li anons li, andotmo i ti pou goute parey dimyel.—Lir Ezekyel 2:8–3:4, 7-9. *
11 Nou osi nou dan menm sityasyon avek Ezekyel. Bokou dimoun ozordi i senpleman pa enterese pour tann sa ki Labib i dir. Si nou oule persevere pour anons parol Bondye, i vreman enportan pour nou etidye Lekritir dan en fason ki i pou permet nou pli byen konpran e aksepte sa ki i pe dir. Nou devret annan sa labitid pour etidye regilyerman e non pa ler nou ganny letan. Nou devret annan menm dezir avek sa psalmis ki ti sante: “Les bann parol ki sorti dan mon labous ek refleksyon ki sorti dan mon leker vin en keksoz agreab pour ou, O Zeova mon Ros ek mon Liberater.” (Ps. 19:14) Pa i vreman enportan alor pour nou pran letan e medit lo sa ki nou lir pour ki laverite dan Labib i tous o fon nou leker! Sirman alor, nou bezwen fer bokou zefor pour amelyor kalite nou letid personnel. *
12. Dan ki fason renyon i ed nou pour ganny gide par lespri sen?
12 En lot fason nou kapab benefisye avek lespri sen Zeova i kan nou “rode konman pous kanmarad pour annan lanmour e fer sa ki byen. [E] pa abandonn [nou] lasanble.” (Ebr. 10:24, 25) Si nou fer bokou zefor pour asiste renyon regilyerman, ekout atantivman e aplik sa ki nou aprann, sa i bann bon fason kot nou pe les lespri sen gid nou. Apre tou, eski pa lespri sen Zeova i donn gidans atraver kongregasyon?—Lir Revelasyon 3:6.
Byenfe pour devlop lardyes
13. Ki nou kapab aprann avek sa ki bann Kretyen dan premye syek ti akonplir dan predikasyon?
13 Lespri sen i sa lafors pli pwisan dan liniver e i kapab donn bann imen lafors pour fer lavolonte Zeova. Anba gidans lespri sen, bann Kretyen dan premye syek ti kapab akonplir predikasyon dan en fason ekstraordiner. Zot ti pres sa bon nouvel “dan lemonn antye.” (Kol. 1:23) Kan nou mazinen ki laplipar zot ti bann zonm “senp san gran ledikasyon,” i evidan ki zot ti pe ganny motive par en lafors pli pwisan.—Akt 4:13.
14. Kwa ki pou ed nou pour annan sa lantouzyasm gras a lespri sen?
14 Ler nou viv dan en fason kot nou pe les lespri sen gid nou, sa i motiv nou pour partisip dan minister avek kouraz. Ler nou kontinyelman demann Bondye son lespri sen, etidye personnelman o profon, medit e fer lapriyer lo sa ki nou lir e asiste regilyerman bann renyon kongregasyon, sa i kapab ed nou pour nou ‘ranpli avek lantouzyasm par Lespri.’ Konsernan Apolos, en Zwif ki ti’n ne Alekzandri e ki ti’n ariv Efez, Labib i dir: “Plen avek lantouzyas [“gras a lespri sen,” NW] i ti prese e ansenny egzakteman bann fe konsernan Zezi.” (Akt 18:24, 25) Ler nou “pouse par Lespri,” nou kapab demontre plis lardyes kan nou pres kaz an kaz e kan nou pe fer temwannyaz enformel.—Rom. 12:11.
15. Ki byenfe nou kapab gannyen kan nou koz avek plis lardyes?
15 Rann temwannyaz avek bokou lardyes i annan en bon lefe lo nou. Nou latitid i sanze akoz nou pli byen konpran lenportans ek byenfe nou travay. Nou annan plis lantouzyasm akoz nou ganny plis lazwa kan nou pli efikas dan minister. Nou osi annan plis devouman akoz nou pli konsyan ki sa travay predikasyon i irzan.
16. Ki nou devret fer si nou devouman pour predikasyon in diminyen?
16 Me si i arive ki nou’n perdi nou devouman pour predikasyon ouswa nou pa sitan devoue parey oparavan? Alor, i pou byen pour nou egzamin nou lekor personnelman. Pol ti ekrir: “Egzamin zot lekor pou war si zot pe gard zot lafwa. Teste zot lekor.” (2 Kor. 13:5) Demann ou lekor: ‘Eski mon ankor annan sa menm devouman gras a lespri sen? Eski mon priy Zeova pour ganny son lespri sen? Eski mon lapriyer i montre ki mon pe depan lo li pour fer son lavolonte? Eski dan mon lapriyer mon eksprim mon lapresyasyon pour sa travay ki nou’n gannyen? Eski mon annan en bon labitid letid personnel? Ki kantite letan mon pran pour medit lo sa ki mon lir e tande? Eski mon partisipe dan renyon kongregasyon?’ Si ou reflesir lo bann kestyon koumsa, sa i kapab ed ou pour idantifye ou bann febles dan sa domenn e aziste kot i neseser?
Les lespri Bondye donn ou lardyes
17, 18. (a) Ki nou kapab dir lo rezilta travay predikasyon ozordi? (b) Ki mannyer nou kapab koz “avek lasirans san okenn lanpesman” kan nou pe anons sa bon nouvel lo Rwayonm Bondye?
17 Apre son rezireksyon, Zezi ti dir son bann disip: “Zot pou ranpli avek en pouvwar ler Sent-Espri pou desann lo zot. Alor zot a vin mon bann temwen dan Zerizalenm, dan tou rezyon Zide ek Samari e ziska tou bann landrwa pli elwannyen lo later.” (Akt 1:8) Sa travay ki ti konmanse sa letan i ankor pe ganny fer dan en fason ekstraordiner ozordi. Plis ki set milyon Temwen Zeova pe anons sa mesaz Rwayonm dan plis ki 230 pei. Zot pas pros 1.5 bilyon erdtan sak lannen dan predikasyon. Pa i vreman gou pour partisip avek devouman dan sa travay ki pa pou zanmen ganny repete ankor!
18 Parey dan premye syek, lespri sen Bondye ki pe diriz sa travay predikasyon ki pe ganny fer dan lemonn antye. Si nou swiv gidans lespri sen, dan predikasyon nou pou koz avek “lasirans san okenn lanpesman.” (Akt 28:31) Annou fer tou sa ki nou kapab pour les nou ganny gide par lespri sen anmezir nou anons sa bon nouvel lo Rwayonm Bondye!
[Not anba lo paz]
^ par. 4 1 Tesalonisyen 2:2: “E malgre ki nou ti soufer e ganny maltrete dan lavil Filip avan nou ti ariv kot zot, parey zot konnen nou ti [“pran kouraz gras a nou Bondye,” NW] pour anons zot Levanzil Bondye devan gran lopozisyon.”
^ par. 7 Bann non in sanze.
^ par. 10 Ezekyel 2:8–3:4, 7-9: “‘E ou, o garson zonm, ekout sa ki mon pe dir ou. Pa bezwen vin rebel parey sa lakaz rebel. Ouver ou labous e manz sa ki mon pe donn ou.’ Mon ti konmans vwar e gete, en lanmen ti ganny anvoye ver mwan e dan sa lanmen i ti annan roulo en liv. E i ti pe ouver sa roulo devan mwan e lo devan ek deryer sa roulo bann kantik dey ek sagrinasyon ek leokri ti’n ganny ekrir. Alor i ti dir mwan: ‘Garson zonm, sa ki ou pe vwar, manz li. Manz sa roulo e ale, koz avek pep Izrael.’ Mon ti ouver mon labous, e i ti pe fer mwan manz sa roulo. Apre i ti dir mwan: ‘Garson zonm, ou devret ranpli ou vant, pour ki ou kapab ranpli ou trip avek sa roulo ki mon pe donn ou.’ E mon ti konmans manze, e dan mon labous i ti vin dou parey dimyel. Apre sa, i ti dir mwan: ‘Garson zonm, ale, al parmi pep Izrael e ou devret koz mon bann parol avek zot.’” “Me tandis ki pep Izrael, zot pa pou anvi ekout ou, akoz zot pa anvi ekout mwan; parski tou sa ki parmi pep Izrael zot latet i dir e zot annan leker dir. Gete! Mon’n fer ou figir dir zis parey pour zot i dir e ou fron dir parey zot fron i dir. Mon’n fer ou fron vin parey dyanman, pli dir ki en ros. Ou pa devret annan lafreyer pour zot, ou pa devret per zot lafas, akoz zot en pep rebel.”
^ par. 11 Pour benefisye avek ou lektir ek letid Labib personnel, vwar liv Benefisye atraver Ledikasyon Lekol Minister Teokratik, anba sapit ki annan pour tit “Fer Zefor pour lir byen” e “Letid i anmenn Rekonpans” lo paz 21-32.
Ki ou’n aprann?
•Akoz nou bezwen annan lardyes kan nou pe koz parol Bondye?
•Kwa ki ti ed bann disip dan premye syek pour koz san okenn lafreyer?
•Konman nou kapab devlop lardyes?
•Ki byenfe nou gannyen kan nou devlop lardyes?
[Kestyon]
[Portre lo paz 16]
Ki mannyer paran i kapab ed zot zanfan devlop lardyes?
[Portre lo paz 17]
En lapriyer bref i kapab ed ou annan plis lardyes dan minister