Frer, “senm sa ki fer plezir Lespri” e aksepte bann responsabilite!

“Si i senm sa ki fer plezir Lespri, i pou rekolte sorti kot Lespri, lavi eternel.”—GAL. 6:8.

1, 2. Ki mannyer Matye 9:37, 38 pe ganny akonplir, e ki bezwen sa i kree dan kongregasyon?

OZORDI ou pe vwar bann levennman dan listwar imen ki pa pou zanmen ganny oubliye! En travay mondyal ki Zezi Kri ti koz lo la in deza konmanse e pe kontinyen ganny fer avek en lavites remarkab. I ti dir: “I annan en gran rekolt ki’n pare me napa ase zouvriye. Pour sa rezon, sipliy met rekolt pour anvoy zouvriye.” (Mat. 9:37, 38) Zeova pe reponn bann lapriyer koumsa dan en fason ekstraordiner. Pandan lannen servis 2009, lakantite kongregasyon dan lemonn antye in ogmante sorti 2,031 e pour vin 105,298. Sa i apepre 757 dimoun ki batize sak zour!

² Sa ogmantasyon in kree en bezwen pour annan plis frer kalifye pour ansenny e pran swen avek kongregasyon. (Efe. 4:11) Pandan sa plizyer dizenn lannen ki’n pase, Zeova in apwent bann zonm kalifye pour pran swen avek bezwen son bann mouton e nou annan konfyans ki i pou kontinyen fer sa. Sa profesi ki’n ganny rikorde dan Mika 5:5 i asir nou ki pandan bann dernyen zour, pep Zeova pou annan “set berze” ek “wit dik.” Sa i reprezant sa kantite zonm kapab ki pou pran responsabilite parmi zot.

3. Eksplike ki savedir ‘senm sa ki fer plezir Lespri.’

³ Si ou en frer batize, kwa ki pou kapab ed ou pour aksepte sa bann privilez dan kongregasyon? En fakter enportan i “senm sa ki fer plezir Lespri.” (Gal. 6:8) Sa i enplik viv dan en fason ki pou permet lespri sen Bondye gid ou dan ou lavi. Annou reste determinen pour pa ‘senm sa ki fer plezir natir imen.’ Evite les bann keksoz parey konfor, detant ek divertisman diminyen ou dezir pour fer plis dan servis Bondye. Tou Kretyen i devret “senm sa ki fer plezir Lespri,” e avek letan, bann frer ki fer sa pou kapab kalifye pour ganny bann privilez dan kongregasyon. Sa lartik i espesyalman pour bann frer Kretyen akoz i annan en gran bezwen ozordi pour plis asistan ministeryel ek ansyen. Alor frer, nou ankouraz ou pour fer sa lartik vin size ou lapriyer.

Fer zefor pour kalifye

4, 5. (a) Ki kalite privilez dan kongregasyon bann frer batize i ganny ankouraze pour fer zefor pour gannyen? (b) Ki zefor en frer i merit fer?

⁴ En frer Kretyen pa vin en sirveyan otomatikman. I bezwen fer zefor pour li ganny sa “fonksyon nob.” (1 Tim. 3:1) Sa i enkli servi son bann konpanyon Kretyen par pran swen avek zot bann bezwen avek en leker senser. (Lir Izai 32:1, 2. *) En frer ki pe fer zefor avek en bon motivasyon pa pou en dimoun anbisye. O kontrer, i annan en gran dezir pour ed lezot.

⁵ En frer i kalifye pour vin en asistan ministeryel oubyen en sirveyan ler i fer bokou zefor pour ranpli sa bann kondisyon ki ganny trou ve dan Labib. (1 Tim. 3:1-10, 12, 13; Tit 1:5-9) Si ou en frer batize, demann ou lekor: ‘Eski mon pe partisip plennman dan sa travay predikasyon, e eski mon pe ed lezot pour fer sa? Eski mon pe batir mon bann konpanyon Kretyen par montre en lentere senser dan zot byennet? Eski lezot i konn mwan konman en bon etidyan Labib? Eski mon pe amelyor mon bann komanter? Eski mon pe fer bokou zefor pour desarz bann responsabilite dan kongregasyon ki bann ansyen in konfye mwan?’ (2 Tim. 4:5) Sa bann kestyon i merit ganny konsidere seryezman.

6. Ki sa fakter enportan ki fer en dimoun kalifye pour ganny bann responsabilite dan kongregasyon?

⁶ En lot fason pour ou kalifye e ganny bann responsabilite dan kongregasyon i ler ou “vin for enteryerman” atraver “pouvwar Lespri.” (Efe. 3:16) En dimoun pa ganny elekte pour vin en asistan ministeryel ouswa en ansyen dan kongregasyon. Me i kapab ganny sa privilez ler i progrese spirityelman. Ki mannyer i kapab progrese spirityelman? En fason i par kontinyen “les Lespri diriz [son] lavi” e devlop fri lespri. (Gal. 5:16, 22, 23) Anmezir ki ou montre ki ou annan bann kalite spirityel ki neseser pour ganny lezot privilez e ou aplik bann konsey ki ou gannyen pour amelyor ou bann kalite, “tou dimoun [pou] war ou progre.”—1 Tim. 4:15.

Annan en leta lespri sakrifis

7. Kwa ki enplike dan servi lezot?

⁷ Pour servi lezot i enplik travay dir e i demann en leta lespri sakrifis. Lefet ki bann sirveyan Kretyen i bann berze spirityel, alor zot konsernen avek problenm troupo. Remarke ki mannyer responsabilite ki zapot Pol ti annan pour pran swen avek troupo ti annan lefe lo li. I ti dir avek son bann konpanyon Kretyen Korent: “Mon’n ekrir zot avek en gran sagren e avek en leker lour, e avek larm, non pa pour fer zot tris me pour ki zot santi sa gran lanmour ki mon annan pour zot.” (2 Kor. 2:4) I evidan ki Pol ti pran son travay aker.

8, 9. Donn legzanp sorti dan Labib ki montre ki mannyer bann zonm ti pran swen avek bezwen lezot.

 ⁸ Tou bann zonm ki’n travay dir pour bann serviter Zeova in toultan demontre en leta lespri sakrifis ki disteng zot avek lezot. Par egzanp, nou pa pou zanmen kapab imazin Noe pe dir avek lezot dan son fanmir: ‘Fer mwan konnen letan lars i fini konstrir pour mwan vin avek zot.’ Moiz pa ti dir avek bann Izraelit Lezip: ‘Mon ava zwenn zot kot Lanmer Rouz. Pran semen ki zot krwar pou pli bon pour ariv laba.’ Zozye pa’n zanmen dir: ‘Dir mwan letan miray Zeriko i tonbe.’ Izai pa ti montre ledwa lo personn e dir: ‘La i laba! Anvoy li.’—Iza. 6:8.

⁹ Zezi Kri ti les lespri sen Bondye motiv li e sa i en bon legzanp pour nou. I ti pare pour li aksepte sa responsabilite pour sov bann imen. (Zan 3:16) Pa sa lanmour ki Zezi in demontre par met lentere lezot avan sa ki pour li i pous nou pour demontre sa menm leta lespri sakrifis? En frer ki en ansyen depi lontan ti eksprim son santiman pour kongregasyon par dir: “Parol ki Zezi ti dir avek Pyer: ‘Pran swen avek mon bann mouton,’ i tous mwan bokou. Avek letan, mon’n aprann ki mannyer zis en pti parol ki demontre lanmour oubyen en aksyon ki demontre labonte i kapab ankouraz en dimoun. Pran swen avek kongregasyon i en travay ki mon vreman kontan.”—Zan 21:16.

10. Kwa ki kapab pous en frer Kretyen pour imit legzanp Zezi pour servi lezot?

¹⁰ I pou byen si bann frer batize dan kongregasyon i reflekte latitid ki Zezi ti annan anver kongregasyon kan i ti dir: “Mon a donn zot repo.” (Mat. 11:28) Lafwa dan Bondye e lanmour pour kongregasyon i pous bann frer Kretyen pour fer zefor pour kalifye pour desarz bann responsabilite san mazinen ki i en tro gran sakrifis oubyen i demann tro bokou zefor lo zot par. Me si i annan ki pa santi li motive pour aksepte sa privelez? Eski en frer i kapab devlop sa dezir pour servi dan kongregasyon?

Devlop sa dezir pour servi lezot

11. Ki mannyer en dimoun i kapab devlop sa dezir pour servi lezot?

¹¹ Si ou santi ki ou napa sa abilite oubyen bann kalite pour kalifye pour vin en asistan ministeryel oubyen ansyen, i pou byen pour demann led lespri sen dan lapriyer. (Lik 11:13) Lespri sen Zeova pou ed ou pour fer fas avek nenport lenkyetid ki ou kapab annan dan sa domenn. Sa dezir pour servi lezot i sorti kot Zeova, akoz lespri sen Zeova ki motiv en frer pour fer zefor pour kalifye e apre i donn li lafors pour fer sa servis sakre. (Fili. 2:13; 4:13) Alor, i apropriye pour nou demann Zeova led pour devlop sa dezir pour aksepte sa privilez pour servi lezot.—Lir Psonm 25:4, 5. *

12. Ki mannyer en dimoun i kapab ganny ase lasazes pour li desarz sa bann responsabilite ki i’n ganny konfye?

¹² En Kretyen i kapab deside pour pa aksepte sa privilez akoz i kapab santi ki i pou bezwen depans en kantite letan ek lenerzi pour pran swen avek kongregasyon e menm donn zot latansyon. I kapab osi santi ki i napa sifizaman lasazes pour li desarz sa bann responsabilite. Si sa i leka, i kapab ganny plis lasazes si i fer plis zefor pour etidye Parol Bondye ek bann piblikasyon baze lo Labib. I kapab demann son lekor: ‘Eski mon pe met letan dekote pour etidye Parol Bondye? Eski mon pe demann lasazes dan mon lapriyer?’ Disip Zak ti ekrir: “Si i annan parmi zot ki mank lasazes, ki i demann Bondye e Bondye a donn li parski i donn tou dimoun zenerezman san fer okenn repros.” (Zak 1:5) Eski ou krwar sa parol enspire? Bondye ti reponn lapriyer Salomon par donn li “disernman ek en leker ki saz” pour ed li fer ladiferans ant sa ki byen ek sa ki mal letan i ti pe zize. (1 Rwa. 3:7-14) I vre, ka Salomon ti enn spesyal. Kantmenm sa, nou kapab annan konfyans ki Bondye pou donn lasazes bann  frer ki’n ganny konfye bann responsabilite dan kongregasyon pour zot kapab byen pran swen avek son pep.—Prov. 2:6.

13, 14. (a) Eksplike ki mannyer “lanmour Kris” ti enfliyans Pol. (b) Dan ki fason “lanmour Kris” i merit enfliyans nou?

¹³ En lot fason ki nou kapab devlop sa dezir pour servi lezot i ler nou reflesir o profon lo tou sa ki Zeova ek son Garson in fer pour nou. Par egzanp, egzamin 2 Korentyen 5:14, 15. (Lir.) Ki mannyer “lanmour Kris i kontrol nou”? Lanmour ki Kris in demontre pour nou par ofer son lavi konman en sakrifis dapre lavolonte Zeova i telman remarkab ki nou leker i ganny touse e nou vin pli rekonesan. Pol ti les lanmour Kris kontrol son fason azir. I ti anpes li vin egois e ed li pour servi Bondye ek tou dimoun dan kongregasyon e an deor.

¹⁴ Letan nou medit lo lanmour ki Kris i annan pour bann dimoun, sa i fer nou vin rekonesan. Pour fini kont, nou realize ki i pou vreman mal si nou kontinyen ‘senm sa ki fer plezir nou natir imen’ par pourswiv bann lobzektif egois e viv pour satisfer nou prop dezir. O kontrer, nou pou fer bann sanzman dan nou lavi e met sa travay ki Bondye in donn nou pour fer an premye. Nou ganny pouse pour “servi” nou bann frer ek ser avek lanmour. (Lir Galat 5:13.) Si nou vwar nou lekor parey bann lesklav ki pe travay avek limilite pour bann serviter Zeova ki’n dedye zot lavi avek li, nou pou tret lezot avek dinyite ek respe. Sirman nou pa pou imit leta lespri ki Satan i promote, tel parey kritik ouswa ziz lezot.—Rev. 12:10.

Zefor ki enkli tou lafanmir

15, 16. Ki rol manm fanmir i zwe pour ki en frer i kalifye e servi konman asistan ministeryel oubyen ansyen dan kongregasyon?

¹⁵ Si en frer in marye e i annan zanfan, sityasyon son fanmir pou ganny pran an konsiderasyon letan pe determinen si i kalifye pour vin en asistan ministeryel oubyen en ansyen. Spirityalite ek repitasyon son fanmir osi i ganny pran an konsiderasyon si i pou ganny apwente. Sa i met lanfaz lo rol enportan ki en fanmir i zwe pour siport sa msye ek papa anmezir ki i fer zefor pour kalifye pour vin en asistan ministeryel oubyen ansyen dan kongregasyon.—Lir 1 Timote 3:4, 5, 12.

¹⁶ I fer Zeova plezir letan bann manm dan en fanmir Kretyen i korpere avek kanmarad. (Efe. 3:14, 15) Pour en sef fanmir kapab desarz byen son bann responsabilite dan kongregasyon e diriz son lakour dan en bon fason i bezwen byen balanse. Alor, i enportan pour en ansyen oubyen asistan ministeryel etidye Labib avek son madanm ek zanfan pour ki zot tou zot a kapab benefisye avek sa letan pour ador Bondye an fanmir tou le semenn. I devret partisip dan predikasyon avek zot regilyerman. Pour sa menm rezon, i enportan pour bann manm fanmir korpere avek sa sef lakour.

Eski ou pou servi ankor?

17, 18. (a) Si en frer i nepli kalifye pour desarz bann responsabilite dan kongregasyon, ki i bezwen fer? (b) Ki leta lespri en frer ki ti pe servi konman en asistan ministeryel oubyen en ansyen dan lepase i kapab annan?

¹⁷ Petet ou ti en ansyen oubyen en asistan ministeryel en letan me ou pa pe desarz sa responsabilite pour le moman. Ou kontan Zeova e ou kapab asire ki i ankor enterese avek ou. (1 Pyer 5:6, 7) Eski ou’n ganny demande pour fer detrwa azisteman? Alor i pou byen si ou pare pour admet ou fot e travay lo la avek led Bondye. Pa bezwen gard rankin. Vin saz e  montre en leta lespri pozitif. En ansyen ki ti servi pour bokou lannen me ki’n perdi son privilez dan sa servis ti dir: “Mon ti determinen pour kontinyen asiste renyon, al predikasyon e lir Labib zis parey mon ti fer letan mon ti ankor en ansyen, en lobzektif ki mon ti kapab atenn. Mon ti aprann devlop pasyans akoz mon ti krwar ki i ti pou pran mwan zis enn oubyen de-z-an pour reganny mon privilez, me i ti pran pros set an avan ki mon ti kapab revin en ansyen. Pandan tou sa letan, lankourazman ki mon ti gannyen pour pa arete me pour kontinyen fer zefor ti vreman ed mwan.”

¹⁸ Si ou en frer ki dan sa menm sityasyon parey sa enn ki’n fek ganny dekrir, pa bezwen dekouraze. Reflesir lo fason ki Zeova pe beni ou servis predikasyon ek ou fanmir. Batir ou fanmir spirityelman, al vwar bann dimoun ki malad, e ankouraz bann ki feb. Parlao tou, apresye sa privilez ki ou annan pour loue Bondye e partaz sa bon nouvel lo Rwayonm konman en Temwen Zeova. *—Ps. 145:1, 2; Iza. 43:10-12.

Vwar keksoz dan en lot fason

19, 20. (a) Ki tou bann frer batize i ganny ankouraze pour fer? (b) Ki nou pou egzaminen dan lartik swivan?

¹⁹ I annan plis bezwen ki avan pour annan plis asistan ministeryel ek ansyen. Alor, nou ankouraz tou bann frer batize pour revwar zot sirkonstans e demann zot lekor: ‘Si mon pa en asistan ministeryel oubyen en ansyen, pour ki rezon mon pa pe desarz enn sa bann responsabilite? Les lespri sen Bondye gid ou pour devlop en bon latitid lo sa size vreman enportan.

²⁰ Tou manm dan kongregasyon pou benefisye avek zefor ki zot bann konpanyon Kretyen pe fer avek en bon leta lespri sakrifis. Letan nou fer bann bon aksyon e nou pa egois, nou pou annan sa lazwa ki vin atraver servi lezot e nou pou senm sa ki fer plezir lespri sen Bondye. Par kont parey lartik swivan pou montre, nou pa merit ofans lespri sen Bondye. Ki mannyer nou kapab anpes sa arive?

[Not anba lo paz]

Ki ou pou reponn?

• Ki lasirans sa profesi dan Mika 5:5 i donn nou?

• Eksplike kwa ki enplike dan en leta lespri sakrifis.

• Ki mannyer en dimoun i kapab devlop en leta lespri sakrifis pour servi lezot?

• Akoz i enportan pour en fanmir korpere si en frer i anvi kalifye pour vin en asistan ministeryel oubyen ansyen?

[Kestyon]

[Portre lo paz 25]

Ki zefor ou kapab fer pour servi lezot?