Kestyon lekter

Vi ki Zeova i defann ador zidol, akoz i pa ti pini Aaron ler i ti fer en pti bef annor?

Parey i’n ganny rikorde dan Egzod sapit 32, kan Aaron ti fer sa pti bef annor, i ti kas lalwa Bondye konsernan idolatri. (Egz. 20:3-5) Akoz sa, “Zeova ti vreman ankoler [avek Aaron] ziska en degre ki i ti anvi detrir li; me sa letan la [Moiz] ti fer siplikasyon pour Aaron.” (Det. 9:19, 20) Eski siplikasyon Moiz sa zonm drwat ti annan “gran pisans” dan sityasyon Aaron? (Zak 5:16) Wi. Akoz son kalite siplikasyon e pour omwen de lezot rezon ankor, i paret ki Zeova ti reponn lapriyer Moiz e i pa ti pini Aaron.

Aparaman, en rezon ti akoz Aaron ti renonmen pour son fidelite. Kan Moiz ti ganny demande pour al devan Faraon e fer bann Izraelit sorti Lezip, Zeova ti swazir Aaron pour akonpanny Moiz e koz dan son plas. (Egz. 4:10-16) Sa de zonm ti obeir e al plizyer fwa devan lerwa Lezip e siport menas Faraon, sa lerwa ki ti annan en leker dir. Alor, letan ki zot ti ankor Lezip, Aaron ti devlop son repitasyon konman en zonm fidel e solid dan servis pour Zeova.—Egz. 4:21.

Egzamin osi kwa ki ti pous Aaron pour fer sa pti bef annor. Moiz ti lo Montanny Sinai pour 40 zour. Kan “lepep ti remarke ki Moiz ti pe pran tro bokou letan pour retournen sorti lo montanny,” zot ti persyad Aaron pour fer en zidol pour zot. Aaron ti korpere e fer stati en pti bef annor. (Egz. 32:1-6) Par kont, aksyon ki i ti pran pa tro bokou letan apre i montre ki i pa ti vreman dakor avek sa aksyon idolatri. I paret ki i ti’n les lepep met presyon lo li. Par egzanp, kan Moiz ti met en lafen trazik avek sa aksyon idolatri ki ti pe ganny fer, tou bann garson Levi, enkli Aaron, ti pran pozisyon ferm lo kote Zeova. Trwa mil adorater zidol ki ti direkteman responsab pour move kondwit idolatri ti ganny touye.—Egz. 32:25-29.

Zis apre sa, Moiz ti dir lepep: “Zot in fer en gro pese.” (Egz. 32:30) Alor, pa zis Aaron tousel ki ti koupab lo en serten degre pour sa move aksyon. Aaron ek lepep osi ti benefisye avek mizerikord Zeova.

Apre sa lensidan an rapor avek pti bef annor, Zeova ti ordonnen ki Aaron i devret ganny etabli konman gran pret. Bondye ti dir Moiz: “Ou devret met Aaron en lenz sen e apwent li e sanktifye li, e alor i devret azir konman en pret anver mwan.” (Egz. 40:12, 13) I evidan ki Zeova ti’n pardonn Aaron pour son febles. Dan son leker, Aaron ti totalman siport vre ladorasyon e i pa ti en rebel ki ador zidol.