Ki Bondye pe fer?

“Akoz O Zeova, ou kontinyen debout lwen avek mwan? Akoz ou reste kasyet kan mon dan letan ladetres?” *—PSONM 10:1.

ZIS zet en pti koudey lo bann gran tit dan nouvel e ou pou remarke ki nou pe vreman viv dan “letan ladetres.” Kan nou personnelman ganny afekte par en aksidan grav, lanmor en dimoun ki nou kontan, oubyen krim, nou kapab demann nou lekor: “Eski Bondye i vwar mon soufrans? Eski i enterese avek sa ki pe ariv mwan? Eski i vreman egziste?”

Eski par kont i posib ki nou lekspektasyon i kapab baze lo en fo konsep? Pour donn en legzanp, mazin en pti zanfan ki mekontan akoz son papa in al travay. Sa zanfan i mank son papa e i ti a kontan ki i retourn kot lakour. I santi li konmsi in ganny abandonnen. Tou dilon lazournen i demande, “Oli Dadi”?

Nou fasilman kapab remarke kwa ki mal avek fason panse sa zanfan. Apre tou, son papa pe travay pour ki i kapab pran swen avek bezwen materyel son fanmir. Eski i kapab annan en keksoz mal avek nou fason panse osi ler nou demande, “Oli Bondye?”

Par egzanp, serten i kapab swete ki Bondye i vin zot ziz. Pour zot, travay prensipal Bondye se deswit pini en dimoun ki fer en keksoz mal. Pour serten, Bondye i zis en Bonnonm Nwel ki son travay i pour donn zot bann kado ki swa en travay, en konzwen, oubyen menm en dyakpot.

Bann ki mazin koumsa i prezimen ki Bondye pa enterese avek nou soufrans e i pa konn nou bezwen akoz i pa anmenn lazistis deswit oubyen donn nou sa ki nou demann li. Me sa pa vre! Laverite se ki la konmela menm Zeova pe travay pour byennet lafanmir antye, me pa dan en fason ki bokou i ekspekte.

Ki Bondye pe fer alors? Pour reponn sa kestyon, nou pou bezwen retourn depi o konmansman listwar imen, kan relasyon ant Bondye ek imen ti seryezman ganny afekte. Erezman i posib pour reganny sa bon relasyon avek li.

Konsekans pese

Imazin en lakaz ki pour plizyer lannen in ganny abandonnen. Plafon i pros pour tonbe, son bann laport in fini tonbe e in ganny andomaze an deor. Avan, sa lakaz ti dan en bon kondisyon me la i nepli. Kan nou reflesir lo sa kantite domaz ki sa lakaz in sibir, sa i fer  nou realize kantite travay ki bezwen ganny fer lo la e evidaman, sa reparasyon pa pou ganny konplete dan zis vennkat erdtan.

Aprezan, reflesir lo sa ki ti arive avek bann imen apepre 6,000 an pase, ler en lespri envizib setadir Satan, ti enfliyans Adan ek Ev pour rebel kont Bondye. Avan sa ti arive, sa premye koup imen ti annan en lasante parfe e en lespwar pour viv pour touzour ansanm avek zot desandans. (Zenez 1:28) Me ler zot ti fer pese, Adan ek Ev ti gat lavenir zot bann desandans.

Pa bezwen souzestim kantite domaz ki sa rebelyon in anmennen. Labib i dir ki: “Pese in antre dan lemonn par en sel zonm, e pese in anmenn lanmor.” (Romen 5:12) Apard anmenn lanmor, pese in gat nou relasyon avek nou Kreater e in afekte nou fizikman, mantalman e emosyonnelman. An rezilta sa, nou kapab konpar sityasyon ki nou ladan avek en lakaz ki dan en move kondisyon. Zob, en zonm drwat ti byen dekrir nou sityasyon ler i ti dir ki zonm “son lavi i kourt e ranpli avek tourman.”—Zob 14:1, Bible en français courant.

Me eski Bondye ti abandonn bann imen apre ki Adan ek Ev ti’n fer pese? Ditou! Anfet, depi ki Adan ek Ev in fer pese ziska ozordi, nou Papa pe travay dan lesyel. I pe pran bann pa neseser pour redonn imen sa ki zot in perdi. Pour pli byen apresye sa ki i pe fer, egzamin sa trwa letap ki neseser pour repar en lakaz e vwar ki mannyer sak letap i relye avek sa ki Bondye pe fer.

1 Apre ki en lakaz andomaze in ganny enspekte, son met i bezwen deside si i pou repar li oubyen kraz li.

Deswit apre ki Adan ek Ev ti’n rebele dan zarden Edenn, Zeova ti anons son plan pour redonn bann imen sa ki zot ti’n perdi. Zeova ti dir avek sa lespri envizib ki ti par deryer sa rebelyon: “Mon pou met en laenn ant ou ek sa madanm, ant ou desandans ek son desandans. I pou kraz ou latet e ou pou kraz son talon.”—Zenez 3:15.

Par dir sa parol, Zeova ti promet pour detrir sa enn ki responsab pour sa rebelyon dan zarden Edenn. (Romen 16:20; Revelasyon 12:9) Deplis, Zeova ti predir ki i ti pou annan en “desandans” ki ti pou sov limanite dan pese. * (1 Zan 3:8) Sa bann promes i montre nou en keksoz vreman enportan: Bondye ti pou repar me pa detrir son kreasyon. Me i ti pou bezwen letan pour fer sa reparasyon.

2 En arsitek i fer en plan konplet pour sa lakaz.

Zeova ti donn bann Izraelit bann lalwa e i ti fer plan en tanp kot zot ti pou ador li. Labib i dir: “Tousala i zis lonbraz keksoz ki pou vini dan lavenir.” (Kolosyen  2:17) Parey en plan, zot ti reprezant en keksoz pli meyer.

Par egzanp, bann Izraelit ti ofer sakrifis zannimo pour ki zot pese i ganny pardonnen. (Levitik 17:11) Sa ti reprezant en pli gran sakrifis ki ti pou ganny ofer plizyer syek pli tar, en sakrifis ki ti pou permet limanite vreman ganny sove. * Plan pour tabernak ek tanp kot bann Izraelit ti ador Zeova ti reprezant bann letap ki Mesi ti pou pran. Sa ti pou konmans ler i ti pou sakrifye son lavi ziska ler i ti mont dan lesyel.—Vwar sa latab lo paz 7.

3 En mason ki pou swiv sa plan i ganny swazir e i fer sa reparasyon.

Zezi i sa Mesi ki ti ganny promet pour swiv legzanp ki bann Izraelit ti kite par ofer bann sakrifis e i ti pou donn son prop lavi pour sov limanite. Se pour sa rezon ki Zan Batis ti apel Zezi “Lanyo Bondye ki efas pese lemonn.” (Zan 1:29) Zezi ti volonterman aksepte pour fer lavolonte son Papa. I ti dir: “Mon’n sorti dan lesyel pour vin fer, non pa mon prop lavolonte, me lavolonte sa enn ki’n anvoy mwan.”—Zan 6:38.

Pour Zezi, fer lavolonte Bondye pa ti enkli zis “donn son lavi konman pri pour liberasyon bokou dimoun” me i ti pou osi fer en lalyans avek son bann disip pour gouvern avek li dan son Rwayonm. (Matye 20:28; Lik 22:29, 30) Sa Rwayonm i sa mwayen ki Bondye pou servi pour akonplir son plan pour limanite. Sa mesaz konsernan Rwayonm Bondye i ganny apele “Bonn Nouvel” akoz i eksplike ki Bondye in etablir en gouvernman dan lesyel ki pou kontrol bann keksoz lo later.—Matye 24:14; Danyel 2:44. *

Travay reparasyon i kontinyen

Avan i ti mont dan lesyel, Zezi ti donn sa komannman son bann disip: “Ale e fer tou pep vin mon bann disip. Batiz zot o non di-Per, di-Fis e di-Sent-Espri . . . E konnen ki mwan mon avek zot toulezour, ziska lafen.”—Matye 28:19, 20.

Alor sa travay reparasyon pa ti pou fini avek lanmor Zezi. I pou kontinyen “ziska lafen” sa lemonn setadir sa letan ler Rwayonm Bondye pou konmans pran kontrol lo later. Sa letan in aprezan arive. Nou konn sa akoz sa siny ki Zezi ti predir konsernan “lafen” sa move lemonn pe ganny akonplir dan nou letan. *—Matye 24:3-14; Lik 21:7-11; 2 Timote 3:1-5.

Ozordi, dan 236 pei, Temwen Zeova pe obeir komannman Zezi pour pres sa bon nouvel konsernan Rwayonm Bondye. Anfet, sa magazin ki ou pe lir in ganny prepare pour ed ou aprann plis ankor konsernan sa Rwayonm e sa ki i pou akonplir. Dan sak nimero Latour Veyer lo paz 2, ou pou trouv sa komanter: “Sa magazin . . . i rekonfort tou dimoun avek sa bon nouvel lo Rwayonm Bondye ki en gouvernman dan lesyel ki egziste e ki byento pou met en lafen avek tou mesanste e transform later dan en paradi. I promot lafwa dan Zezi Kri, ki ti mor pour ki nou kapab ganny lavi eternel e ki pe dirize konman Lerwa dan Rwayonm Bondye.”

I vre ki ozordi ou ankor pe tann nouvel konsernan bann latak teroris, dezas natirel, oubyen ou kapab personnelman eksperyans en trazedi. Me en letid Labib pou konvenk ou ki Bondye pa’n abandonn limanite me o kontrer “i pa lwen avek sakenn parmi nou.” (Akt 17:27) Son promes pour reetablir sa ki nou premye paran in perdi pou reisi.—Izai 55:11.

[Not anba lo paz]

 [Bwat lo paz 7]

(For fully formatted text, see publication)

En kopi larealite—Sa ki tabernak ti reprezante

LOTEL

Laranzman Bondye pour aksepte sakrifis Zezi.—EBRE 13:10-12.

GRAN PRET

Zezi.—EBRE 9:11

1 Zour Propisyasyon, gran pret ti ofer en sakrifis pour pese lepep.—LEVITIK 16:15, 29-31.

1 Le 14 Nizan 33 N.L., Zezi ti sakrifye son lavi pour nou.—EBRE 10:5-10; 1 ZAN 2:1, 2.

LASANM SEN

Nouvo nesans Zezi konman Garson spirityel Bondye ler i ti lo later.—MATYE 3:16, 17; ROMEN 8:14-17; EBRE 5:4-6.

RIDO

Lekor Zezi konman en imen, sa baryer ki ti separ lavi lo later avek sa ki dan lesyel.—1 KORENTYEN 15:44, 50; EBRE 6:19, 20; 10:19, 20.

2 Gran pret ti antre dan lasanm Tre Sen par deryer sa rido ki separ lasanm Sen ek Tre Sen

2 Apre son rezireksyon, Zezi ti antre dan Tre Sen par deryer rido pour mont dan lesyel “pour prezant li menm devan Bondye pour nou.”—EBRE 9:24-28.

LASANM TRE SEN

Lesyel.—EBRE 9:24.

3 Ler i ti dan Tre Sen, gran pret ti fann en pe disan sa sakrifis devan lars lalyans.—LEVITIK 16:12-14.

3 Par prezant valer son disan ki i ti’n verse, Zezi ti sakrifye son lavi enn fwa pour tou pour ki nou pese i ganny pardonnen.—EBRE 9:12, 24; 1 PYER 3:21, 22.