Laverite lo pese

ESKI en zonm i kapab prouve ki i pa ganny lafyev par senpleman kas en termomet? Definitivman non! Pareyman, zis akoz en kantite dimoun i rezet pwennvi Bondye lo pese, i pa vedir ki pese pa egziste. Son Parol, Labib i annan bokou pour dir lo sa size. Zisteman alor, ki Labib i ansenny nou lo pese?

Tou dimoun in komet pese

Apepre de mil an pase, zapot Pol ti eksprim son dezapwentman lo lefet ki ‘i pa ti fer sa ki byen ki i ti anvi fer, me i ti fer sa ki mal, ki i pa ti anvi fer.’ (Romen 7:19) Si nou onnet, nou bezwen admet ki nou dan menm sityasyon ki li. Petet nou ti a kontan viv nou lavi dapre sa Dis Komannman oubyen viv dapre serten lezot kalite standar, me kontan pa kontan, nou tou nou pa arive fer li. I pa vedir ki nou volonterman deside pour kas en lalwa, me i zis ki nou feb. Akoz sa? Pol li menm i donn larepons: “Si mon fer sa ki mon pa oule, alor i nepli mwan ki pe azir me pese ki reste dan mwan.”—Romen 7:20.

Parey Pol, limanite an antye in ne avek sa febles. Sa i laprev ki nou’n erit pese ek lenperfeksyon. Sa zapot ti dir: “Parski tou dimoun in fer pese e pa’n arive ganny laglwar Bondye.” Kwa ki’n met nou dan sa sityasyon? Pol i kontinyen dir: “Pese in antre dan lemonn par en sel zonm [Adan], e pese in anmenn lanmor, e lanmor in pas avek tou dimoun, parski tou dimoun in komet pese.”—Romen 3:23; 5:12.

Menm si laplipar dimoun pa aksepte sa lide ki pese ki nou bann premye paran in komet in fer nou elwannyen avek Bondye e fer nou vin enparfe, an realite se sanmenm ki Labib i dir. Kan Zezi ti sit Lekritir dan bann premye sapit Zenez, sa ti montre ki i ti krwar ki Adan ek Ev ti vreman egziste.—Zenez 1:27; 2:24; 5:2; Matye 19:1-5.

Enn parmi bann laspe byen enportan sa mesaz dan Labib se ki Zezi in vin lo later pour sov bann ki met lafwa dan li e retir zot dan sa kondisyon ki zot ladan. (Zan 3:16) Nou lespwar pour lavenir i depan lo si nou aksepte laranzman ki Zeova in fer pour sov bann imen ki rekonesan dan sa sityasyon deplorab ki zot napa okenn kontrol lo la. Me si nou napa menm pwennvi ki Bondye lo pese, nou pa pou kapab vreman apresye sa mwayen ki Zeova in servi pour sov nou.

Sakrifis Zezi e akoz i ti neseser

Zeova ti donn sa premye zonm sa lespwar pour viv pour touzour. I ti pou perdi sa zoli lespwar, selman si i ti rebele kont Bondye. Me malerezman, Adan ti rebele e kan i ti fer sa, i ti vin en peser. (Zenez 2:15-17; 3:6) Adan ti fer sa ki ti tou lekontrer avek lavolonte Bondye, i ti vin enparfe e gat son relasyon avek Bondye. Kan i ti komet pese par kas lalwa Bondye, i ti konmans vyeir e finalman i ti mor. Malerezman, tou desandans Adan, enkli nou osi nou’n ne dan pese e akoz sa, nou tou nou’n ganny kondannen a mor. Akoz?

I annan en rezon byen senp. Bann paran enparfe pa kapab fer zanfan parfe. Tou bann desandans Adan in ne konman bann peser e parey zapot Pol i fer resorti, “rekonpans pour pese i lanmor.” (Romen 6:23) Me, dezyenm bout sa verse i donn nou en lespwar: “Me don gratwit ki Bondye i donnen i lavi eternel dan Kris-Zezi nou Senyer.” Andotmo sa i vedir ki akoz Zezi in sakrifye son lavi pour nou, i posib pour bann dimoun obeisan e rekonesan  ganny pirifye e libere avek lefe pese ki Adan ti komet. * (Matye 20:28; 1 Pyer 1:18, 19) Ki mannyer sa i devret fer ou santi?

Lanmour Kris i “kontrol nou”

Zapot Pol ti ganny enspire pour donn nou larepons sa kestyon. I ti ekrir: “Wi, lanmour Kris i kontrol nou, parski nou asire ki en sel in mor pour tou dimoun . . . e i’n mor pour tou bann vivan pour ki bann vivan i nepli viv pour zot menm, me pour li ki’n mor e resisite pour zot.” (2 Korentyen 5:14, 15) Si en dimoun i rekonesan ki sakrifis Zezi i annan sa abilite pour liber li avek konsekans pese e i ti a kontan montre son rekonesans pour sa laranzman, i devret fer bokou zefor pour viv son lavi an armoni avek sa ki Bondye ti a kontan pour li. Sa i enkli ganny en konnesans lo sa ki Bondye i ekspekte li fer, antrenn son konsyans dapre bann standar dan Labib e apre viv son lavi an armoni avek zot.—Zan 17:3, 17.

Kan nou komet pese, sa i gat nou relasyon avek Zeova. Kan Lerwa David ti rekonnet gravite son pese ler i ti komet adilter avek Batseba e touy son msye, san dout, sa ti fer li vreman onte. Me en keksoz ki ti byen dan son fason azir se ki i ti pli konsernen avek lefet ki son bann pese ti’n ofans Bondye. Avek bokou regre, i ti admet son fot avek Zeova: “Kont ou, zis ou menm, ki mon’n fer pese, e fer sa ki mal dan ou lizye.” (Psonm 51:4) Pareyman kan Zozef ti ganny tante pour komet adilter, son konsyans ti pous li pour demande: “Ki mannyer mon kapab fer sa gran keksoz mal e vreman fer pese kont Bondye?”—Zenez 39:9.

Alor, pese i pa zis annan pour fer avek sa laont ki nou resanti akoz petet lezot i vwar nou pe fer en keksoz mal. I pa zis en sityasyon kot nou bezwen rann kont lasosyete akoz petet nou pa’n arive swiv en serten standar. Si nou kas lalwa Bondye lo sèks, lonnekte, respe, ladorasyon e lo lezot keksoz, sa i gat nou relasyon personnel avek li. Si nou volonterman fer pese, nou pe fer nou vin lennmi Bondye.  I neseser ki nou fer en bon refleksyon lo sa laverite.—1 Zan 3:4, 8.

Alor, ki’n arive avek pese? Annefe napa nanryen ki’n arive avek pese. Dimoun in zis konmans donn li lezot non an esperan ki sa i pou fer li pa paret tro serye. Pour bokou dimoun zot konsyans i nepli sansib oubyen zot inyor zot konsyans. Tou bann ki anvi ganny laprouvasyon Bondye i bezwen evite pour annan sa kalite tandans. Parey nou’n vwar, rekonpans pour pese i pa senpleman sa laont ki en dimoun i resanti apre ki i’n komet pese me i lanmor. Pese i en kestyon ant lavi ek lanmor.

Sa bon nouvel se ki si nou repantir e nou aret fer sa bann pese, i posib pour nou ganny pardonnen gras a sa valer ki sakrifis Zezi i annan. Zapot Pol ti ekrir: “Byennere bann ki ganny pardonnen zot fot, e zot pese i ganny kouver. Byennere sa enn ki Senyer pa pran an konsiderasyon son pese.”—Romen 4:7, 8.

[Not anba paz]

[Bwat lo paz 10]

Legliz in konpletman sanz enn son lansennyman

Pour lamazorite Katolik ki al legliz, sa lide lo Lelenm pa’n zanmen kler pour zot. Dan sa bann dizenn lannen ki’n pase, sa lansennyman in dousman dousman disparet ziska en pwen ki i nepli ganny mansyonnen dan katesis. An 2007, Legliz Katolik ti ofisyelman met en lafen avek sa lansennyman lo Lelenm dan en dokiman ki mansyonn “bann rezon relizye ki donn lespwar ki bann zanfan ki mor anvan batize zot kapab ganny sove e ganny lazwa pour touzour.”—International Theological Commission.

Akoz i’n annan sa sanzman dan zot lansennyman? Senpleman, sa in permet legliz debaras li avek sa ki zournalis Franse, Henri Tincq ti apel “en leritaz ki’n anmenn fardo, ki’n ganny defann depi lepok Mwayennaz ziska ventyenm syek par en Legliz ki manipil dimoun, ki enpasyan pour servi Lelenm konman en menas pour ankouraz bann paran pour batiz zot zanfan o pli vit posib.” Me sanzman dan sa lansennyman i osi soulev lezot kestyon.

Tradisyon ouswa Labib? Ler nou get en pti pe dan listwar, sa krwayans lo Lelenm ti aparet dan douzyenm syek kan ti annan bann deba lo bann size ki annan pour fer avek pirgatwar. Legliz Katolik ti ansennyen ki nanm i viv apre lanmor. Alor i ti bezwen eksplike kote nanm bann zanfan i ale akoz zot pa ti pou kapab al dan lesyel vi ki zot pa ti ankor batize, me an menm tan zot pa ti merite al dan lanfer. Sa i fason ki sa lansennyman lo Lelenm ti devlope.

Me par kont, Labib pa ansennyen ki nanm i sirviv apre lanmor. O kontrer, i dir klerman ki olye imortel, nanm en imen ki fer pese i kapab ganny “detri” e “i pou mor.” (Akt 3:23; Ezekyel 18:4, Douay-Rheims Version) Vi ki nanm i mortel, en tel landrwa parey Lelenm pa kapab egziste. Deplis, Labib i dir ki lanmor i en kondisyon kot ou pa konsyan nanryen, zis parey ler ou pe dormi.—Eklezyast 9:5, 10; Zan 11:11-14.

Labib i dir ki Bondye i konsider bann zanfan ki zot paran i Kretyen, sen. (1 Korentyen 7:14) Sa deklarasyon pa ti pou fer sans si i ti neseser pour en zanfan batize pour li ganny sove.

Sa lansennyman lo Lelenm ti vreman en lensilt pour Bondye. I ti fer li paret konman en Bondye kriyel ki pini bann inosan olye konman en Papa ki zis e ranpli avek lanmour. (Deterononm 32:4; Matye 5:45; 1 Zan 4:8) I pa drol alor ki sa lansennyman ki pa dan Labib pa’n zanmen fer sans pour bann Kretyen ki senser!

[Portre lo paz 9]

Si ou viv en lavi ki an armoni avek Parol Bondye, sa i fer ou annan en bon relasyon avek Bondye ek lezot