Akoz dimoun i fer bann move keksoz?

LAMAZORITE dimoun pou dakor ki nou tou nou enparfe e sa i fer ki nou fer fot e nou fer bann keksoz ki nou regrete apre. Kantmenm sa, eski sa i eksplike akoz i annan sa kantite move keksoz ki nou trouve oubyen tande preski tou le zour an personn oubyen dan nouvel?

Malgre nou enparfe, kot i konsern moralite, dimoun i normalman rekonnet ki i annan serten limit ki devret touzour ganny respekte e ki i posib pour bann imen pa fer keksoz mal. Laplipar dimoun pou osi fasilman dakor ki i annan en diferans ant dir en keksoz ki pa vre lo en dimoun san fer ekspre, avek koz manti volonterman lo en dimoun pour fer li ditor. I osi annan en diferans ant ler ou fer ditor en dimoun par aksidan, avek ler en dimoun i reflesir byen davans avan i komet en krim. Toudmenm, se bann dimoun ki paret ordiner dan kominote ki souvan komet bann keksoz sokan. Me akoz dimoun i fer bann move keksoz?

 Labib i donn leklersisman lo sa size. I presizeman fer resorti bann rezon prensipal akoz dimoun i azir dan bann fason ki zot deza konnen i mal. Egzamin sa ki Labib i dir.

▪ “Lopresyon i kapab fer ki en dimoun saz i azir parey en dimoun fou.”—EKLEZYAST 7:7.

Labib i fer resorti ki parfwa dimoun i ganny pouse pour reazir dan en fason ki zot pa ti pou normalman reazir akoz sirkonstans ki zot ladan. Serten i menm komet krim dan zot zefor pour esey rod sa ki zot panse i solisyon pour bann difikilte ek lenzistis ki zot pe sibir. Sa liv Urban Terrorism i dir: “Dan bokou ka, en teroris i premyerman ganny motive par fristrasyon ki i annan kont bann sistenm ki paret difisil pour sanze dan domenn politik, sosyal ek ekonomik.”

▪ “Lanmour larzan i rasin tou lemal.”—1 TIMOTE 6:10.

Serten dimoun i dir ki menm bann bon dimoun i pare pour kas lalwa lo sa ki byen ek sa ki mal si en kantite larzan i enplike. Personnalite serten dimoun ki normalman paret amikal e zantiy i sanze dek ki i annan en posibilite pour zot ganny oubyen perdi larzan. Zot vin en dimoun totalman diferan, en dimoun brit e agresif. Mazin sa kantite krim ki ganny komet akoz vorasite. Sa i fer ki dimoun i blackmail kanmarad, vole, fer frod, kidnap e menm touy kanmarad.

▪ “Akoz santans kont en move aksyon pa’n ganny egzekite vitman, sa i rezon akoz leker bann garson zonm in vreman determinen pour fer sa ki mal.”—EKLEZYAST 8:11.

Sa verse i fer resorti ki imen i annan sa tandans pour krwar ki en dimoun i kapab fer sa ki i anvi kan napa personn dan lotorite ki vwar li. Sa i le ka kan dimoun i fer vites lo highway, kopye dan legzanmen, vol larzan piblik e fer lezot keksoz pli pir ankor. Kan lalwa pa ganny enplimante dan en fason konsistan oubyen kan dimoun napa lafreyer pour ganny atrape, dimoun ki normalman abitye obeir lalwa i kapab santi zot ase konfidan pour fer sa ki zot pa abitye fer. Magazin Arguments and Facts i fer sa lobzervasyon: “Lefet ki bann kriminel i fer krim san ganny okenn pinisyon, i paret ki sa i ankouraz bann dimoun ordiner pour komet bann krim pli kriyel.”

▪ “Tou dimoun i ganny tante ler i les li ganny antrennen e atire par son prop move dezir. Alor, move dezir enn fwa ki i’n ganny formen i donn nesans pese, e pese, ler in devlope, i anmenn lanmor.”—ZAK 1:14, 15.

I arive ki tou dimoun i ganny bann move panse parler. Tou le zour nou ganny bonbarde avek en kantite sizesyon ek tantasyon pour fer sa ki mal. Sa parol ti ganny dir avek bann Kretyen dan lepase: “Tou tantasyon ki’n ariv zot i arive normalman avek en dimoun.” (1 Korentyen 10:13) Me kantmenm sa, rezilta i tou depan lo sa ki en dimoun i swazir pour fer, ki swa pour rezet sa move panse deswit oubyen pour kontinyen mazin lo la e permet li devlope. Sa verse anler dan liv Zak i averti nou ki si  nou les sa move dezir “ganny formen,” definitivman bann move aksyon pou swiv.

▪ “Sa ki mars avek bann dimoun saz pou vin saz, me sa ki frekant bann enbesil pou mal pase.”—PROVERB 13:20.

Nou bezwen aksepte ki dimoun ki nou frekante i annan en gran lefe lo nou, ki swa bon oubyen move. Byen souvan, dimoun i fer sa ki zot napa lentansyon pour fer zis akoz lezot i met presyon lo zot oubyen, parey bokou dimoun i dir, ‘move frekantasyon i anmenn move konsekans.’ Sa term “bann enbesil” ki ganny servi dan Labib pa pe refer avek bann dimoun ki bet me bann ki inyor bann konsey ki saz dan Parol Bondye. Ki swa nou zenn oubyen vye, si nou pa byen swazir nou zanmi oubyen nou frekantasyon, andotmo, si nou pa les bann bon standar dan Parol Bondye gid nou dan sa domenn, nou kapab ekspekte ki nou pou “mal pase.”

Sa bann verse ek plizyer lezot verse dan Labib i eksplik dan en fason senp e kler akoz bann dimoun ordiner i fer bann move keksoz, menm bann keksoz sokan. Menm si i byen pour konpran kwa ki pous dimoun pour fer bann keksoz vreman mal, eski i annan lespwar ki keksoz pou sanz pour le meyer? Wi sertennman, parski Labib pa zis eksplike akoz dimoun i fer bann move keksoz me i osi promet ki sa bann move keksoz pou nepli egziste. Ki sa bann promes? Eski tou sa bann move keksoz dan lemonn pou vreman ganny met en lafen avek? Sa lot lartik i donn nou larepons.