Sekre 4

Swazir byen ou bann zanmi

KI LABIB I DIR? “Sa ki mars avek bann dimoun saz pou vin saz.”—Proverb 13:20.

KI SA DEFI? Nou bann zanmi pou swa ankouraz oubyen dekouraz nou pour kontant nou avek sa ki nou annan. Zot latitid ek konversasyon pou definitivman annan en lefe lo lafason ki nou vwar lavi.—1 Korentyen 15:33.

Vwar par egzanp sa resi Labib lo sa 12 zonm ki ti al espyonn Kanaan. Kan zot ti retournen, lamazorite zot ti “anmenn en move rapor lo sa pei ki zot ti’n espyonnen kot bann garson Izrael.” Malgre sa, de parmi sa bann zonm ti koz dan en fason pozitif lo Kanaan. Zot ti apel li “en tre tre bon pei.” Me latitid negatif sa dis espyon ti’n fini propaze parmi sa pep. Sa resi i dir: “Lasanble antye ti lev zot lavwa, e tou bann garson Izrael ti konmans mirmire.”—Nonm 13:30–14:9.

Pareyman ozordi, i annan bokou dimoun ki “touzour mekontan e pe touzour plennyen.” (Zid 16) I difisil pour nou touzour kontant nou avek sa ki nou annan si nou frekant bann zanmi ki pa zanmen satisfe.

KI OU KAPAB FER? Analiz konversasyon ki ou fer avek ou bann zanmi. Eski zot vant zot lekor souvan lo bann keksoz ki zot annan? Oubyen, eski zot toultan pe konplent lo sa ki zot napa? Ki kalite zanmi ou ete pour zot? Eski ou esey fer zot zalou ou, oubyen ou ankouraz zot pour kontant zot avek sa ki zot annan?

Egzamin sa legzanp ki David ek Yonatann, garson Lerwa Sail in lese pour nou. David ti pe viv an tayan dan dezer. Lerwa Sail ti santi ki son pozisyon konman lerwa ti pe ganny menase par David e i ti anvi touy li. Menm si Yonatann ki ti sipoze vin lerwa apre son papa, i ti’n vin enn parmi bann zanmi pros David. Yonatann ti aksepte ki Bondye ti’n apwent David pour vin fitir lerwa e i ti kontan pour donn son zanmi sipor.—1 Samyel 19:1, 2; 20:30-33; 23:14-18.

Ou bezwen bann zanmi koumsa, bann ki fer zefor pour kontant zot avek sa ki zot annan e ki annan ou lentere a ker. (Proverb 17:17) Byensir, pour ou kapab atir sa bann kalite zanmi ou bezwen ou menm demontre sa bann kalite ki zot annan.—Filipyen 2:3, 4.

[Portre lo paz 7]

Eski ou bann zanmi i ankouraz ou oubyen dekouraz ou pour kontant ou avek sa ki ou annan?