Lespri sen i donn sa pwisans pour fer fas avek nenport leprev
Lespri sen i donn sa pwisans pour fer fas avek nenport leprev
“Rod ou lafors dan linyon avek Senyer e dan son gran pisans.”—EFE. 6:10.
1. Akoz pep Zeova i fer fas avek bokou difikilte?
PEP Zeova osi i fer fas avek tou sort kalite difikilte. Serten leprev i akoz nou lenperfeksyon, ouswa i rezilta sa lemonn ki nou pe viv ladan. Lezot i akoz sa laenn ki egziste ant bann serviter Bondye ek sa bann ki pa servi li. (Zen. 3:15) Depi o konmansman listwar imen, Bondye in ed son bann serviter fidel pour fer fas avek persekisyon relizye, reziste move lenfliyans e andir lezot kalite difikilte ankor. Son lespri sen i kapab donn nou sa pwisans pour fer parey.
Led pour fer fas avek persekisyon relizye
2. Ki bi bann persekisyon relizye e dan ki fason i vini?
2 Persekisyon relizye i en menas ouswa dimal ki ganny fer par ekspre akoz lafwa ouswa krwayans ki en dimoun i annan. Bi sa kalite persekisyon se ki sa bann ki responsab i anvi elimin sa krwayans, anpes li propaze ouswa kas lentegrite bann ki krwar ladan. Sa kalite persekisyon i vin dan diferan fason, serten i kapab direk e serten endirek. Labib i konpar bann latak Satan avek latak en zenn lyon ek en kobra.—Lir Psonm 91:13. *
3. Ki mannyer nou konnen si en persekisyon i resanble latak en lyon oubyen kobra?
3 Parey en lyon sovaz, Satan i souvan fer bann latak direk, setadir i servi vyolans, restriksyon ouswa fer sa bann dimoun ganny anprizonnen. (Ps. 94:20) Dan Yearbook, i annan en kantite leksperyans konsernan bann leprev koumsa ki Temwen Zeova in fer fas avek. Bann lafoul rebel dan bokou pei, ki serten i ganny sipor bann sef relizye ouswa politisyen fanatik, in tret pep Bondye dan en move fason. Sa bann latak ki parey latak ki en lyon i fer, in fer serten aret servi Zeova. Parey en kobra, Dyab i osi atak pep Bondye an kasyet, pour ki dan en sans i anpwazonn zot lespri e anbet zot pour ki zot fer son lavolonte. I servi sa kalite latak pour afeblir nou spirityelman ouswa fer nou fer konpromi. Me, avek led lespri sen Bondye, nou kapab fer fas avek tou le de kalite persekisyon.
4, 5. Ki pli bon fason pour prepar ou pour persekisyon e akoz? Donn en legzanp.
4 Si ou mazin davans lo bann persekisyon ki ou kapab rankontre, i pa sa pli bon preparasyon pour ou fer fas avek zot. Parski nou zis pa konnen ki kalite leprev nou pou rankontre, alor i pa vo lapenn enkyet konsernan bann keksoz ki petet pa ni pou menm arive. Par kont, i annan en keksoz ki nou kapab fer. Laplipar parmi sa bann ki’n andir persekisyon fidelman in reisi akoz zot in medit lo legzanp bann serviter Bondye ki ti gard zot lentegrite, parey i ganny rikorde dan Labib, e osi lo lansennyman ek legzanp Zezi. Sa in ed zot ogmant zot lanmour pour Zeova. Sa lanmour in apre sa ed zot pour reziste nenport leprev ki zot ti rankontre.
5 Egzamin legzanp nou de ser Malawi. En group dimoun vyolan ti bat zot, tir lenz lo zot e menase ki zot ti pou vyol zot si zot pa ti aste kart en parti politik. Sa bann dimoun ti koz manti e dir zot ki menm bann manm lafanmir Betel ti’n aste sa bann kart. Ki ti reaksyon sa de ser? Zot ti dir: “Nou servi zis Zeova tousel. Alor, si nou bann frer kot biro brans in aste sa bann kart, sa pa fer en diferans pour nou. Nou pa pou fer konpromi, menm si zot touy nou!” Apre ki zot ti’n pran sa pozisyon ferm, sa de ser ti ganny large.
6, 7. Ki mannyer Zeova i donn lafors son bann serviter pour fer fas avek persekisyon?
6 Zapot Pol ti remarke ki “avek lazwa prodwi par Lespri Sen,” bann Kretyen Tesalonik ti’n aksepte mesaz laverite “menm si zot [ti’n] bokou soufer.” (1 Tesa. 1:6) I vre, bokou Kretyen, ki swa dan lepase ouswa dan nou letan ki’n fer fas avek oubyen siport persekisyon i dir ki dan sa moman pli difisil dan zot leprev, zot ti santi lape lespri ki en laspe fri lespri sen Bondye. (Gal. 5:22) An retour, sa lape ti ed zot pour protez zot leker ek lespri. Wi, Zeova i servi son lafors aktif pour donn son bann serviter lafors pour fer fas avek bann leprev e azir dan en bon fason kan zot rankontre difikilte. *
7 Bann dimoun ki’n obzerv nou in sirprann pour vwar sa determinasyon ki pep Bondye i annan pour gard zot lentegrite menm kan zot ganny persekite severman. I paret ki Temwen Zeova i ranpli avek en lafors ekstraordiner e sirman i leka. Zapot Pyer i asir nou: “Si zot ganny maltrete pour non Kris, zot ere, parski Lespri laglwar, Lespri Bondye i repoz lo zot.” (1 Pyer 4:14) Lefet ki nou ganny persekite akoz nou pe siport bann standar drwat, sa i montre ki nou annan laprouvasyon Bondye. (Mat. 5:10-12; Zan 15:20) I en lazwa pour konnen ki Zeova pe beni nou dan sa fason. Pa i vre?
Led pour reziste move lenfliyans lezot
8. (a) Kwa ki ti ed Zozye ek Kaleb pour reziste move lenfliyans lezot? (b) Ki nou kapab aprann avek legzanp Zozye ek Kaleb?
8 Move lenfliyans lezot i en lot leprev direk ki bann Kretyen i bezwen fer fas avek. Par kont, lefet ki lespri sen Zeova i pli pwisan ki lespri sa lemonn, nou kapab reziste bann dimoun ki sifok nou, ki koz manti lo nou ouswa ki esey fors nou pour viv parey zot. Me kwa ki ti permet Zozye ek Kaleb par egzanp, pour pa tonm dakor avek sa dis lezot espyon ki ti’n ganny anvoye Kanaan? Zot ti swiv gidans lespri sen Bondye e annan en lot “lespri” ouswa fason panse.—Lir Nonm 13:30; 14:6-10, 24. *
9. Akoz bann Kretyen i devret pare pour diferan avek lamazorite dimoun?
9 Dan menm fason, lespri sen ti donn lafors bann premye zapot Zezi pour obeir Bondye olye bann dimoun ki bokou ti konsider konman bann ansenyan vre larelizyon. (Akt 4:21, 31; 5:29, 32) Laplipar dimoun i tant pour plifere swiv lafoul, ouswa fer sa ki lezot i fer, zis pour zot evit problenm ouswa konfli. Me, bann vre Kretyen pa koumsa, zot souvan bezwen tenir ferm e pran pozisyon pour sa ki zot konnen i byen. Kantmenm sa, granmersi zot ganny led lafors aktif Bondye, akoz sa i ed zot pour pa per menm si zot diferan. (2 Tim. 1:7) Egzamin en domenn kot nou pa devret les lezot enfliyans nou.
10. Ki sityasyon difisil serten Kretyen i kapab trouv zot ladan?
10 Serten zenn i kapab vwar zot dan en sityasyon difisil si zot dekouver ki enn zot zanmi in fer en keksoz ki kont prensip Labib. Zot kapab santi ki si zot rod led spirityel pour zot zanmi, i mal akoz zot pe kas sa lanmitye antre zot; alor zot pa koz lo la akoz zot krwar ki zot fidel avek zot zanmi. En dimoun ki’n fer sa ki mal i kapab fors son zanmi pour kasyet son pese. Byensir, pa zis bann zenn ki fer fas avek sa kalite problenm. Serten adilt osi i kapab vwar li difisil pour zot apros bann ansyen dan kongregasyon konsernan move konportman enn zot zanmi ouswa manm fanmir. Me ki mannyer bann vre Kretyen pou reazir anba en tel presyon?
11, 12. Ki pli bon fason pour azir kan en manm kongregasyon i sipliy ou pour pa devwal son move aksyon e akoz?
11 Mazin sa sityasyon. Meton Alex, en zenn frer, i aprann ki Steve, son zanmi dan kongregasyon, i abitye get pornografi. Alex i dir Steve ki i vreman konsernen avek sa ki son zanmi pe fer. Par kont, Steve pa ni fatig li avek sa ki Alex pe dir. Kan Alex i ankouraz li pour koz avek bann ansyen lo la, Steve i dir ki si zot ti vreman zanmi, i pa ti pou raport li avek ansyen. Eski Alex i devret per pangar i perdi son zanmi? I kapab mazinen lekel ki ansyen pou pli krwar si Steve i dir ki i pa pe get pornografi. Me kantmenm sa, sityasyon pa pou amelyore si Alex pa dir nanryen. Sirman, i kapab finalman arive ki Steve i perdi son relasyon avek Zeova. I pou byen si Alex i rapel ki “tranble devan zonm se sa ki vin en latrap, me sa ki met konfyans dan Zeova pou ganny proteze.” (Prov. 29:25) Kwa ki Alex i kapab fer ankor? Byen zantiman i kapab apros Steve ankor enn fwa e koz avek li seryezman. Sa pou demann bokou kouraz, me i kapab arive ki safwasi Steve pou sezi sa loportinite pour koz lo son problenm. Ankor enn fwa, Alex i devret ankouraz Steve pour koz avek bann ansyen e dir li ki si i pa fer li, dan en serten kantite letan ase rezonnab, li i pou fer.—Lev. 5:1.
12 Si ou pas dan en sityasyon parey, petet premye kou ou zanmi pa pou kontan sa zefor ki ou’n fer pour ed li. Me, avek letan i pou realize ki ou pe fer sa ki pli bon pour li. Si sa enn ki fer pese i resevwar e aksepte led, dan sa ka petet i pou touzour rekonesan anver ou akoz ou kouraz ek fidelite. De lot kote, si i reste ankoler avek ou, eski sanmenm sa kalite zanmi ki ou anvi? Fer plezir Zeova, nou pli bon Zanmi i touzour sa pli bon keksoz pour fer. Kan nou met li premye, lezot ki kontan li pou respekte nou pour nou fidelite e zot pou vin nou bann vre zanmi. Nou pa devret zanmen kit plas pour Dyab dan kongregasyon. Si nou ti les li antre, nou ti pou vreman ofans lespri sen Zeova. Par kont, nou azir an armoni avek lespri sen ler nou travay dir pour kit kongregasyon pir.—Efe. 4:27, 30.
Sa pwisans pour andir nenport kalite difikilte
13. Ki difikilte pep Zeova i rankontre e akoz i annan en kantite sa bann keksoz?
13 Difikilte i vin dan diferan fason, problenm finansyel, perdi louvraz, dezas natirel, lanmor en dimoun nou kontan, problenm lasante ek lezot ankor. Vi ki nou pe viv dan “letan difisil,” i toutafe normal pour ekspekte ki to ou tar nou tou nou pou bezwen fer fas avek en kalite leprev. (2 Tim. 3:1) Kan sa i arive, i enportan ki nou pa panik. Lespri sen i kapab donn nou sa pwisans pour fer fas avek nenport kalite difikilte.
14. Kwa ki ti donn Zob lafors pour andir bann difikilte?
14 Zob ti pas atraver bann moman difisil, enn deryer lot. I ti perdi tou sours son reveni, son zanfan, son zanmi, son lasante e son madanm ti perdi konfyans dan Zeova. (Zob 1:13-19; 2:7-9) Pourtan, Eliou ti en vre zanmi pour Zob. “Espere! e egzamin bann travay merveye Bondye” ti tenm mesaz Eliou e osi bann pwen prensipal mesaz Zeova pour Zob. (Zob 37:14) Kwa ki ti ed Zob pour andir son bann leprev? Kwa ki kapab ed nou andir sa ki pour nou? Letan nou reflesir e mazin bokou lo bann diferan fason ki Zeova ti servi son lespri sen ek pwisans. (Zob 38:1-41; 42:1, 2) Petet nou kapab rapel bann moman dan nou lavi kot i ti evidan pour nou ki Zeova ti enterese avek nou personnelman. I ankor enterese avek nou.
15. Kwa ki ti donn lafors zapot Pol pour andir bann leprev?
15 Akoz son lafwa, zapot Pol ti rankontre en kantite difikilte ki ti kapab kout li son lavi. (2 Kor. 11:23-28) Ki mannyer i ti gard en bon lekilib ek kontrol byen son santiman dan sa bann moman difisil? I ti depan antyerman lo Zeova atraver lapriyer. Ler i ti pe ganny persekite e finalman ganny touye, Pol ti ekrir: “Senyer in soutenir mwan e i’n fortifye mwan e in fer mwan kapab anons son mesaz e fer tou bann payen tande. E koumsa mon’n ganny delivre dan lagel lyon.” (2 Tim. 4:17) Alor, atraver son prop leksperyans, Pol ti kapab asir son bann frer ek ser ki i pa ti neseser pour zot “enkyet pour nanryen.”—Lir Filipyen 4:6, 7; Efezyen 6:10.
16, 17. Donn en legzanp pour montre konman ki Zeova i donn son pep lafors pour fer fas avek difikilte denozour.
16 En ser pionye ki apel Roxana i enn parmi bann ki’n vwar levidans ki Zeova i pran swen avek son pep. Kan i ti demann son anplwayer permisyon pour li pran detrwa zour konze pour ki i asiste enn nou lasanble distrik, son anplwayer ti ankoler avek li e dir Roxana ki si i ale, i ti pou pous li travay. Kantmenm sa, Roxana ti al son lasanble e i ti sipliy Zeova en kantite pour ki i kapab gard son louvraz. Apre sa, i ti santi li soulaze. Me zis parey i ti’n dir, Lendi bomaten apre lasanble, son bourzwa ti pous li. Roxana ti vreman enkyet. I ti bezwen sa louvraz pour siport son fanmir, menm si sa louvraz pa ti pey bokou. Ankor enn fwa, i ti priye e i ti mazinen ki Bondye in pran swen avek li spirityelman, alor i pou sirman kapab fer li fizikman. Anmezir i ti marse pour al kot li, Roxana ti vwar en lansenny ki ti pe demann led dimoun ki konn servi byen en masin koud endistriyel e i ti fer laplikasyon pour sa travay. Sa manedyer ti dekouver ki i ti napa leksperyans, me toudmenm i ti donn li sa louvraz, son lapey ti menm preski de fwa plis ki sa ki i ti pe gannyen avan e Roxana ti santi ki son lapriyer ti pe ganny reponn. Par kont, pli gran benediksyon ki i ti gannyen se ki i ti kapab partaz sa bon nouvel avek plizyer son bann koleg travay. Senk parmi zot, enkli son manedyer in aksepte laverite e batize.
17 Parler, i kapab paret ki nou lapriyer pa pe ganny reponn, an tou ka pa toudswit, ouswa menm pa lafason ki nou pe ekspekte. Me si i leka, san okenn dout i annan en bon rezon. Zeova ki konnen e petet plitar ki nou pou konpran pli byen. Me nou kapab asire ki Bondye pa zanmen abandonn sa bann ki fidel avek li.—Ebr. 6:10.
Led pour fer fas avek leprev ek tantasyon
18, 19. (a) Akoz nou ekspekte fer fas avek leprev ek tantasyon? (b) Ki mannyer ou kapab reisi fer fas avek leprev?
18 Pep Zeova pa sirprann ki zot ganny tante, dekouraze, ganny persekite ouswa ganny enfliyanse par lezot pour fer sa ki mal. Lemonn an zeneral pa tro kontan nou. (Zan 15:17-19) Me kantmenm sa, lespri sen i ed nou fer fas avek okenn defi ki nou kapab rankontre dan nou servis pour Bondye. Zeova pa pou zanmen les nou ganny tante plis ki nou kapab siporte. (1 Kor. 10:13) I pa pou zanmen negliz nou, ni menm abandonn nou. (Ebr. 13:5) Si nou obeir son Parol enspire nou pou ganny proteksyon ek lafors. Deplis, lespri sen Bondye i kapab motiv bann frer ek ser Kretyen pour ed nou kan nou bezwen.
19 Alor, annou kontinyen rod led lespri sen atraver lapriyer ek letid Labib. “Ki Bondye i ranpli [nou] avek lafors par pisans son laglwar, pour ki [nou] a kapab siport tou avek pasyans.”—Kol. 1:11.
[Not anba lo paz]
^ par. 2 Psonm 91:13: “Ou pou mars lo sa zenn lyon e lo sa kobra. Ou pou kraz sa zenn lyon for ek sa gro serpan.”
^ par. 6 Par egzanp, vwar Latour Veyer le 1 Me 2001 paz 27; ek Awake! le 8 Fevriye 1993 paz 21 ek 22.
^ par. 8 Nonm 13:30; 14:6-10, 24: “Apre sa Kaleb ti esey fer lepep reste trankil devan Moiz e dir: ‘Annou al deswit e sirman nou pou pran sa pei akoz nou vreman kapab vin pli for ki zot.’” “Zozye, garson Noun ek Kaleb, garson Yefoune, ki ti parmi sa bann ki ti espyonn pei ti desir zot lenz, 7 epi dir sa avek tou bann garson Izrael ki ti’n rasanble: ‘Sa pei kot nou’n ale pour eksplore i en tre tre bon pei. 8 Si nou annan faver dan lizye Zeova, alor i pou fer nou antre dan sa pei e donn nou sa pei, en pei ki koul dile ek dimyel. 9 Selman pa rebel kont Zeova; e zot, pa bezwen ki zot per sa bann dimoun dan sa pei, akoz zot parey dipen pour nou. Zot nepli annan proteksyon, e Zeova i avek nou. Pa bezwen per zot.’ 10 Par kont, lepep antye ti mazin pour saboul zot avek ros. E laglwar Zeova ti aparet avek tou bann garson Izrael lo lantant pour renyon.” “Tandis ki Kaleb mon serviter, akoz i ti annan en lespri diferan avek li e i ti kontinyen swiv mwan konpletman, mon pou sirman donn li sa pei kot i’n ale e son desandans pou pran sa pei.”
Ki ou pou reponn?
• Ki mannyer ou kapab prepar ou pour fer fas avek persekisyon?
• Ki mannyer ou devret reazir si en dimoun i sipliy ou pour pa devwal son pese?
• Ki konfyans ou kapab annan menm ler ou pe fer fas avek nenport kalite difikilte?
[Kestyon]
[Portre lo paz 30]
Ki nou kapab aprann avek Zozye ek Kaleb?
[Portre lo paz 31]
Ki mannyer ou kapab ed en zanmi ki’n fer sa ki mal?