Eski Bondye pe pini nou?

Apre ki en tranblemandter ki mezir 9.0-magnitid ek en tsounami ti frap Zapon an Mars 2011, en politisyen Zaponnen ti dir: “Mon krwar ki sa i tembatsu (pinisyon sorti kot Bondye), menm si mon pran lapenn pour sa bann dimoun ki’n ganny afekte par sa dezas.”

Ler plis ki 220,000 dimoun ti ganny touye dan sa tranblemandter ki ti frap Aiti Zanvye 2010, en paster ki abitye koz lo larelizyon lo televizyon ti dir ki sa ti akoz zot ti’n fer “en lakor avek dyab,” alor, zot ti bezwen “retourn ver bondye.”

En pret Katolik ti dir ki “Bondye ti anvi evey nou konsyans ki’n mor e nepli sansib” ler 79 dimoun Manila, Filipin ti mor apre ki en lafoul dimoun ti tay lo kanmarad. En zournal laba menm ti dir ki “venteen poursan bann adilt i krwar ki Bondye i tir son lakoler lo zot par servi bann deboulir later, tanpet ek lezot dezas” ki souvan frap sa pei.

SA KRWAYANS ki Bondye i servi bann dezas pour pini bann dimoun pa nouvo. An 1755, apre ki en tranblemandter, dife ek tsounami ti touy anviron 60,000 dimoun Lisbon, Portigal, en filozof byen renonmen apele Voltaire ti demande: “Eski i ti annan plis lemal Lisbon ki Pari kot dimoun i trouv plis lazwa par satisfer zot bann move dezir?” Vreman, plizyer milyon dimoun i demande si Bondye i servi bann dezas natirel pour pini dimoun. Menm dan plizyer pei zot dir ki tou sa la i lavolonte Bondye.

An rapor avek tou sa la, i byen pour nou demande: Eski Bondye i vreman servi bann dezas natirel pour pini dimoun? Eski sa kantite dezas ki’n arive tou dernyenman i pinisyon sorti kot Bondye?

Bann dimoun ki taye pour blanm Bondye i souvan servi bann resi dan Labib kot Bondye ti anmenn destriksyon par servi bann eleman natirel. (Zenez 7:17-22; 18:20; 19:24, 25; Nonm 16:31-35) Me ler nou egzamin sa bann resi Labib nou vwar ki i annan trwa fakter enportan ki fer en distenksyon avek sa ki dimoun i dir. Premyerman, dan sak sityasyon nou vwar ki en lavertisman ti ganny donnen davans. Dezyenmman, kontrerman avek bann dezas natirel konmela kot bann bon ek move dimoun i ganny detrir, zis bann move dimoun ki pa ti anvi repantir oubyen ekout bann lavertisman ki ti ganny detrir par Bondye. Trwazyenmman, Bondye ti fer laranzman pour bann dimoun inosan ganny sove.​—Zenez 7:1, 23; 19:15-17; Nonm 16:23-27.

Napa okenn levidans ki montre ki se Bondye ki responsab pour sa kantite dezas ki’n pran lavi plizyer milyon dimoun dan nou letan. Alors, ki mannyer nou kapab fer fas avek sa bann dezas? Eski bann dezas natirel pou toultan egziste? Ou pou trouv larepons sa bann kestyon dan bann lartik ki swiv.