Eski i enportan pour konn larepons?

“Zot a konn laverite e laverite i ava fer zot lib.”​—ZAN 8:32.

DAN Labib i annan bann laverite ki kapab liber nou avek bann fo krwayans ek konfizyon lo Zezi. Me, eski sa ki nou krwar lo Zezi i enportan? Wi, i vreman enportan. I enportan pour Zeova, i enportan pour Zezi e i devret enportan pour nou.

● Akoz i enportan pour Zeova? Senpleman akoz “Bondye i lanmour.” (1 Zan 4:8) Zeova i anvi ki nou viv ere pour touzour. Zezi ti dir: “Bondye in telman kontan lemonn [oubyen limanite] ki i’n donn son sel Garson, pour ki nenport ki krwar dan li . . . a ganny lavi eternel.” (Zan 3:16) Bondye ti anvoy son Garson pour vin liber nou e pour fer li posib pour nou viv pour touzour dan Paradi lo later ki dapre sa plan ki I ti annan depi o konmansman. (Zenez 1:28) Bondye i vreman anvi donn lavi eternel bann ki aprann laverite lo son Garson e azir dapre sa ki zot aprann.​—Romen 6:23.

● Akoz i enportan pour Zezi? Zezi osi i kontan bann imen. I ti demontre en lanmour senser pour nou par volonterman ofer son lavi konman en sakrifis. (Zan 15:13) I ti konnen ki i ti pou sa sel mwayen pour bann imen kapab ganny libere. (Zan 14:6) Eski i sirprann nou ki Zezi i anvi ki maksimonm dimoun i benefisye atraver sa pri ki i’n peye? Non, akoz i ti donn lord son bann vre disip pour ansenny bann dimoun partou lo later konsernan lavolonte Bondye ek son plan.​—Matye 24:14; 28:19, 20.

● Akoz i devret enportan pour nou? Zis mazinen, pa ou lasante ek fanmir i enportan pour ou? Eski ou ti a kontan annan en bon lasante ek en meyer lavenir pour ou ek ou fanmir? Atraver Zezi, Zeova i ofer ou ek tou dimoun ki ou kontan sa posibilite pour viv pour touzour avek en lasante parfe kot ou pa pou zanmen pas atraver okenn douler ni soufrans. (Psonm 37:11, 29; Revelasyon 21:3, 4) Eski ou ti pou kontan viv sa kalite lavi? Si wi, i annan en keksoz ki ou bezwen fer.

Get sa verse Labib ki swiv tit sa lartik ankor enn fwa. I dir: “Zot a konn laverite e laverite i ava fer zot lib.” Laverite lo Zezi ek rol ki i zwe pour akonplir plan Bondye i kapab liber ou dan sa form lesklavaz ki pli terib: lesklavaz pese ek lanmor. Me avan ki ou kapab ganny libere ou bezwen “konn laverite.” Akoz ou pa aprann plis lo sa laverite e lo ki mannyer ou ek ou fanmir i kapab benefisye? Temwen Zeova pou byen kontan pour ed ou.