Met ou konfyans dan Zeova, Bondye “letan ek sezon”
Met ou konfyans dan Zeova, Bondye “letan ek sezon”
“I pe sanz letan ek sezon, pe retir bann lerwa e pe met bann lerwa o pouvwar.”—DAN. 2:21.
KI OU POU REPONN?
Ki mannyer kreasyon ek bann profesi ki’n ganny akonplir i montre ki Zeova i sa Enn ki kontrol letan?
Lefet ki nou konnen ki Zeova i Bondye “letan ek sezon,” ki sa i devret pous nou pour fer?
Akoz nenport kwa ki kapab arive dan lemonn ouswa plan bann imen pa pou afekte plan Zeova?
1, 2. Kwa ki montre ki Zeova i konpran byen letan?
MENM avan ki Zeova ti kre imen, i ti fer posib pour kalkil letan. Lo katriyenm zour kreasyon, Bondye ti dir: “Ki lalimyer i aparet dan lesyel pour fer en separasyon ant lizour ek lannwit e zot a ganny servi konman siny pour bann sezon, zour ek lannen.” (Zen. 1:14, 19, 26) Dapre lavolonte Zeova, sanmenm sa ki ti arive.
2 Me ziska aprezan bann syantis in fer plizyer kozri lo ki savedir letan. En ansiklopedi i dir: “Letan i enn bann pli gro mister lo later. Personn pa kapab dir ki si sa letan.” Par kont, Zeova i konpran byen letan. Apre tou, se li ki “Kreater lesyel, . . . sa Enn ki’n form e fer later.” Zeova i osi “sa Enn ki depi o konmansman i revel konklizyon e depi byen lontan bann keksoz ki pa ankor arive.” (Iza. 45:18; 46:10) Pour ranforsi nou lafwa dan Bondye ek son Parol Labib, annou vwar ki mannyer kreasyon ek bann profesi ki’n ganny akonplir i prouve ki Zeova i sa Enn ki kontrol letan.
KREASYON I FER NOU DEVLOP PLIS LAFWA DAN SA ENN KI KONTROL LETAN
3. Mansyonn serten legzanp dan kreasyon ki nou kapab obzerv bann peryod letan egzakt.
3 Nou kapab obzerv bann peryod letan egzakt dan bann keksoz ki Zeova in kree, ki swa pti ouswa gro. Bann atonm i vibre menm vites toultan. Bann revey spesyal ki servi atonm pour kalkil ler pa pou mank en segonn, ni menm apre 80 milyon lannen pli tar. Bann plannet ek zetwal osi i bouz dan en fason konsistan e presi. Lefet ki imen i kapab dir pozisyon egzakt bann zetwal ek plannet davans sa in ed zot pour determin bann sezon e konn direksyon kan pe navige. Zeova, sa Enn ki’n kre sa bann atonm, plannet ek zetwal i vreman “for e pwisan” e nou devret loue li pour sa.—Lir Izai 40:26. *
4. Ki mannyer bann peryod letan egzakt ki nou obzerve dan bann keksoz vivan i montre ki Bondye i annan lasazes?
4 Nou kapab osi obzerv letan dan bann keksoz vivan. I konmsi zot ganny kontrole par en revey anndan zot ki toultan egzakt. Par egzanp, bann zwazo i ganny kontrole par zot lensten ki dir zot kan ki zot devret imigre. (Zer. 8:7) Lekor bann imen i mars dapre en revey 24 erdtan ki fer nou konnen i lizour oubyen aswar. Si nou vwayaz par avyon pour al dan en lot pei ki son ler i vreman diferan avek sa ki pour nou, i pou pran nou lekor plizyer zour pour aziste avek sa nouvo ler. Tou sa bann levidans dan kreasyon konsernan ler oubyen letan i montre ki sa Bondye ki’n kre “letan ek sezon” i annan bokou pwisans ek lasazes. (Lir Psonm 104:24. *) Wi, sa Enn ki kontrol letan i tou pwisan e i annan bokou lasazes. Nou kapab annan lafwa ki i pou akonplir tou sa ki i anvi.
BANN PROFESI KI’N GANNY AKONPLIR A LER I FER NOU DEVLOP PLIS LAFWA
5. (a) Ki sa sel fason ki nou kapab konnen ki lavenir i rezerve pour nou? (b) Akoz Zeova i kapab predir bann levennman ek letan ki zot pou arive?
5 Kreasyon i ansenny nou en kantite lo bann “kalite envizib” ki Zeova i annan me i pa reponn tou nou bann kestyon, par egzanp ki lavenir i rezerve pour nou? (Rom. 1:20) Pour nou konn larepons, nou bezwen get sa ki Bondye in revele dan son Parol Labib. Kan nou egzamin Labib, nou trouv bann profesi ki’n toultan ganny akonplir egzakteman a ler. Zeova i kapab dir davans sa ki pou arive akoz i konn lavenir dan en fason presi. Deplis, sa ki Labib i predir pou arive i ariv zis a ler akoz Zeova i kapab fer bann levennman arive dapre son plan ek letan ki i anvi sa levennman i arive.
6. Kwa ki montre ki Zeova i anvi ki nou konpran lakonplisman bann profesi Labib?
6 Zeova i anvi ki son bann serviter i konpran bann profesi ki dan Labib e ki zot benefisye nou. Menm si Zeova pa vwar letan parey nou, nou kapab konnen kan ki en levennman ki i’n predir pou arive akoz i servi bann term ki nou kapab konpran. (Lir Psonm 90:4. *) Par egzanp, liv Revelasyon i koz lo “sa kat lanz” ki’n ganny “prepare pour sa ler, sa zour, sa mwan e sa lannen,” nou konpran ki kantite letan sa bann diferan term i reprezante. (Rev. 9:14, 15) Kan nou vwar bann profesi pe ganny akonplir dan sa letan egzakt ki zot ti’n ganny profetize, sa i devret fer nou annan plis lafwa dan Bondye “letan ek sezon” ek son Parol. Annou vwar detrwa legzanp.
7. Ki mannyer lakonplisman profesi Zeremi konsernan Zerizalenm ek Zida i montre ki Zeova i sa Enn ki kontrol letan?
7 Premyerman, get sa ki ti arive dan setyenm syek A.N.L. “Pandan katriyenm lannen renny Yeoyakim garson Yosiya, lerwa Zida,” Zeremi ti ganny parol sa Enn ki kontrol letan “konsernan pep Zida.” (Zer. 25:1) Zeova ti predir ki Zerizalenm ti pou ganny devaste e ki bann Zwif ti pou ganny egzile Babilonn. Laba, zot ti pou “servi lerwa Babilonn pour swasanndis lannen.” An 607 A.N.L., larme Babilonnyen ti detrir Zerizalenm e bann Zwif ti vreman ganny deporte e ganny anmennen Babilonn. Me ki ti pou arive a lafen sa 70 an? Zeremi ti profetize: “La sa ki Zeova in dir: ‘An konformite avek lakonplisman sa swasanndis an Babilonn, mon pou tourn mon latansyon ver zot lepep e an rapor avek zot mon pou vreman realiz mon bon parol pour reanmenn zot dan sa landrwa.’” (Zer. 25:11, 12; 29:10) Sa profesi ti ganny akonplir egzakteman sa letan ki i ti’n ganny profetize, an 537 A.N.L. apre ki bann Med ek Pers ti liber bann Zwif Babilonn.
8, 9. Ki mannyer bann profesi Danyel konsernan larive Mesi ek lannen ki Rwayonm Bondye ti pou konmans dirize dan lesyel i montre ki Zeova i Bondye “letan ek sezon”?
8 Annou vwar en lot profesi ki enplik pep Bondye dan letan lontan. Apepre de-z-an avan ki bann Zwif ti kit Babilonn, Bondye ti servi profet Danyel pour predir ki Mesi ti pou vini 483 lannen apre ki lord pour rekonstri Zerizalenm ti pou ganny donnen. Lerwa Lanpir Med ek Pers ti donn sa lord an 455 A.N.L. Egzakteman 483 lannen pli tar, an lannen 29 N.L., Zezi ki sorti Nazaret ti ganny swazir par lespri sen kan i ti batize e vin sa Mesi. *—Nee. 2:1, 5-8; Dan. 9:24, 25; Lik 3:1, 2, 21, 22.
9 Aprezan get sa ki Lekritir ti predir konsernan Rwayonm Bondye. Labib ti endike ki Rwayonm Bondye dan lanmen Zezi ti pou ganny etablir dan lesyel an 1914. Par egzanp, Labib ti donn “siny” prezans Zezi e ti dir ki pandan sa letan i pou annan bokou problenm lo later akoz Satan pou ganny zete lo later. (Mat. 24:3-14; Rev. 12:9, 12) Deplis, bann profesi Labib i montre sa letan egzakt ki “letan bann nasyon etranze [ti pou] fini” e montre ki Zezi ti pou konmans dirize dan lesyel an 1914.—Lik 21:24; Dan. 4:10-17. *
10. Ki bann levennman ki pou ariv aler tre byento?
10 Zezi ti predir ki dan lavenir i pou annan en “gran ladetres.” Apre sa, i pou rennyen pour mil an. Nou napa okenn dout ki sa bann keksoz pou ariv zis aler. Kan Zezi ti lo later, Zeova ti’n fini met sa “zour e sa ler” kan sa bann levennman pou arive.—Mat. 24:21, 36, NW; Rev. 20:6.
“SERVI BYEN TOU BANN LOKAZYON”
11. Lefet ki nou konnen ki nou pe viv pandan bann dernyen zour, ki lefe sa i devret annan lo nou?
11 Ki lefe sa i devret annan lo nou lefet ki nou konnen ki Rwayonm Bondye in konmans dirize e ki nou pe viv pandan “letan lafen”? (Dan. 12:4) I annan bokou dimoun ki remarke ki sa lemonn pe deteryore me zot pa oule aksepte ki sa i lakonplisman bann profesi Labib konsernan bann dernyen zour. Serten pe ekspekte vwar sa sistenm degrengole en zour tandis ki lezot i krwar ki dan en fason ou lot, imen pou kapab etablir ‘lape ek sekirite.’ (1 Tesa. 5:3) Me ki lefe sa i devret annan lo nou? Si nou rekonnet ki nou pe vreman viv dan bann dernyen zour lemonn Satan, eski pa nou devret fer bokou zefor pour servi sa Bondye “letan ek sezon” dan sa ptigin letan ki reste e ed lezot dimoun aprann konn li? (2 Tim. 3:1) Nou bezwen fer bann desizyon saz lo lafason ki nou servi nou letan.—Lir Efezyen 5:15-17.
12. Ki nou kapab aprann atraver sa parol ki Zezi ti dir konsernan zour Noe?
12 Sa lemonn i ranpli avek bann distraksyon, alor i pa fasil pour “servi byen tou bann lokazyon” ki prezant devan nou. Zezi ti donn nou sa lavertisman: “Larive Fis-de-Lonm pou parey sa ki ti arive dan letan Noe.” Ki ti arive dan letan Noe? I ti ganny predir ki lemonn dan sa letan ti pou ganny detrir. Bann move dimoun ti pou noye dan en gro deliz. Noe ti en “predikater lazistis” e i ti anons mesaz Bondye avek bann dimoun dan son letan san arete. (Mat. 24:37; 2 Pyer 2:5) Me sa bann dimoun ti “pe manze e bwar, dimoun ti pe marye e zot ti pe fer marye zot fiy . . . Zot pa ti pran kont nanryen ziska deliz ti vini e balye zot tou.” I pour sa rezon ki Zezi ti averti son bann disip: “Zot osi met zot pare, akoz Fis-de-Lonm pou vini ler ki zot pa pe ekspekte li.” (Mat. 24:38, 39, 44) Nou bezwen fer parey Noe, pa parey bann dimoun dan son letan. Kwa ki pou ed nou pour met nou pare?
13, 14. Ki nou devret rapel konsernan Zeova ki pou ed nou kontinyen servi li fidelman anmezir ki nou pe esper Fis-de-lonm vini ?
13 Menm si Fis-de-lonm pou vin en ler ki nou pa pe ekspekte, nou bezwen gard antet ki Zeova i sa Enn ki kontrol letan. Nenport kwa ki kapab arive dan lemonn ouswa sa ki imen i plàn pour fer, Zeova i kapab deside kan ki keksoz pou arive e avek ki rezilta. (Lir Danyel 2:21. *) Anfet, Proverb 21:1 i dir nou: “Leker en lerwa i parey larivyer dan lanmen Zeova. I kapab fer li al dan nenport direksyon ki i anvi.”
14 Zeova i kapab kontrol bann levennman pour akonplir son plan aler. I annan bokou bann gran sanzman ki’n arive dan lemonn ki ti lakonplisman bann profesi tel parey sa travay predikasyon ki pe ganny fer dan lemonn antye pour anons sa bon nouvel lo Rwayonm Bondye. Mazin sa ki ti arive apre ki Linyon Sovyetik ti tonbe. Bokou dimoun pa ti pou krwar ki keksoz dan politik ti pou kapab sanze en sel kou. An konsekans, sa bon nouvel pe aprezan ganny prese dan bann landrwa kot i ti’n ganny enterdi. Annou servi byen tou bann lokazyon ki prezant devan nou pour servi sa Bondye “letan ek sezon” fidelman.
ANNAN LAFWA KI PLAN ZEOVA POU AKONPLIR ZIS A LER
15. Ki mannyer nou kapab demontre lafwa kan bann azisteman i ganny fer dan lorganizasyon Zeova?
15 Pour nou kapab kontinyen pres lo son Rwayonm dan sa bann dernyen zour, nou bezwen annan lafwa ki plan Zeova pou ganny akonplir zis a ler. Lefet ki sirkonstans dan sa lemonn i kontinyelman sanze, i posib ki nou pou bezwen sanz lafason ki nou prese. Lorganizasyon Zeova i kapab fer serten azisteman detanzaot pour ed nou pres sa bon nouvel dan en fason pli efikas. Nou demontre lafwa dan sa Bondye “letan ek sezon” par aksepte sa bann azisteman anmezir ki nou kontinyen servi li fidelman anba direksyon son Garson, “sef [kongregasyon, NW].”—Efe. 5:23.
16. Akoz nou kapab annan lafwa ki Zeova pou donn nou led dan sa moman neseser?
16 Zeova i oule ki nou apros li dan lapriyer libreman avek konfyans total ki i pou “ed nou dan moman neseser.” (Ebr. 4:16) Pa sa i montre ki Zeova i kontan e enterese avek nou endividyelman? (Mat. 6:8; 10:29-31) Nou demontre ki nou annan lafwa dan Zeova par demann li son led atraver lapriyer regilyerman, azir an armoni avek nou lapriyer ek son gidans e priy pour nou bann frer ek ser.
17, 18. (a) Ki Zeova pou fer avek son bann lennmi tre byento? (b) Ki latrap ki nou devret evite?
17 La i pa lemoman pour ‘ni ezite ni doute,’ la i lemoman pour vin pli for dan lafwa. (Rom. 4:20) Bann lennmi Bondye, setadir Satan ek tou bann ki les zot ganny enfliyanse par li, pe esey fer arete sa travay ki Zezi ti demann son bann disip enkli nou pour fer. (Mat. 28:19, 20) Malgre bann latak Dyab, nou konnen ki Zeova i “en Bondye vivan, Sover pour tou dimoun, sirtou pour bann krwaryan.” I “konnen ki mannyer i pou delivre bann dimoun ki atase avek li dan difikilte.”—1 Tim. 4:10; 2 Pyer 2:9.
18 Zeova pou tre byento anmenn en lafen avek sa move lemonn. Menm si i pa’n donn nou tou bann detay ek ler egzakt ki sa pou arive, nou konnen ki Kris pou detrir bann lennmi Bondye zis a ler e tou dimoun pou konnen ki se Zeova ki annan drwa pour dirize. Nou pou fer en gro fot si nou pa esey konpran sa “letan ek sezon” ki nou pe viv ladan. Annou pa zanmen tonm dan sa latrap pour panse ki “tou i reste parey depi kreasyon lemonn.”—1 Tesa. 5:1; 2 Pyer 3:3, 4.
‘KONTINYEN ESPERE’
19, 20. Akoz nou devret kontinyen esper Zeova?
19 Plan Bondye pour imen depi o konmansman ti osi enkli ki imen i aprann konsernan li ek son zoli kreasyon pour en letan endefini. Eklezyast 3:11 i dir: “I’n fer tou keksoz zoli dan son letan. I’n menm met dezir pour viv pour en letan endefini dan zot leker, pour ki bann imen pa zanmen dekouver travay ki sa vre Bondye in fer depi o konmansman ziska lafen.”
20 Pa nou vreman kontan ki Zeova pa’n zanmen sanz son plan konsernan imen! (Mal. 3:6) I “napa menm lonbraz en sanzman” avek Bondye. (Zak 1:17) Lonbraz i kontinyen sanze akoz later i kontinyelman vire, me plan Zeova pa sanze akoz i pa vwar letan parey imen. Zeova i “Lerwa eternel.” (1 Tim. 1:17) Alor, annou “kontinyen esper Bondye ki pou sov [nou].” (Mik. 7:7) “Pran kouraz e ki zot leker i for, zot tou ki pe esper Zeova.”—Ps. 31:24.
[Not anba lo paz]
^ par. 3 Izai 40:26: “Lev zot lizye anler e gete. Lekel ki’n kre sa bann keksoz? Se sa Enn ki pe fer marse sa larme, zot tou zot la. I apel zot tou par zot non. Akoz i annan en kantite lenerzi e akoz i for e pwisan, napa enn parmi zot ki manke.”
^ par. 4 Psonm 104:24: “Pa ou bann travay i bokou, O Zeova! Ou’n fer zot tou avek lasazes. Later i ranpli avek tou sa ki ou’n fer.”
^ par. 6 Psonm 90:4: “Akoz mil an dan ou lizye i konmsi yer kan i’n pase e parey en veye pandan lannwit.”
^ par. 8 Vwar liv Pay Attention to Daniel’s Prophecy! lo paz 186-195.
^ par. 9 Vwar liv Pay Attention to Daniel’s Prophecy! lo paz 94-97.
^ par. 13 Danyel 2:21: “I pe sanz bann letan ek sezon, retir bann lerwa e met bann lerwa o pouvwar. I pe donn lasazes sa bann ki saz ek konnesans bann ki konn disernman.”
[Kestyon]
[Portre lo paz 25]
Danyel ti annan lafwa dan bann profesi Bondye
[Portre lo paz 27]
Eski ou servi byen ou letan pour fer lavolonte Zeova?
