Kestyon 1: Ki bi mon lavi?

ROSALIND, ki’n grandi Langleter, ti annan en gran lanvi pour aprann. I ti osi anvi ed dimoun. Apre ki i ti fini lekol, Rosalind ti ganny en bon plas travay ki ti enplik ed bann ki napa lakaz, e i ti osi ed bann ki annan dezabilite fizik ek difikilte pour aprann. Malgre i ti byen kontan son travay e annan en lavi konfortab, i dir: “Pour bokou lannen mon’n demann mon lekor, ‘Akoz nou la?’ e ‘Ki bi lavi?’”

Akoz sa kestyon? Nou pa parey bann zannimo ki pa kapab reflesir. Nou annan sa abilite pour aprann avek lepase, plàn pour lavenir, e annan en bi dan lavi.

Ki larepons serten i donnen? Bokou dimoun i krwar ki vin ris oubyen popiler i bi prensipal lavi, e se sa ki fer en dimoun ere.

Ki sa larepons i montre? Nou etabli nou prop priyorite dan lavi. Nou bann dezir i pli enportan ki fer lavolonte Bondye.

Ki Labib i dir? Lerwa Salomon ti ganny en gran fortin e i’n byen anmize, me i ti vwar ki sa bann keksoz pa ti donn son lavi en bi. I ti idantifye kwa ki donn en vre bi dan lavi ler i ti ekrir: “Konklizyon apre ki tou keksoz in ganny tande, i: Annan lakrent pour sa vre Bondye e gard son bann komannman. Akoz sa i tou lobligasyon zonm.” (Eklezyast 12:13) Ki i enplike dan gard komannman Bondye?

Rezwir lavi i form parti plan Bondye pour nou. Salomon ti ekrir: “Napa nanryen pli meyer pour en zonm ki i manze e  menm bwar e vwar rezilta akoz i’n travay dir. Sa osi mon’n vwar, menm mwan, ki sa i sorti dan lanmen sa vre Bondye.”​—Eklezyast 2:24.

Bondye i osi anvi nou kontan nou fanmir e pran swen avek zot. Get sa bann gidans senp e pratik pour sak manm fanmir:

“Bann zonm devre alor, kontan zot madanm parey zot kontan zot prop lekor.”​—Efezyen 5:28.

“Fodre ki . . . sak madanm i respekte son mari.”​—Efezyen 5:33.

“Zanfan, i zot devwar obei zot paran dan Senyer.”​—Efezyen 6:1.

Si nou aplik sa bann prensip Labib, nou pou trouv boner ek lakontantman. Me, keksoz pli enportan ki nou kapab fer se aprann tou sa ki nou kapab lo nou Kreater e vin son zanmi pros. Wi, Labib i envit nou pour “apros avek Bondye.” I osi azoute ki Bondye “i ava apros avek zot.” (Zak 4:8) Si ou aksepte sa lenvitasyon, ou pou trouv vre bi dan lavi.

Rosalind, ki’n ganny mansyonnen o konmansman sa lartik, i santi aprezan ki i’n trouv sa vre bi dan lavi. Ou kapab lir kwa ki’n fer li sanz son latitid dan Latour Veyer le 1 Novanm 2012 paz 10 an Angle.

Pour aprann plis lo ki mannyer ou kapab viv en lavi ki fer plezir Bondye, vwar sapit 12 dan liv Ki Labib i vreman dir? Ou kapab download li lo www.dan124.com

[Bwat lo paz 5]

Ki Zezi ti dir lo bi lavi?

Zezi ti napa okenn dout konsernan bi son lavi. I ti dir: “Mon’n ne e mon’n vin dan lemonn pour servi temwen pour laverite.” (Zan 18:37) Zezi ti depans tou son letan pour ansenny dimoun laverite lo Bondye ek Son plan.

Si nou swiv legzanp Zezi, nou pou annan en vre bi dan lavi. Anfet, Zezi i envit nou pour aprann avek li. (Matye 11:29) Annou vwar de fason kot nou kapab fer sa.

Zezi ti dir ki pour nou ere, fodre nou “konsyan [nou] bezwen spirityel.” (Matye 5:3, NW) Nou arive satisfer nou bezwen spirityel ler nou aprann konn sa “sel vre Bondye, ek Zezi-Kri ki [i’n] anvoye.”​—Zan 17:3.

Zezi ti donn son bann disip sa konmann pour ansenny lezot sa ki zot in aprann. I ti dir: “Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obei tou sa ki mon’n konmande.”​—Matye 28:19, 20.

Bann dimoun ki satisfer zot bezwen spirityel par etidye Labib e aplik sa ki zot aprann, i vwar ki zot lavi i sanz pour le meyer. Deplis, zot konvenki ki zot lavi i annan en vre bi ler zot konmans ed lezot aprann lo Bondye.