IMIT ZOT LAFWA | ABEL

“I pe kontinyen koze menm si i’n mor”

ABEL i get son bann mouton kot pe manze lo montanny, zot anpe. I get dan lwen e la i vwar en pti lalimyer. I konnen ki kot sa lalimyer i ete i annan en sab dife ki pe tournen, tournen, e pe touzour tournen, pour anpes okenn dimoun antre dan zarden Edenn. Son paran ti viv laba lontan, me ni zot ni zot zanfan pa kapab retourn laba. Esey mazin en zour dan tar apremidi, en pti divan pe soufle dan seve Abel anmezir ki i lev son lizye anler e mazin son Kreater. Eski en zour imen pou kapab reganny sa bon relasyon ki zot ti annan avek Bondye? Se sa ki Abel ti pe swete.

Abel pe koz avek ou ozordi. Eski ou tann li? Ou kapab dir ki sa i enposib. Apre tou, sa dezyenm garson Adan in mor en bann syek. I’n fini vin lapousyer depi plis ki 60 syek pase. Labib i menm dir sa konsernan bann dimoun mor: “Zot pa konn nanryen ditou.” (Eklezyast 9:5, 10) Deplis, Abel pa’n ekrir ni en mo dan Labib. Alor, ki mannyer i kapab koz avek nou?

Abel i koz avek nou atraver son lafwa. Anba lenspirasyon Bondye, Pol ti dir: “Par son lafwa Abel i pe kontinyen koze menm si i’n mor.” (Ebre 11:4) Abel ti sa premye dimoun ki ti devlop sa zoli kalite. Son lafwa ti sitan for ki i en bon legzanp pour nou swiv ozordi. Si nou imit lafwa Abel, i pou konmsi i pe vreman koz avek nou.

Me ki nou kapab aprann konsernan lafwa Abel vi ki Labib pa koz bokou lo li? Annou vwar.

I TI GRANDI KAN LEMONN TI’N FEK KONMANSE

Abel ti ne kan listwar imen ti’n fek konmanse. Plitar kan Zezi ti pe koz lo “fondasyon lemonn,” i ti pe refer avek Abel. (Lik 11:50, 51) I kler ki Zezi ti pe refer lo bann dimoun ki ti annan lespwar pour ganny pardonnen zot pese. Menm si Abel ti sa katriyenm imen ki ti egziste, i paret ki i ti sa premye imen ki Bondye ti konsider diny pour ganny pardonnen. * I kler, Abel pa ti grandi dan en bon lenfliyans.

Lemonn ti’n fek vin an egzistans e deza fanmir imen ti dan en gran latristes. Paran Abel, Adan ek Ev, ti bezwen de zoli dimoun, ranpli avek lenerzi. Me zot ti konn tre byen ki zot ti’n fer en gro fot dan zot lavi. Zot ti parfe e annan sa posibilite pour viv pour touzour. Me apre zot ti rebel kont Zeova, e ganny pouse dan zarden Edenn, sa Paradi kot zot ti reste. Lefet ki zot ti les zot dezir pas avan tou keksoz, enkli lentere zot bann zanfan, zot ti perdi sa lavi parfe ki zot ti annan ek sa posibilite pour viv pour touzour.​—Zenez 2:15–3:24.

Lavi an deor zarden ti vreman difisil pour Adan ek Ev. Pourtan, Ev ti dir sa kan zot premye zanfan, Kaen, ti ne: “Mon’n prodwir en zonm  avek led Zeova.” Son parol i montre ki petet i ti’n rapel sa promes ki Zeova ti fer dan zarden Edenn konsernan en madanm ki ti pou prodwi en “desandans” ki ti pou detrir sa enn move ki’n anbet zot. (Zenez 3:15; 4:1) Eski Ev ti panse ki i ti sa madanm dan sa profesi e ki Kaen ti sa “desandans” ki ti’n ganny promet?

Si i ti pe mazin sa, i ti’n mal kalkile. Deplis, si li ek Adan ti’n fer Kaen krwar ki i ti sa desandans, sa ti pou’n san dout fer sa imen enparfe vin pli orgeye. Avek letan, Ev ti donn nesans en dezyenm zanfan, me napa okenn parol grandyoz ki’n ganny rikorde konsernan li. Zot ti apel li Abel ki kapab vedir “Lavaper” oubyen “Vanite.” (Zenez 4:2) Eski sa non i vedir ki zot ti napa gran ekspektasyon konsernan Abel, konmsi zot ti annan plis lespwar dan Kaen ki Abel? Kekfwa!

Dan nenport ki ka, bann paran ozordi i kapab aprann bokou avek sa de premye paran. Eski sa ki ou dir e fer i ankouraz ou zanfan pour vin arogan, anbisye, e mazin zis son lekor? Oubyen ou pe ansenny li pour kontan e vin zanmi Zeova? Malerezman, sa premye paran pa ti arive desarz zot responsabilite. Me i ti annan lespwar pour zot desandans.

KI MANNYER ABEL TI DEVLOP LAFWA?

Anmezir ki sa de garson ti pe grandi, i posib ki Adan ti montre zot bann travay ki devret ganny fer pour pran swen avek zot fanmir. Kaen ti vin en fermye e Abel li, en berze.

Me Abel ti fer en keksoz pli enportan. Avek letan i ti devlop lafwa, sa zoli kalite ki Pol ti koz lo la plitar. Mazinen ki Abel ti napa legzanp personn pour li swiv. Alor, ki mannyer i ti kapab devlop lafwa dan Zeova? Annou vwar trwa pwen ki’n ed li devlop sa lafwa solid:

Kreasyon Zeova. I vre ki Zeova ti’n modi later par fer li prodwir pikan ek move zerb. Sa ti fer li difisil pour kiltiv later. Me kantmenm sa, later ti prodwir ase manze pour soutenir Abel ek son fanmir. Par kont bann zannimo, enkli zwazo ek pwason, pa ti’n ganny modi, ni montanny, lanmar, larivyer, ek lanmer. Ni lesyel, nyaz, soley, lalin, ek zetwal pa ti’n ganny modi. Partou kot Abel ti gete, i ti aprann ki Zeova, sa enn ki ti’n kre tou keksoz, i annan bokou lanmour, lasazes ek labonte. (Romen 1:20) Kan i ti medit lo tousala, sa ti fer son lafwa vin solid.

San dout Abel ti pran letan pour reflesir lo bann keksoz spirityel. Mazin li pe pran swen avek son bann mouton. I ti bezwen mars en kantite konman en berze. I ti anmenn son bann mouton marse lo bann montanny, vale, ek kot bann larivyer. I ti rod bann landrwa kot ti annan sa pli bon delo, kot zerb ti pli ver, e kot i ti pli konfortab pour repoze. Dan tou sa ki Bondye ti’n kree, mouton i sa zannimo ki pli san defans,  konmsi zot ti’n ganny kree pour zonm gid zot e protez zot. Eski Abel ti santi ki li osi i ti bezwen gidans, proteksyon, ek swen sorti kot Enn ki annan plis lasazes ek pwisans ki tou imen? San dout i ti’n bezwen mansyonn sa bann panse dan son lapriyer, e sa ti fer son lafwa kontinyen vin pli for.

Bann promes Zeova. Adan ek Ev ti’n bezwen rakont zot bann zanfan sa ki ti’n arive ki’n fer zot ganny pouse dan zarden Edenn. Alor, Abel ti annan en kantite pour reflesir lo la.

Zeova ti dir ki later ti pou ganny modi. Abel ti vwar lakonplisman sa parol kan i ti vwar bann pikan ek move zerb pe pouse partou. Zeova ti osi predir ki Ev ti pou soufer en kantite pandan lansentman ek lakousman. Anmezir ki son bann frer ek ser ti ne, Abel ti’n bezwen vwar lakonplisman sa bann parol. Zeova ti predir ki Ev ti pou depan en kantite lo lanmour ek latansyon Adan, e ki an retour Adan ti pou domin li. Abel ti vwar klerman ki tou sa ki Zeova ti’n dir ti pe ganny arive e realize ki i ti kapab met konfyans dan tou sa ki i ti dir. Sa i montre nou ki Abel ti annan bon rezon pour met lafwa dan promes Zeova konsernan en “desandans” ki ti pou en zour rektifye sa problenm ki ti konmanse dan zarden Edenn.​—Zenez 3:15-19.

Bann serviter Zeova. Menm si i ti napa okenn bon legzanp pour Abel swiv parmi imen, i ti annan lanz lo later ki ti fidel. Kan Adan ek Ev ti ganny pouse dan zarden Edenn, Zeova ti fer sir ki ni zot, ni zot desandans pa ti pou ganny akse avek Paradi. Zeova ti met bann seriben, setadir bann lanz ki annan en o pozisyon dan lesyel pour vey larantre zarden Edenn. I ti osi met en lepe avek lanm an flanm ki ti kontinyen tournen.​—Zenez 3:24.

Imazin Abel pe get sa bann seriben kan i ti ankor zanfan. Vi ki zot ti’n pran laform imen, Abel ti kapab vwar ki zot ti vreman pwisan. Sa “lepe” ki son laflanm pa ti zanmen tennyen, e ki pa ti zanmen aret tournen ti pou’n bezwen enpresyonn li. Anmezir ki Abel ti pe grandi, i pa ti zanmen vwar sa bann lanz annwiye e kit landrwa kot zot ti stasyonnen. Lizour konman aswar, lannen apre lannen, sa bann lanz ti touzour la. Atraver sa, Abel ti aprann ki Bondye ti annan bann serviter fidel e ki kontan fer sa ki byen. Abel ti vwar ki sa bann lanz ti fidel e obeisan anver Zeova, de kalite ki ti manke dan son fanmir. San dout, legzanp sa bann lanz ti fer son lafwa pli solid.

Kan Abel ti medit lo tou sa ki Zeova ti revele lo Li atraver kreasyon, Son bann promes, ek legzanp Son bann serviter, tousala ti fer son lafwa vin pli for. Pa i konmsi Abel pe koz avek nou atraver son legzanp? Bann zenn an partikilye i kapab vwar li ankourazan ki zot kapab devlop vre lafwa dan Zeova menm si zot fanmir i fer lekontrer. Bann mervey dan kreasyon otour nou, Labib antye ki a nou dispozisyon, e avek tou sa legzanp bann dimoun ki’n demontre lafwa, pa tou sa la i ed nou pour devlop en lafwa solid?

KWA KI TI FER SAKRIFIS ABEL PLI MEYER?

Anmezir ki lafwa Abel ti agrandi, i ti anvi demontre son lafwa an aksyon. Me kwa ki en imen i kapab donn Kreater liniver? Sirman Bondye pa ti bezwen okenn kado oubyen led imen. Avek letan Abel ti realiz sa laverite: ‘Si avek sa bon motivasyon mon zis ofer Zeova, mon Papa lanmour, sa keksoz pli meyer ki mon annan, pa i pou vreman apresye.’

Alor Abel ti deside ofer serten mouton dan son troupo. I ti pran sa ki meyer, bann premye ne, e ofer bann morso ki i ti panse ti pli bon. Kaen osi ti anvi ganny benediksyon ek faver Bondye. Alor i ti deside ofer serten porsyon son rekolt. Me son motivasyon pa ti parey pour Abel.  Sa diferans ti vin aparan kan tou le de frer ti prezant Bondye zot lofrann.

I posib ki tou le de garson Adan ti’n servi en lotel ek dife pour prezant Bondye zot lofrann. Zot ti fer sa kot zot ti kapab vwar bann seriben, sel reprezantan Zeova lo later sa letan. Zeova ti azir! Labib i dir: “Zeova ti pe get avek faver lo Abel ek son lofrann, i pa ti get avek faver lo Kaen ek son lofrann.” (Zenez 4:4) Labib pa dir nou ki mannyer Bondye ti demontre son faver. Me akoz i ti an faver lofrann Abel?

Eski i ti sa lofrann li menm? Abel ti ofer en zannimo e vers son disan. Eski Abel ti realize ki kantite valer sa sakrifis ti pou annan? Plizyer syek apre lepok Abel, Bondye ti servi sakrifis en pti mouton san defo pour reprezant sakrifis Son prop Garson, setadir “Lanyo Bondye,” ki son disan inosan ti pou ganny verse. (Zan 1:29; Egzod 12:5-7) Sirman Abel pa ti konn tousala.

Sa ki nou konnen se: Abel ti ofer sa keksoz pli meyer parmi sa ki i ti annan. Zeova pa ti get zis sa lofrann, me sa dimoun osi. Se lanmour pour Zeova ek lafwa dan li ki ti motiv Abel pour azir.

I ti diferan avek Kaen. Zeova “pa ti get avek faver lo Kaen ek son lofrann.” (Zenez 4:5) I pa ki lofrann Kaen ti mal dan li menm parski pli tar Lalwa Bondye ti permet pour ofer rekolt. (Levitik 6:14, 15) Me Labib i dir ki “laksyon [Kaen] ti move.” (1 Zan 3:12) Parey bokou dimoun i krwar ozordi, Kaen ti panse ki i ti kapab pretann ki i annan respe pour Bondye. Son aksyon pa ti tarde prouve ki i ti mank lanmour ek vre lafwa dan Zeova.

Kan Kaen ti vwar ki i pa ti’n ganny faver Zeova, eski i ti oule aprann avek legzanp Abel? Non. I ti vreman vreman ankoler avek son frer. Zeova ti vwar sa ki ti pe arive dan leker Kaen e avek pasyans i ti esey rezonn avek li. I ti averti Kaen ki si i pa ti sanze, sa ti pou fer li fer en pese grav, e I ti donn li en lespwar ki si i ti zis sanz son leker, i ti “pou ganny met pli o.”​—Zenez 4:6, 7.

Kaen ti inyor lavertisman Bondye. I ti envit son pti frer marse avek li dan lakanpanny, e la i ti atak li, e touy li. (Zenez 4:8) Dan en sans, Abel ti vin sa premye dimoun pour ganny persekite akoz son larelizyon. Menm si i’n mor, son zistwar pa ti fini la.

Dan en sans senbolik, disan Abel ti kriy Zeova pour revanze oubyen rann lazistis. Bondye ti fer sir ki lazistis i ganny fer par pini Kaen pour son krim. (Zenez 4:9-12) Pli enportan ankor, Abel pe koz avek nou ozordi atraver legzanp son lafwa. Menm si i ti viv pour pros en syek, sa ti en ptigin letan pour en dimoun viv dan sa letan. Me kantmenm sa, Abel ti viv en lavi ki ti fer plezir Bondye. Kan i ti mor, i ti konnen ki i ti annan laprouvasyon Zeova, son Papa dan lesyel. (Ebre 11:4) Nou kapab asire ki i’n ganny prezerve dan memwar Bondye e ki i pou ganny resisite pour viv pour touzour lo later. (Zan 5:28, 29) Eski ou pou zwenn li laba? Ou kapab zwenn li si ou determinen pour ekoute anmezir ki Abel i koze e imit son lafwa ekstraordiner. ▪

[Not anba lo paz]

[Portre lo paz 12]

[Portre lo paz 13]

Tou son lavi, Abel ti kapab vwar ki bann seriben ti bann serviter ki ti fidel e obeisan anver Zeova

[Bwat lo paz 14]

Kan Abel ti obzerv kreasyon, sa ti fer li devlop lafwa solid dan en Kreater ki ranpli avek lanmour

[Portre lo paz 15]

Kontrerman avek Kaen, Abel ti ofer son sakrifis avek lafwa