Labib i reponn

Ki mannyer Bondye i apele?

Tou dimoun dan nou fanmir i annan en non, menm zannimo domestik! Pa i ti pou fer sans pour Bondye osi annan en non? Dan Labib, Bondye i annan plizyer tit, parey Bondye Tou Pwisan, Souvren Senyer, ek Kreater. Me i osi annan en non.​—Lir Izai 42:8.

Plizyer tradiksyon Labib i annan non Bondye dan Psonm 83:18. Par egzanp, dan New World Translation of the Holy Scriptures, sa verse i dir: “Ou, ki ou non i Zeova, ou tousel ki Tre O lo later antye.”

Akoz nou devret servi non Bondye?

Bondye i anvi nou servi son non. Kan nou koz avek en dimoun ki nou kontan, parey nou zanmi pros, nou apel li par son non. Eski i devret diferan kan nou pe koz avek Bondye? Deplis, Zezi Kri ti ankouraz nou pour servi non Bondye.​—Lir Matye 6:9; Zan 17:6.

Annefe, pour vin zanmi Bondye, nou bezwen konn plis ki zis son non. Par egzanp, ki mannyer Bondye i ete? Eski i posib pour apros avek Bondye? Ou kapab trouv larepons sa bann kestyon dan Labib.

Pour plis lenformasyon, vwar sapit 1 dan liv Ki Labib i vreman dir? pibliye par Temwen Zeova

[Portre lo paz 16]

Kan nou koz avek en dimoun ki nou kontan, parey nou zanmi pros, nou apel li par son non